Zuza Ngokuzeleko Ekufundeni Kwakho IBhayibheli

1. Khuyini etjengisa ukuthi imiTlolo beyiqakathekile kuJesu?

AKHUCABANGE bona bekunjani ukulalela uJesu afundisa. Kanengi bekadzubhula emiTlolweni eCwengileko ngehloko! Kuhlekuhle emezwinakhe wokuthoma atloliweko ngemva kokubhajadiswa kwakhe namanye amezwakhe wamaswaphela ngaphambi kokuhlongakala kwakhe, uJesu wawadzubhula emiTlolweni.b (Dut. 8:3; Rhu. 31:5; Luk. 4:4; 23:46) Hlangana neminyaka emithathu nesiquntu ezenzakalweni ezimbilezo, uJesu kanengi bekafunda tjhatjhalazi adzubhule imiTlolo bekayihlathulule.—Mat. 5:17, 18, 21, 22, 27, 28; Luk. 4:16-20.

2. Njengombana uJesu akhula, khuyini eyamsiza wayazi kuhle imiTlolo? (Qala isithombe esingaphandle.)

² Eminyakeni eminengi ngaphambi kobana athome umsebenzakhe, uJesu wafunda bewezwa iliZwi lakaZimu lifundwa ngokubuyelelweko. Akunakuzaza ukuthi ekhaya wezwa uMariya noJosefa badzubhula emiTlolweni nabakhulumako.c (Dut. 6:6, 7) Siyaqiniseka ukuthi uJesu bekaya esinagogeni qobe ngeSabatha nomndenekhabo. (Luk. 4:16) Nakalapho kungenzeka bekalalelisisa kuhle nakufundwa imiTlolo. Ngokukhamba kwesikhathi uJesu wafunda ukuzifundela imiTlolo eCwengileko leyo. Umphumela waba kukuthi uJesu akhenge ayazi kuhle imiTlolo kwaphela kodwana wayithanda wayivumela nokuthi ilawule izenzo zakhe. Ngokwesibonelo, khumbula lokho okwenzeka ethempelini lokha uJesu nakaneminyaka eli-12. Abafundisi ebebawazi kuhle umThetho kaMosi “barareka khulu ngendlela [uJesu] azwisisa naphendula ngayo.”—Luk. 2:46, 47, 52.

3. Khuyini esizokucoca ngayo esihlokwenesi?

³ Nathi singalazi iliZwi lakaZimu besilithande lokha nasilifunda qobe. Alo singazuza njani ngokuzeleko kilokho esikufundako? Singafunda okunengi kilokho uJesu akutjela labo abajayelene nomThetho, okufaka hlangana abatloli, abaFarisi nabaSadusi. Abadosiphambili bamasondo labo bebayifunda kanengi imiTlolo kodwana babhalelwa kuzuza kilokho ebebakufunda. UJesu waveza iindlela ezintathu ebezenza amadoda la angazuzi emiTlolweni. Amezwakhe azosisiza sithuthukise ikghono lethu (1) lokuzwisisa esikufundako, (2) lokufumana amaqiniso aligugu (3) nelokuvumela iliZwi lakaZimu lisibumbe.

FUNDELA UKUZWISISA

4. ULukasi 10:25-29 usifundisani ngokufunda iliZwi lakaZimu?

⁴ Sifuna ukuzwisisa bona kutjho ukuthini lokho esikufunda eliZwini lakaZimu. Nasingenzi njalo, ukufunda kwethu angekhe kusizuzise. Ngokwesibonelo, akhucabange ngekulumiswano uJesu aba nayo ‘nendoda esisazi somThetho.’ (Funda uLukasi 10:25-29.) Indoda le nayibuza ukuthi kufuze yenzeni nayizakufumana ukuphila okungapheliko, uJesu wayisiza bona ifumane ipendulo eliZwini lakaZimu ngokuyibuza lokhu: “Kutlolweni emThethweni? Ufunda njani?” Indoda le yakghona ukunikela ipendulo enembileko ngokudzubhula emitlolweni malungana nokuthanda uZimu nomakhelwana. (Lev. 19:18; Dut. 6:5) Tjheja lokho eyakutjhoko: “Kuhlekuhle ngubani umakhelwanami?” Indoda le yatjengisa ukuthi akhenge ikuzwisise ebeyikufunda. Lokho kwayenza yangakghoni ukusebenzisa imitlolo leyo ngendlela efaneleko ekuphileni kwayo.

