Ragela Phambili Ukhamba Ngokukholwa

1. Kubayini umpostoli uPowula athaba nakaqala indlela ebekaphila ngayo?

UMPOSTOLI uPowula bekazi ukuthi uzokubulawa, kodwana nakaqala indlela aphila ngayo wathaba. Nakaqala emva, wathi: “Ngagijima umjarho bekwaba sekupheleni, ngibambelele ekukholweni.” (2 Thim. 4:​6-8) UPowula wathatha isiqunto esihle sokusebenzisa ukuphila kwakhe bona alotjhe uJehova. Nathi sifuna ukuthatha iinqunto ezihle begodu samukelwe nguZimu. Singakwenza njani lokho?

2. Kutjho ukuthini ukukhamba ngokukholwa?

² UPowula wathi ngaye nangamanye amaKrestu athembekileko: “Ngombana sikhamba ngokukholwa, asikhambi ngokubona.” (2 Kor. 5:7) Bekatjho ukuthini uPowula? EBhayibhelini, “ukukhamba” kwesinye isikhathi kuqalisele endleleni umuntu akhetha ukuphila ngayo. Umuntu okhamba ngokubona usekela iinqunto zakhe ezintweni azibonako nalokho akuzwako. Umuntu okhamba ngokukholwa usekela iinqunto zakhe endleleni athemba ngayo uJehova uZimu. Izenzo zakhe zitjengisa ukuthi uyaqiniseka ngokuthi uJehova uzombusisa begodu uzokuzuza eselulekweni esifumaneka eliZwini lakhe.—Rhu. 119:66; Heb. 11:6.

3. Kusizuzisa njani ukukhamba ngokukholwa? (2 Korinte 4:18)

³ Ngezinye iinkhathi senza iinqunto ngebanga lalokho esikubonako. Kodwana nasisekela iinqunto zethu kilokho esikubonako nesikuzwako kwaphela, sizokuba nemiraro. Kubayini? Kungombana esikubonako nesikuzwako akuhlali kuthembekile. Nasithatha iinqunto ezisekelwe kilokho esikubonako nesikuzwako, singagcina sesithatha iinqunto ezingathabisi uJehova. (UMtj. 11:9; Mat. 24:​37-39) Nasikhamba ngokukholwa, kanengi sizokuthatha iinqunto ‘ezamukelekako eKosini.’ (Efe. 5:10) Ukulandela iseluleko esivela kuZimu, kuzosinikela ukuthula begodu kuzosithabisa. (Rhu. 16:​8, 9; Isa. 48:​17, 18) Nasiragela phambili sikhamba ngokukholwa, sizokufumana ukuphila okungapheliko.—Funda yesi-2 kwebeKorinte 4:18.

4. Khuyini engasiza umuntu abone ukuthi ukhamba ngokubona namkha ngokukholwa?

⁴ Khuyini engasiza umuntu abone ukuthi ukhamba ngokubona namkha ngokukholwa? Kuzokuya ngokuthi: Khuyini ekusizako nawuthatha iinqunto? Kghani unqotjhiswa zizinto ozibonako kwaphela namkha uthembela esinqophisweni esisifumana kuJehova? Sizokucoca ngokuthi singaragela njani phambili sikhamba ngokukholwa eendaweni ezilandelako: Nasikhetha umsebenzi, nasikhetha umuntu esizokutjhada naye nalokha nasifumana isinqophiso esivela ehlanganweni. Engcenyeni ngayinye sizokubona ukuthi khuyini ekufuze sicabangisise ngayo nasizakuthatha iinqunto ezihle.

NAWUKHETHA UMSEBENZI

5. Khuyini ekufuze sicabange ngayo nasikhetha umsebenzi?

⁵ Soke kufuze sikghone ukuzitlhogomela thina nemindenethu. (UMtj. 7:12; 1 Thim. 5:8) Eminye imisebenzi ibhadela imali enengi. Lokho kungenza umuntu bona akghone ukuthenga izinto azitlhogako bekakghone ukubekela ngeqadi enye imali. Eminye imisebenzi ibhadela imali encani, ingenza umuntu osebenzako bona akghone ukuthenga kwaphela izinto ezitlhogwa mndeni. Nasikhetha umsebezi esizowenza, siyacabanga ngokuthi sizokurhola malini. Kodwana nange sicabanga ngalokho kwaphela sizabe sikhamba ngokubona.

