Qiniseka Ukuthi UJehova Uzokududuza

1. Bebunjani ubujamo bamaJuda adingiselwa eBhabhiloni?

BESELE kuminyaka eminengi khulu abantu bakwaJuda basolo bangalaleli uJehova. Umphumela walokho waba kukuthi uJehova avumele abantu beBhabhiloni batjhabalalise inarha yakwaJuda bebayithumbele eBhabhiloni. Bekunjani ukuphila lapho? (2 Kron. 36:​15, 16, 20, 21) Kuliqiniso ukuthi nanyana bebathunjelwe lapho, bebasakghona ukwenza izinto ebebajayele ukuzenza. (Jor. 29:​4-7) Bekungasibulula begodu bekungasikuphila ebebangakukhetha. Bazizwa njani ngobujamobo? Omunye wabo wathi, “Sahlala ngemilanjeni yeBhabhiloni. Besisolo silila nasikhumbula iZiyoni.” (Rhu. 137:1) AmaJuda bekakutlhoga khulu ukududuzwa kodwana ngubani obekazowaduduza?

2-3. (a) UJehova wawenzelani amaJuda ebewathunjiwe? (b) Khuyini esizokucoca ngayo esihlokwenesi?

² UJehova ‘nguZimu wayo yoke induduzo.’ (2 Kor. 1:3) UJehova uyabathanda abantu bakhe begodu ufuna ukubaduduza. UJehova bekazi ukuthi amanye amaJuda nawaseBhabhiloni azokuzwa ubuhlungu ukuthi akhange amlalele begodu azokufuna ukumlotjha ngendlela efaneleko. (Isa. 59:20) Yeke, uJehova wanikela u-Isaya umlayezo oya kumaJuda, eminyakeni engaphezu kwelikhulu ngaphambi kobana adingiselwe eBhabhiloni. Bekuyini ihloso yalokho? U-Isaya uthi: “‘Duduzani, duduzani abantu bami,’ kutjho uZimenu.” (Isa. 40:1) Ngencwadi ka-Isaya, uJehova wanikela amaJuda ebewasekudingisweni induduzo ayitlhogako.

³ NjengamaJuda ebewasekudingisweni, nathi ngasikhathi sitlhoga induduzo. Isihlokwesi, sizokukhuluma ngeendlela ezintathu uJehova aduduza ngazo amaJuda: (1) Wawathembisa ukuthi uzowalibalela nawatjhugulukako, (2) wanikela abantu bakhe ithemba begodu (3) wabasiza bona bangatshwenyeki. Sizokucoca nangokuthi uJehova usiduduza njani ngendlela efanako namhlanjesi.

UJEHOVA USILIBALELA NGESIRHAWU

4. UJehova utjengise njani ukuthi unguZimu onesirhawu? (Isaya 55:7)

⁴ UJehova ‘nguBaba wesirhawu.’ (2 Kor. 1:3) Watjengisa ubuntobo lokha nakathembisa ukulibalela amaJuda ebewasekudingisweni nawatjhugulukako. (Funda u-Isaya 55:7.) Wathi, “Ngethando elihlala ngokungapheliko, ngizokuba nomusa kuwe.” (Isa. 54:8) UJehova bekazositjengisa njani isirhawu sakhe? Nanyana amaJuda bekufuze aqalane nemiphumela yokungalaleli kwawo, uJehova wawathembisa ukuthi angekhe ahlale ukuphila kwawo koke eBhabhiloni. Bewazokuhlala ekudingisweni isikhatjhana. (Isa. 40:2) Kungenzeka lokho kwawaduduza khulu amaJuda atjhugulukileko begodu afuna nokuthabisa uJehova.

5. Kubayini siqiniseka khudlwana ukudlula amaJuda ukuthi uJehova uyasilibalela?

⁵ Khuyini esiyifundako? UJehova uzimisele ukulibalela abantu bakhe ngokupheleleko. Namhlanjesi sinamabanga amanengi khulu asenza siqiniseke ukudlula amaJuda ebewaseBhabhiloni ukuthi uJehova uyasilibalela. Njani? Ngombana siyazi ukuthi khuyini uJehova ayenzileko bona asilibalele izono zethu. Eminyakeni emakhulu eyadlulako, ngemva kokuphorofida kwaka-Isaya, uJehova wathumela iNdodanakhe ayithandako ephasini bona ibe sihlengo kizo zoke izoni ezitjhugulukako. Ngebanga lokuthi uJesu wasifela, uJehova ukghona ukulibalela izono zethu ngokupheleleko. (IzE. 3:19; Isa. 1:18; Efe. 1:7) Kwamambala uJehova unguZimu onesirhawu.