5. Ukuthandaza nokufunda kabuthaka kungayithuthukisa njani indlela esizwisisa ngayo?

⁵ Singakhulisa indlela esizwisisa ngayo iliZwi lakaZimu ngokuba nemikghwa emihle yokufunda. Nanzi iindlela ezingakusiza. Thandaza ngaphambi kokuthi uthome ukufunda. Sitlhoga isizo lakaJehova bona sizwisise imiTlolo, yeke kufuze simbawe asiphe ummoya ocwengileko bona usisize sikghone ukudzimelela kilokho esikufundako. Funda kabuthaka. Lokho kuzokusiza uzwisise okufundako. Ungakufumana kuzuzisa ukufundela phezulu namkha ukukhambisana nomgadangiso orekhodiweko weBhayibheli. Nawuzwa amezwi arekhodiweko begodu uwabone ephepheni, lokho kungakusiza uzwisise, ukhumbule bewufunde okungeziweko eliZwini lakaZimu. (Jotj. 1:8) Nawuqeda ukufunda, thandaza godu uthokoze uJehova ngesipho esililiZwi lakhe begodu umbawe akusize usebenzise okufundileko.

6. Kubayini ukuzibuza imibuzo nokutlola phasi amaphuzu kungakusiza njengombana ufunda? (Qala nesithombe)

⁶ Nanzi ezinye iindlela ezimbili ezingakusiza uthuthukise indlela ozwisisa ngayo iBhayibheli. Zibuze imibuzo ngalokho okufundako. Njengombana ufunda ngendaba ethileko, zibuze: ‘Bobani abalingiswa abaveleleko? Ngubani okhulumako? Ukhuluma nobani begodu kubayini? Indaba le yenzeka kuphi begodu nini?’ Imibuzo enjengale izokusiza ucabange bewuzwisise amaphuzu ayihloko wendaba ofunda ngayo. Njengombana ufunda, tlola phasi amaphuzu. Nawutlola phasi lokho okufundileko, ucabanga khudlwana ngakho begodu kuzokusiza uzwisise ngcono. Ukutlola phasi kukusiza nokuthi ukhumbule ofunde ngakho. Ungatlola phasi imibuzo, izinto ozifumeneko nawenza irhubhululo, urhunyeze namaphuzu ayihloko, utlole nokuthi uzokusebenzisa njani okufundileko namkha utlole indlela ozizwa ngayo. Ungafumana ukuthi ukutlola phasi amaphuzu kungakusiza uqale iliZwi lakaZimu njengomlayezo onqotjhiswe kuwe.

7. Ngibuphi ubuntu esibutlhogako lokha nasifundako begodu kubayini? (Matewu 24:15)

⁷ UJesu waveza ubuntu obuqakathekileko esibutlhogako bona sizwisise nasifunda iliZwi lakaZimu, ubuntobo lilemuko. (Funda uMatewu 24:15.) Yini ilemuko? Likghono lokuzwisisa ukuthi omunye umbono uhlobene njani nomunye, uhluke njani komunye nokubona okungabonakali lula. Njengombana uJesu atjengisa, sitlhoga ilemuko ukubona izenzakalo ezizalisekisa isiphorofido seBhayibheli. Sitlhoga ubuntobu bona sikghone ukuzuza ngokuzeleko kikho koke esikufunda eBhayibhelini.

8. Singafunda njani ngelemuko?

⁸ UJehova unikela iinceku zakhe ilemuko. Yeke thandaza kuye umbawe bona akusize ube nobuntobu. (IzA. 2:6) Ungenza njani ngokuvumelana nomthandazwakho? Hlolisisa lokho okufundako begodu utjheje ukuthi kuhlobana njani nezinye izinto ozaziko. Bona ukwenze kuhle lokhu, qala iincwadi ezisiza ekufundeni iBhayibheli, njengethi-Ithulusi Lokurhubhulula LaboFakazi bakaJehova. Ithuluseli lizokusiza ukghone ukubona lokho okutjhiwo yindinyana ethileko eBhayibhelini nokubona ukuthi ungakusebenzisa njani ekuphileni kwakho. (Heb. 5:14) Njengombana ufunda ngelemuko, indlela ozwisisa ngayo imiTlolo izokukhula.

