Qiniseka Bona UJehova Uyakuthanda

1. Kubayini uqunte ukunikela ipilwakho kuJehova? (Qala nesithombe.)

USALIKHUMBULA ilanga owathandaza ngalo, watjela uJehova bona ufuna ukumlotjha ukuphila kwakho koke? Wenza isiquntweso ngombana wathoma ukwazi nokuthanda uJehova. Umthembise bona ukwenza intandwakhe kuzokuza qangi ekuphileni kwakho nokuthi uzokuragela phambili umthanda ngehliziywakho yoke, ngomphefumulwakho woke nangomkhumbulwakho woke nangamandlakho woke. (Mar. 12:30) Kusukela ngesikhatheso, indlela omthanda ngayo beyisolo ithuthuka. Alo-ke, ungaphendula njani umuntu nakabuza ukuthi, “Uyaqiniseka na bona uyamthanda uJehova?” Ngaphandle kokuzaza uzokuthi, “Ngimthanda ukudlula nanyana yini!”

2-3. Khuyini uJehova afuna siqiniseke ngayo begodu sizokufundani esihlokwenesi? (Joromiya 31:3)

² Ungamphendula njani umuntu okubuza umbuzo othi, “Uyaqiniseka na bona uJehova uyakuthanda?” Ngitjho nanyana sazi bona uJehova uyasithanda, kungenzeka singaqiniseki bona uyasithanda. Kungenzeka sicabanga bona asikafanelwa kukuthi asithande. Omunye udadwethu owakhula kabuhlungu uthi: “Ngimthanda khulu uJehova. Ngiyaqiniseka ngalokho. Kodwana kanengi ngihlala ngizibuza ukuthi uJehova uyangithanda na.” Kodwana uJehova uzizwa njani ngawe?

³ UJehova ufuna uqiniseke ngokuthi uyakuthanda. (Funda uJoromiya 31:3.) Iqiniso kukuthi uJehova bekafuna ufunde ngaye begodu ube mnganakhe. Ngesikhathi uzinikela kuye bewubhajadiswe, wafumana into eqakatheke khulu, wafumana ithando lakhe elithembekileko. Lokho kutjho bona ukuthanda khulu begodu angekhe akulahle nanini. Ithandweli lenza ukuthi abone abantu abamlotjha ngokuthembeka ‘njengepahla ekhethekileko’ kuye. (Mal. 3:17) UJehova ufuna uqiniseke ngethando lakhe ngawe njengombana umpostoli uPowula bekaqiniseka ngethando uJehova ebekanalo ngaye. Bekaqiniseka ngokuthi uJehova uyamthanda kangangokuthi watlola wathi, “Ngiyaqiniseka ukuthi akunakufa namkha ukuphila namkha iingilozi namkha imibuso namkha izinto ezikhona njenganje namkha izinto ezizako namkha amandla namkha ubude namkha ukutjhinga namkha nanyana ngiyiphi enye indalo engakghona ukusihlukanisa nethando lakaZimu.” (Rom. 8:​38, 39) Esihlokwenesi, sizokubona ukuthi kubayini kufuze siqiniseke ngokuthi uJehova uyasithanda nokuthi khuyini engasisiza senze njalo.

KUBAYINI KUQAKATHEKILE UKUKHOLWA BONA UJEHOVA UYAKUTHANDA?

4. USathana uleya amala athini begodu singawala njani amala lawo?

⁴ Ngokukholwa ukuthi uJehova uyasithanda, singalwisana “namaqhinga kaDeveli.” (Efe. 6:11) USathana uzokwenza nanyana yini angakghona ukuyenza bona asilisise ukulotjha uJehova. Amanye amala uSathana awathuthukisako, kukwenza abantu bacabange ukuthi uJehova akabathandi. Ungalibali ukuthi uSathana uzokusebenzisa elinye nelinye ithuba alifumanako. Usisahlela khulu lokha nasidanileko, nasizizwa siphasi ngebanga lezinto esaqalana nazo epilweni, ngeentjhijilo esiqalana nazo nje namkha ngokungaqiniseki ngengomuso. (IzA. 24:10) USathana ufana nebhubezi, ufuna ukusahlela abantu ababonakala bangakavikeleki. Yeke ulinga ukusebenzisa ithuba nasizizwa sidanile bona asenze silahle itewu. Kodwana nasihlala siqinisa ukukholwa kwethu ukuthi uJehova uyasithanda, sizokulungela ‘ukulwisana’ noSathana namanwakhe wokudlelezela.—1 Pit. 5:​8, 9; Jak. 4:7.

