Ungalibali Ukuthandazela Abanye

1. Sazi njani bona imithandazwethu iqakathekile kuJehova?

UMTHANDAZO sisipho esihle khulu. Akhucabange ngalokhu, uJehova wabele iingilozi imisebenzi eminengi. (Rhu. 91:11) Unikele neNdodanakhe imisebenzi eqakatheke khulu. (Mat. 28:18) Kodwana kuthiwani naziza ekulaleleni imithandazo? UJehova ngokwakhe uyazilalelela imithandazo. UJehova ‘uMuzwi womthandazo,’ uyilalela yena ngokwakhe imithandazo.—Rhu. 65:2.

2. Ngisiphi isibonelo umpostoli uPowula asitjhiyele sona naziza endabeni yokuthandazela abanye?

² Singathululela uJehova isifuba sethu ngezinto ezisitshwenyako kodwana kufuze sithandazele nabanye. Ngilokho umpostoli uPowula akwenzako. Ngokwesibonelo, watlolela ibandla le-Efesu wathi, “Ngiragela phambili ngikhuluma ngani emithandazwenami.” (Efe. 1:16) UPowula bekabathandazela abanye. Ngokwesibonelo watjela uThimothi bona, “Ngiyathaba ngoZimu, . . . akhenge ngilise ukukukhumbula ekurabheleni kwami ubusuku nemini.” (2 Thim. 1:3) UPowula bekanezinto ezimtshwenyako ebekangathandaza ngazo. (2 Kor. 11:23; 12:​7, 8) Nanyana kunjalo, wenza isikhathi sokuthandazela nabanye.

3. Kubayini singalibala ukuthandazela abanye?

³ Ngezinye iinkhathi singalibala ukuthandazela abanye. Kubayini? Udadwethu u-Sabrinaa uhlathulula elinye ibanga. Uthi, “Ukuphila ephasineli kubudisi. Kulula ukudzimelela khulu emirarweni oqalene nayo bese uthandazela kwaphela izinto ozitlhogako.” Kuyenzeka na kuwe lokho? Nangabe kunjalo, isihlokwesi sizokusiza. (1) Sizokuhlathulula bona kubayini kuqakathekile ukuthandazela abanye begodu (2) sizositjengisa ukuthi singakwenza njani lokho.

KUBAYINI KUFUZE SITHANDAZELE ABANYE?

4-5. Kubayini imithandazo esiyenzela abanye ingaba ‘nemiphumela enamandla’? (Jakopo 5:16)

⁴ Ukuthandazela abanye kungaba ‘nemiphumela enamandla.’ (Funda uJakopo 5:16.) Kghani ukuthandazela abanye kungatjhugulula indlela izinto ezenzeka ngayo kwamambala? Iye kungazitjhugulula. UJesu njengombana bekazi bona uPitrosi uzomphika kungasi kade wathi, “Ngikubawele bona ukukholwa kwakho kungapheli.” (Luk. 22:32) UPowula naye bekazi bona ukuthandaza kungatjhugulula izinto. Ngesikhathi abotjhwe kungakafaneli eRoma, watlolela uFilimoni wathi, “Nginethemba lokobana ngemithandazwenu ngizokubuyiselwa kini.” (Flm. 22) Ngilokho okwenzekako, uPowula watjhatjhululwa ejele, watjhumayela godu.

⁵ Nokho lokho akutjho bona singakatelela uJehova bona enze izinto esizithandazelako. Uyazibona izinto ezitshwenya abantu bakhe begodu ngezinye iinkhathi wenza ngokuvumelana nalokho abakubawako. Ukwazi lokho kuzosisiza bona sithandaze kuJehova ngehliziyo yoke, ngemva kwalokho siqiniseke ngokuthi uzokwenza okulungileko.—Rhu. 37:​5, 2 Kor. 1:11.

6. Ukuthandazela abanye kungasenza sizizwe njani ngabo? (1 Pitrosi 3:8)

⁶ Ukuthandazela abanye kungasisiza ‘sibe nesirhawu.’ (Funda yoku-1 kaPitrosi 3:8.) Umuntu onesirhawu, uyakubona abanye abantu abaqalene nakho bese afune ukubasiza. (Mar. 1:​40, 41) U-Micheal ongumdala webandla uthi, “Nangithandazela abanye ngezinto abazitlhogako, ngibuzwisisa ngcono ubujamo babo begodu lokho kungenza ngibathande khulu. Ngizizwa ngitjhidelene nabo ngitjho nanyana bona bangakwazi lokho.” U-Richard naye ongumdala uthi, “Nasithandazela umuntu othileko sikhuthazeka bona senze okuthileko ukumsiza.” Ungezelela ngokuthi, “Nasisiza umuntu ebesimthandazela ngezinto azitlhogako, ngezinga elithileko sisiza ekuphenduleni umthandazo esimenzele wona.”

7. Ukuthandazela abanye kungasisiza njani singadzimeleli kwaphela emirarweni thina esinayo? (Filipi 2:​3, 4) (Qala neenthombe.)

