‘Khethani . . . Bona Nizokulotjha Bani’

1. Khuyini ekufuze siyenze bona sithabe begodu kubayini? (Isaya 48:​17, 18)

UBABETHU wezulwini uyasithanda begodu ufuna sithabele ukuphila nje nesikhathini esizako. (UMtj. 3:​12, 13) Wasidala namakghono amanengi kodwana akhenge asinikele ikghono lokuzibusa nelokuzibekela imithetho yokulungileko nokungakalungi. (UMtj. 8:9; Jor. 10:23) Uyazi ukuthi okusenza sithabe kukuthi simlotjhe, siphile ngeenkambiso zakhe.—Funda u-Isaya 48:​17, 18.

2. Khuyini uSathana afuna siyikholelwe begodu uJehova wenzeni ngamala lawo?

² USathana ufuna sicabange ukuthi singathaba ngaphandle kwakaJehova nokuthi abantu bangazibusa. (Gen. 3:​4, 5) UJehova wawaphendula amala ngokuvumela abantu abangalaleliko bona bazibuse isikhatjhana. Kulula khulu ukubona imiphumela yokuzibusa komuntu. Nanyana kunjalo, imiTlolo ineembonelo ezinengi zabantu ebebathabile ngebanga lokulotjha uJehova. Isibonelo esiphuma phambili, nguJesu Krestu. Akhesibone ukuthi khuyini eyamenza wakhetha ukulotjha uJehova. Sizokubona nokuthi kubayini kufuze silotjhe uBabethu wezulwini. Emaswapheleni, sizokubuyekeza amanye amabanga asenza sikhethe ukulotjha uJehova.

KUBAYINI UJESU AKHETHA UKULOTJHA UJEHOVA?

3. USathana wamthembisani uJesu begodu uJesu wakhetha ukwenzani?

³ Nakasephasini, uJesu kwafuze akhethe ukuthi uzokulotjha ubani. Nakaqeda ukubhajadiswa, uSathana wamthembisa ukumnikela yoke imiBuso esephasini nakangamlotjha kanye kwaphela. UJesu wathi: “Suka Sathana! Ngombana kutloliwe ukuthi: ‘Kufuze ulotjhe uJehova uZimakho begodu nguye kwaphela okufuze umenzele umsebenzi ocwengileko.’” (Mat. 4:​8-10) Kubayini uJesu athatha isiquntweso? Cabangela amabanga alandelako.

4-5. Ngimaphi amanye amabanga enza uJesu wakhetha ukulotjha uJehova?

⁴ Ibanga eliqakathekileko elenza uJesu wakhetha ukulotjha uJehova lithando. UJesu bekamthanda khulu uYise. (Jwa. 14:31) Ukungezelela kilokho, uJesu bekalotjha uJehova ngombana bekufuze enze njalo. (Jwa. 8:​28, 29; IsAm. 4:11) Bekazi ukuthi uJehova Mthombo wokuphila nokuthi uthembekile begodu uyaphana. (Rhu. 33:4; 36:9; Jak. 1:17) UJehova bekahlala amtjela iqiniso uJesu begodu wamnikela nezinto ebekanazo. (Jwa. 1:14) USathana uhlukile, yena ubangele abantu isono nokufa. Umleyimala onomona begodu uzicabangela yena. (Jwa. 8:44) Ukwazi amaqiniso la, kwasiza uJesu wangalingisi uSathana owavukela uJehova.—Flp. 2:​5-8.

⁵ Elinye ibanga elenza uJesu wakhetha ukulotjha uJehova, kuhlala aqale phambili ezintweni ebezisazokwenzeka ngebanga lokuhlala kwakhe athembekile kuJehova. (Heb. 12:2) Bekazi bona nakangahlala athembekile, bekazokucwengisa igama lakaYise begodu enze nendlela yokususa koke ukutlhaga okwabangelwa nguDeveli.

KUBAYINI KUFUZE SILOTJHE UJEHOVA?

6-7. Kubayini abantu abanengi bangalotjhi uJehova namhlanjesi, kodwana kubayini kufuze simlotjhe?

