Qiniseka Bona UJehova Ukulibalele

1-2. Nasilemuka bona uJehova ulibalele izono zethu sizizwa njani? (Qala nesithombe esingaphandle.)

IKOSI uDavida beyazi ukuthi kunjani ukuzizwa umlandu ngebanga lemitjhapho edlulileko. (Rhu. 40:12; 51:3; isethulo) Wenza imitjhapho emikhulu epilwenakhe. Kodwana waphenduka, uJehova wamlibalela. (2 Sam. 12:13) UDavida wathaba khulu ngokwazi ukuthi uJehova umlibalele.—Rhu. 32:1.

² Nathi singathaba nasilemuka bona uJehova usitjengisa umusa begodu ulibalela izono zethu. Kuyaduduza ukwazi bona uJehova uzimisele ukusilibalela izono zethu, ngitjho nezono ezikulu, nange siphenduka kwamambala, sivume izono zethu begodu senze koke okusemandleni bona singasabuyeleli imitjhapho esiyenzileko. (IzA. 28:13; IzE. 26:20; 1 Jwa. 1:9) Kududuza khulu ukwazi ukuthi uJehova nakasilibalelako kuba ngasuthi akhenge siwenze umtjhapho esiwenzileko.—Hez. 33:16.

3-4. Omunye udadwethu wazizwa njani ngemva kokubhajadiswa begodu sizokucoca ngani esihlokwenesi?

³ Ngezinye iinkhathi abanye bangakufumana kubudisi ukwamukela bona uJehova ubalibalele. Akhesicoce ngesibonelo saka-Jennifer, owakhuliselwa emaqinisweni. Nakasese mumuntu omutjha wathoma ukwenza izinto ezimbi begodu wazifihlela ababelethi bakhe. Ngokukhamba kwesikhathi wabuyela kuJehova ngemva kwalokho walungela ukubhajadiswa. Uthi, “Ipilo ebengiyiphila beyizele ukuthanda imali, ukuziphatha kumbi ngokomseme, ukusela khulu begodu bengimumuntu osilingeka khulu. Emkhumbulwenami bengazi bona nange ngingabawa ukulitjalelwa begodu ngiphenduke, umhlatjelo kaKrestu bewuzongenza ngihlwengeke. Kodwana phakathi ehliziywenami bengingakholwa ukuthi uJehova ungilibalele.”

⁴ Kghani ngezinye iinkhathi ucabanga bona uZimu usakukwatele ngebanga lemitjhapho oyenze esikhathini esidlulileko? Khumbula indlela uDavida ebekazizwa ngayo ngomusa kaJehova, bekaqiniseka bona uJehova umlibalele. UJehova ufuna nawe uzizwe ngendlela efanako. Esihlokwenesi, sizokufunda ngokuthi kubayini kuqakathekile ukukholwa ukuthi uJehova usilibalele nokuthi yini engasisiza senze njalo.

KUBAYINI KUQAKATHEKILE UKUKHOLWA BONA UJEHOVA USILIBALELE?

5. Khuyini uSathana afuna siyikholwe? Nikela isibonelo.

⁵ Nasikholwa kwamambala ukuthi uJehova uyasithanda nokuthi usilibalele, angekhe siwakholwe amala kaSathana. Khumbula ukuthi uSathana uzokwenza koke okusemandlenakhe bona asilisise ukulotjha uJehova. Bona enze lokho uSathana uzokulinga ukusenza sicabange ukuthi izono zethu angeze zalitjalelwa. Cabanga ngokwenzeka endodeni yeKorinte, eyaziphatha kumbi ngokomseme ngemva kwalokho yasuswa ebandleni. (1 Kor. 5:​1, 5, 13) Ngokukhamba kwesikhathi yaphenduka kodwana uSathana bekafuna abantu bangayilibaleli, bayiphathe kabuhlungu begodu bangayamukeli. Ngesikhathi esifanako, uSathana bekafuna indoda le izizwe ingalibaleleki ukwenzela bona ‘ihlulwe kudana okudluleleko’ kangangokuthi ilise ukulotjha uJehova. Nanamhlanjesi uSathana akakatjhuguluki kodwana “siyawazi amaqhingakhe.”—2 Kor. 2:​5-11.