⁷ Ukuthandazela abanye kusisiza siqale imiraro esinayo ngendlela efaneleko. (Funda kwebeFilipi 2:​3, 4.) Ngebanga lokuthi siphila ephasini elilawulwa nguDeveli, soke sihlangabezana nemiraro. (1 Jwa. 5:19; IsAm. 12:12) Nasizijayeza ukuthandazela abanye sizikhumbuza ukuthi, “yoke ihlangano [yabafowethu] ephasini iqalana nemitlhago efanako.” (1 Pit. 5:9) Udadwethu oliphayona u-Katherine uthi, “Ukuthandazela abanye kungikhumbuza bona nabanye abantu bayaqalana nemiraro. Ukwazi lokho kungisiza ngingasolo ngidzimelele khulu emirarwenami.”

BATLHOGA IMITHANDAZWETHU

8. Nikela iimbonelo zokuthi bonani esingabathandazela.

⁸ Bonani esingabathandazela? Singathandazela abantu abanengi, ngokwesibonelo singathandazela abantu abanemiraro yezamaphilo, abantu abatjha abaqalene nokugandelelwa esikolweni nalabo abaqalene nemiraro yokuluphala. Abantu abanengi esilotjha nabo uJehova baqalene nokuphikiswa, kungaba semindenini namkha kiborhulumende. (Mat. 10:​18, 36; IzE. 12:5) Abanye abafowethu nabodadwethu kutlhogeke batjhiye amakhaya ngebanga lezepolotiki. Abanye baqalene nemiraro ngebanga leenhlekelele zemvelo. Kungenzeka asibazi abafowethu nabodadwethwaba. Kodwana nasibathandazelako, sitjengisa bona silalela umyalo kaJesu othi, ‘sithandane.’—Jwa. 13:34.

9. Kubayini kufuze sithandazele abafowethu abadosa phambili ehlanganweni kaJehova nabomkabo?

⁹ Kufuze sithandazele abafowethu abadosa phambili ehlanganweni kaJehova. Lokho kuhlanganisa IsiHlopha EsiBusako nabasizi baso, Amakomidi wamaGatja, nabafowethu ababatlhogomeli ema-ofisini wegatja, abajikelezi, abadala bamabandla neenceku ezisizako. Abanengi ebafowethwinaba banemiraro abaqalene nayo njengombana basebenza budisi bona basisize. (2 Kor. 12:15) Ngokwesibonelo umjikelezi igama lakhe elingu-Mark uthi, “Omunye wemiraro engiqalene nawo kukuthi ngibe kude nababelethi bami esele baluphala. Begodu bobabili bayagula. Ngitjho nanyana udadwethu nosbari babatlhogomela kodwana kungizwisa ubuhlungu ukuthi kuncani mina engikghona ukubenzela khona.” Kunganandaba bona siyayazi imiraro abafowethu abasebenza budisaba abaqalene nayo namkha awa kodwana sizabe senza kuhle ngokuthi sibathandazele. (1 Thes. 5:​12, 13) Kufuze sithandazele namakhosikazi wabafowethwaba, njengombana asekela amadodabo ezabelweni zawo.

10-11. Kghani uJehova uyathaba na ngemithandazwethu nasingabatjho ngamagama abafowethu nabodadwethu? Hlathulula.

¹⁰ Njengombana sicocile, sithandazela abafowethu nabodadwethu abanengi. Ngokwesibonelo, ngitjho nanyana singacabangi ngomfowethu namkha udadwethu othileko, singabawa bona uJehova asize abafowethu nabodadwethu abasemajele namkha simbawe bona aduduze abahlongakalelweko. Umdala ibizo lakhe elingu-Donald uthi, “Kunabafowethu nabodadwethu abanengi abaqalene neenkhathi ezibudisi esibathandazelako, sihlanganisa boke abaqalene nemiraro.”

¹¹ Kghani imithandazo enjalo iyamthabisa uJehova? Iye, iyamthabisa. Asazi ukuthi abafowethu nabodadwethu boke baqalene nani. Yeke singenza umthandazo obafaka boke. (Jwa. 17:20; Efe. 6:18) Imithandazo enjalo inikela ubufakazi bokuthi ‘sithanda yoke ihlangano yabafowethu.’—1 Pit. 2:17.

NASITHANDAZELA UMUNTU OTHILEKO

12. Ukutjhejisisa kungasisiza njani nasithandazela abafowethu nabodadwethu?

¹² Tjhejisisa. Ukungezelela ekuthandazeleni abafowethu nabodadwethu abanengi, kuhle nokuthandazela omunye nomunye wabo, sibabize ngamagama. Kghani kunomfowethu namkha udadwethu ebandleni omaziko bona uphethwe kugula okuthileko? Kghani kunomfowethu namkha udadwethu ebandleni obonakala adanile mhlamunye ngebanga lokugandelelwa aqalana nakho esikolweni? Kghani kunombelethi odosa budisi ngokukhulisa abantwana ayedwa “ngesiyalo nangesinqophiso sakaJehova”? (Efe. 6:4) Ngokutjhejisisa, uzokwandisa ithando nezwelo onalo ngabafowethu nabodadwethu begodu uzokukhuthazeka bona ubathandazele.b—Rom. 12:15.

