Ragela Phambili Uzuza Eemfundisweni Ezisisekelo

1. Wazizwa njani ngeemfundiso zeBhayibheli nawuthoma ukufunda iqiniso?

IZINTO esazifundako nasithoma ukufunda iqiniso leBhayibheli zitjhugulule ukuphila kwethu. Ngokwesibonelo, ngokwazi igama lakaJehova, safuna ukuba bangani bakhe. (Isa. 42:8) Nasifunda ukuthi kwenzekani lokha umuntu nakahlongakalako, akhenge sisatshwenyeka ngokuthi kghani abantu esibathandako abahlongakeleko bayatlhaga na. (UMtj. 9:10) Nasifunda ngesithembiso sakaZimu sePharadesi akhenge sisatshwenyeka ngengomuso. Nje siyaqiniseka bona ukuphila kwethu angekhe kube kufitjhani, angekhe siphile iminyaka ema-70 namkha ema-80 kwaphela kodwana sizokuphila ngokungapheliko.—Rhu. 37:29; 90:10.

2. Umtlolo weye-2 kaPitrosi 1:​12, 13, utjengisa njani ukuthi ngitjho namaKrestu avuthiweko angaragela phambili azuza eemfundisweni zeBhayibheli azifunda nawathoma ukufunda iBhayibheli?

² Kufuze sihlale sikhumbula ukuthi iimfundiso zeBhayibheli esazifunda ekuthomeni ziqakatheke kangangani. Encwadinakhe yesibili, umpostoli uPitrosi watlolela amaKrestu egade ‘akakarele eqinisweni.’ (Funda yesi-2 kaPitrosi 1:​12, 13.) Kodwana ngesikhatheso, bekunabantu ababogabogako ebandleni ebebafuna ukutjhidisela abafowethu kude neqiniso. (2 Pit. 2:​1-3) UPitrosi bekafuna ukuqinisa abafowabo nabodadwabo, abasize bavikele ukukholwa kwabo emangeni lawo. Bona enze njalo wabakhumbuza ngeemfundiso ebesele bazifundile. Iimfundiswezi bezingabasiza bahlale bathembekile kuJehova.

3. Fanekisa ukuthi kubayini woke amaKrestu kufuze aragele phambili acabangisisa ngezinto azifunda nakathoma ukufunda iBhayibheli?

³ Ngitjho nanyana kungaphela iminyaka siseqinisweni, singazuza ezintweni esazifunda nasithoma ukufunda iBhayibheli. Ngokwesibonelo: Umpheki onekghono angasebenzisa iinthako ezijayelekileko ukupheka. Kodwana ngokukhamba kwesikhathi, angafunda ukusebenzisa iinthakwezo ukupheka ukudla okuhlukahlukeneko. Ngokufanako abantu bakaJehova esele kuphele isikhathi bamlotjha, nabantu abathoma ukufunda iBhayibheli bangaqala amaqiniso weBhayibheli ngeendlela ezihlukahlukeneko. Ubujamo bethu nendlela esilotjha ngayo uJehova kungenzeka bona bebusolo butjhuguluka solo sabhajadiswa. Nasicabanga ngamaqiniso aseBhayibhelini esawafunda kade, singakghona ukuwasebenzisa ebujamweni esiqalene nabo nje. AmaKrestu esele kuphele isikhathi alotjha uJehova angafunda izinto ezintathu emaqinisweni asisekelo.

UJEHOVA MBUMBI

4. Ukwazi ukuthi uJehova Mbumbi kusithinte njani?

⁴ “Owakhe zoke izinto nguZimu.” (Heb. 3:4) Siyazi bona izulu nephasi zenziwe Mdalethu onamandla nohlakaniphe khulu. Nguye osidalileko yeke usazi kuhle. Ngaphezu kwakho koke, uyasithanda. Uyazi bona yini esilungeleko. Ukwazi lokho kuthinte ukuphila kwethu ngendlela ekulu, kwenze ukuphila kwethu kwaba nehloso.