5. Kubayini kuqakathekile bona ulizwe ithando lakaJehova begodu wazi nokuthi uqakathekile kuye?

⁵ Nasiqinisekako ukuthi uJehova uyasithanda sizokutjhidela kuye. Naka amabanga asenza sitjho njalo. UJehova nakasibumbako, usenze sakghona ukuthanda begodu nathi sitlhoga ukuthandwa. Nasithandwako nathi sitjengisa ithando. Yeke nasizwa ithando lakaJehova begodu sibona ukuthi siqakathekile kuye nathi sizomthanda. (1 Jwa. 4:19) Nathi ithando lethu nalikhulako ngaye nelakhe lizokukhula ngathi. IBhayibheli lithi: “Tjhidelani kuZimu naye uzokutjhidela kini.” (Jak. 4:8) Alo, yini engasenza siqiniseke bona uJehova uyasithanda?

KHUYINI ENGAKUQINISEKISA UKUTHI UJEHOVA UYAKUTHANDA?

6. Khuyini ongayenza nawungaqiniseki bona uJehova uyakuthanda?

⁶ Thandaza qobe ubawe uJehova akusize uzwisise bona kubayini akuthanda. (Luk. 18:1; Rom. 12:12) Bawa uJehova akusize uzibone ngendlela yena akubona ngayo, ukwenze kanengi ngelanga lokho nakukghonakalako. Ngezinye iinkhathi, kungaba nezinto ezikwenza ungaqiniseki bona uJehova uyakuthanda. Kodwana khumbula ukuthi uJehova mkhulu kuneenhliziyo zethu. (1 Jwa. 3:​19, 20) Ukwazi ukudlula indlela wena ozazi ngayo, ubona izinto okungenzeka wena ungaziboni. (1 Sam. 16:7; 2 Kron. 6:30) Yeke, ‘thululela ihliziywakho’ kuJehova umtjele indlela ozizwa ngayo, umbawe akusize uqiniseke bona uyakuthanda. (Rhu. 62:8) Ngemva kokuthi uthandazile, kuqakathekile bona wenze izinto ezilandelako.

7-8. AmaRhubo asisiza njani siqiniseke bona uJehova uyasithanda?

⁷ Kholwa lokho uJehova akutjhoko. Wanikela amadoda atlola iBhayibheli umoyakhe onamandla bona siqiniseke ukuthi abakutlolako ngaye kuliqiniso. Kelinye lamarhubo uDavida uhlathulula uJehova kuhle khulu ngokuthi uJehova uyasithanda. UDavida uthi, “UJehova useduze nalabo abaneenhliziyo eziphukileko; uyabasindisa abadanileko.” (Rhu. 34:18) Nawudanileko, ungazizwa uwedwa. Kodwana uJehova uthembisa bona ngeenkhathi ezinjalo, uhlanu kwakho ngombana uyabona ukuthi umtlhoga kunanini ngaphambilini. Kelinye irhubo uDavida watlola wathi, “Faka iinyembezi zami ngebhodlelweni lakho lesikhumba.” (Rhu. 56:8) UJehova uyabona nasidanileko namkha sizwa ubuhlungu. Unendaba khulu nawe begodu uzwa ubuhlungu nakakubona uzwa ubuhlungu. Njengombana woke amathosi wamanzi aqakathekile umuntwini okhamba lapha kunganamanzi khona, iinyembezi zakho ziqakathekile kuJehova begodu uyazikhumbula iinkhathi lapho uzwa khona ubuhlungu. KuRhubo 139:3 sifunda bona “[UJehova] uzazi zoke iindlela zami.” UJehova uzazi zoke iindlela zakho kodwana udzimelela ezintweni ezihle ozenzako. (Heb. 6:10) Kubayini enza njalo? Ngombana uthatjiswa yinanyana yini oyenzako bona umthabise.a

⁸ UJehova usebenzisa amavesi aduduzako eBhayibhelini ukusitjela bona unendaba nathi begodu usithanda khulu. Njengombana sifundile ekuthomeni, uSathana ufuna ucabange ukuthi uJehova akakuthandi. Yeke, nakwenzeka ngezinye iinkhathi ungaqiniseki ukuthi uJehova uyakuthanda, cabanga ukuthi ngubani ekufuze umkholwe. Uzokukholwa uSathana ‘uyise wamala’ namkha uzokukholwa ‘uZimu weqiniso?’—Jwa. 8:44; Rhu. 31:5.

