Ungamnikela Njani Omunye Umuntu Iseluleko?

1. Ngubani ekufuze anikele iseluleko begodu kubayini? Hlathulula.

KGHANI uyakuthanda ukunikela abanye iseluleko? Abanye bayakuthanda ukululeka abanye. Abanye bayakusaba begodu bazizwa bangakatjhaphuluki nakufuze banikele abanye iseluleko. Kinanyana ngikuphi, soke sibophekile bona siluleke abanye nakutlhogekako. Kubayini? Kungombana uJesu wathi nasifuna ukuba balandeli bakhe kufuze sithande abafowethu nabodadwethu. (Jwa. 13:35) Enye indlela esingatjengisa ngayo ukuthi siyabathanda abafowethu nabodadwethu kukuthi sibanikele iseluleko nabasitlhogako. IBhayibheli lithi nasinikela umuntu ‘iseluleko esithembekileko’ siqinisa ubungani esinabo.—IzA. 27:9.

2. Khuyini abadala ekufuze bayenze begodu kubayini? (Funda nebhoksi elithi, “Iseluleko Sesifundo Saphakathi Kweveke.”)

² Abadala kufuze bazi ukuthi bangabanikela njani abanye iseluleko ngendlela ephumelelako. UJehova noJesu bakhethe amadoda la bona atlhogomele ibandla. (1 Pit. 5:​2, 3) Enye indlela abadala abakwenza ngayo lokho kubeka iinkulumo ezinezeluleko ezisekelwe eliZwini lakaZimu. Godu kufuze baluleke imvu ngayinye kuhlanganise nokusiza labo ebebatjhiye uJehova bona babuyele ebandleni. Abadala kunye nathi, singasinikela njani iseluleko esihle?

3. (a) Singakufunda njani ukunikela abanye iseluleko esihle? (Isaya 9:6; funda nebhoksi elithi, “Lingisa UJesu Nawunikela Iseluleko.”) (b) Sizokucoca ngani esihlokwenesi?

³ Kunengi esingakufunda malungana nokunikela iseluleko ngokuqala indlela abantu esifunda ngabo eBhayibhelini ebebanikela ngayo iseluleko. UJesu bekahlala anikela iseluleko esiphuma phambili. Esinye isiqu anikelwa sona kwathiwa “nguMeluleki oMuhle.” (Funda u-Isaya 9:6.) Esihlokwenesi, sizokufunda ngokuthi khuyini esingayenza lokha umuntu nakasibawa iseluleko nokuthi singenzani lokha umuntu nakatlhoga iseluleko sethu nanyana angakasibawi. Sizokufunda nangokuqakatheka kokunikela iseluleko ngesikhathi nangendlela efaneleko.

LOKHA UMUNTU NAKASIBAWA ISELULEKO

4-5. Umuntu nakasibawa iseluleko, khuyini ekufuze sizibuze yona? Nikela isibonelo.

⁴ Umuntu nakakubawa iseluleko ungasabela njani? Kungenzeka uzizwe uthabile begodu ufune ukumsiza khonokho. Kodwana kuhle ukuzibuza ukuthi, ‘Ngibuzwisisa kuhle na ubujamo bakhe bona ngingakghona ukumnikela iseluleko?’ Ngezinye iinkhathi, indlela esingasiza ngayo kunganikeli umuntu iseluleko kunalokho singamsiza afumane umuntu onelwazi ngobujamo aqalene nabo bona amnikele iseluleko.

⁵ Ngokwesibonelo, umnganakho angakutjela ukuthi ufumene bona uphethwe kugula okumasikizi. Ngemva kwalokho, akutjele ukuthi bekenza irhubhululo ngeendlela zokwelapha angakhetha kizo bese akubawe bona umsize akhethe indlela yezokwelapha ocabanga ukuthi izomsiza. Kungenzeka kube nendlela oyikhethako, kodwana awusingudorhodera begodu awukabandulwa bona ungalapha ukugula. Ebujamweni obunjalo, ungasiza umnganakho ngokumfunisa umuntu obandulelwe ukulapha ukugula okumphetheko.

6. Kubayini kukuhle ukulinda ngaphambi kokunikela iseluleko?

⁶ Nanyana singazizwa ngathi siyakufanelekela ukunikela iseluleko endabeni ethileko, singakhetha ukulinda isikhatjhana ngaphambi kokuphendula umuntu obawe iseluleko. Kubayini? IzAga 15:28 zithi, ‘olungileko uyazindla ngaphambi kobana aphendule.’ Kuthiwani-ke nange sicabanga ukuthi siyayazi ipendulo? Nanyana singacabanga njalo, kufuze siziphe isikhathi sokwenza irhubhululo, sithandaze begodu sicabangisise. Nasenze njalo, singaqiniseka ngokuthi iseluleko sethu sizokukhambisana nendlela uJehova azizwa ngayo ngendaba leyo. Cabanga ngesibonelo somphorofidi uNathani.