⁶ Abantu abanengi namhlanjesi abamlotjhi uJehova ngombana ababazi ubuntu bakhe obukarisako begodu abakwazi koke abenzele khona. Lokho kuliqiniso ebantwini umpostoli uPowula atjhumayela kibo e-Athene.—IzE. 17:​19, 20, 30, 34.

⁷ UPowula wahlathululela abantu ebebamlalele ukuthi uZimu weqiniso “unikela boke abantu ukuphila nokuphefumula nazo zoke izinto.” Wangezelela wathi: “Ngaye siyaphila, siyasikinyeka begodu sikhona.” UZimu uMdali, ‘wenza iintjhaba ezinengi zabantu,’ nje-ke kufanele simlotjhe.—IzE. 17:​25, 26, 28.

8. Khuyini uJehova angekhe ayenza? Hlathulula.

⁸ NjengoMdali noMbusi wendawo yoke, uJehova bekangakatelela abantu bona bamlotjhe. Nanyana kunjalo, uJehova angekhe akwenza lokho. Kunalokho, usinikela ubufakazi obutjengisa ukuthi ukhona nokuthi uthanda ngamunye wethu khulu. Ufuna abantu abanengi bona babe bangani bakhe ngokungapheliko. (1 Thim. 2:​3, 4) Kungebangelo uJehova asibandula ukuthi sifundise abanye iindaba ezimnandi ezimalungana nomnqophwakhe, sibatjele nangezinye izinto ezihle azozenzela abantu. (Mat. 10:​11-13; 28:​19, 20) Usihlelele amabandla bona simlotjhele kiwo begodu wabeka nabatlhogomeli abanethando bona basisize.—IzE. 20:28.

9. UJehova utjengise njani ukuthi uyasithanda?

⁹ Indlela uJehova athanda ngayo abantu ibonakalala endleleni aphatha ngayo abantu abangafuni ukukholelwa ukuthi ukhona. Cabanga ngalokhu: Abantu abanengi baphila ngendlela abathanda ngayo, kunokulalela uZimu bayazikhethela ukuthi khuyini okulungileko nokungakalungi. Nanyana kunjalo, ngomusa uJehova ubanikela abakutlhogako bona bathabele ukuphila. (Mat. 5:​44, 45; IzE. 14:​16, 17) Ubenze bakghona ukuba nabangani, imindeni ebathandako nokuthabela ukusebenza. (Rhu. 127:3; UMtj. 2:24) Koke lokhu kutjengisa ukuthi uBabethu ubathanda khulu boke abantu. (Eks. 34:6) Akhesizikhumbuze ngamanye amabanga asenza sikhethe ukulotjha uJehova nokuthi usibusisa njani nasenza njalo.

KUBAYINI SIKHETHA UKULOTJHA UJEHOVA?

10. (a) Ngiliphi ibanga eliqakatheke khulu elisenza silotjhe uJehova? (Matewu 22:37) (b) Ukubekezela kwakaJehova kukuzuzise njani? (IRhubo 103:​13, 14)

¹⁰ NjengoJesu, silotjha uJehova ngombana simthanda khulu. (Funda uMatewu 22:37.) Nasifunda ngobuntu bakhe, sizizwa sitjhidelene naye khulu. Ngokwesibonelo, cabanga ngendlela uJehova asibekezelela ngayo. Ama-Israyeli nawangamlaleliko, wawancenga wathi: “Ngibawa niphenduke eendleleni zenu ezimbi.” (Jor. 18:11) UJehova uyakhumbula ukuthi sinesono nokuthi silithuli. (Funda iRhubo 103:​13, 14.) Nawucabangisisa ngokubekezela kwakaJehova nangobunye ubuntu bakhe obukarisako, kghani lokho kukwenza uzimisele ukumlotjha ngokungapheliko?

