Zuza Eemfundisweni Ezivela KuJehova

1, 2. (a) AboFakazi bakaJehova bazizwa njani ngeBhayibheli? (b) Wena-ke ngimuphi umtlolo weBhayibheli owuthandako?

KUYAZIWA bona aboFakazi bakaJehova bayayithanda iBhayibheli. Kungombana lisinikela ithemba, liyasiduduza begodu lisinikela neenqophiso ezithembekileko. (Roma 15:4) Kazi alisiyincwadi enomqondo wabantu, kodwana ‘ililizwi lakaZimu.’—1 Thesalonika 2:13.

² Soke sinamavesi esiwathandako eBhayibhelini. Abanye bethu bathanda amavangeli, ngombana abutjengisa kuhle ubuntu bakaJehova lokha nakathumela uJesu ephasinapha. (Jwanisi 14:9) Bese kuthi abanye bona bazithandela amavesi akhuluma khulu ngeemphorofido njengesAmbulo esikhuluma ‘ngokufanele kwenzeke msinyana.’ (IsAmbulo 1:1) Kube khona nabazithandela amaRhubo ngombana ayabaduduza, nabazithandela izAga ngombana bafuna iinluleko ezilirhelebho. Kuyakhanya-ke bona iBhayibheli yincwadi yabo boke abantu.

3, 4. (a) Sizizwa njani ngalokho uJehova asenzela khona? (b) Phakathi neencwadi zethu esizifumanako, ngikuphi okhunye okwenzelwe abantu abathileko?

³ Ngebanga lokuthi sithanda iBhayibheli siyazithanda neencwadi zethu ngombana zisekelwe kilo iliZwi lakaZimu. Koke ziincwadi, bomagazini, maphetjhana kuvela kuJehova. Begodu kuyasirhelebha bona sihlale sitjhidela kuJehova besihlale sinokukholwa okuqinileko.—Titosi 2:2.

⁴ Iincwadi zethu ezinengi zitlolelwe thina kuhle kuhle. Kodwana zikhamba zihluka, zikhona ezitlolelwe ilutjha namkha ababelethi. Bese kuthi amavidiyo amanengi afumaneka kuzinzolwazi lethu wona enzelwe abantu abangasiboFakazi bakaJehova. Koke lokho kubufakazi bokuthi uJehova usibulungile isithembiso sakhe sokuthi uzosifundisa ngeendlela ezinengi.—Isaya 25:6.

5. Yini ethabisa uJehova?

⁵ Inengi lethu liyafisa ukuba nesikhathi esinengi sokufunda iBhayibheli nezinye iincwadi ezisekelwe kilo. Kodwana angeze sakghona ukufunda zoke iincwadi zethu ngesikhathi esilinganako. Yeke uJehova angathaba khulu nange singasebenzisa isikhathi sethu kuhle, ukuze sibe nesikhathi sokufunda iBhayibheli neencwadi zethu. (Efesu 5:15, 16) Nanyana kunjalo kunengozi okufuze siyibalekele. Ngiyiphi ingozi leyo?

6. Yini engasibangela bona kube khona okusiphundako eemfundisweni zakaJehova?

⁶ Nasingakayeleli singathoma sicabange ukuthi amanye amavesi weBhayibheli akasebenzi kithi namkha ezinye iincwadi azisithinti. Kuthiwani nangabe uzizwa kwanga amavesi athileko akasebenzi kuwe? Namkha isihloko esithileko asikuthinti? Uyasifunda na isihlokweso namkha uvele usiphayele eqadi? Nangabe wenza njalo kufuze wazi ukuthi uphundwa lilwazi elinengi tle. Alo singayibalekela njani ingozi le? Kufuze sikhumbule ukuthi ilwazelo livela kuJehova. IBhayibheli lithi, “Mina [Jehova] nginguZimakho okufundisako ukuze kukukhambele kuhle.” (Isaya 48:17) Esihlokwenesi sizokufunda ngezinto ezinthathu ezizosirhelebha sizuze eemfundisweni zakaJehova.