7. Sifundani esibonelweni somphorofidi uNathani?

⁷ IKosi uDavida yakhuluma noNathani, yathi ifuna ukwakhela uJehova ithempeli. UNathani wamluleka khonokho bona alakhe. Kodwana uNathani bekufuze aziphe isikhathi sokubuza uJehova. Kubayini? Ngombana uJehova bekangafuni bona kube nguDavida owakha ithempeli. (1 Kron. 17:​1-4) Njengombana isibonelwesi sitjengisa, lokha umuntu nakasibawa iseluleko kukuhlakanipha ukuba “buthaka ekukhulumeni.”—Jak. 1:19.

8. Ngiliphi elinye ibanga ekufuze lisenze sicabangisise kuhle ngeseluleko esisinikelako?

⁸ Nanti elinye ibanga ekufuze lisenze sicabangisise kuhle nasinikela omunye umuntu iseluleko: Nathi sizokuthinteka nange iseluleko sethu singenza omunye umuntu athathe isiqunto esingakahlakaniphi esizomenza aqalane nemiphumela ebuhlungu. Kungebangelo kuqakathekile ukucabangisisa kuhle ngaphambi kokunikela umuntu iseluleko.

UKUNIKELA UMUNTU ISELULEKO ANGAKASIBAWI

9. Abadala kufuze baqiniseke ngani ngaphambi kokunikela iseluleko? (Galatiya 6:1)

⁹ Ngezinye iinkhathi, abadala kufuze bathathe igadango lokululeka umfowethu namkha udadwethu othethe “igadango elingakalungi.” (Funda kwebeGalatiya 6:1.) Umuntu angathatha iinqunto ezingakahlakaniphi ezingambangela bona enze isono esikhulu ngokukhamba kwesikhathi. Umnqopho wabadala kusiza umuntu onjalo bona arage nokulotjha uJehova begodu afumane ukuphila okungapheliko. (Jak. 5:​19, 20) Nje-ke iseluleko sabo nasizakusebenza kuhle, kufuze baqiniseke ukuthi umuntu loyo ulithethe kwamambala igadango elingakalungi. Bayalemuka ukuthi uJehova usivumela soke bona sizithathele iinqunto kuye ngokuthi unembezethu uyasivumela na. (Rom. 14:​1-4) Nange abadala balemuka ukuthi umfowethu wenze okuthileko okungalimaza ubuhlobo bakhe noJehova, bangamnikela njani iseluleko?

10-12. Abadala bazokwenzani nakufuze banikele umuntu iseluleko angakasibawi? Nikela isibonelo. (Qala neenthombe.)

¹⁰ Akusilula bona abadala banikele umuntu iseluleko angakasibawi. Kubayini? Umpostoli uPowula wathi umuntu angathatha igadango elingakalungi angakatjheji. Nje-ke ngaphambi kokunikela umuntu iseluleko, kunezinto abadala ekufuze bazenze ezizokwenza umuntu loyo bona alalele iseluleko.

¹¹ Ukunikela umuntu iseluleko angakasibawi kufana nokulinga ukutjala ehlabathini eqinileko. Ngaphambi kokutjala, umlimi kufuze athome ngokulima ihlabathi. Lokho kwenza ihlabathi ithambe begodu ikulungele ukwamukela imbewu. Ngemva kwalokho, angathoma ukutjala. Ekugcineni uzokuthelelela ukwenzela bona isitjalo sikhule. Ngokufanako, ngaphambi kobana umdala anikele umfowethu iseluleko angakasibawi, kunezinto ekufuze azenze ezizokwenza kube bulula bona alalele. Ngokwesibonelo, umdala angalinda isikhathi esihle sokukhuluma, angatjela umfowethu ukuthi unendaba naye begodu kunento angathanda ukukhuluma ngayo naye. Nange umuntu onikela iseluleko aziwa ngokuba nethando nomusa, kuzokuba bulula bona abanye basamukele iseluleko sakhe.

¹² Phakathi nekulumiswano, umdala angaraga nokwenza kube lula ngomfowethu ukwamukela iseluleko, angenza lokho ngokumkhumbuza ukuthi woke umuntu uyayenza imitjhapho nokuthi iseluleko siyatlhogeka ngezinye iinkhathi. (Rom. 3:23) Ngomoya ophasi nangehlonipho, umdala angasebenzisa imiTlolo ukumtjengisa ukuthi ulithethe njani igadango elingakalungi. Ngemva kokuthi umfowethu avume ukuthi wenze umtjhapho, umdala “utjala imbewu” ngokumhlathululela bona kufuze enzeni nakazakulungisa umtjhaphwakhe. Ekugcineni kwekulumiswano, umdala angenza kube lula bona umfowethu amukele iseluleko ngokumtjela ngezinto ezihle azenzako begodu athandaze naye.—Jak. 5:15.

