IVuko LakaJesu LiTjho UkuPhila!

UKUVUSWA kwakaJesu akusisisehlakalo esenzeka ekadeni esingatjho litho kithi namhlanje. Umpostoli uPowula watjengisa ukuqakatheka kwakho nekatlola asithi: “UKrestu uvusiwe kabafileko, yena osithelo sokuthoma sabaleleko. Njengombana ukufa kweza ngomuntu, kunjalo nokuvuka kwabafileko kuza ngomuntu. Njengombana ku-Adamu boke bayafa, ngokunjalo kuKrestu bazakuvuswa.”—1 Korinte 15:20-22.

UJesu wavuswa ngoNisan 16, 33 C.E., ngelanga amaJuda anikela ngalo ngeenthelo zokuthoma zokusanthoro kuJehova uZimu ethempelini elicwengileko eJerusalema. Ngokubiza uJesu ngeenthelo zokuthoma, uPowula bekatjho bona kuzokuba khona abanye abazokuvuswa.

Amezwi kaPowula alandelako ahlathulula lokho okwenziwa livuko lakaJesu. UPowula wathi, “Njengombana ukufa kweza ngomuntu, kunjalo nokuvuka kwabafileko kuza ngomuntu.” Ngebanga lesono nokungapheleli okwadluliselwa kithi ngu-Adamu, soke siyafa. Nokho, ngokunikela ngobuntu bakhe obupheleleko njengomhlatjelo, uJesu wavulela abantu indlela yokutjhatjhululwa ekugqilazweni sisono nokufa ngevuko. Asonga indaba le kamnandi, uPowula watlola kwebeRoma 6:23 wathi: “Umvuzo wesono kukufa; kodwana isipho somusa kaZimu sikuphila okungapheliko ngoKrestu uJesu iKosethu.”

UJesu wahlathulula lokho okutjhiwo ukufa nokuvuswa kwakhe kithi. Aqalise kuye ngokwakhe, wathi: ‘INdodana yomuntu kufanele iphakanyiswe, bona kuthi loyo okholwa kiyo abe nepilo engapheliko. Mbala uZimu walithanda kangaka iphasi, wabe wanikela ngeNdodanakhe ebelethwe yodwa, khona kuzakuthi loyo okholwa kiyo angabhubhi, kodwana abe nepilo engapheliko.’—Jwanisi 3:14-16.

Akhucabange—ukuphila okungapheliko ngaphandle kobuhlungu, ukutlhaga nofana amatluwo! (IsAmbulo 21:3, 4) Qala bona ingomuso elithabisa kangangani lelo! Esinye isazi sihlathulula indaba le bunje: “Nanyana amathuna angakhumbuza umuntu ngobufitjhani bokuphila, ivuko liyasiqinisekisa bonyana nokufa kungokwesikhatjhana.” Kwamambala, ivuko lakaJesu litjho ukuphila!