AboFakazi BakaJehova Babaphatha Njani Labo Ebebamalunga Wekolwabo?

Senza koke okusemandlenethu ukuphatha woke umuntu ngethando, ngomusa nangehlonipho. Nangabe omunye waboFakazi bakaJehova akasalotjhi qobe namkha sekalisile ukulotjha uJehova, siyamvakatjhelaa simqinisekise ukuthi siyamthanda besilinge ukuvuselela ithando lakhe ngoZimu.—Lukasi 15:4-7.

Kobunye ubujamo, umuntu angenza into engabangela bona asuswe ebandleni. (1 Korinte 5:13) Nanyana kunjalo, ngebanga lokuthi sibathanda khulu esikholwa kunye nabo, senza koke okusemandlenethu bona sisize umuntu loyo khona angazokususwa ebandleni. Nanyana sekasusiwe, siragela phambili senza lokho iBhayibheli elisikhuthaza bona sikwenze, simtjengisa ithando nehlonipho.—Markosi 12:31; 1 Pitrosi 2:17.

Khuyini ebangela bona umuntu asuswe ebandleni?

IBhayibheli lithi nange umKrestu enze isono esikhulu begodu angatjhuguluki, kufuze asuswe ebandleni. (1 Korinte 5:11-13) IBhayibheli liyatjho ukuthi ngiziphi izono ezikulu ezingabangela bona umuntu asuswe ebandleni. Ngokwesibonelo, libala izono ezifana nokufeba, ukudakwa, ukubulala, ukuhlunguphaza amalunga womndenakho nokweba.—1 Korinte 6:9, 10; Galatiya 5:19-21; 1 Thimothi 1:9, 10.

Nanyana kunjalo, umuntu owenze isono esikhulu akasuswa khonokho ebandleni. Abadala bebandlab bazokuthoma ngokulinga ukumsiza bona atjhuguluke esonweni sakhe. (Roma 2:4) Balinga ukumlungisa ngomoya ophasi begodu bamphatha kuhle nangomusa. (Galatiya 6:1) Indlela le ingenza isoni sibone umtjhaphaso besitjhuguluke. (2 Thimothi 2:24-26) Abadala nasele benze koke bona bamsize kodwana angatjhuguluki kunalokho aragele phambili nokwenza lokho iBhayibheli elithi akukalungi, umuntu onjalo kufuze asuswe ebandleni. Bese abadala bazokumemezela ebandleni ukuthi umuntu loyo akasasingomunye waboFakazi bakaJehova.

Ngimiphi imiphumela emihle eba khona ngokususa umuntu ongatjhugulukiko ebandleni? Kokuthoma, ibandla lihlala likhambisana neenkambiso zakaZimu zokuziphatha ngokucwengileko begodu liyavikeleka emtheleleni omumbi womuntu loyo. (1 Korinte 5:6; 15:33; 1 Pitrosi 1:16) Kwesibili, isoni singalisa ukwenza isono begodu senze koke bona sitjhuguluke.—Hebheru 12:11.

AboFakazi bakaJehova babaphatha njani labo abasusiweko ebandleni?

IBhayibheli lithi amaKrestu kufuze ‘alise ukuzihlanganisa’ nomuntu osusiweko ebandleni, ‘angadli ngitjho nokudla nomuntu onjalo.’ (1 Korinte 5:11) Yeke, asimkhulumisi umuntu osusiweko ebandleni. Nanyana kunjalo, asimbethisi ngomoya ngokupheleleko. Simphatha ngehlonipho. Wamukelekile ukuza emihlanganwenethu begodu abanye bangakhetha nokumlotjhisa.c Angabawa nabadala bona bamsize afanelekele ukubuyela ebandleni godu.

Kuthiwani-ke nange umuntu asuswa ebandleni kodwana umlinganakhe nabantwana bakhe baseseboFakazi bakaJehova? Nanyana angasalotjhi uJehova nomndenakhe kodwana useselilunga lomndeni. Njengombana bahlala ndawonye, itjhebiswano ebekanalo nomlinganakhe nabantwana bakhe liragela phambili begodu boke kufuze baphathane ngethando.

Umuntu osusiweko angabawa abadala bona bamvakatjhele, bazomnikela iseluleko esinethando esivela eBhayibhelini begodu bazomkhuthaza bona atjhuguluke bekabuyele kuZimu. (Zakariya 1:3) Nangabe uyalisa ukwenza okungakalungi bekatjengise ngezenzo ukuthi ufuna ukuphila ngeenkambiso zeBhayibheli zokuziphatha, angabuya abe yingcenye yebandla godu. Ibandla ‘lizomlibalela ngomusa belimduduze,’ njengombana kwenza amaKrestu weKorinte lokha isoni nasilisa ukona.—2 Korinte 2:6-8.

Labo ekhebasuswa bazizwa njani nje?

Tjheja okutjhiwo ngabanye aboFakazi bakaJehova ekhebasuswa ebandleni kwathi ngokukhamba kwesikhathi baqunta ukubuyela kuZimu.

“Nangiqunta ukubuyela ebandleni, bengicabanga ukuthi abadala bazokufuna ukwazi koke engikwenzileko hlangana neminyaka eminengi yokususwa kwami. Kunalokho, sebathi, ‘Sifuna udzimelele kilokho ozokwenza ukusukela nje kuragele phambili.’ Ngathi nangizwa lokho, ngatjhaphuluka.”—U-Maria, We-United States.

“Ibandla lathaba khulu ngokubuya kwami. Ngazizwa ngamukelekile. Abafowethu nabodadwethu ebandleni bangisiza ngabona ukuthi uJehova ungilibalele begodu nabo bangilibalele, lokho kwangisiza ngalisa ukuzizwa ngimlandu ngebanga lezinto ezingakalungi engazenzako. Abadala bebahlala bangisiza bona ngivuselele ubuhlobo bami noZimu. Bangiduduza bebangisiza ngabona ukuthi kuJehova ngisaqakathekile begodu usangithanda.”—U-Malcom, We-Sierra Leone.

“Iyangithabisa indlela uJehova abathanda ngayo abantu bakhe nendlela aqinisekisa ngayo ukuthi ihlanganwakhe ihlala ihlwengile. Nanyana kwabanye kungabonakala kungasilithando ukususa isoni ebandleni kodwana kufuze kwenziwe begodu lokho sisenzo sethando. Kuyangithokozisa ukuthi ubabethu wezulwini unguZimu onethando nolibalelako.”—U-Sandi, We-United States.