FUNDA BONA UFUMANE AMAQINISO ALIGUGU

9. Ngiliphi iqiniso eliqakathekileko elisemTlolweni abaSadusi abangakhenge balamukele?

⁹ AbaSadusi bebazazi kuhle iincwadi zokuthoma ezihlanu ezisemiTlolweni yesiHebheru, kodwana akhenge bawamukele amaqiniso aqakathekileko aseencwadini eziphefumulelwekwezo. Ngokwesibonelo, cabanga ngendlela uJesu aphendula ngayo abaSadusi ebebambuza ngokuvuswa kwabafileko. Wababuza wathi: “Anikafundi na encwadini kaMosi, endabeni yomuthi wameva, ukuthi uZimu wathi kuye: ‘NginguZimu ka-Abrahama noZimu ka-Isaka noZimu kaJakopo’?” (Mar. 12:18, 26) Nanyana kungenzeka ukuthi abaSadusi bayifunda kanengi indaba le, umbuzo kaJesu watjengisa ukuthi akhenge balamukele iqiniso eliqakathekileko elisemTlolweni, okuyifundiso yokuvuswa kwabafileko.—Mar. 12:27; Luk. 20:38.d

10. Khuyini okufuze siyiphaphamele nasifundako?

¹⁰ Khuyini esingayifunda? Nasifundako sifuna ukukuphaphamela koke ivesi namkha indaba ethileko eseBhayibhelini esifundisa khona. Asifuni ukuzwisisa iimfundiso ezisisekelo kwaphela kodwana namanye amaqiniso angeneleleko neenkambisolawulo ezifihlekileko.

11. Ngokuvumelana neyesi-2 kaThimothi 3:16, 17, ungawafumana njani amaqiniso aligugu eBhayibhelini?

¹¹ Ungawafumana njani amaqiniso aligugu nawufunda iBhayibheli? Cabanga ngalokho okutjhiwo mtlolo weyesi-2 kaThimothi 3:16, 17. (Ifunde.) Tjheja ukuthi “zoke izinto ezitlolwe emiTlolweni . . . ziyasiza” (1) ekufundiseni, (2) ekusoleni, (3) ekunqophiseni izinto (4) nekuyaleni. Amaphuzu amane la angakuzuzisa ngitjho neencwadini zeBhayibheli ongakajayeli ukuzisebenzisa. Hlolisisa ukuthi indaba ofunda ngayo ikufundisani ngoJehova, umnqophwakhe namkha ngeenkambisolawulo zakaZimu. Cabanga ukuthi lisiza njani ekusoleni. Yenza lokhu ngokutjheja indlela amavesi akusiza ngayo ubone bewubalekele imikghwa emimbi namkha engakalungi begodu uhlale uthembekile kuJehova. Hlolisisa ukuthi indaba ofunda ngayo ungayisebenzisa njani ekunqophiseni izinto namkha ekulungiseni umbono ongakafaneli okungenzeka khewaqalana nawo nawusemsebenzini wokutjhumayela. Qala nanyana ngisiphi isiyalo esisemavesini esingakusiza utjengise indlela uJehova acabanga ngayo. Nawucabanga ngezinto ezinezi, ukuzokufumana amaqiniso aligugu angakusiza uzuze nawufunda iBhayibheli.

VUMELA UKUFUNDA KWAKHO KUKUBUMBE

12. Kubayini uJesu abuza abaFarisi umbuzo othi, “Azange nifunde na?”

¹² UJesu wabuza umbuzo othi, “Azange nifunde na?” ukutjengisa ukuthi abaFarisi bebanombono ongakafaneli ngemiTlolo. (Mat. 12:1-7)e Esenzakalweneso, abaFarisi bathi abafundi bakaJesu baphule iSabatha. UJesu nakabaphendulako wadzubhula iimbonelo ezimbili ezisemTlolweni, wadzubhulula nevesi elisencwadini kaHoseya ukutjengisa ukuthi abaFarisi bebangazwisisi ukuthi kubayini bekunomthetho weSabatha begodu babhalelwa kutjengisa umusa. Kubayini amadoda la angakhenge abunjwe ngilokho ebekakufunda eliZwini lakaZimu? Ngombana bewalifunda ngokunyefula nangokuzikhakhazisa. Indlela ebewacabanga ngayo yawakhandela bona azwisise ebewakufunda.—Mat. 23:23; Jwa. 5:39, 40.