6. Singakhamba njani ngokukholwa nasikhetha umsebenzi? (Hebheru 13:5)

⁶ Nasikhamba ngokukholwa, sizokucabanga ngendlela umsebenzi ozokuthinta ngayo ubuhlobo bethu noJehova. Singazibuza ukuthi: ‘Umsebenzi engiwukhethako uzongenza ngihlanganyele ekwenzeni izinto uJehova azihloyako?’ (IzA. 6:​16-19) ‘Kghani uzokuthikazisa indlela engilotjha ngayo uJehova, ungenze ngibe kude nomndenami isikhathi eside?’ (Flp. 1:10) Nange siphendule ngo iye emibuzweni le, kungaba kuhlakanipha ukungawuthathi umsebenzi loyo nanyana kungaba budisi kangangani ukufumana umsebenzi. Ngebanga lokuthi sikhamba ngokukholwa, sizokuthatha iinqunto ezizokutjengisa ukuthi siyaqiniseka ngokuthi uJehova uzositlhogomela.—Mat. 6:33; funda amaHebheru 13:5.

7-8. Umfowethu we-South America, watjengisa njani ukuthi ukhamba ngokukholwa? (Qala nesithombe.)

⁷ Umfowethu u-Javier,a we-South America, bekazi ukuthi qakatheke kangangani ukukhamba ngokukholwa. Uthi: “Ngafuna umsebenzi ebewuzongibhadela ngokubuyelelweko kunomsebenzi ebenginawo.” Nanyana kunjalo, u-Javier bekafuna ukuphayona ngehliziywakhe yoke. Nakaragako uthi: “Kwahlelwa bona umphathi wemsebenzini lo angibuze imibuzo. Ngaphambi kwalokho ngathandaza ngabawa isizo, bengiqiniseka ngokuthi uJehova uyakwazi engikutlhogako. Bengifuna ukuwenza kuhle umsebenzami begodu ngirhole imali enengi, kodwana bengingawufuni umsebenzi lo nawungekhe ungisize bona ngisebenzele uJehova ngokungeziweko.”

⁸ U-Javier uthi: “Ngesikhathi umphathi angibuza imibuzo wangitjela ukuthi kanengi kuzokufuze ngisebenze isikhathi esingeziweko. Ngamhlathululela bona angeze ngakghona ukwenza njalo ngombana kufuze ngilotjhe uJehova.” U-Javier akhenge awamukela umsebenzi loyo. Ngemva kweemveke ezimbili, wathoma ukuphayona. Ekukhambeni kwesikhathi, wafumana umsebenzi omvumela bona asebenze amalanga ambalwa. Uthi: “UJehova wayizwa imithandazwami begodu wanginikela umsebenzi owangivumela bona ngiphayone. Ngiyathaba ngokuba nomsebenzi ongivumela bona ngibe nesikhathi sokulotjha uJehova nginabafowethu.”

9. Ufundani kilokho okwenzeka ku-Trésor?

⁹ Khuyini ekufuze siyenze nasilemuka ukuthi umsebenzi esiwenzako awusivumeli bona sikhambe ngokukholwa? Cabanga ngokwenzeka ku-Trésor ohlala e-Congo. Uthi: “Bengiwuthanda umsebenzami. Bengirhola ngokubuyelelwe kathathu kunemali ebengiyirhola ngaphambilini begodu bengihlonitjhwa khulu.” Kanengi u-Trésor bekangayi esifundweni ngebanga lokusebenza isikhathi esingeziweko. Ngezinye iinkhathi bekagandelelwa bona akhulume amala, afihle ukungathembeki okwenzeka emsebenzini. U-Trésor bekafuna ukulisa umsebenzi kodwana athuswe kukuthi uzokuhlala anganamsebenzi. Khuyini eyamsizako? Uthi: “URhabakhukhu 3:​17-19 wangisiza ngazwisisa ukuthi nanyana ngingalahlekelwa msebenzi, uJehova uzongitlhogomela. Nje-ke ngalisa umsebenzi.” Uphetha ngokuthi: “Abaqatjhi abanengi bacabanga ukuthi umuntu angadela nanyana yini kuhlanganise nomndenakhe ngebanga lomsebenzi onemali. Kuyangithabisa ukuthi ngavikela ubuhlobo bami noJehova nebomndenami. Ngemva komnyaka, uJehova wangisiza ngafumana umsebenzi omuhle ongivumela bona ngiphile ngenginakho begodu ngibe nesikhathi esinengi sokumlotjha. Nasibeka uJehova qangi, kungenzeka ngezinye iinkhathi singabi nemali eyaneleko kodwana uJehova uzositlhogomela.” Nasithembela kuJehova neenthembisweni zakhe, sizokuragela phambili sikhamba ngokukholwa begodu uzosibusisa.