IZINTO EZIZOSISIZA SIFUNDE IBHAYIBHELI NGENDLELA EPHUMELELAKO

7. Kubayini kufuze sifunde iBhayibheli ngomkhumbulo ovulekileko?

⁷ Nawufundako vula umkhumbulwakho. Iye khona kuliqiniso ukuthi amanye amavesi eBhayibhelini atlolelwa abantu abathileko. Kodwana iBhayibheli ithi, ‘Yoke imitlolo iphefumulelwe nguZimu,’ begodu iyazuzisa. (2 Thimothi 3:16) Kungakho kufuze sivule umkhumbulo nasifunda iBhayibheli. Omunye umzalwana nakafunda iBhayibheli uhlala akhumbula ukuthi kunengi angakufunda ekulandiseni okukodwa kwalo. Lokho kumsiza khulu ngani ngoba ukghona nokufunda iimfundo ezingasi sebaleni. Yeke kuqakatheke khulu ukuthi ngaphambi kokufunda iBhayibheli, kufuze sibawe uJehova asisize sibe nomkhumbulo ovulekileko, asiphe nokuhlakanipha. Ukuze sizwisise besifumane neemfundo ezinengi.—Ezra 7:10; funda uJakopo 1:5.

8, 9. (a) Ngimiphi imibuzo esingazibuza yona nasifunda iBhayibheli? (b) Ubuntu babadala bungasitjelani ngoJehova?

⁸ Zibuze imibuzo. Nawufunda iBhayibheli akhujame, bese uzibuze nasi imibuzo: ‘Lokhu kungitjelani ngoJehova? Ngingakusebenzisa njani epilwenami? Ngingabasiza njani abanye abantu?’ Nasingacabanga ngemibuzo le, sizokufunda litho likhulu eBhayibhelini. Akhesiqale isibonelo salokho. IBhayibheli isitjela ngobuntu umzalwana okufuze abe nabo nakafuna ukuba ngumdala. (Funda 1 Thimothi 3:2-7.) Nanyana inengi lethu lingasibadala, kodwana kukhona esingakufunda elwazinelo. Yeke akhesibone ukuthi singayisebenzisa njani imibuzo engehla le malungana nobuntu okufuze abadala babe nabo.

⁹ “Lokhu kungitjelani ngoJehova?” UJehova usazisile bona abadala kufuze babe babantu abanjani. Ulindele bona kube madoda avuthiweko atlhogomela ibandla. Lokho kusitjela ukuthi ibandla liqakathekile kuye. IBhayibheli ithi walithenga “ngeengazi zeNdodanakhe.” (IzEnzo 20:28) Yeke uJehova ufuna abadala babeziimbonelo zokulingiswa, ngombana bazokulandisa ngendlela abaphatha ngayo ibandla. Ufuna sizizwe sivikelekile nabasitlhogomelako. (Isaya 32:1, 2) Kuyakhanya ukuthi nasingafunda ngobuntu uJehova afuna abadala babe nabo sizokubona indlela uJehova asithanda ngayo.

10, 11. (a) Nasifunda ngobuntu babadala, lokho kungasirhelebha njani ekuphileni kwethu? (b) Singalisebenzisa njani ilwazelo ukuze sirhelebhe abanye?

¹⁰ “Ngingakusebenzisa njani epilwenami?” Nange ungumdala kufuze uhlale ubuhlola ubuntu uJehova afuna ube nabo bewubuthuthukise. Nangabe “ulangazelela ukuba mbonisi,” kufuze ulinge ngamandla ukuba nobuntobo. (1 Thimothi 3:1) Ekufuze singakulibali kukuthi soke singafunda ebuntwinobo. Ngokwesibonelo, uJehova ufuna soke sibe babantu abanengqondo begodu sahlulele kuhle. (Filipi 4:5; 1 Pitrosi 4:7) Abadala kufuze babe “ziimbonelo emhlambini,” ukuze silingise ‘ukukholwa kwabo.’—1 Pitrosi 5:3; Hebheru 13:7.

