Yoyamba ya Petulo
3 Molingana na vamene ivi, mwewo anakazi mukogonjela analume ŵanu kuti keno ofunalini kumvwila Mawu a Mulungu, akopeke na nkhalidwe yanu, osati na mawu ŵanu. 2 Koma chifukwa chakuti awona nkhalidwe yanu iweme* komasoti ulemu wanu ukulu. 3 Kuliwamililisha kwanu osati kunkhale kwa kunja kweka monga kumanga sisi, kuvwala voliwamililishila va golide olo vovwala vodula ngako. 4 Koma kunkhalesoti kwa munthu wofisika mu ntima, alivwale vovwala vosawonongeka vamene ni ntima wodekha komasoti wofasa wamene ni wantengo wapatali pamenso pa Mulungu. 5 Niyesoti mwenzeliwamililishila anakazi okhulupilika akale, amene enzeyembekezela Mulungu. Anakazi amene aŵa enzegonjela analume ŵawo. 6 Mwachisanzo, Sala enzemvwila Abulahamu ndipo enzemuita kuti “ambuye.” Lomba mwewo mwankhala ŵana ŵake ndipo munkhale mphela ŵana ŵake mukapitilija kuchita viweme komasoti keno muyopalini chilichonse.
7 Mwewosoti analume, pitilijani kunkhala na anakazi ŵanu moŵaziŵa luweme. Mukoŵapasa ulemu chifukwa anakazi ali monga ni chiya chamene chumukalini kufwaika. Mukochita vamene ivi kuti mapemphelo ŵanu osati akochingilijiwa, chifukwa muzalondele nawo pamozi moyo wamene Mulungu azakupaseni chifukwa cha kuwama ntima kwake kukulu.
8 Posilijila mwewo monse munkhale na maganizo amozi, mukomvwilana chisoni, mukokonda akwasu, mukonkhala na chifundo chikulu komasoti munkhale olichefya. 9 Munthu akakuchitilani chiipa osati mukowejela chiipa, akakunyozani osati mukowejelasoti manyozo. Mmalomwake mukoŵachitila viweme* chifukwa Mulungu ekusankhani kuti mukodalisa ayakine kuti nayesoti azakudaliseni.
10 Munthu wamene okonda moyo wake komasoti wamene ofuna kunkhala na moyo uweme ofunika kusamala kuti osati akolaŵila viipa na lilimi yake komasoti osati akolaŵila vachinyengo na milomo yake. 11 Ofunika kuleka kuchita viipa nochita viweme. Ofunikasoti kuyeja-yeja kunkhala mwa ntendele na ayakine komasoti kuutang’isha. 12 Menso a Yehova ali pa olungama, ndipo matu ŵake omvwishila mapemphelo ŵawo opapatila, koma Yehova okalipila ŵanthu amene ochita viipa.”
13 Ni chendi, kansi ni ŵani angakuchitileni viipa keno muyeja-yeja kuchita viweme? 14 Koma olo kuti mutamane chifukwa chochita vinthu mwachilungamo, mukuŵa mphela osangalala. Osati mukoyopa vinthu vakuyopa ove* ndipo osati mukodela navo nkhaŵa. 15 Koma muvomekeje mmitima mwanu kuti Khilisitu ni Ambuye komasoti kuti ni ntuŵa. Nthawe zonse mukonkhala okonzeka kuyankha aliyense wamene wakukonshani vokhuza chiyembekezo chanu, ndipo mukoŵayankha mofasa komasoti mwaulemu ngako.
16 Mukonkhala na chikumbuntima chiweme, kuti keno ŵanthu okulaŵililani vinthu viipa, okulaŵililani viipa amene awo azachite nsoni chifukwa cha nkhalidwe yanu iweme monga ophunzila a Khilisitu. 17 Vingankhale luweme kutamana chifukwa chochita vinthu viweme, keno Mulungu walola kuti vamene ivo vichitike, kusiyana na kutamana chifukwa chochita vinthu viipa. 18 Pala olo Khilisitu echifwa kamozi tyala kuti achose uchimo. Munthu wolungama wamene uyo efwila ŵanthu osalungama kuti akuchitisheni kunkhala okatijana na Mulungu. Yove epaiwa monga munthu,* koma eushiwa monga mzimu. 19 Pavuli pake eluta kuyalalikila uthenga wachiweluzo kuli mizimu yamene yenze mu djeli. 20 Mizimu yamene iyi iliyemvwile Mulungu pa nthawe yamene enzeleza ntima mmasiku a Nowa. Pa nthawe yamene iyo, Nowa enzepanga chingalaŵa chamene chipulumusha ŵanthu oŵelengeka pa manzi, ŵanthu* 8 ŵeka tyala.
21 Lomba ubatizo wamene ulingana na chingalaŵa, upulumushasoti mwewo (osati kuchosa tyala lunsa ya mmuŵili, koma kusenga Mulungu kuti akupaseni chikumbuntima chiweme) chifukwa mukhulupilila Yesu Khilisitu wamene eushiwa. 22 Yove eluta kululu ndipo ali kukwanja ngayo ya Mulungu mwakuti emukweja kuti maulamulilo, mphamvu komasoti angelo vinkhale pansi pake.