6. Kubayini kududuza ukucabanga ngendlela uJehova alibalela ngayo? (Qala nesithombe.)

⁶ Amezwi aphefumulelweko kaJehova afumaneka ku-Isaya 55:​7, angasiduduza nange sizizwa simlandu. Abanye bethu basaragela phambili bazizwa bamlandu nangemva kokutjhuguluka ngebanga lemitjhapho edlulileko abayenzako. Singaragela phambili sizizwa njalo ngebanga lemiphumela esisuke siqalana nayo ngebanga lemitjhapho esiyenzileko. Nanyana kunjalo, nange sivume izono zethu salungisa, salisa ukwenza okumbi, singaqiniseka ukuthi uJehova usilibalele. UJehova nakalibalelako, ukhetha ukungasasikhumbuli isono sethu. (Madanisa noJoromiya 31:34.) UJehova akasolo acabanga ngemitjhapho esiyenzileko, nathi kufuze singasolo sicabanga ngayo. Okuqakatheke khulu kuJehova ngilokho esikwenza nje, ingasi imitjhapho esiyenze esikhathini esidlulileko. (Hez. 33:​14-16) Msinyana ephasini elitjha, uBabethu onesirhawu uzokususa koke ukutlhaga okubangelwa mitjhaphwethu.

7. Khuyini engasikhuthaza bona sikhulume nabadala nange senze isono esikhulu?

⁷ Khuyini ekufuze siyenze nange sizizwa simlandu ngebanga lokufihla isono esikhulu? IBhayibheli lisikhuthaza ukuthi sibawe abadala basisize. (Jak. 5:​14, 15) Nanyana kunjalo, kungenzeka kungabi lula ukuthi sibatjele ngesono esisenzileko. Kufuze sikhumbule ukuthi uJehova usebenzisa amadoda la ukusisiza begodu azokuba nethando nesirhawu kithi njengombana uJehova enza. Nasikhumbula lokho besitjhuguluke, sizokukhuthazeka ukukhuluma nabo. Cabanga ngesibonelo sendlela uJehova asebenzisa ngayo abadala ukududuza umfowethu u-Arthura obekazizwa amlandu ngalokho ebekakwenza. Uthi, “Isikhathi esipheze sibe mnyaka, bengisolo ngibukela zomseme. Kwathi ngemva kokuzwa ikulumo ekhuluma ngonembeza, ngavuma isono sami kumkami nakubadala. Ngemva kwalokho, ngezwa kwehla umthwalo omkhulu emahlombami kodwana bengisadanile ngalokho engikwenzileko. Abadala bangikhumbuza ukuthi uJehova akakangilahli. Uyasilungisa ngombana uyasithanda. Amezwabo anomusa athinta ihliziywami begodu angisiza ngakghona ukuziqala ngendlela uJehova angiqala ngayo nokuzwisisa ukuthi kwamambala ungilibalele.” Namhlanjesi u-Arthur uliphayona nenceku esizako. Kukhuthaza khulu ukwazi ukuthi nasizisola kwamambala ngemitjhapho esiyenzileko, uJehova uhlala akulungele ukusilibalela.

UJEHOVA USINIKELA ITHEMBA

8. (a) UJehova wabanikela liphi ithemba ebebasekudingisweni? (b) Ngokwaka-Isaya 40:​29-31, amaJuda atjhugulukileko bewazozizwa njani ngethemba uJehova awanikela lona?

⁸ AmaJuda bewangacabanga ukuthi angekhe abuyele enarhenawo. Abantu beBhabhiloni bebangazitjhaphululi iingqila zabo ukuthi zibuyele eenarheni zazo. (Isa. 14:17) Nanyana kunjalo, uJehova wanikela abantu bakhe ithemba. Wathembisa abantu bakhe ukuthi uzobatjhaphulula begodu bekungekho into ezomvimba ekwenzeni lokho. (Isa. 44:26; 55:12) Emehlweni kaJehova, abantu beBhabhiloni bebanganamandla njengethuli. (Isa. 40:15) Lokha nawuvuthela ithuli, liyanyamalala. Bekuzokuba bulula ngoJehova ukuthi atjhaphulule abantu bakhe eBhabhiloni. Ithembeli belizowasiza njani amaJuda? Belizowaduduza belenze okungeziweko. U-Isaya wathi, “Abathembela kuJehova bazokufumana amandla.” (Funda u-Isaya 40:​29-31.) Ithemba belizobapha amandla begodu “bazokuphapha ngeempiko njengamakhozi.”