6. Nange usazizwa ngasuthi uJehova akakakulibaleli ngemitjhapho owayenza esikhathi esidlulileko, khuyini ongayenza?

⁶ Nasikholwa kwamambala ukuthi uJehova usilibalele imitjhapho esayenza esikhathini esidlulileko, sizokuthaba godu. Nasenza isono sizizwa simlandu. (Rhu. 51:17) Kuhle lokho. Ngebanga lokuthi sizizwa simlandu, singakhuthazeka bona sitjhuguluke bese senze okulungileko. (2 Kor. 7:​10, 11) Nanyana kunjalo, nawusolo uzizwa umlandu isikhathi eside ngebanga lesono osenzileko, ungazifumana sele ufuna ukulahla itewu. Nasikholwa bona uJehova usilibalele, angekhe sisazizwa simlandu. Sizokulotjha uJehova ngendlela afuna simlotjhe ngayo, ngonembeza ohlanzekileko nangethabo. (Kol. 1:​10, 11; 2 Thim. 1:3) Kodwana khuyini engenza sikholwe bona uJehova usilibalele?

KHUYINI ENGASENZA SIKHOLWE BONA UJEHOVA USILIBALELE?

7-8. UJehova wazihlathulula njani kuMosi begodu lokho kusiqinisekisa ngani? (Eksodusi 34:​6, 7)

⁷ Cabanga ngendlela uJehova azihlathulula ngayo. Ngokwesibonelo, ngesikhathi uMosi afuna ukwazi okungeziweko ngoJehova, khumbula bona uJehova wathini.a (Funda u-Eksodusi 34:​6, 7.) Kizo zoke izinto uJehova ebakangazitjho ngaye, wabona kukuhle ukuthi azihlathulule ngalendlela, “nguJehova uZimu onesirhawu nomusa.” Yeke ucabanga bona umuntu othanda uJehova nakenze isono bese aphenduke, uJehova angekhe amlibalele? UJehova angekhe ayenze into ebuhlungu kangaka.

⁸ Singaqiniseka bona uJehova nakathi unesirhawu, usuke akhuluma iqiniso, uJehova akaleyi amala. (Rhu. 31:5) Yeke singakukholwa akutjhoko. Nange kubudisi kuwe ukulisa ukuzizwa umlandu ngezono owazenza kade, zibuze, ‘Ngiyakholwa na bona uJehova unesirhawu begodu unomusa nokuthi uzokuhlala alibalela nanyana ngubani ophendukako esonweni sakhe? Alo, akukafuzi na ngikholwe bona ungilibalele?’

9. IRhubo 32:5 lisifundisani ngendlela uJehova alibalela ngayo izono zethu?

⁹ Cabanga ngalokho uJehova asifundisa khona eBhayibhelini ngendlela asilibalela ngayo. Ngokwesibonelo, cabanga ngendlela uDavida ahlathulula ngayo ukulibalela kwakaJehova. (Funda iRhubo 32:5.) UDavida wathi, “Wabulibalela ubumbi bezono zami.” Igama lesiHebheru elitjho ‘ukulibalela’ lingatjho “ukuphakamisa,” “ukususa” namkha “ukuthwala.” Yeke singatjho ukuthi ngesikhathi uJehova alibalela uDavida waphakamisa isono sakhe wasisusa. UDavida wathaba godu ngombana bekazi bona uJehova umlibalele ngokupheleleko. (Rhu. 32:​2-4) Nathi singaba nethabo elifanako. Nasiphendukako ezonweni zethu, akukafuzi sizizwe simlandu ngombana uJehova uphakamise izono zethu wazisusa kithi, usilibalele ngokupheleleko.

10-11. Amezwi athi “ukulungele nokulibalela” asitjelani ngoJehova? (IRhubo 86:5)