5. Ngiliphi iqiniso elingasisiza sithobeke? (Isaya 45:​9-12)

⁵ Ukwazi ukuthi uJehova Mdali kusifundisa ukuthobeka. Ngokwesibonelo, kwaba nesikhathi uJobho akhuluma izinto ezingakalungi ngoJehova. Bekalibele ukuthi khuyini eqakatheke khulu, bekadzimelele khulu endleleni ebekazizwa ngayo nekutjengiseni abantu bona yena bekenze izinto kuhle, akhenge acabange ngoJehova. UJehova wamkhumbuza ukuthi Mdali. (Job. 38:​1-4) Lokho kwasiza uJobho wabona ukuthi uJehova uhlala enza okulungileko. U-Isaya watlola amezwi akhambisana nala wathi: “Kghani kufuze umdaka uthi kuMbumbawo: ‘Wenza ini?’”—Funda u-Isaya 45:​9-12.

6. Kunini lapho kuqakatheke khulu khona ukucabanga ngokuhlakanipha namandla woMdali? (Qala neenthombe.)

⁶ Nasele kuphele iminyaka umKrestu alotjha uJehova, angathoma ukuthembela endleleni acabanga ngayo kunokuthembela esinqophisweni sakaJehova neliZwini lakhe. (Job. 37:​23, 24) Kuzokwenzekani nange umuntu acabanga ngokuhlakanipha okukhulu kwakaMdali? (Isa. 40:22; 55:​8, 9) Ukutjheja ukuthi indlela uJehova acabanga ngayo iphakeme khulu kuneyethu kuzomenza ahlale athobekile.

7. Khuyini u-Rahela ayenzako bona amukele ukutjhuguluka kwesinqophiso?

⁷ U-Rahela ohlala e-Slovenia uthi ukucabanga ngoMdali kwamsiza wamukela iinqophiso zehlangano. Uthi, “Ngasikhathi bekuba budisi ukwamukela iinqophiso ezenziwa bafowethu abadosa phambili. Ngokwesibonelo, ngitjho nanyana besele ngiwubukele Umbiko WesiHlopha EsiBusako #8 2023 ngathukwa nangibona umfowethu oneendevu abeka ikulumo. Yeke ngathandaza ngabawa uJehova angisize ngamukele amatjhuguluko la.” U-Rahela uyalemuka ukuthi uJehova njengombana aMdali, ukghona ukunqophisa ihlanganwakhe lapha kufuze itjhinge khona. Nawukufumana kubudisi ukwamukela indlela etjha esele sizwisisa ngayo, thobeka ucabangisise ngokuhlakanipha namandla amakhulu kaJehova.—Rom. 11:​33-36.

KUBAYINI UZIMU AVUMELA UKUTLHAGA?

8. Ukwazi bona kubayini uJehova avumela ukutlhaga kusisiza njani?

⁸ Kubayini uZimu avumela ukutlhaga? Abanye abantu abangayizwisisi ipendulo yombuzo lo, bakwatela uZimu namkha baphethe ngokuthi akekho. (IzA. 19:3) Kodwana wena uyazi ukuthi abantu batlhaga begodu bahlongakala ngebanga lesono, ingasi ngebanga lakaJehova. Uyazi bona indlela uJehova abekezela ngayo uvumele iingidigidi zabantu zamazi bezabona ukuthi uJehova uzokuqeda ukutlhaga unomphela. (2 Pit. 3:​9, 15) Ukwazi amabanga enze uJehova avumele ukutlhaga kuyasiduduza kusitjhideze kuye.

9. Ngibuphi ubujamo lapho kuqakatheke khulu khona ukukhumbula amabanga enza uJehova avumele ukutlhaga?

⁹ Kufuze sibekezele njengombana silindele bona uJehova aqede koke ukutlhaga. Kodwana nakwenzeka thina namkha abantu esibathandako siqalane nokugandeleleka, ukungabi nobulungiswa namkha ukulahlekelwa, singazibuza ukuthi kubayini uJehova angaqedi ukutlhaga msinya. (Rhab. 1:​2, 3) Ngesikhatheso kungaba kuhle ukukhumbula amabanga enza uJehova avumele ukutlhaga.a (Rhu. 34:19) Singabuye sicabange ngomnqophwakhe wokuqeda ukutlhaga.

