Thobeka Nakunezinto Ongazizwisisiko

1. Ngimaphi amakghono uJehova asiphe wona begodu kubayini?

UJEHOVA usidale ngendlela erarako: Sikghona ukucabanga, ukufunda izinto ezitjha besikghone ukusebenzisa esikufundako. Kubayini asidale ngendlela le? Kungombana ufuna ‘sifumane ilwazi ngoZimu’ begodu sithathe iinqunto ezisekelwe elwazini elinembileko njengombana simlotjha.—IzA. 2:​1-5; Rom. 12:1.

2. (a) Khuyini ekufuze siyizwisise ngendlela esidalwe ngayo? (Jobho 37:​23, 24) (Qala nesithombe.) (b) Ukwazi ukuthi amandlethu aphelela kuphi kusizuzisa njani?

² UJehova usidale saba nekghono lokufunda izinto ezinengi kodwana zinengi izinto esingazaziko. (Funda uJobho 37:​23, 24.) Cabanga ngesibonelo sakaJobho. UJehova wabuza uJobho imibuzo eminengi eyamsiza wazwisisa ukuthi kunezinto ezinengi ebekangazazi. Ikulumiswano leyo yasiza uJobho walemuka ukuthi kufuze athobeke begodu atjhugulule indlela acabanga ngayo. (Job. 42:​3-6) Nathi kufuze sithobeke sizwisise ukuthi angekhe sazi yoke into. Ukuthobeka kuzosisiza sithembe uJehova siqiniseke ngokuthi uzosambulela lokho ekufuze sikwazi bona sikghone ukuthatha iinqunto ezivuthiweko.—IzA. 2:6.

3. Sizokucoca ngani esihlokwenesi?

³ Esihlokwenesi, sizokucoca ngezinye izinto esingazaziko nokuthi zingakwenza njani ukuphila kwethu kube budisi ngezinye iinkhathi. Sizokucoca nangokuthi, kubayini kukuhle ukungazi zoke izinto? Ukucoca ngamaphuzu la kuzokuqinisa indlela esimthemba ngayo uJehova “owazi koke” begodu ositjela lokho ekufuze sikwazi.—Job. 37:16.

ASAZI UKUTHI ISIPHELO SIZOKUFIKA NINI

4. Ngokomtlolo kaMatewu 24:​36, khuyini esingayaziko?

⁴ Funda uMatewu 24:36. Asazi ukuthi ukuphela kwephaseli kuzokufika nini. Nalokha uJesu nakasephasini bekangalazi ‘ilanga namkha i-iri.’a Kamuva watjela abapostoli bakhe ukuthi nguJehova onelawulo lokuqunta ukuthi izinto zizokwenzeka nini. (IzE. 1:​6, 7) UJehova sekaquntile ukuthi iphaseli lizokuphela nini kodwana thina asazi ukuthi kuzokwenzeka nini lokho.

5. Ukungazi ukuthi isiphelo sizokufika nini, kusithinta njani?

⁵ Amezwi kaJesu atjengisa ukuthi asazi bona sizokulinda isikhathi esingangani ngaphambi kokufika kwesiphelo. Ngebanga lalokho, kungenzeka siphelelwe sineke sokulinda, khulukhulu nasele kudlule isikhathi eside silinde ilanga lakaJehova. Singakufumana kubudisi ukukghodlhelela ukuhlekwa mindenethu namkha abanye abantu. (2 Pit. 3:​3, 4) Singacabanga ukuthi angathana besazi bona isiphelo sizokufika nini besizokghona ukulinda nokubekezelelela ukuhlekwa.

6. Kubayini kukuhle ukungazi ukuthi isiphelo sizokufika nini?

⁶ UJehova usinikela ithuba lokutjengisa ukuthi simlotjha ngebanga lokuthi siyamthanda begodu sithembele kuye kungebangelo angasitjeli ukuthi isiphelo sizokufika nini. Asifuni ukulotjha uJehova bekufike isiphelo, kunalokho sifuna ukumlotjha ngokungapheliko. Kunokucabanga khulu ngokuthi “ilanga lakaJehova” lizokufika nini, sifuna ukucabanga ngezinto ezihle ezizokwenzeka nakudlula ilangelo. Nasenza njalo, sizokutjhidela khulu kuJehova, simthembe begodu senze koke okuzomthabisa.—2 Pit. 3:​11, 12.