¹⁰ Funda iRhubo 86:5. Evesineli uDavida uthi uJehova “ukulungele nokulibalela.” Lokho kutjho bona uJehova akasilingeki msinya nasenza imitjhapho begodu uhlala afuna ukulibalela abaphendukako. Kubayini uJehova angendlela leyo? Indima elandelako yeveseli ithi, “Ubathanda khulu boke abakubizako.” Njengombana sifundile esihlokweni esigadungileko, ithando elithembekileko lenza uJehova abathande khulu abantu abamlotjhako begodu atjhidelane nabo. Ithando elithembekileko lenza uJehova afune ‘ukuzilibalela ngokutjhaphulukileko’ izoni eziphendukileko. (Isa. 55:7) Nakubudisi kuwe ukukholwa bona uJehova ukulibalele ngomtjhapho owenze esikhathini esidlulileko, ungazibuza umbuzo lo, ‘Ngiyakholwa na bona uJehova uhlala akulungele ukulibalela zoke izoni eziphendukako nezithandaza kuye zibawa bona abe nesirhawu kizo? Nangikholwako, kufuze ngiqiniseke bona uJehova uzongilibalela nangimbawa bona abe nesirhawu kimi nokuthi angilibalele.’

¹¹ IBhayibheli lisitjela ukuthi uJehova uyizwisisa kuhle indlela esidalwe ngayo, uyazi bona sinesono, lokho kuyasiduduza. (Rhu. 139:​1, 2) Akhesibone ukuthi uDavida wathini kelinye irhubo begodu sibone nokuthi lokho kungasisiza njani siqiniseke bona uJehova ufuna ukusilibalela.

KHUYINI UJEHOVA AYIKHUMBULA NGATHI?

12-13. Khuyini uJehova ayikhumbulako begodu usiphatha njani? (IRhubo 103:14)

¹² Funda iRhubo 103:14. UDavida nakakhuluma ngoJehova uthi “uyakhumbula ukuthi silithuli.” Ngamezwi la, uDavida uhlathulula elinye ibanga elenza uJehova akulungele ukulibalela izoni eziphendukako, wazi indlela esidaleke ngayo. Nasizakuzwisisa ngcono, akhe sitjheje amezwi kaDavida.

¹³ UDavida uthi, uJehova “uyazi kuhle indlela esenziwe ngayo.” UJehova wabumba u-Adamu “ngehlabathi” begodu wazi kuhle bona abantu benziwe njani nokuthi batlhogani. Ngokwesibonelo, batlhoga ukudla, ukulala nokuphefumula. Ngitjho nabantu abanganasono bayazitlhoga izintwezi. (Gen. 2:7) Ngebanga lokuthi u-Adamu no-Eva benza isono, ukuba lithuli kwaba nenye ihlathululo. Njengombana sisizukulwana sabo, sibelethwa sinesono begodu kufuze silwisane neemfiso ezimbi. UJehova uyazi bona sinesono begodu uDavida uthi “uyakhumbula.” Yeke, ngebanga lokuthi uJehova uyazi bona sinesono uyasitlhuwela. Singarhunyeza ihlathululo yamezwi kaDavida bunjesi: UJehova uyazi bona ngezinye iinkhathi sizoyenza imitjhapho, nakabona ukuthi siphenduke kwamambala uzokuba nesirhawu, asilibalele.—Rhu. 78:​38, 39.

14. (a) Khuyini okhunye okutjhiwo nguDavida ngokulibalela kwakaJehova? (Rhu. 103:12) (b) Khuyini esingakufunda endleleni uJehova alibalela ngayo uDavida? (Funda ibhoksi elithi, “Indlela UJehova Alibalela Nalibala Ngayo.”)

¹⁴ Khuyini okhunye okungasenza sikholwe bona uJehova usilibalele? (Funda iRhubo 103:12.) “Njengombana ipumalanga ikude netjingalanga” uDavida uthi uJehova nakasilibalelako uzibeka kude ngaleyo ndlela izono zethu. Ipumalanga ikude khulu netjingalanga, iindawo ezimbilezi angeze zahlangana. Lokho kukutjelani ngendlela uJehova asilibalele ngayo? Enye incwadi ekhuluma ngeveseli ithi, uZimu uzidedisela kude khulu nathi izono zethu, kube njengalokha iphunga lento lingasanuki. Yeke singaqiniseka bona angekhe asacabanga namkha asikhumbuze ngazo godu. Ngokwesibonelo, iphunga lokudla namkha lezinye izinto lingakwenza ucabange ngento eyenzeke esikhathini esidlulileko. Lokho kutjho bona uJehova nakasilibalela izono zethu, kuba ngasuthi uzisusa azise kude khulu nathi, kude kangangokuthi akunanto engamenza bona acabange ngazo godu begodu asijezise ngebanga lazo.—Hez. 18:​21, 22; IzE. 3:19.

