Ihlelo Elitjha Nelikarisako Lokutjhumayela Tjhatjhalazi
1. Amabandla aneendawo ezinabantu abanengi abakhamba ngeenyawo akhuthazwa bonyana enzeni?
1 Amabandla aneendawo ezinabantu abanengi abakhamba ngeenyawo, akhuthazwa ukuthi ahlele itjumayelo yatjhatjhalazi, asebenzise amatafula namkha ikoloyana yokukhangisa. Nangabe kusetjenziswa ikoloyana, omunye umrhuweleli kufuze ajame namkha ahlale hlanu komkhangiso loyo. Nanyana kunjalo, barhuweleli ababili okufuze babe semkhangisweni wetafula. Labo-ke ababelwe ukwenza umkhangiso, kufuze babe nobuntu, ubungani begodu bangeneke. Akhesithi nangu umuntu ubukele umkhangiso loyo, omunye wabarhuweleli angathoma ingcoco, mhlamunye athi, “Khewazibuza na ukuthi iBhayibheli ithini ngendaba le?” Omunye wabarhuweleli namkha ababili bangaraga nomkhangiso, khisibe ngapha batjhumayela ngokungakahlelwa.
2. Yitjho okuhlangabezanwe nakho okuveza ukuqakatheka kokutjhumayela tjhatjhalazi ngeentafula zokukhangisa.
2 Ihlelweli lenze kwaba neemfundo ezinengi zeBhayibheli ezitja. Omunye umfundi wekholiji wakhetha ukutlola indaba ngaboFakazi bakaJehova, kodwana bekangakghoni ukufumana iWolo lomBuso. Kwathi ngeveke elandelako wabona itafula yomkhangiso endaweni yekholiji. Kwabe kwathonywa isifundo seBhayibheli, sikhuluma-nje umfundi loyo sekamrhuweleli obhajadisiweko naye uhlanganyela ehlelweneli lokufakaza.
3. Abanye abarhuweleli bazizwa njani ngehlelo elitjheli lokutjhumayela tjhatjhalazi?
3 Omunye udade okhe wasebenzisa ihlelweli lokufakaza tjhatjhalazi unaba ngokuthi: “Abanye bafike bajame ematafuleni wemikhangiso bathathe abomagazini bamva nje. Abanye babo akhenge khebezwe ngaboFakazi bakaJehova ngaphambilini. Sengiyabona ukuthi ngehlelweli, kungafikelelwa abantu abanengi.” Omunye udade naye wathi, “Leli lihlelo elitjha nelikarisako lokutjhumayela, ngebanga lokuthi abantu bezakuwe ngitjho nanyana banganakareko, kodwana bafuna ukwazi.”
4. Kuzuzisa ngani ukukhangisa iincwadi endaweni efanako nangesikhathi esifanako qobe veke?
4 Kuyazuzisa ukukhangisa eendaweni ezifanako, ngamalanga afanako nangeenkhathi ezifanako qobe veke. Umphumela walokho, abantu bayajayela nababona umkhangiso lo bese bazizwe batjhaphulukile ukuza kithi bebabuze nemibuzo nofana bathathe iincwadi. Kghani ibandla lenu selihlelile ukutjhumayela tjhatjhalazi? Nakunjalo-ke, mhlamunye nawe ungahlanganyela ehlelweneli elithabisako nelithelako ‘lokumemezela umBuso kaZimu.’—Luk. 9:60.