11. Ngimaphi amanye amabanga asenza sikhethe ukulotjha uBabethu wezulwini?

¹¹ Silotjha uJehova ngombana ngilokho ekufuze sikwenze. (Mat. 4:10) Ngaphezu kwalokho, siyazi ukuthi nasimlotjha ngokuthembeka zinengi izinto ezihle ezizokwenzeka. Ukuthembeka kwethu kusisiza sicwengise igama lakaJehova, sitjengise ukuthi uSathana uleya amala begodu sithabisa ihliziyo kaBabethu. Nasikhetha ukulotjha uJehova, sizokuba nethuba lokumlotjha ngokungapheliko.—Jwa. 17:3.

12-13. Sifundani kilokho okwenzeka ku-Jane naku-Pam?

¹² Nanyana sibancani singamthanda khulu uJehova, ithandwelo lizokuragela phambili likhula njengombana isikhathi sikhamba. Ngilokho okwenzeka ku-Jane no-Pam ababantwana bomuntu.a U-Jane bekaneminyaka eli-11, u-Pam aneminyaka eli-10 nabathoma ukufunda iBhayibheli. Ababelethi babo bebangakuthandi ukufunda kodwana babavumela abantwana babo bona bafunde iBhayibheli naboFakazi, kwaphela nabazokukhamba nomndeni baye esondweni ngepelaveke. U-Jane uthi: “Engakufundiswa boFakazi ngeBhayibheli kwangisiza ngakghona ukuqalana nokugandelelwa bangani bami ebebangigandelela bona ngibheme iindakamizwa begodu ngiziphathe kumbi ngokomseme.”

¹³ Nasele bakhulile, abantazanaba bobabili baba barhuweleli. Kamuva baphayona begodu bebatlhogomela ababelethi babo abalupheleko. Nabaqala emva ezintweni abadlule kizo, u-Jane uthi: “Ngifunde ukuthi uJehova uyabatlhogomela abangani bakhe njengombana yesi-2 kaThimothi 2:19 ithi, ‘UJehova uyabazi abangebakhe.’” Akunakuzaza ukuthi uJehova uyabatlhogomela abakhetha ukumthanda nokumlotjha.

14. Amezwethu nezenzo zethu zingasiza njani ekuvikeleni igama lakaJehova? (Qala neenthombe.)

¹⁴ Sifuna ukusiza ekuvikeleni igama lakaJehova ekuhlazisweni. Cabanga ngendaba le: Akhesithi unomngani onomusa, ophanako begodu olibalelako. Ngelinye ilanga uzwe omunye akhuluma kumbi athi umnganakho ukhohlakele begodu akakathembeki. Bewungazizwa njani? Bewuzomvikela. Ngokufanako lokha uSathana nabalandeli bakhe nabalinga ukusilaphaza igama lakaJehova ngokukhuluma amala ngaye, thina sivikela igama lakaJehova ngokuthi sikhulume iqiniso ngaye. (Rhu. 34:1; Isa. 43:10) Sitjengisa ukuthi sifuna ukulotjha uJehova ngomphefumulo woke ngamezwi nangezenzo zethu.

15. Umpostoli uPowula wazuza njani ngokutjhugulula imigomwakhe? (Filipi 3:​7, 8)

¹⁵ Sizimisele ukutjhugulula imigomwethu ekuphileni ukwenzela bona silotjhe uJehova ngendlela ayamukelako besimenzele okungeziweko. Ngokwesibonelo, umpostoli uPowula wakhetha ukulisa isikhundla sakhe esiphakamileko emphakathini bona alandele uKrestu bekalotjhe uJehova. (Gal. 1:14) Ukwenza njalo, kwamenza wathaba, wafumana nethuba lokubusa noKrestu ezulwini. Akhenge azisole ngesiqunto asithathako sokulotjha uJehova, nathi angekhe sizisole.—Funda kwebeFilipi 3:​7, 8.