9. Ngimaphi amabanga ebekazokunikela amaJuda asekudingisweni ukuthi athembe iinthembiso zakaJehova?

⁹ UJehova wanikela amaJuda ibanga lokuthi athembe iinthembiso zakhe. Njani? Cabanga ngeemphorofido ebesele zizalisekile. Bekazi ukuthi i-Asiriya ihlule umbuso wakwa-Israyeli wetlhagwini begodu yasa nabantu ekudingisweni. (Isa. 8:4) AmaJuda abona abantu beBhabhiloni batjhabalalisa iJerusalema begodu abasa ekudingisweni. (Isa. 39:​5-7) Bekazi ukuthi iKosi yeBhabhiloni yaphophaza uTsedekhiya beyamletha eBhabhiloni. (Jor. 39:7; Hez. 12:​12, 13) Yoke into uJehova ayibikezelako, yazaliseka. (Isa. 42:9; 46:10) Koke lokhu kungenzeka kwaqinisa ukukholwa kwawo esithembisweni sakaZimu sokuthi azokutjhatjhululwa.

10. Khuyini engasisiza siragele phambili siqinisa ithemba lethu hlangana namalanga wamaswaphela?

¹⁰ Khuyini esiyifundako? Nasizizwa sidanile, ithemba esinalo lingasiduduza lisisize sifumane amandla godu. Siphila eenkhathini ezibudisi begodu siqalene namanaba anamandla. Nanyana kunjalo, akukafuzi siphele amandla. UJehova usinikela ithemba elihle, ukuphila okungapheliko, okunokuthula nokuvikeleka. Kufuze sihlale sidzimelele ethembenelo. Nakungasinjalo ithemba lethu lingafana nokuqala indawo ehle kodwana siyiqale efesidereni elingabonakali kuhle ngebanga lokuthi alikahlwengeki. “Singalihlwengisa njani ifesidere,” okutjho ukuqinisa ithemba lethu? Qobe singazipha isikhathi sokucabanga ukuthi ukuphila kuzokuba mnandi kangangani ephasini elitjha. Singafunda iinhloko, sibukele amavidiyo, silalele nombhino okhuluma ngethemba lethu. Singathandaza kuJehova simtjele ngeenthembiso esiqale phambili kizo epharadesi.

11. Khuyini eyasiza omunye udadwethu onokugula okumasikizi bona afumane amandla?

¹¹ Cabanga ukuthi udadwethu u-Joy onobujamo obumasikizi bepilo waduduzeka njani bewafumana amandla ngethemba esinalo. Uthi, “Nangizizwa ngigandeleleke khulu ngebanga lemiraro eminengi, ngitjela uJehova koke nangendlela engizizwa ngayo begodu ngiyazi ukuthi ungizwisisa kuhle. Ngeenkhathezo, unginikela ‘amandla angaphezu kajayelekileko.’” (2 Kor. 4:7) U-Joy uzicabanga asephasini elitjha, lapho ‘kunganasakhamuzi esizokuthi “ngiyagula.”’ (Isa. 33:24) Nathi, nange sitjela uJehova indlela esizizwa ngayo besidzimelele ethembeni lethu, singafumana amandla wokukghodlhelelela ubudisi esiqalene nabo.

12. Ngimaphi amabanga wokuthemba iinthembiso zakaJehova? (Qala nesithombe.)

¹² Njengombana uJehova anikela amaJuda ebewaseBhabhiloni amabanga amanengi wokuthi athembe iinthembiso zakhe, usenza okufanako nanamhlanjesi. Cabanga ngeemphorofido esizibona zizaliseka. Ngokwesibonelo, i-Anglo American World Power inengcenye ‘eqinileko nebuthakathaka.’ (Dan. 2:​42, 43) Sizwa ‘nangokusikinyeka kwephasi eendaweni ngeendawo’ begodu sitjhumayela “kizo zoke iintjhaba.” (Mat. 24:​7, 14) Iimphorofidwezi nezinye ziqinisa ukukholwa kwethu eenthembisweni eziduduzako zakaJehova ezisazokuzaliseka.

UJEHOVA USISIZA SINGATSHWENYEKI KHULU

13. (a) Ngiziphi iintjhijilo amaJuda ebewazokuqalana nazo ngesikhathi sokutjhatjhululwa kwawo? (b) Njengombana kuhlathululwe ku-Isaya 41:​10-13, uJehova wawaduduza njani amaJuda ebekasekudingisweni?

¹³ UJehova wanikela amaJuda ebewahlala eBhabhiloni ithemba elihle khulu lokutjhatjhululwa kodwana bekazi ukuthi bekuzokuba budisi khulu kiwo isikhathi nasele sitjhidela. Wabikezela ukuthi ikosi enamandla izokusahlela beyithathe ilawulo leenarha ezibhode iBhabhiloni beyisahlele iBhabhiloni ngokwalo. (Isa. 41:​2-5) Kghani bekufuze amaJuda atshwenyeke? UJehova waduduza abantu bakhe kusese nesikhathi wathi: ‘Ningasabi ngombana nginani. Ningatshwenyeki ngombana nginguZimenu.’ (Funda u-Isaya 41:​10-13.) Bekatjho ukuthini nakathi, ‘NginguZimenu’? Bekangakhumbuzi amaJuda ukuthi amlotjhe ngombana amaJuda besele akwazi lokho. Kunalokho, bekawakhumbuza ukuthi bekasese sehlangothini lawo.—Rhu. 118:6.