¹¹ “Ngingabasiza njani abanye abantu?” Ngingabusebenzisa njani ubuntu uJehova athi abadala babe nabo? Ngokuthi sisize abantu esibafundelako nabangathanda ukufundelwa, sibatjele indlela abadala abahluke ngayo ebafundisini. Lokho kungabuye kusikhumbuze ngokuzikhandla kwabadala. Bese sihlohlozeleka ukuthi sibahloniphe. (1 Thesalonika 5:12) Nasihlala sibahlonipha abadala bazoyenza bathabile imisebenzabo.—Hebheru 13:17.

12, 13. (a) Nasisebenzisa koke uJehova asenzele khona, ngiliphi irhubhululo esingalenza? (b) Iza nesibonelo sokuthi ilwazi elinabileko ngamavesi weBhayibheli lingasirhelebha njani bona sifunde iimfundo ezisithekileko.

¹² Yenza irhubhululo. Nasifunda iBhayibheli, kungaba kuhle sifune iimpendulo zemibuzo le:

• Itlolwe ngubani incwadi le?

• Yatlolelwa kuphi begodu nini?

• Ngiziphi izenzakalo eziqakathekileko ezenzeka incwadi le nayitlolwako?

Ilwazelo lingasirhelebha sifunde iimfundo ezisithekileko.

¹³ Isibonelo salokho nguHezekiyeli 14:13, 14 nakathi: “lokha inarha nayona kimi ngokungathembeki kwayo bese mina ngelule isandla sami ngokujamelana nayo ngephule umphekgho wesikwa sayo, ngithumele indlala kiyo, ngiphelise kiyo umuntu nefuyo, ngitjho nanyana amadoda amathathu la, uNowa, uDanyela noJobho, bebaphakathi kwayo, bebazakusindisa ipilwabo kwaphela ngokulunga kwabo; Kutjho [uJehova] uSomandla.” Nasenza irhubhululo sifumene ukuthi uHezekiyeli watlola amezwi la ngaphambi kweminyaka eyi-612 bona kubelethwe uKrestu. UNowa noJobho besele baneminyaka emakhulu bahlongakele, kodwana uJehova bekasolo akukhumbula ukuthembeka kwabo. UDanyela yena-ke bekasaphila. Kungenzeka bekaneminyaka eyi-20 uJehova nakathi uthembeke njengoNowa noJobho. Sifundani kilokho? Sifunda ukuthi uJehova uyabathanda abantu bakhe ngitjho nabancani.—IRhubo 148:12-14.

ZUZA EENTWENI EZIHLUKAHLUKENEKO UJEHOVA ASENZELA ZONA

14. Iincwadi ezitlolelwe abantu abatjha zingabasiza njani, abantu abakhulu abafunda iincwadezo bona zingabasiza njani? (Qala isithombe esisekuthomeni.)

¹⁴ Iincwadi ezitlolelwe abantu abatjha. Sifundile ukuthi iBhayibheli liloke liyasifundisa. Ngokufanako-ke, singafunda nakizo zoke izinto uJehova asenzela zona. Akhesicoce ngeembonelo ezimbalwa zalokho. Eminyakeni embalwa edlulileko le, uJehova ufundise abantu abatjha ngelwazi elithe tjha.^[1] (Qala isiphetho.) Ilwazelo libasiza khulu ekutheni baqalane nokugandelela kweentanga, nemiraro yokukhula. Kodwana abantu abakhulu-ke bona bangafundani eencwadinezo? Bangafunda ngemiraro abantu abatjha abaqalana nayo, lokho kuzokwenza kube lula ukuthi babasize bebabakhuthaze kuhle.