7. Khuyini esiyaziko?

⁷ Senza kuhle ngokudzimelela kilokho esikwaziko, siyazi ukuthi imihla yokuphela yathoma ngo-1914. EBhayibhelini, uJehova usinikele iimphorofido ezitjengisa ukuthi imihla yokuphela yathoma ngo-1914. Usitjele nemininingwana eminengi etjengisa ukuthi ephasini bekuzokuba njani ngemva komnyaka loyo. Ngebanga lalokho, siyaqiniseka ngokuthi “Ilanga elikhulu lakaJehova liseduze!” (Zef. 1:14) Siyawazi nomsebenzi uJehova afuna siwenze, ufuna sitjele abantu abanengi ngendlela esingakghona ngayo ‘iindaba ezimnandi zomBuso.’ (Mat. 24:14) Umlayezo lo sewutjhunyayelwe eenarheni ezima-240 ngamalimi angaphezu kwayi-1 000. Asitlhogi ukwazi “ilanga ne-iri” bona sitjhumayele ngetjiseko.

ASAZI UKUTHI UJEHOVA UZOKUSABELA NJANI

8. ‘Umsebenzi kaZimu weqiniso’ uqaliselephi? (UMtjhumayeli 11:5)

⁸ Angekhe sihlale siwazi ‘umsebenzi kaZimu weqiniso.’ (Funda uMtjhumayeli 11:5.) Amezwi lawo aqalisele ezintweni uJehova azenze zaba khona namkha ezintweni azivumela bona zenzeke bona kwenzeke intandwakhe. Angekhe sawazi woke amabanga enza uJehova avumele okuthileko bona kwenzeke namkha sazi ukuthi uzosisiza njani. (Rhu. 37:5) IBhayibheli lifanisa ukungazi ‘imisebenzi kaZimu weqiniso’ nokungazi ukuthi umntwana ukhula njani ngaphakathi kwesibeletho. Nabososayensi abazwisisi ukuthi umntwana ukhula njani ngaphakathi kwesibeletho sakanina. Ngokufanako, nathi angeze sayizwisisa ngokupheleleko indlela kaJehova yokwenza izinto.

9. Ukungazi okuzokwenziwa nguJehova, kungasenza sizizwe njani?

⁹ Ukungazi ukuthi uJehova uzosisiza njani kungasenza sizaze ukuthatha iinqunto ezithileko. Singazaza ukuthuthukisa indlela esisebenzela ngayo uJehova, njengokusebenza isikhathi esingeziweko esimini namkha ukuthuthela endaweni etlhoga abarhuweleli abangeziweko. Singathoma ukuzibuza ukuthi uJehova kuyamthabisa na, ukusibona sibhalelwa kufikelela iminqopho esizibekele yona yokuthuthukisa indlela esimsebenzela ngayo. Singazizwa ngasuthi asimthabisi uJehova lokha nasingaboni imiphumela emihle esiyifumana nasitjhumayelako namkha nasiqalana neentjhijilo emsebenzini esiwenzela uJehova.

10. Ukungazi ukuthi uJehova uzosisiza njani, kuzosisiza sibe nabuphi ubuntu obuqakathekileko?

¹⁰ Ukungazi ukuthi uJehova uzosisiza njani kuzosisiza sibe nobuntu obuhle obufana nokuthobeka. Kuyasisiza ukuzwisisa ukuthi uJehova uhlala akwazi okusilungeleko. (Isa. 55:​8, 9) Lokho kusenza simthembe khulu uJehova bona uzosisiza siphumelele. Nasifumana imiphumela emihle esimini namkha keminye imisebenzi esiyenzela uJehova, lokho kusenza simdumise khulu. (Rhu. 127:1; 1 Kor. 3:7) Kwesinye isikhathi izinto azenzeki ngendlela esifuna ngayo, nakunjalo kufuze sikhumbule ukuthi uJehova ubona koke. (Isa. 26:12) Thina kufuze sidlale indimethu, sithembe ukuthi uJehova uzokuhlala asisiza. Siyaqiniseka ngokuthi uzosinqophisa, nanyana lokho angekhe akwenze ngokuyikarisomraro njengombana bekenza ngezinye iinkhathi ekadeni.—IzE. 16:​6-10.

