Nqophisa Amadubulo Wakho Ngokuhlakanipha
1. Yoku-1 KwebeKorinte 9:26 isebenza njani ekonzweni?
1 Umpostoli uPowula watlola: “Ngikho lokhu ngigijima thwi ngiphikelela ekunqopheni, ngikho ngilingisa umbethi wesidubulo ongakhuthi abethe umoya.” (1 Kor. 9:26) UPowula bekaqalisele ekubeni kwakhe nomkhumbulo munye nekudzimeleleni kwakhe ukufikelela iimnqopho engokomoya. Nokho, ngokwekambisolawulo, amezwi la asebenza nekonzweni. Sifuna ukunqophisa ‘amadubulo,’ namtjhana iimzamwethu, ngokuhlakanipha khona izakuba nephumela eminengi emihle. Njani?
2. Singamlingisa njani uPowula nabanye abavangeli bangekhulu lokuthoma ekukhetheni indawo nesikhathi sokutjhumayela?
2 Iya Lapho Abantu Bafumaneka Khona: UPowula nabanye abavangeli bekhulu lokuthoma bebatjhumayela eendaweni ebebalindele bona zibe nabantu. (IZe. 5:42; 16:13; 17:17) Ngalokho nengabe abanengi esiminethu basemakhaya ntambama, lesi kungaba sikhathi esingcono khulu sokutjhumayela endlini ngendlu. Kghani isitetjhi seembhesi namtjhana sesitimela sangakhenu siyatinazela ngamathathakusa nantambama abantu nebaya namtjhana babuya emsebenzini? Kunini lapho iintolo zangekhenu ziba nabantu abanengi khona? Ukufakaza endleleni kungaphumelela khulu ngeenkhathezo.
3. Singawanqopha njani amadubulwethu ngokuhlakanipha endleleni esisebenza ngayo isimethu?
3 Sebenzani Isimu Ngokuhlakanipha: Godu kufuze sitlhogomele bona sinqophisa amadubulwethu ngokuhlakanipha endleleni esisebenza ngayo isimethu. Ngokwesibonelo, esikhundleni sokuthatha isiqhema esikhulu siyokusebenza indawo yinye, lapho kungatlhogeka umzamo nesikhathi esinengi ukusibulunga sihlophisekile begodu simajadu, kungaba ngcono ukusihlukanisa. Ngokufanako, nesisebenza isimu yemaphandleni, sizoyihlanganisa msinyana isimu begodu sibe namathuba amanengi wokukhuluma nengabe iinqhema azibi zikhulu ngokweqileko. Kghani singafumana isimu yomuntu mathupha eseduze nalapho sihlala khona, okungaphungula isikhathi sokuya lapho isimu ikhona?
4. Khuyini ezosisiza bona sibe “babambi babantu” abaphumelelako?
4 UJesu wafanisa ukutjhumayela nokuthiya iimfesi. (Mar. 1:17) Umqopho womthiyi weemfesi akusikufaka inede emanzini kwaphela kodwana kubamba iimfesi. Ngalokho, abathiyi abaphumelelako bathiya ngesikhathi begodu endaweni abalindele ukufumana kiyo iimfesi, begodu bathoma ukuthiya ngaphandle kokumorosa isikhathi. Kwamambala, banqophisa iimzamwabo ngokuhlakanipha. Kwanga singatjengisa ikuthalo efanako ekonzwenethu.—Heb. 6:11.