15. Kubayini abantu abadala nabo kufuze bazifunde iincwadi zabantu abatjha?

¹⁵ Ababelethi abamaKrestu akukafuzi bazizwe ngasuthi badala bona bangafunda iincwadi zabantu abatjha. Inengi lemiraro ekukhulunywa ngayo eencwadinezo irhelebha woke amaKrestu. Isibonelo salokho, soke kufuze sikwazi ukujamela lokho esikukholelwako, silawule amazizwethu, sihlule ukugandelela kweentanga, sigegede abangani abangakalungi begodu sibalekele ukuzithabisa ngendlela engakalungi. Ngitjho nanyana iincwadezo zitlolelwe abantu abatjha, iqiniso kukuthi soke singafunda litho likhulu kizo ngani ngoba zisekelwe eBhayibhelini.

16. Khuyini godu okuphethwe ziincwadi zabantu abatjha, begodu zingabasiza njani?

¹⁶ Iincwadezi zingabarhelebha abantu abakhulu nabo bona baqinise ubuhlobo babo noJehova. (Funda uMtjhumayeli 12:1, 13.) Isibonelo salokho, i-Phaphama! ka-April 2009 ngaphasi kwesihloko esithi, “Intsha Iyabuza . . . Ngingakwenza Kanjani Ukufunda IBhayibheli Kujabulise?” Isihlokwesi seza neendlela ezihlukahlukeneko zokufunda iBhayibheli, bekunebhoksi ebelingakerwa bese lisetjenziswe ekufundeni iBhayibheli. Umbuzo ukukuthi abantu abadala bona-ke kukhona abakufundako? Omunye umma uthi nakafunda iBhayibheli bekuba budisi. Kodwana ngemva kokusebenzisa iindlela ekwakhulunywa ngazo esihlokwenesi, nje akufundako uyakuzwisisa. Uthi: “Nje sengihlale ngikuqale ngabovu ukufunda iBhayibheli, akhenge khengithabele ukufunda iBhayibheli ngale ndlela.”

17, 18. Singafundani eencwadini ezenzelwe umphakathi? Iza nesibonelo.

¹⁷ Iincwadi zomphakathi. Kusukela ngo-2008 besisolo sine-siThala esifundwa ebandleni. IsiThalesi senzelwe aboFakazi BakaJehova, kodwana kunezinye godu iincwadi ezenzelwe abantu bomphakathi. Thina-ke singafundani eencwadinezo? Akhesize nesibonelo. Nawumemela umuntu eWolweni lomBuso bese eze uyathaba nawumbonako. Nasele nihlezi nilalele ikulumo, uyazibuza ukuthi kazi uyezwa na, ucabangani ngakuzwakokho begodu uyazibuza ukuthi kungakuthinta njani ukuphila kwakhe. Nawe ulalela naye begodu uyayithabela ikulumo.

¹⁸ Ngendlela efanako-ke, nasifunda iincwadi zomphakathi sifunda okukhulu. Isibonelo salokho, Iinhloko ezifumaneka ku-jw.org zenziwe bulula begodu zihlathulula amaqiniso weBhayibheli ngendlela elula khulu. Nasizifundako iinhlokwezi ilwazi lethu ngeBhayibheli lizokukhula begodu sizokuzwisisa bhedere. Singafunda neendlela ezitja zokufundisa esimini. Ngokufanako nange-Phaphama! isenza siqiniseke ukuthi uJehova wadala zoke izinto. Isirhelebhe nokuthi siqinise ukukholwa kwethu.—Funda 1 Pitrosi 3:15.

19. Singamtjengisa njani uJehova ukuthi siyakuthabela lokho asenzela khona?

¹⁹ Kusebaleni-ke bona uJehova usiphe iinluleko neenqophiso ezinengi tle. (Matewu 5:3) Yeke asirageleni phambili sizifunda iincwadi asiphe zona besikusebenzise lokho ekuphileni kwethu. Nasenza njalo sikhumbule ukuthi kuzokurhelebheka thina, begodu sizokutjengisa uJehova ukuthi siyakuthabela lokho asenzela khona.—Isaya 48:17.