13. Umdala angaqiniseka njani ukuthi umuntu uyasizwisisa iseluleko?

¹³ Ngezinye iinkhathi okutjhiwo mumuntu onikela iseluleko nalokho okuzwiwa mumuntu olulekwako kungaba zizinto ezimbili ezingafaniko. Khuyini abadala abangayenza ukuqinisekisa ukuthi abakutjhoko kuyazwisiseka? Bangalinga ukukhanyisa amaphuzu ayihloko ngokusebenzisa imibuzo ngokuhlakanipha. (UMtj. 12:11) Iimpendulo zomuntu olulekwako zizokusiza umdala abone ukuthi umuntu uyasizwisisa iseluleko anikelwa sona.

UKUNIKELA ISELULEKO NGESIKHATHI NANGENDLELA EFANELEKO

14. Kubayini kungakafuzi sinikele umuntu iseluleko nasisilingekileko? Hlathulula.

¹⁴ Soke sinesono, nje-ke sizokwenza namkha sitjho izinto ezizokuzwisa abanye ubuhlungu. (Kol. 3:13) IBhayibheli liyatjho ukuthi ngezinye iinkhathi umuntu angatjho namkha enze into ezosisilinga. (Efe. 4:26) Kodwana kufuze sibalekele ukunikela iseluleko nasisilingekileko. Kubayini? Ngombana “ukusilingeka komuntu akulethi ukulunga kwakaZimu.” (Jak. 1:20) Nasinganikela iseluleko sisilingekile manengi amathuba wokuthi senze umonakalo omkhulu kunokwenza okuhle. Lokhu akutjho ukuthi akukafuzi siveze indlela esicabanga nesizizwa ngayo emuntwini osisilingileko. Kunalokho kufuze sehlise umoya ngaphambi kokukhuluma nomuntu osisilingileko. Tjheja isibonelo esihle esabekwa ngu-Elihu owanikela uJobho iseluleko esihle.

15. Sifundani esibonelweni saka-Elihu? (Qala nesithombe.)

¹⁵ U-Elihu walalela uJobho amalanga amanengi njengombana bekalinga ukuzivikela ezintweni ezimamala ezakhulunywa baduduzi bakhe bamala. U-Elihu wamrhawukela uJobho. Nanyana kunjalo, u-Elihu wasilingeka ngombana uJobho walinga ukutjengisa ukuthi umsulwa, wakhuluma nezinto ezingasiliqiniso ngoJehova. U-Elihu walinda, wakhuluma noJobho ngomoya ophasi nangehlonipho. (Job. 32:2; 33:​1-7) Ku-Elihu sifunda isifundo esiqakathekileko sokuthi kuhle ukunikela iseluleko lokha nasingakasilingeki begodu sisinikele ngehlonipho nangomoya ophasi.—UMtj. 3:​1, 7.

RAGA NOKUNIKELA BEGODU WAMUKELE ISELULEKO

16. IRhubo 32:​8, likufundisani?

¹⁶ Emtlolweni ekusekelwe kiwo isihlokwesi uJehova uthi: “Ngizokunikela iseluleko ilihlo lami likuqalile.” (Funda iRhubo 32:8.) Lokhu kutjengisa ukuthi uJehova uzokuhlala asifundisa. Akasinikeli iseluleko kwaphela kodwana usisiza bona sikghone ukusisebenzisa. Singasilingisa isibonelo sakaJehova. Nakutlhogeka bona sinikele abanye iseluleko, singaragela phambili sibakhuthaze begodu sibasize bathathe iinqunto ezivuthiweko.

17. Abadala basenza sizizwe njani nabasinikela iseluleko esivela eBhayibhelini? Hlathulula. (Isaya 32:​1, 2)

¹⁷ Nje sikutlhoga khulu ukunikela nokufumana iseluleko ukudlula phambilini. (2 Thim. 3:1) Njengombana ‘imilanjana yamanzi endaweni enganamanzi’ ingavuselela umuntu, abadala abanikela iseluleko esivela eBhayibhelini bayasikhuthaza begodu basisiza bona siragele phambili silotjha uJehova. (Funda u-Isaya 32:​1, 2.) Sibathokoza khulu abangani abangariyadi ukusinikela iseluleko nasisitlhogako. Amezwabo afana ‘nama-abhula wegolide esikotlelweni sesiliva.’ (IzA. 25:11) Kwangathi soke singaragela phambili sifunda ukuthi singasinikela besisamukele njani iseluleko.