13. Singabathandazela njani abantu esingabaziko?

¹³ Thandazela abantu usebenzise amagamabo. Singakwenza lokho ngitjho nangabantu esingakhenge khesihlangane nabo. Ngokwesibonelo, cabanga ngabafowethu nabodadwethu abasemajele eenarheni ezinjenge-Crimea, e-Eritrea, e-Russia, ne-Singapore. Ungafumana amagamabo ku-jw.org.c U-Brian ongumjikelezi uthi, “Ukutlola amagama wabafowethu nabodadwethu abasemajele phasi bese ngiwatjhwele phezulu, kungisiza ngibakhumbule begodu ngibathandazele.”

14-15. Singathandaza njani ngezinto ezinqophileko?

¹⁴ Thandaza ngezinto ezinqophileko. U-Micheal ekhesakhuluma ngaye phambilini uthi, “Njengombana ngifunda ngabafowethu nabodadwethu abasemajele ku-jw.org, ngilinga ukucabanga bona bengizozizwa njani ngathana ngisebujamweni babo. Ngiyazi bona bengizokutshwenyeka ngomkami begodu bengizokufuna ukuqinisekisa bona uzokutlhogomeleka. Lokho kwenza ngibe nezinto ezinqophileko engingathandaza ngazo ngabafowethu ababotjhiweko abatjhadileko.”—Heb. 13:​3, ftn.

¹⁵ Nasicabanga ngokuthi kunjani ukuphila qobe langa ejele, kuzosenza sibe nezinto ezinqophileko esingathandaza ngazo nasithandazela abafowethu nabodadwethu abasemajele. Ngokwesibonelo, singathandazela bona abonogada babe nomusa kubafowethu nabodadwethu, singathandazela nokuthi abaseenkhundleni eziphezulu babavumele balotjhe uJehova ngokutjhaphulukileko. (1 Thim. 2:​1, 2) Singathandaza bona amabandla eseduze akhuthazeke nakabona ukuthembeka kwabafowethu ababotjhiweko namkha ukuthi abantu abangasiboFakazi bakaJehova babone ukuziphatha kuhle kwabafowethu ababotjhiweko begodu kubenze balalele umlayezwethu. (1 Pit. 2:12) Singenza okufanako nasithandazela abafowethu nabodadwethu abakghodlhelelela iintjhijilo. Ngokutjhejisisa, ukubiza abafowethu nabodadwethu ngamagama, nokunqopha nasithandazako singatjengisa bona “siyaphuphuma ekuthandaneni.”—1 Thes. 3:12.

UKUTHANDAZA NGENDLELA EFANELEKO

16. Singathandaza njani ngendlela efaneleko? (Matewu 6:8)

¹⁶ Njengombana sibonile, imithandazwethu ingatjhugulula indlela izinto ezenzeka ngayo. Nanyana kunjalo, kufuze siwuqale ngendlela efaneleko umthandazwethu. Nasithandazako, sisuke singatjeli uJehova into angayaziko begodu akukafuzi simtjele bona awusombulule njani umraro esimtjela ngawo. UJehova uyazi bona iinceku zakhe zitlhogani ngaphambi kobana zona, namkha thina sazi. (Funda uMatewu 6:8.) Alo kubayini kufuze sithandazele abanye? Ngaphandle kwamabanga esele sicoce ngawo, elinye ibanga kukuthi siyabathanda abantu. Ithando lisikhuthaza bona sithandazelane. Begodu kuyamthabisa uJehova ukubona abantu balingisa yena ekutjengiseni ithando.

17-18. Umthandazo esiwenzela abantu esilotjha nabo uJehova ungafaniswa nani?

¹⁷ Ngitjho nanyana umthandazwethu ungeze watjhugulula indlela izinto ezenzeka ngayo, utjengisa bona siyabathanda abafowethu nabodadwethu begodu uJehova uyakubona lokho. Ngokwesibonelo, cabanga ngomndeni onabantwana ababili, umsana nomntazana. Umsana uyagula begodu ulele embhedeni. Umntazana uthi kuyise, “Ngibawa wenzele umfowethu okuthileko. Uyagula!” Ubaba lo uyazi ukuthi indodanakhe iyagula begodu wenza okusemandlenakhe bona ayisize, uyayithanda indodanakhe begodu uyayitlhogomela. Nanyana kunjalo, kumthabisa khulu ubaba lo nakezwa indodakazakhe itshwenyeke ngomfowabo kangangobana imbawe bona ayisize.

¹⁸ Ngilokho uJehova asikhuthaza bona sikwenze, ufuna sithandane begodu sithandazelane. Njengombana senza njalo, sitjengisa bona asizicabangeli thina sisodwa kodwana siyatshwenyeka ngabanye begodu uJehova uyakubona lokho. (2 Thes. 1:3; Heb. 6:10) Njengombana sicocile, kobunye ubujamo imithandazwethu ingatjhugulula indlela izinto ezenzeka ngayo. Yeke, asenzeni koke okusemandleni bona sikhumbule ukuthandazelana.