Iqiniso Elibuhlungu Ngokuhlongakala

AKHUZICABANGE ubukele ividiyo yomuntu odumileko, kungaba mvumi omthandako. Ithoma ngokuveza isikhathi lapho amncani khona, ngesikhathi afunda ukucula, ibuye iveze lapho aphrakthiza khona. Iveze avuma iingoma zakhe ekhonsethini, akhamba iinarha, adume iphasi loke. Kungasi kade kuvele iinthombe zakhe lapho sele akhulile khona, bese-ke kuswaphelise ngokuthi ahlongakale.

Ividiyo le iveza izinto esele zidlulile. Kungakhathaliseki ukuthi umuntu odumileko lo bekungusosayensi, umuntu owenza zemidlalo, namkha umuntu nje owaziwako, isiphetho sakhe sizokufana. Kungenzeka kunengi aphumelele kikho, kodwana uyazibuza na ukuthi bekazokuphumelela kangangani ngathana akhenge aluphale abe ahlongakale?

Kuyadanisa ukuthi soke siyophetha ngaleyondlela. (UMtjhumayeli 9:5) Ngitjho nanyana singalinga kangangani, angeze sakghona ukubalekela ukuluphala nokufa. Akusikuluphala kwaphela okusibulalako kodwana sibuye sibulawe ziingozi namkha ukugula. IBhayibheli itjengisa bona sinjengekungu “evela isikhatjhana bese inyamalale.”—Jakopo 4:14.

Kabanye abantu ukuphila kubudisi begodu abazi ukuthi baphilelani, lokho kubenza bathi, “asidleni begodu sisele, ngombana kusasa sizokufa.” (1 Korinte 15:32) Kodwana ukwenza njalo kutjho bona sele sizinikele ekufeni. Kungenzeka nawe uzibuze umbuzo othi, ‘Kukhona na ukuphila ngemva kwalokhu?’ lokho kungenzeka khulukhulu nawuqalene nokugandeleleka. Ungayifumanaphi ipendulo?

Abantu abanengi bafuna iimpendulo kusayensi. Ukuthuthuka kwesayensi nemitjhoga kuyithuthukisile ipilo. Abanye abososayensi basebenza ngamandla bona basize abantu baphile isikhathi eside. Ngaphezu kwakho koke abakwenzako, umbuzo osalako ngothi: Kubayini siluphala bese siyafa? Likhona na ithemba lokuthi inaba lethu ukufa lizokuhlulwa? Isihloko esilandelako sizokudemba ipendulo yombuzo othi: Kukhona na ukuphila ngemva kwalokhu?