NAWUKHETHA UMUNTU OZOKUTJHADA NAYE

10. Ngiziphi izinto eziqakathekileko umuntu ekufuze acabange ngazo nakakhetha umuntu azokutjhada naye?

¹⁰ Umtjhado sisipho esivela kuJehova begodu kungokwemvelo ukuthi umuntu afune ukutjhada. Nakakhetha umuntu azokutjhada naye, udade angaqala ubuntu bomfowethu, indlela aqaleka ngayo, indlela aziwa ngayo, indlela asebenzisa ngayo imali, umenza azizwe njani nokuthi kghani kufuze atlhogomele umndenakhe.b Zoke izintwezi ziqakathekile. Kodwana nakaqala izintwezi kwaphela uzabe akhamba ngokubona.

11. Singakhamba njani ngokukholwa nasikhetha umuntu esizokutjhada naye? (1 Korinte 7:39)

¹¹ UJehova uzikhakhazisa khulu ngabodadwethu nabafowethu abalalela isinqophiso sakhe nabakhetha umlingani womtjhado. Ngokwesibonelo, balalela isiyeleliso seBhayibheli sokulinda bona ‘kudlule iminyaka yobutjha’ ngaphambi kokufuna umuntu abazokutjhada naye. (1 Kor. 7:36) Nabafuna umuntu abozokutjhada naye, badzimelela khulu ebuntwini uJehova athi benza umuntu abe yindoda namkha umfazi omuhle. (IzA. 31:​10-13, 26-28; Efe. 5:33; 1 Thim. 5:8) Nange umuntu ongalotjhi uJehova nakathi uyabathanda, balalela iseluleko esithi batjhade “kwaphela eKosini” esifumaneka kweyoku-1 kwebeKorinte 7:39. (Ufunde.) Baragela phambili bakhamba ngokukholwa, baqiniseka ngokuthi uJehova unendaba nendlela abazizwa ngayo ukudlula nanyana ngubani begodu uzobatlhogomela.—Rhu. 55:22.

12. Ufundani esibonelweni saka-Rosa?

¹² Cabanga ngokwenzeka ku-Rosa oliphayona eColombia. Kanengi umsebenzakhe bewumhlanganisa nendoda ebeyingasinguFakazi, indoda leyo yathoma ukumtjengisa ukuthi iyamthanda. U-Rosa naye wazizwa ngendlela efanako. Uthi: “Beyibonakala imumuntu olungileko. Beyisiza emphakathini ebeyihlala kiwo begodu beyiphila kuhle. Bengithanda nendlela ebeyingiphatha ngayo. Beyingikho koke ebengikufuna emuntwini engingatjhada naye, ngaphandle kokuthi ayisinguFakazi.” Nakaragako uthi “Bekubudisi khulu ukuyitjela ukuthi angekhe ngikghone ukuthandana nayo ngombana bekungilokho ebengikufuna. Ngesikhatheso bengizizwa ngingedwa, nje-ke bengifuna ukutjhada kodwana bengingamfumani umuntu ebengizokutjhada naye ehlanganweni.” U-Rosa akhenge adzimelele kilokho ebekakubona. Wacabangisisa ngokuthi isiqunto sakhe besizobuthinta njani ubuhlobo bakhe noJehova. Walisa ukuzihlanganisa nendoda leyo begodu waba majadu ngezinto zakaJehova. Ngokukhamba kwesikhathi, wamenywa bona aye esiKolweni sabaTjhumayeli beVangeli lomBuso begodu nje sekaliphayona elikhethekileko. U-Rosa uthi: “UJehova ungibusise khulu begodu ngithabe khulu.” Nanyana kungasilula ukukhamba ngokukholwa eendabeni ezisithinta ngokunqophileko, kodwana kuyazuzisa ukwenza njalo.

NASIFUMANA ISINQOPHISO EHLANGANWENI

13. Khuyini engatjengisa ukuthi sikhamba ngokubona nasifumana isinqophiso esivela ehlanganweni?

¹³ Abadala, abajikelezi, i-ofisi legatja namkha isiHlopha esiBusako basinikela iinqophiso ezinqophisa indlela esilotjha ngayo. Kodwana kuthiwani ngezinye iinkhathi nasingasizwisisi isinqophiso esisifumanako? Singathoma ukuzaza ukuthi isinqophiso esisifumeneko silungile. Singathoma nokudzimelela emitjhaphweni eyenziwa bafowethu abasinikeke isinqophisweso.