15. Khuyini esingayenza nange sizizwa simlandu ngemitjhapho esiyenze esikhathini esidlulileko?

¹⁵ Amezwi kaDavida afumaneka kumaRhubo 103 angasisiza njani sikholwe bona uJehova usilibalele? Nangabe usolo uzizwa umlandu ngebanga lemitjhapho oyenze esikhathini esidlulileko, zibuze, ‘Ngiyakulibala na uJehova akukhumbulako, ukuthi uyazi bona nginesono nokuthi uzimisele ukulibalela izoni eziphendukako njengami? Khumbula nokuthi uJehova ukhethe ukungasacabanga namkha ukungasazikhumbuli izono akulibalele zona. Yeke angekhe akujezisele zona godu.’ UJehova akahlali acabanga ngezono esazenza kade. Yeke nathi akukafuzi sisolo sicabanga ngazo. (Rhu. 130:3) Nasikholwako bona uJehova usilibalele, angekhe sisolo sizizwa simlandu begodu sizokuragela phambili silotjha uJehova sithabile.

16. Nikela isibonelo esitjengisa ubungozi bokusolo ucabanga ngesono owasenzako nanyana uJehova sele akulibalele. (Qala nesithombe.)

¹⁶ Cabanga nganasi isibonelo. Ukusolo ucabanga ngesono owasenza kade kungafana nokutjhayela ikoloyi kodwana uqale isiboniboni esikutjengisa okwenzeka ngemva kwekoloyi. Kuhle ukunande uqala isibonibonesi bona ubalekele iingozi ezingakwehlakalela. Kodwana bona utjhayele ngokuphepha, kufuze uqale khulu okwenzeka phambi kwakho. Ngendlela efanako, kungasiza ukunande ukhumbula imitjhapho owayenza esikhathini esidlulileko, kungakwenza uzimisele ukungasayibuyeleli. Kodwana nasihlala sicabanga ngemitjhapho enjalo, kungasenza sihlale sizizwa simlandu begodu singalotjhi uJehova ngamandlethu woke. Kunalokho asiqaleni khulu endleleni esitjhinga kiyo. Sisendleleni etjhinga ephasini uZimu asithembise lona, lapho ‘izinto zekuthomeni zingekhe zisakhunjulwa.’—Isa. 65:17; IzA. 4:25.

RAGELA PHAMBILI UQINISEKISA IHLIZIYWAKHO

17. Kubayini kufuze siqiniseke bona uJehova uyasithanda nokuthi uhlala akulungele ukusilibalela?

¹⁷ Kufuze sikholwe bona uJehova uyasithanda nokuthi uhlala akulungele ukusilibalela. (1 Jwa. 3:19) Kubayini? Ngombana uSathana uzokuhlala alinga ukusenza sikholwe bona sinesono nokuthi uJehova angeze asithanda namkha asilibalele nasenze imitjhapho. Umnqophwakhe kukuthi asilisise ukulotjha uJehova. Lezi ziindlela uSathana azisebenzisako bona asilisise ukulotjha uJehova kodwana uzokulinga khudlwana ngombana uyazi bona isikhathi sakhe sifitjhani. (IsAm. 12:12) Kodwana kufuze silwisane noSathana begodu siragele phambili silotjha uJehova ngokuthembeka.

18. Khuyini ongayenza bona uqiniseke ngokuthi uJehova uyakuthanda nokuthi uhlala akulungele ukukulibalela?

¹⁸ Nawuzakuqiniseka ngokuthi uJehova uyakuthanda, sebenzisa izinto esifunde ngazo esihlokweni esidlulileko. Bona uqiniseke ngokuthi uJehova ukulibalele, cabangisisa ngendlela uJehova azihlathulula ngayo. Cabangisisa nangalokho iBhayibheli elikutjhoko ngendlela uJehova alibalela ngayo. Ungalibali bona wazi kuhle ukuthi unesono begodu uzokurhawukela nawenze imitjhapho. Khumbula bona nakakulibalelako, ukulibalela ngokupheleleko. Uzokuthaba ngombana uyaqiniseka ukuthi uJehova uzokurhawukela begodu nawe ungakhuluma njengoDavida uthi, “Ngiyathokoza Jehova ngokuthi ulibalele ‘ubumbi bezono zami’!”—Rhu. 32:5.