Sisebenzise Kuhle Isikhathi Sakho Ekonzweni
Ngomnyaka wekonzo ka-2014 aboFakazi bakaJehova benze ama-awara ayi-1 945 487 604 ekonzweni yesimini—lobu bufakazi obukhanyako bokuthi sizimisele ukuhlala simajadu ekonzweni kaJehova! (Rhu. 110:3; 1 Kor. 15:58) Njengombana ‘isikhathi esiseleko sisifitjhani,’ kghani kungakghonakala na ukusebenzisa ama-awara wethu aligugu ekonzweni bona sicoce nabantu abanengi?—1 Kor. 7:29.
Bona sisebenzise kuhle isikhathi sethu ekonzweni yesimini kutlhogeka ukuthi sizivumelanise nobujamo. Ngokwesibonelo, nengabe qobe usebenzisa isikhathi sakho nofana ingcenye ethileko yekonzo ngaphandle kokukhuluma nanyana ngubani, bengeze mhlamunye wakghona ukwenza ukutjhentjha okuthileko ukwenzela ukuthi ufumane abantu abangeziweko ongakhuluma nabo? Ubujamo buyahluka kuye ngeendawo. Nanyana kunjalo, iimphakamiso ezilandelako zingakusiza ukuthi usisebenzise kuhle isikhathi sakho ukwenzela bona ubalekele ‘ukufutha umoya.’—1 Kor. 9:26.
Ukufakaza Emzini Ngomuzi: Sekumatjhumi weminyaka, abarhuweleli bajayele ukuthoma ilanga labo ekonzweni yesimini ngokutjhumayela umuzi ngomuzi. Nokho, njengombana inengi labantu lisemsebenzi emini, kubayini ungalingi ukutjhumayela emzini ngomuzi ngemva kwamadina namkha butjhingo belanga, lokha abantu abanengi nabasekhaya, baphumulile? Emini ekulu, ukutjhumayela endleleni namkha eendaweni zamabhizinisi kungaba nomphumela omuhle khulu.
Ukufakaza Tjhatjhalazi: Iintafula neenkoloyana zokukhangisa kufuze zibekwe endaweni lapho kunabantu abanengi abakhamba ngeenyawo khona esimini yebandla enabelwe yona. (Qala iKonzwethu YomBuso kaJulayi 2013, k. 5.) Nengabe indawo enabelwe ukutjhumayela kiyo ayinabantu abanengi abakhamba ngeenyawo, iKomidi yeKonzo yeBandla ingaqunta ukuthi ikoloyana yeencwadi yokukhangisa nofana itafula kufuze zisiwe kwenye indawo lapho kunabantu abanengi abakhamba ngeenyawo khona.
Amabuyelo Neemfundo ZeBhayibheli: Kungakghonakala na ukuhlela amabuyelwakho neemfundo zeBhayibheli ngeenkhathi lapho ikonzo ingatheli khulu? Ngokwesibonelo, nange ikonzo yomuzi nomuzi isebenzeka ngaboMgqibelo ekuseni, kghani ungakwazi ukuyokuraga iimfundo zeBhayibheli ngemva kwamadina nofana butjhingo belanga? Nabenza amabuyelo, abarhuweleli bangahlela na ukuyokufundela iimfundo ezakhelene endaweni yinye ngesikhathi esithileko ukwenzela bona basebenze khulu ekonzweni yesimini?
Nokho, liqiniso ukuthi singasibala isikhathi sethu nanyana kunini nasihlanganyela ekonzweni yesimini, nethabo lethu liyanda nakhibe ikonzwethu iyathela. Nangabe ufumana ukuthi ukuhlanganyela engcenyeni ethileko yekonzo akuphumeleli ngesikhathi esithileko, linga enye indlela. Thandazela isinqophiso sakaJehova, “iKosi yesivuno,” ukwenzela bona usisebenzise kuhle isikhathi sakho ekonzweni!—Mat. 9:38.