13. Kufuze sifunde iBhayibheli ngamuphi umbono begodu kubayini?

¹³ Sifunda emezwini kaJesu ukuthi kufuze sifunde iBhayibheli ngombono ofaneleko. Ngokungafani nabaFarisi, kufuze sithobeke begodu sizimisele ukufunda. Kufuze ‘sikwamukele ngomusa ukudzinyeleliswa kwelizwi.’ (Jak. 1:21) Nasithobekileko, sizokuvumela iliZwi lakaZimu litjhugulule lokho esingikho. Iimfundo eziqakathekileko eziseBhayibhelini ezimalungana nomusa, isirhawu nethando zizosibumba kwaphela nasibalekela ummoya wokunyefula newokuzikhakhazisa.

14. Yini engasisiza sibone ukuthi siyalivumela iBhayibheli bona lisibumbe? (Qala neenthombe)

¹⁴ Indlela esiphatha ngayo abanye izokutjengisa ukuthi siyalivumela na iliZwi lakaZimu lisibumbe. AbaFarisi babhalelwa kuvumela iliZwi lakaZimu lifikelele iinhliziyo zabo, ngebanga lalokho ‘baphara ngomlandu abamsulwa.’ (Mat. 12:7) Indlela esiqala besiphathe ngayo abanye iyatjengisa ukuthi silivumele na iliZwi lakaZimu bona lisibumbe. Ngokwesibonelo, inga-kghani sijayele ukubona okuhle kwabanye namkha simsinya ekutshwayeni imitjhaphwabo? Inga-kghani sinomusa begodu sikulungele ukulibalela namkha siyanyefula besibambe amavunda? Ukuzihlola okunjalo kungaveza ukuthi siyakuvumela esikufundako bona kubumbe indlela esicabanga ngayo, esizizwa ngayo nendlela esenza ngayo izinto.—1 Thim. 4:12, 15; Heb. 4:12.

UKUFUNDA ILIZWI LAKAZIMU KULETHA ITHABO

15. UJesu bekazizwa njani ngemiTlolo eCwengileko?

¹⁵ UJesu bekayithanda imiTlolo eCwengileko begodu indlela ebekazizwa ngayo yavezwa ngokusiphorofido emezwini afumaneka kuRhubo 40:8 elithi: ‘Maye! Zimami, kuyangithabisa ukwenza intandwakho, umthethwakho uzikile ngaphakathi kwami.’ Yeke ngebanga lokuthi uJesu bekayithanda imiTlolo, bekathabile begodu aphumelela ekulotjheni uJehova. Nathi singalifumana ithabo nepumelelo nasifunda iliZwi lakaZimu sifunde nokulithanda.—Rhu. 1:1-3.

16. Ngiziphi iindlela ongazisebenzisa bona uzuze ngokungeziweko nawufunda iliZwi lakaZimu? (Qala ibhoksi elithi, “Amezwi kaJesu angakusiza uzwisise lokho okufundako.”)

¹⁶ Ngokuvumelana namezwi kaJesu nesibonelo sakhe, asithuthukiseni amakghonwethu wokufunda iBhayibheli. Singathuthukisa indlela esizwisisa ngayo indinyana ethileko eBhayibhelini ngokuthandaza, ukufunda kabuthaka, ukuzibuza imibuzo nokutlola amaphuzu. Singasebenzisa ilemuko ngokuhlolisisa kuhle esikufundako sisebenzisa iincwadi zethu ezisekelwe eBhayibhelini. Singathuthukisa indlela esisebenzisa ngayo imiTlolo, iindaba esingakazijayeli ngokufuna amaqiniso aligugu asendabeni okukhulunywa ngayo. Singavumela iliZwi lakaZimu lisibumbe ngokuba nombono ofaneleko nasilifundako. Nasenza ngeendlelezi, sizokuzuza ngokuzeleko nasifunda iBhayibheli begodu sitjhidele khudlwana kuJehova.—Rhu. 119:17, 18; Jak. 4:8.