Yoyamba yoluta kuli Akolinto
12 Lomba akwasu, polaŵila za mphaso zauzimu, nufunalini kuti munkhale osaziŵa. 2 Muziŵa kuti mukaliyenkhala wokhulupilila,* mwenzesogolelewa komasoti kuluŵilishiwa na mafano asalaŵila. 3 Koma lomba nufuna muziŵe kuti paliye munthu osogolelewa na mzimu wa Mulungu wamene anganene kuti: “Yesu niwotembelelewa!” Paliyesoti wamene anganene kuti: “Yesu ni Ambuye!” paliye kusogolelewa na mzimu utuŵa.
4 Pali mphaso zosiyana-siyana, koma mzimu ni umozi. 5 Ndipo pali mautumiki osiyana-siyana, koma Ambuye ni mmozi. 6 Ntchito ziliposoti zosiyana-siyana, koma pali Mulungu mmozi wamene opeleka mphamvu yokatila ntchito zamene izo kuli munthu aliyense. 7 Koma thandizo ya mzimu utuŵa yuwonekela kuli munthu aliyense, ndipo Mulungu opeleka mzimu wamene uyo na cholinga chakuti munthu wamene uyo akoyavya ayakine. 8 Mwachisanzo, mzimu uyavya muyakine kulaŵila mawu anzelu, ndipo mzimu wamene uyo uyavya munthu muyakine kulaŵila mawu owonesha kuziŵa vinthu. 9 Mzimu wamene uyo uyavya munthu muyakine kunkhala na chikhulupililo, pamene muyakine umuyavya kunkhala na mphaso yopojeka, 10 muyakine umupasa mphaso yochita ntchito zamphamvu, muyakine kulaŵililatu vakusogolo, muyakine kuziŵa mawu oujiliwa, muyakine kulaŵila vilaŵilo vosiyana-siyana,* komasoti muyakine kumasulila vilaŵilo. 11 Koma vonse vamene ivi vukwanishika na mzimu wamene uyo, ndipo munthu aliyense opasiwa mphaso zamene izi mosogolelewa na mzimu wamene uyo.
12 Muŵili ni umozi, koma uli na vizo vinyinji ndipo vizo vonse vamuŵili olo kuti n’vinyinji, vupanga muŵili umozi. Niye mwavililisoti na Khilisitu. 13 Tonse tibatiziwa na mzimu umozi kuti tinkhale muŵili umozi. Keno nise Ayuda olo Agiliki, akapolo olo ŵanthu omasuka, tonse sewo tilondela mzimu umozi.
14 Muŵili unkhalalini na chizo chimozi, koma vinyinji. 15 Keno kwendo inganene kuti: “Pakuti ninelini kwanja, ninelini mbali ya muŵili,” vamene ivo vingachitishelini kuti kwendo yamene iyo osati inkhale mbali ya muŵili. 16 Ndipo keno kwatu inganene kuti: “Pakuti ninelini linso, ninelini mbali ya muŵili,” vamene ivo vingachitishelini kuti kwatu yamene iyo osati inkhale mbali ya muŵili. 17 Kuti muŵili wonse wenze linso, kansi sembe tikumvwa na chinji? Lomba kuti muŵili wonse wenze kwatu, kansi sembe tununsha na chinji? 18 Koma Mulungu eika vizo vonse va muŵili, chilichonse pamalo ŵake, mwechifunila yove.
19 Kuti vizo vonse chenze chizo chimozi, kansi muŵili sembe ulipo? 20 Tetyo pali vizo vinyinji, koma muŵili ni umozi. 21 Linso ingaujelini kwanja kuti: “Niliye nawe ntchito,” olosoti mutu ungaujelini mendo kuti: “Niliye namwe ntchito.” 22 Ndipo vizo vamene vuwoneka monga ni vofoka, ni vofunika. 23 Koma vizo vatuwona monga ni vonyozeka, niye vatupasa ulemu ngako. Tetyo vizo va muŵili wasu visawoneka bwino, niye vatusamalila ngako. 24 Koma vizo vasu vuwoneka kale bwino vufunikalini kuvisamalila tetyo. Koma lomba Mulungu elundikija bwino muŵili wonse, kuti vizo vamene viliye ulemu wokwanila vikosamaliliwa ngako. 25 Echita vamene ivi kuti muŵili osati unkhale woyaŵanika, koma vizo vake vikosamalilana. 26 Ndipo chizo chimozi chikavutika, vizo viyakine vonse vuvutika nacho pamozi, komasoti chizo chiyakine chikalemekezewa, vizo viyakine vonse vusangalala nacho pamozi.
27 Nimwe muŵili wa Khilisitu ndipo aliyense wa mwewo ni chizo chamuŵili wamene uyo. 28 Mulungu wapeleka vochita kuli munthu aliyense mumpingo. Choyamba atumwi, chachiŵili aneneli,* chachitatu aphunzisi, pavuli pake ntchito za mphamvu, mphaso zopojeka, utumiki woyavya ŵanthu, luso yoyendesha vinthu komasoti mphaso zolaŵila vilaŵilo vosiyana-siyana.* 29 Ni onselini angankhale atumwi. Ndipo vingakwanishikelini kuti onse ankhale aneneli.* Kansi onse angankhale aphunzisi? Kansi onse angochita ntchito zamphamvu? 30 Komasoti ni onselini ali na mphaso zopojeka. Ni onselini amene olaŵila vilaŵilo vosiyana-siyana.* Komasoti ni onselini angankhale omasulila. 31 Tetyo yeja-yejani kuti mulondele mphaso zikulu. Koma olo n’tetyo, nikuwonesheni njila iweme ngako.