Ukufumana Ukuthula Nanyana Kunepi Nenturhu
U-Gary obekalisotja ngaphambilini uthi: “Ngaphambi kobana ngifunde iBhayibheli, bengingazi ukuthi kubayini kunobuhlungu obungaka, ukungabi nabulungisa, nemiraro yoke esephasini kodwana nje nginokuthula ngombana ngiyazi bona uJehova uZimu uzokwenza iphasi libe yindawo evikelekileko.
Akusingu-Gary kwaphela ozizwa ngendlela le. Cabanga ngendlela iBhayibheli elisize abanye ngayo.
IBHAYIBHELI LITHI: “Maye! Jehova, umuhle, ukulungele nokulibalela.”—IRhubo 86:5.
KUSIZA NJANI LOKHU: “Iveseli liyangiqinisekisa ukuthi uJehova unomusa. Ngiyazi ukuthi ukulungele ukungilibalela ngakho koke engikwenzileko esikhathi esidlulileko nangisahlanganyela epini.”—U-Wilmar, we-Colombia.
IBHAYIBHELI LITHI: “Ngombana qala! Ngenza izulu elitjha nephasi elitjha; izinto zekuthomeni angekhe zisakhunjulwa, namkha zifike ehliziyweni.”—Isaya 65:17.
KUSIZA NJANI LOKHU: “Ngihlala ngigandelelekile ngokomkhumbulo ngebanga lezinto ezimbi ezibuhlungu ezenzekako nangisese lisotja. Umtlolo lo uyangikhumbuza ukuthi ingasikade uJehova uzongenza ngilibale zoke izinto ezimbi ezenzeka kade. Angekhe zifike ehliziywenami. Lesi sisipho esihle khulu!”—U-Zafirah, we-United States.
IBHAYIBHELI LITHI: “Emihlenakhe abalungileko bazokutlhurha, nokuthula kuzokuba kukhulu bekube kulapho inyanga ingasekho.”—IRhubo 72:7.
KUSIZA NJANI LOKHU: “Ngihlala ngicabanga ngamagama la. Ingasi kade ipi izokuphela begodu angekhe kutlhogeke ngitshwenyeke ngokuvikeleka kwabantu engibathandako.”—U-Oleksandra, we-Ukraine.
IBHAYIBHELI LITHI: “Abahlongakeleko bakho bazokuphila. . . . Vukani, nirhuwelele ngethabo, nina zakhamuzi ezisethulini!”—Isaya 26:19.
KUSIZA NJANI LOKHU: “Amalunga womndenami amanengi ahlongakala lokha enye ikoro ibulala boke abantu abamaTutsi. Iveseli liyangiqinisekisa ukuthi ngizokubuye ngibabone godu. Ngiqale phambili ekuzweni amaphimbabo wethabo lokha nabavuswako!”—U-Marie, we-Rwanda.
IBHAYIBHELI LITHI: “Sekusele kancani ukuthi abakhohlakeleko bangasaba khona . . . Kodwana abathobekileko bazokuzuza iphasi, bazokuthaba khulu ngokuthula okukhulu.”—IRhubo 37:10, 11.
KUSIZA NJANI LOKHU: “Nanyana ipi iphelile, kusese nokungabi nabulungisa nabantu abakhohlakeleko. Amavesi la angipha amandla ngaso soke isikhathi. UJehova ubona koke begodu uzwisisa kuhle ubujamo bami. Uthembisa ukuthi koke ukutlhaga kuzokuphela begodu ngekhe kusakhunjulwa.”—U-Daler, we-Tajikistan.
Abantu ekukhulunywe ngabo kumagazini lo bahlangana neengidigidi zaboFakazi bakaJehova, abasizwe liBhayibheli bona bafumane ukuthula. Bafunde ukuhlula ukubandlululana ngokobuhlanga, kwesitjhaba, kwekoro nokuba nehloyo. (Efesu 4:31, 32) AboFakazi bakaJehova abathathi hlangothi kwezepolotiki begodu ababi nengcenye nakunenturhu.—Jwanisi 18:36.
AboFakazi bakaJehova bafumana nesekelo kubafowabo nabodadwabo abanethando ephasini loke. (Jwanisi 13:35) Ngokwesibonelo, u-Oleksandra, ekukhulunywe ngaye ngaphambilini, kwafuze yena nodadwabo babalekele kwenye inarha ngebanga lepi. Uthi: “Nasiqeda ukuyamela ngale komkhawulo, sabona aboFakazi bendaweni leyo basilindile begodu basamukela ngezandla ezifuthumeleko. Isekelo labo lasisiza sakufumana kungcono ukuhlala enarheni enye njengababaleki.”
Siyakumema ukuthi usivakatjhele emihlanganwenethu lapho esifunda khona ngomlayezo weBhayibheli wokuthula nokuthi singawusebenzisa njani ekuphileni kwethu. Vakatjhela i-jw.org ukufumana indawo eseduze nawe namkha ubawe isifundo sasimahla seBhayibheli komunye waboFakazi bakaJehova, nizokusebenzisa incwadi ethi, Thabela Ukuphila Ngokungapheliko!