11. Ngiziphi izinto eziqakathekileko esizaziko ezingasisiza?

¹¹ Hlala ukhumbula bona uJehova unethando, unobulungiswa begodu uhlakaniphile. Siyazi ukuthi usithanda khulu begodu uyathaba ngalokho esimenzela khona, nalokho esikwenzela abafowethu nabodadwethu. Siyazi nokuthi uJehova uhlala ababusisa abantu abathembekileko kuye.—Heb. 11:6.

ASAZI UKUTHI INGOMUSO LISIPHATHELENI

12. Sifundani kuJakopo 4:​13, 14?

¹² Funda uJakopo 4:​13, 14. Iqiniso kukuthi asazi ukuthi kuzokwenzekani kithi. Zinengi izinto ‘esingakazilindeli’ ezingenzeka kithi. (UMtj. 9:11) Ngebanga lalokho, asazi ukuthi sizokuphila isikhathi esingangani nokuthi sizokukghona na ukwenza izinto esifisa ukuzenza.

13. Ngezinye iinkhathi ukungazi ukuthi ingomuso lisiphatheleni kungasenza sizizwe njani?

¹³ Ukungazi ukuthi ingomuso lisiphatheleni kungenza kube budisi ukukghodlhelela. Njani? Singatshwenyeka khulu ngokuthi khuyini ezokwenzeka, lokho kungasiqedela ithabo. Ukuphila kwethu kungatjhuguluka singakalindeli, msinyana singenzakalelwa zizinto ezimbi ezingasenza sizwe ubuhlungu. Lokha izinto nazingenzeki ngendlela esifisa ngayo, singadana besiphelelwe mamandla.—IzA. 13:12.

14. Nasizakuthaba khuyini ekufuze siyazi begodu siyenze? (Qala neenthombe.)

¹⁴ Nasikghodlhelelela ubudisi, sitjengisa uBabethu osezulwini ukuthi siyamthanda begodu sizomlotjha nanyana kungenzekani ekuphileni kwethu. Iindaba eziseBhayibhelini zisisiza sizwisise ukuthi angekhe salindela uJehova bona asivikele kibo boke ubudisi nokuthi akahleli kusesengaphambili ukuthi kuzokwenzekani ekuphileni kwethu. Uyazi ukuthi asithatjiswa kukwazi ukuthi ingomuso lisiphatheleni. Kunalokho, sithatjiswa kufuna isinqophiso sakhe nokumlalela. (Jor. 10:23) Nasifuna isizo lakhe ngaphambi kokuthatha iinqunto, kufana nokuthi sithi: “UJehova nakathandileko, sizokuphila senze lokhu nalokha.”—Jak. 4:15.

15. Khuyini esiyaziko malungana nengomuso?

¹⁵ Nanyana singazi ukuthi ilanga ngalinye lisiphatheleni, siyazi ukuthi uJehova usithembise ukuphila okungapheliko kunganandaba ukuthi sizokuphila ephasini namkha ezulwini. Siyazi ukuthi angeze akhuluma amala begodu akunalitho engamkhandela bona enze lokho akuthembisileko. (Tit. 1:2) Nguye kwaphela ‘ongabikezela izinto ezisazokwenzeka kusukela ekuthomeni, nezinto ezingakenzeki kusukela kade.’ Kuneemphorofido eziseBhayibhelini esele zizalisekile begodu zoke iimphorofido eziseBhayibhelini ngengomuso zizokuzaliseka. (Isa. 46:10) Siyaqiniseka ngokuthi akunalitho engenza uJehova angasithandi. (Rom. 8:​35-39) Uzosinikela ukuhlakanipha, induduzo namandla esiwatlhogako wokukghodlhelelela zoke izinto. Singaqiniseka nangokuthi uJehova uzosisiza begodu uzosibusisa.—Jor. 17:​7, 8.