9. UJehova ubathembisani abantu abamthandako? (Eksodusi 20:​5, 6)

⁹ Cabanga indlela uJehova azizwa ngayo ngabantu abamthandako. Cabanga ngalokho uJehova akutjho kuMosi nakuma-Israyeli. (Funda u-Eksodusi 20:​5, 6.) UJehova uthembisa ukuthi uzokuragela phambili atjengisa abantu abamthandako ithando elithembekileko. Ngebanga lokuthi uJehova uthembekile, siyaqiniseka ukuthi uzokuhlala abathanda abantu abamtjengisa ithando. (Nerh. 1:5) Yeke nakwenzeka utlhoge ukuqinisekiswa ngokuthi uJehova uyakuthanda, jama kancani uzibuze, ‘Ngiyamthanda na uJehova?’ Cabanga nganakhu: Nange umthanda uJehova begodu ulinga koke okusemandlenakho ukumthabisa, qiniseka ukuthi uJehova ukuthanda khulu. (Dan. 9:4; 1 Kor. 8:3) Ngamanye amezwi, nange uqiniseka ngokuthi uyamthanda uJehova, kufuze uqiniseke ngokuthi naye uyakuthanda. Ungaqiniseka ukuthi uyakuthanda nokuthi angeze akutjhiye.

10-11. Khuyini uJehova afuna uyikhumbule ngesihlengo? (Galatiya 2:20)

¹⁰ Cabangisisa ngesihlengo. UJehova wanikela abantu isipho esihle ukuzidlula zoke nakathumela indodanakhe bona izosifela. (Jwa. 3:16) UJehova uthumele indodanakhe bona izokufela wena! Cabanga ngokwenzeka kumpostoli uPowula. Khumbula bona wenza izono ezikulu ngaphambi kobana abemKrestu begodu bekusafuze aragele phambili alwisana nokuba nesono. (Rom. 7:​24, 25; 1 Thim. 1:​12-14) Kodwana bekaqiniseka ngokuthi uJehova unikele ngeNdodanakhe ngebanga lakhe. (Funda kwebeGalatiya 2:20.) Khumbula bona nguJehova owasebenzisa uPowula bona atlole amezwi la. UJehova ufuna sifunde kilokho okwatlolwa nguPowula. (Rom. 15:4) Amezwi kaPowula atjengisa bona uJehova ufuna usiqale njani isihlengo, ufuna usiqale njengesipho sakho. Nawucabanga ngokuthi isihlengo sisipho esihle kangangani uJehova akuphe sona, uzokuqiniseka bona uJehova uyakuthanda.

¹¹ Siyamthokoza uJehova ngokuthi athumele uJesu bona azosifela. Kodwana elinye ibanga elenza uJesu weza ephasini bekukuthi atjele abantu iqiniso ngoZimu. (Jwa. 18:37) UJesu wabuye wafundisa ngokuthi uJehova ubathanda kangangani abantwana.

UJESU ANGASISIZA SIQINISEKE BONA UJEHOVA UYASITHANDA

12. Kubayini singakukholwa lokho uJesu akutjho ngoJehova?

¹² Ngesikhathi uJesu asephasini bekathabela ukutjela abantu ukuthi uJehova unguZimu onjani. (Luk. 10:22) Sinawo woke amabanga wokukholwa indlela uJesu ahlathulula ngayo uJehova. UJesu bekanoYise ezulwini isikhathi eside ngaphambi kobana eze ephasini. (Kol. 1:15) UJesu uyazi bona uYise umthanda kangangani. Bekabona indlela uYise ebekatjengisa ngayo bona uthanda iingilozi ezithembekileko nawo woke amadodana namadodakazi athembekileko ephasini. UJesu ubasiza njani abantu baqiniseke bona uJehova uyabathanda?

13. Khuyini uJesu afuna siyizwisise ngoJehova?

¹³ UJesu ufuna sizwisise indlela uJehova azizwa ngayo ngathi. UJesu wabiza uJehova ‘ngoBaba’ iinkhathi ezingaphezu kwezili-160 emitlolweni yamaVangeli. Nakakhuluma nabalandeli bakhe, bekasebenzisa amezwi anjengokuthi, “uYihlo” namkha “uYihlo wezulwini.” (Mat. 5:16; 6:26) Ngaphambi kobana uJesu eze ephasini, abantu bakaJehova abathembekileko bebambiza ngokuthi ‘Mninimandla Woke’ ‘Ophezukoke’ nangokuthi ‘Mfundisi Ophakemeko’ kodwana uJesu bekasebenzisa amezwi alula najayelekileko njengokuthi ‘Baba’ ukuveza indlela uJehova atjhidelene ngayo nabantu abamlotjhako. Kuyakhanya bona uJesu ufuna sibone uJehova ngendlela yena ambona ngayo, uBaba obathanda khulu abantwabakhe. Akhesifunde okungeziweko ngeenkhathi ezimbili uJesu asebenzisa ngazo ibizo elithi “Baba.”