10. Khuyini eyaduduza u-Anne nakahlongakalelwe ngunina?

¹⁰ Ukwazi bona kubayini uZimu avumela ukutlhaga kungasisiza sikghodlhelele. U-Anne ohlala esihlengeleni se-Mayotte, e-Indian Ocean uthi, “Ukuhlongakalelwa ngumma eminyakeni embalwa edlulileko kwangiphatha kabuhlungu khulu. Nanyana kunjalo, ngihlala ngizikhumbuza ukuthi akusinguJehova obanga ubuhlungu. UJehova uzimisele ukuqeda yoke imihlobo yokutlhaga begodu avuse nabantu abahlongakeleko. Ukucabanga ngalokhu kungenza ngibe nokuthula begodu kuyangikhuthaza.”

11. Ukwazi amabanga enza uJehova avumele ukutlhaga kungasisiza njani siragele phambili sitjhumayela?

¹¹ Ukwazi amabanga enza uJehova avumele ukutlhaga kungasikhuthaza bona siragele phambili sitjhumayela. Ngemva kokuhlathulula ukuthi ukubekezela kwakaJehova kutjho ukusinda kwabaphendukako uPitrosi wathi: “Cabangani ukuthi kufuze nibe babantu abanjani ezenzweni ezicwengileko zokuziphatha nezenzweni zokuzinikela kuZimu.” (2 Pit. 3:11) ‘Izenzo zokuzinikela kuZimu’ zihlanganisa umsebenzethu wokutjhumayela. Sithanda abantu njengoBabethu. Sifuna baphile ephasini lakaZimu elitjha nelinokulunga. UJehova uyabekezela, unikela abantu abasemphakathinakho ithuba lokuthi bamlotjhe. Kulilungelo ukusebenza noZimu nokusiza abantu abanengi bafunde ngaye ngaphambi kobana kufike isiphelo.—1 Kor. 3:9.

SIPHILA “EMIHLENI YOKUPHELA”

12. Ukwazi bona siphila ‘emihleni yokuphela’ kusisiza ngani?

¹² IBhayibheli lihlathulula indlela abantu abazokuba ngayo “emihleni yokuphela.” (2 Thim. 3:​1-5) Nasibona abantu esiphila nabo, sibona indlela isiphorofidwesi esizaliseka ngayo. Njengombana sibona indlela abantu abathuwelela ngayo, siqiniseka khulu ukuthi kwamambala, iliZwi lakaZimu lithembekile.—2 Thim. 3:​13-15.

13. Umfanekiso kaJesu okuLukasi 12:​15-21, usisiza njani?

¹³ Ukwazi ukuthi siphila emihleni yamaswaphela kusisiza sidzimelele ezintweni eziqakatheke khulu. Singafunda ukudzimelela ezintweni eziqakatheke khulu emfanekisweni kaJesu okuLukasi 12:​15-21. (Ufunde.) Kubayini indoda enjingileko yabizwa ngokuthi “sidlhadlha ndina”? Akhenge atjho njalo ngombana indoda le beyinjingile kodwana ngebanga lokuthi beyingenzi izinto eziqakathekileko zize qangi. Beyizibekela ‘umnotho kodwana ingakanothi kuZimu.’ Ukusebenzisa isikhathi sayo njalo bekungasikuhlakanipha ngombana beyizokuhlongakala ingasi kade. UZimu wathi endodeni le, “Ebusukwinobu uzokuhlongakala.” Njengombana iphaseli lizokuphela, nathi singazibuza, ‘Kghani ngidzimelele ezintweni eziqakatheke khulu? Ngimiphi iminqopho engifuna abantwabami babe nayo? Kghani ngisebenzisa amandlami, isikhathi sami nemali enginayo ukuzibekela umnotho ezulwini?’