14. UJehova wawasiza njani amaJuda bona angathukwa?

¹⁴ UJehova wasiza amaJuda ukuthi ehlise umoya ngokuwakhumbuza ngamandlakhe nelwazi analo elingapheliko. Wabawa amaJuda ebewasekudingisweni ukuthi aqale umkayi oneenkwekwezi. Wawatjela ukuthi akhenge adale iinkwekwezi kwaphela kodwana wazi ikwekwezi ngayinye ngegama. (Isa. 40:​25-28) Nange uJehova azi ikwekwezi ngayinye ngegama, kuyatjho ukuthi wazi umuntu ngamunye ngegama. Nange akghone ukuba namandla wokubumba iinkwekwezi, kuyatjho bona unamandla wokusiza abantu bakhe. Iye, amaJuda ebewasekudingisweni bewanganabanga lokutshwenyeka namkha arhidlwe livalo.

15. UJehova wawasiza njani amaJuda ebewasekudingisweni bona azilungiselele lokho ebekuseza?

¹⁵ UJehova walungiselela abantu bakhe lokho ebekusazokwenzeka. Engcenyeni esekuthomeni yencwadi ka-Isaya, uJehova watjela abantu bakhe ukuthi: ‘Ngenani ngeenkumbeni zenu zangaphakathi, bese nivale iminyango ngemva kwenu. Zifihleni isikhatjhana bekube kulapho ilaka lidlulile.’ (Isa. 26:20) Kungenzeka amaJuda asebenzisa isinqophiswesi lokha iKosi uKoretjhi isahlela iBhabhiloni. Isazimlando sakade esimGirigi sithi, lokha uKoretjhi nakangena eBhabhiloni ‘wanikela amasotjakhe isinqophiso sokuthi abulale woke umuntu amfumana ngaphandle komnyango.’ Cabanga ukuthi abantu ebebahlala eBhabhiloni bathukwa kangangani. Kodwana kungenzeka amaJuda ebewadingisiweko asinda ngebanga lokulalela iinqophiso zakaJehova.

16. Kubayini kungakafuzi sitshwenyeke ngengomuso lethu? (Qala nesithombe.)

¹⁶ Khuyini esikufundako? Kungasikade sizokuqalana nesizi elikhulu engakhenge siqalane nalo phambilini. Nalithomako, abantu abanengi ephasini bazabe batjharagene begodu bathukiwe kodwana ingasi abantu bakaJehova. Siyazi ukuthi uJehova nguZimethu. Sizokuba nesibindi ngombana siyazi ukuthi ‘ukutjhatjhululwa kwethu kutjhidele.’ (Luk. 21:28) Nalokha iintjhaba ezibumbeneko, nazisisahlelako sizokuragela sizokuragela phambili sithemba uJehova. UJehova uzokusebenzisa iingilozi zakhe ukuthi zisivikele begodu uzosinikela neenqophiso ukuthi sisindise ukuphila kwethu. Uzosinikela njani iinqophiswezo? Kuzokufuze silinde, sibone. Nanyana kunjalo, kungenzeka sizokufumana iinqophiswezi emabandlenethu. Okungaba ‘ziinkumba zangaphakathi’ lapho sizokufumana khona ukuvikeleka. Singakulungiselela njani okusezako? Kufuze sitjhidelane khulu nabafowethu nabodadwethu, sizimisele ukulalela iinqophiso ezivela ehlanganweni besiqiniseke ukuthi uJehova nguye odosa phambili ihlangano esikiyo.—Heb. 10:​24, 25; 13:17.

17. Ungathembela njani kuJehova ukuthi akududuze?

¹⁷ Nanyana ukuphila bekungasibulula emaJudeni ebewaseBhabhiloni, uJehova wawanikela induduzo ebewazoyitlhoga. Uzokwenza okufanako nakithi. Yeke, akunandaba ukuthi ingomuso lisiphatheleni, kufuze sihlale sithembele kuJehova bona asiduduze. Siyakholwa ukuthi uyabalibalela abantu bakhe abathembekileko nokuthi unendaba nathi. Ragela phambili uqinisa ithemba lakho. Khumbula ukuthi uJehova nakanguZimakho, akunalitho ekufuze ulisabe.