14. UJesu watjengisa njani ukuthi ngamunye wethu uligugu kuBabethu uJehova? (Matewu 10:​29-31) (Qala nesithombe.)

¹⁴ Kokuthoma akhesibone ukuthi uJesu wathini kuMatewu 10:​29-31. (Mfunde.) Abotunwana ziinyoni ezincani khulu, angeze zavuka zithanda namkha zilotjhe uJehova. Nanyana kunjalo uBabethu unendaba nabotunwana kangangokuthi uyazi munye nakawela phasi. Alo, uzomtlhogomela kangangani umuntu omthanda nomlotjha ngokuthembeka. UJesu wabuye wathi uBabethu uyazazi iinhluthu ngamunye wethu anazo ehloko. Njengombana uJehova azi ngitjho nezinto ezingakaqakatheki kangako ngathi, singaqiniseka bona siqakatheke kangangani kuye. Kwamambala uJesu ufuna sazi indlela esiqakatheke ngayo kuBabethu wezulwini.

15. Amezwi kaJesu akuJwanisi 6:​44, asitjelani ngoBabethu wezulwini?

¹⁵ Akhe sibone esinye isibonelo sendlela uJesu asebenzisa ngayo ibizo elithi “Baba.” (Funda uJwanisi 6:44.) UBabethu wezulwini ukusiza bona umazi begodu umthande. Kubayini enza njalo? Kungebanga lokuthi ubone ubuntu obuhle kuwe. (IzE. 13:48) Ngesikhathi uJesu akhuluma amezwi akuJwanisi 6:​44, kungenzeka bekaqalisele emezwini akuJoromiya 31:3. Lapho uJehova wathi ebantwini bakhe: “Ngikutjhideze kimi ngethando elithembekileko.” (Jor. 31:3; madanisa noHosiya 11:4) Cabanga ngokuthi kutjho ukuthini lokho. UBabethu wezulwini uhlala abona okuhle kuwe ngitjho nanyana kungenzeka wena ungakuboni.

16. (a) Khuyini uJesu ebekasifundisa yona begodu kubayini kufuze simkholwe? (b) Khuyini engakusiza uqiniseke bona uJehova nguBabakho ophuma phambili? (Funda ibhoksi elithi, “UBaba Soke Esimtlhogako.”)

¹⁶ Ngokubiza uJehova ngokuthi nguBabethu, uJesu usitjela ukuthi: ‘UJehova akasinguBaba kaJesu kwaphela kodwana nawe nguBabakho. Ukuqinisekisa nangokuthi uyakuthanda begodu unendaba nawe njengomuntu omlotjhako.’ Yeke, nakwenzeka ngezinye iinkhathi ungaqiniseki ukuthi uJehova uyakuthanda, khumbula lokho uJesu akutjhoko begodu ukukholwe, ngombana uJesu bekahlala akhuluma iqiniso begodu nguye owazi uBabethu ukudlula nanyana ngubani.—1 Pit. 2:22.

YENZA KOKE OKUSEMANDLENAKHO BONA UQINISEKE UKUTHI UJEHOVA UYAKUTHANDA

17. Kubayini kufuze sihlale siqiniseka bona uJehova uyasithanda?

¹⁷ Kufuze senze koke okusemandlenethu ukuqiniseka bona uJehova uyasithanda. Njengombana sifundile ekuthomeni, inaba lethu uSathana, uzokwenza koke angakwenza bona asenze silise ukulotjha uJehova. Bona enze njalo uzokuhlala alinga ukusenza singaqiniseki ukuthi uJehova uyasithanda. Akukafuzi siwakholwe amala kaSathana lawo!—Job. 27:5.

18. Khuyini ekufuze uyenze bona uragele phambili uqiniseka bona uJehova uyakuthanda?

¹⁸ Bona siragele phambili sikholwa ukuthi uJehova uyasithanda kufuze sihlale sithandaza kuJehova simbawe asisize sizibone ngendlela yena asibona ngayo. Cabangisisa ngamavesi aseBhayibhelini ahlathulula indlela uJehova anendaba nasithanda ngayo. Khumbula bona uJehova uzokuhlala abathanda abantu abamthandako. Ungalibali bona uJehova unikele ngeNdodanakhe ngombana akuthanda. Themba bona uJehova unguBabakho wezulwini njengombana uJesu atjho. Umuntu nakangakubuza ukuthi: “Uyaqiniseka na bona uJehova uyakuthanda?” Ngesibindi uzokuphendula uthi: “Iye, ngiyaqiniseka! Begodu ngenza koke okusemandlenami bona ngimtjengise ukuthi nami ngiyamthanda!”