14. Khuyini ezosisiza sikhambe ngokukholwa nasifumana isinqophiso esivela ehlanganweni? (Hebheru 13:17)

¹⁴ Nasikhamba ngokukholwa, sizokuthemba ukuthi uJehova unqophisa ihlanganwakhe begodu uyabazi nobujamo bethu. Lokho kuzosenza singariyadi ukulalela begodu sizokulalela sithabile. (Funda amaHebheru 13:17.) Siyalemuka ukuthi nasilalelako sihlanganyela ekuthuthukiseni ubunye ebandleni. (Efe. 4:​2, 3) Sinethemba lokuthi uJehova uzosibusisa nasilalela abafowethu abadosaphambili nanyana banesono. (1 Sam. 15:22) Ngesikhathi esifaneleko, uzokulungisa nanyana yini etlhoga ukulungiswa.—Mik. 7:7.

15-16. Khuyini eyasiza umfowethu bona akhambe ngokukholwa nanyana bekazaza ezinye iinqophiso azifumeneko? (Qala nesithombe.)

¹⁵ Cabanga ngokwenzekako okutjengisa imiphumela emihle yokuba nokukholwa nangokulandela isinqophiso esivela ehlanganweni. Nanyana ilimi elikhulunywa khulu e-Peru bekusi-Spanish, abantu abanengi bebakhuluma amanye amalimi wendabuko endaweni leyo. Elinye lawo bekusi-Quechua. Eminyakeni eminengi abafowethu nabodadwethu abakhuluma isi-Quechua bebafuna abantu abakhuluma ilimelo esimini. Bona sikhambisane nomthetho karhulumende kwenziwa amatjhuguluko endleleni yokufumana abantu. (Rom. 13:1) Abanye bebazibuza ukuthi kghani lokho bekuzokuthikazisa umsebenzi wokutjhumayela esimini. Ngebanga lokuthi abafowethu banamathela ematjhugulukweni la, uJehova wabusisa imizamabo yokufumana abantu abakhuluma isi-Quechua.

¹⁶ Umfowethu webandleni lesi-Quechua u-Kevin bekangomunye wabantu ebebatshwenyekile. Uthi: “Ngazibuza ukuthi, ‘sesizobafumana njani abantu abakhuluma isi-Quechua?’” U-Kevin wenzani? Uthi: “Ngakhumbula izAga 3:5 begodu ngacabanga ngoMosi. Bekufuze akhuphe ama-Israyeli eGibhide awase eLwandle eliBomvu, lokho bekuwenza abonakale angakavikeleki ebantwini beGibhide. UMosi walalela begodu uJehova wambusisa khulu ngokubasindisa ngokusimangaliso.” (Eks. 14:​1, 2, 9-11, 21, 22) U-Kevin bekazimisele ukulandela indlela etja le yokutjhumayela. Waba yini umphumela? Uthi: “Yangithabisa indlela uJehova asibusisa ngayo. Esikhathini esidlulileko, besikhamba isikhathi eside esimini singafumani namunye okhuluma isi-Quechua. Nje sesidzimelela esimini enabantu abantu abanengi abakhuluma isi-Quechua. Umphumela walokho ube muhle khulu, sicoce nabantu abanengi, senza amabuyelo begodu siraga neemfundo zeBhayibheli. Nesibalo sabantu abeza esifundweni sikhuphukile.” Kwamambala nasikhamba ngokukholwa sizokuhlala sibusiswa nguJehova.

17. Ufundeni esihlokwenesi?

¹⁷ Sifunde ngokuthi singaragela njani phambili sikhamba ngokukholwa eengcenyeni ezintathu. Kodwana kufuze sihlale sikhamba ngokukholwa ukuphila kwethu koke njengalokha nasikhetha zokuzithabisa, nasithatha iinqunto malungana nefundo nokukhulisa abantwana. Nanyana ngiziphi iinqunto esizozithatha kufuze siqiniseke ngokuthi asinqophiswa ngesikubonako kwaphela kodwana kufuze sinqophiswe nabuhlobo bethu noJehova, isiyeleliso sakhe nesithembiso sakhe sokuthi uzositlhogomela. Nasenza njalo, sizokukghona ‘ukukhamba ngegama lakaJehova uZimethu ngokungapheliko.’—Mik. 4:5.