14. Okwenzeka ku-Miki kusisiza njani sibone ukuqakatheka kokukhumbula bona siphila emihleni yokuphela?

¹⁴ Indlela esenza ngayo iinqunto izokutjhuguluka nange sikhumbula ukuthi siphila emihleni yokuphela. Ngilokho okwenzeka kudadwethu u-Miki. Uthi, “Nangiqeda isikolo, bengifuna ukufundela ibizelo lokusebenza ngeembandana. Ngapha bengifuna ukuphayona isikhathi esizeleko, ngilotjhe nalapha kunetlhogeko ekulu khona. Abafowethu nabodadwethu bebandleni bathi ngicabangisise ukuthi ngizokukghona na ukuraga nokufundela ibizelo ebengilifuna, khisibe ngiphayona namkha ngilotjha lapha kunetlhogeko khona. Bangikhumbuza ukuthi iphaseli lizokuphela ingasikade, ephasini elitjha ngizokuba nesikhathi esaneleko sokufunda ngeembandana. Yeke, ngakhetha ibizelo elingafuni ngifunde isikhathi eside nelizongifundisa amakghono atlhogekako. Langisiza ngafumana umsebenzi ebewungisiza ngikghone ukuphayona, ngokukhamba kwesikhathi ngaya e-Ecuador, lapha kunetlhogeko yabatjhumayeli khona.” Nje u-Miki nendodakhe babajikelezi enarheni leyo.

15. Isibonelo sakaJakopo sisisiza njani sibone ukuthi akukafuzi siphelelwe lithemba ngabantu nabangakabi ukwamukela iqiniso? (Qala neenthombe.)

¹⁵ Akukafuzi sidane lokha abantu ekuthomeni nabangazamukeli iindaba ezimnandi. Abantu bangatjhuguluka. Cabanga ngesibonelo sakamfowabo kaJesu uJakopo. Wabona uJesu akhula, waba nguMesiya begodu afundisa kuhle ukudlula nanyana ngubani owakhe wafundisa. Nanyana kunjalo, kwaphela iminyaka uJakopo angasi mlandeli kaJesu. UJakopo waba mlandeli kaJesu otjhisekako ngemva kokuthi uJesu avusiwe.b (Jwa. 7:5; Gal. 2:9) Kuqakathekile ukuthi singaphelelwa lithemba ngeenhlobo zethu ezingakabi ukwamukela iqiniso namkha abantu esimini abangakazamukeli iindaba ezimnandi. Khumbula ukuthi siphila emihleni yokuphela, yeke umsebenzethu wokutjhumayela uqakathekile. Okutjhoko kizo nje, kungazithinta esikhathini esizako, mhlamunye ngitjho nangaphambi kwesizi elikhulu.c

HLALA UTHOKOZA NGEENKHUMBUZO ZAKAJEHOVA

16. Uzuze njani ngeenkhumbuzo zakaJehova? (Funda nebhoksi elithi, “Zisebenzise Ukusiza Abanye.”)

¹⁶ Elinye ilwazi elisekelwe eBhayibhelini eliseencwadini zethu, lilungiselelwe abantu abanganalwazi elinengi ngeBhayibheli. Ngokwesibonelo, ikulumo eba qobe ngoSondo, ezinye iinhloko namavidiyo ezifumaneka ku-jw.org, nabomagazini bethu bomphakathi benzelwe abantu abangasiboFakazi bakaJehova. Nanyana kunjalo, nathi siyazuza kizo izintwezi. Zenza sithande uJehova khulu, ziqinisa ukukholwa kwethu eliZwini lakhe begodu zisisiza sibe bafundisi beBhayibheli abangcono.—Rhu. 19:7.

17. Kunini lapha ungazuza khona eemfundisweni zeBhayibheli ezisisekelo?

¹⁷ Njengombana siboFakazi bakaJehova, siyathaba nasifumana indlela etjha esizwisisa ngayo amaqiniso weBhayibheli. Ngendlela efanako, amaqiniso asisekelo, esawafumana nasithoma ukufunda iBhayibheli, asisiza sathoma ukutjhidelana noJehova. Njengombana sifundile, amaqiniso la angasisiza nanje. Nasifumana isinqophiso esivela ehlanganweni kodwana sicabange bona indlelethu yokwenza izinto ingcono, siyazithoba, sikhumbule ukuthi uJehova, uMbumbethu ohlakaniphileko nonamandla, nguye onqophisa ihlanganwakhe. Nakwenzeka sikghodlhelelele isitjhijilo namkha umuntu esimthandako akghodlhelelele isitjhijilo, singabekezela begodu sikhumbule bona kubayini uJehova avumela ukutlhaga. Nasiqunta bona sizoyisebenzisa njani imali nezinto zethu, kuzosisiza sikhumbule ukuthi siphila emihleni yokuphela. Kwanga iinkhumbuzo zakaJehova zingaragela phambili zisiqinise, zisikhuthaze begodu sizenze sihlakaniphe.