ANGEZE SAYIZWISISA KUHLE INDLELA UJEHOVA ASAZI NGAYO

16. Khuyini uJehova ayaziko ngathi begodu lokho kukwenza uzizwe njani? (IRhubo 139:​1-6)

¹⁶ Funda iRhubo 139:​1-6. UMdalethu wazi koke ngathi, indlela esicabanga ngayo nendlela esizizwa ngayo. Uhlala anendaba nathi. Uyazi ukuthi kubayini sitjho izinto ezithileko nokuthi sihloseni ngokutjho izintwezo, wazi izinto esizenzako nokuthi kubayini sizenza. IKosi uDavida yathi uJehova uhlala akulungele ukusisiza begodu uzosisiza. Kukwenza uzizwe njani ukwazi ukuthi uZimu onamandla, oPhezukoke nodale zoke izinto unendaba nawe? UDavida wathi: “Ilwazeli kubudisi bona ngilizwisise. Angikghoni ngitjho nokulifikelela.”—Rhu. 139:6.

17. Kubayini ngezinye iinkhathi kungaba budisi ukwamukela ukuthi uJehova usazi kuhle?

¹⁷ Ngezinye iinkhathi kungaba budisi ukuqala uJehova njengoBaba onethando nonendaba nathi, mhlamunye ngebanga lendlela esikhuliswe ngayo emndenini, amasiko namkha izinto esikhule sizikholelwa ngaphambi kokufunda iqiniso. Kungenzeka sicabange ukuthi imitjhapho esayenza kade mimbi khulu, ingenza uJehova angafuni ukusazi namkha ukude khulu nathi. Ngezinye iinkhathi uDavida bekazizwa njalo. (Rhu. 38:​18, 21) Mhlamunye umuntu olinga ngamandla ukutjhugulula ukuphila kwakhe, aphile ngendlela ethabisa uZimu, angazibuza ukuthi ‘uZimu ungazi kwamambala na? Nangabe kunjalo, kubayini alindele bona ngilise ukuphila ngendlela engifuna ukuphila ngayo?’

18. Kubayini kuqakathekile ukwazi ukuthi uJehova usazi ukudlula indlela esizazi ngayo? (Qala neenthombe.)

¹⁸ Singafunda ukwamukela ukuthi uJehova usazi ngcono ukudlula indlela esizazi ngayo begodu ukghona ukubona okuhle kithi nanyana thina singakuboni. Uyasithanda nanyana abona imitjhaphwethu, uyayizwisisa indlela esizizwa ngayo nokuthi kubayini senza izinto ngendlela ethileko. (Rom. 7:15) Nasilemuka ukuthi uJehova ubona okuhle kithi nokuthi singaba babantu abanjani, lokho kusinikela amandla esiwatlhogako bona simlotjhe ngokuthembeka begodu sithabile.

19. Khuyini esiqiniseka ngayo ngoJehova?

¹⁹ Siyazi ukuthi uJehova ulithando. Asikuzazi nakancani lokho. (1 Jwa. 4:8) Siyazi ukuthi iinkambiso zakhe ezilungileko zitjengisa indlela asithanda ngayo begodu uhlala asifisela okuhle kwaphela. Siyazi nokuthi ufuna sifumane ukuphila okungapheliko. Wasinikela isihlengo bona sikghone ukufumana ukuphilokho. Isipho sesihlengo sisiqinisekisa ngokuthi nanyana senza imitjhapho, singakghona ukulotjha uJehova ngendlela ayamukelako. (Rom. 7:​24, 25) Siyazi nokuthi “uZimu mkhulu kuneenhliziyo zethu begodu wazi zoke izinto.” (1 Jwa. 3:​19, 20) UJehova ubona koke ngathi begodu uyaqiniseka ngokuthi singakghona ukuphumelela ekwenzeni intandwakhe.

20. Khuyini engasisiza sibalekele ukutshwenyeka khulu ngezinto esingazaziko?

²⁰ UJehova akasifihleli litho, usitjela koke ekufuze sikwazi. Nje-ke akutlhogeki bona sitshwenyeke ngezinto esingazaziko. Kunalokho, kufuze sidzimelele ezintweni eziqakatheke khulu. Nasenza njalo, sizokutjengisa ukuthi sithobekile begodu sithemba uJehova ngokupheleleko ‘loyo owazi koke.’ (Job. 36:4) Nanyana singazizwisisi ezinye izinto, siyazi ukuthi uJehova uzosifundisa izinto ezitjha ngokungapheliko. Kuyasithabisa lokho ngombana angekhe silise ukufunda izinto ezikarisako ngoZimethu Omkhulu.—UMtj. 3:11.