16. Sifundani kilokho okwenzeka ku-Julia? (Qala neenthombe.)

¹⁶ Nasibeka ukulotjha uJehova qangi ekuphileni kwethu, singakghona ukuthabela ukuphila nje nesikhathini esizako. Cabanga ngalokho okwenzeka kudadwethu u-Julia. Ngaphambi kokufunda iqiniso, u-Julia bekasesiqhemeni esibhinako esondweni kusukela asese mncani. Umvumi onekghono we-opera, wabona ikghono laka-Julia begodu wambandula. Ngesikhatjhana u-Julia waba ngusaziwako begodu bekabhina eendaweni ezikulu. Nakasesikolweni sombhino omunye wabafundi wacoca naye ngoZimu, wamhlathululela ukuthi uZimu unegama nguJehova. Ngemva kwalokho, u-Julia wathoma ukufunda iBhayibheli kabili ngeveke. Ekugcineni, wakhetha ukulotjha uJehova kunokuragela phambili nokubhina. Isiquntweso besingasilula. Uthi: “Abantu abanengi bebangitjela ukuthi ngisidlhadlha ngokulisa ukubhina ngebanga lokulotjha uJehova. Kodwana bengifuna ukulotjha uJehova ngepilwami yoke.” Namhlanjesi uzizwa njani ngesiqunto asithatha eminyekeni engaphezu kwema-30 eyadlulako? Uthi: “Nginokuthula komkhumbulo begodu ngithemba ukuthi uJehova uzozanelisa zoke iimfiso zami esikhathini esizako.”—Rhu. 145:16.

RAGELA PHAMBILI ULOTJHA UJEHOVA

17. Ukwazi ukuthi siphila emihleni yokuphela, kubathinta njani abantu abalotjha uJehova nalabo abangamlotjhiko?

¹⁷ Siphila emihleni yokuphela kwephasi. Umpostoli uPowula watlola wathi: “Kusele ‘isikhathi esincani khulu’ begodu ‘ozako uzokufika, angekhe ariyade.’” (Heb. 10:37) Kusithinta njani lokhu? Sekusele isikhathi esincani sokuthi abantu bakhethe ukulotjha uJehova. (1 Kor. 7:29) Nasikhethe ukulotjha uJehova, siyazi ukuthi nanyana kufuze sikghodlhelele iinlingo, sekusele “isikhathi esincani khulu.”

18. UJehova noJesu bafuna senzeni?

¹⁸ UJesu wakhuthaza abalandeli bakhe bona babe bafundi bakhe begodu baragele phambili bamlandela. (Mat. 16:24) Nje-ke nangabe sesilotjhe uJehova isikhathi eside, asizimiseleni ukungalisi. Kufuze sisebenze budisi ukuphila ngokuvumelana nesiqunto esasithathako sokumlotjha. Kungenzeka kungabi lula kodwana nasenza njalo sizokuthabela iimbusiso nokwaneliseka nje nesikhathini esizako.—Rhu. 35:27.

19. Sifundani kilokho okwenzeka ku-Gene

¹⁹ Abanye bacabanga ngathi ukulotjha uJehova kutlhoga ukuzidela okukhulu. Muntu omutjha, kghani ucabanga ukuthi kukhona okukulahlekelako ngebanga lokulotjha uJehova? Omunye umfowethu, u-Gene uthi: “Bengizwa ngathi ukulotjha uJehova kuyagandelela. Bengibona ngasuthi abanye abantwana engikhule nabo bathabile ngombana bebaya emaphathini, bathandana namkha badlale imidlalo enenturhu, kukulapho mina ngisebenzisa isikhathi sami ngiya esifundweni nesimini.” Ukucabanga ngendlela le kwamthinta njani u-Gene? Uthi: “Ipilwami beyihlukene phakathi begodu bekumnandi lokho isikhatjhana. Kodwana akhenge kungilethele ithabo lamambala. Ngathoma ukucabanga ngamaqiniso weBhayibheli engakhetha ukungawalaleli begodu ngaqunta ukulotjha uJehova ngehliziywami yoke. Kusukela lapho, kube ngathi uJehova uyiphendule yoke imithandazwami.”

20. Khuyini ekufuze sizimisele ukuyenza?

²⁰ Umrhubi wabhinela uJehova wathi: “Uyathaba umuntu omkhethako bese umtjhideze, bona azokuhlala eenrhodlweni zakho.” (Rhu. 65:4) Kwangathi soke singazimisela njengoJotjhuwa owathi: “Mina nomndenami sizokulotjha uJehova.”—Jotj. 24:15.