Kuli Ahebeli
13 Pitilijani kukonda akwasu. 2 Osati muluŵe kulondela luweme alwendo,* chifukwa pochita vamene ivi, ayakine elondela angelo mosaziŵa. 3 Mukokumbukila amene ali mu djeli monga kuti mwamangiwa nawo pamozi. Mukokumbukilasoti amene otamanishiwa, pakuti namwesoti nimwe ŵanthu.* 4 Ukwati unkhale wolemekezeka kuli onse, ndipo pakuyona ŵanthu ali lungulane pankhale posaipishiwa chifukwa Mulungu azaweluze achiwelewele* komasoti achigololo. 5 Osati mukokonda ndalama koma mukokhutila na vinthu vamuli navo pa nthawe yamene iyo. Chifukwa Mulungu enena kuti: “Nizakusiyenilini olo kukutayani na patontho kumo.” 6 Tinkhale chendi otang’a ntima ndipo tinene kuti: “Yehova niye oniyavya. Nizayopelini. Munthu anganichite chinji?”
7 Mukokumbukila amene okusogolelani. Amene aŵa ekuphunzisani mawu a Mulungu. Ndipo pamuganizila vokonkhapo va nkhalidwe yawo iweme, konkhejani chikhulupililo chawo.
8 Yesu Khilisitu aliyechinje kufumila mailo mpaka lelo ndipo azachinjelini mpaka kale-kale.
9 Osati muluŵilishiwe na viphunziso vosiyana-siyana vachilwendo. Kuwama ntima kwa Mulungu niye kungakuyavyeni kunkhala otang’a,* osati vakulya. Chifukwa ŵanthu amene ongoganizila tyala za vakulya,* vuŵapindulishalini.
10 Sewo tili na guwa ya nsembe yamene ŵanthu amene ochita utumiki wopatulika kuchitenti aliye ulamulilo wakulya va pa guwa pamene apo. 11 Chifukwa nyama zamene milopa yake, nkulu wa ansembe oloŵa nayo mmalo atuŵa monga nsembe ya machimo, oluta kuyazishoka kunja kwa nsasa. 12 Tetyo nayesoti Yesu echiyatamanila kunja kwa gedi ya tauni kuti atuŵishe ŵanthu na milopa yake. 13 Tiyeni timukonkhelele kunja kwa nsasa kwamene uko, patunyozewa monga ni mwechinyozelewa yove. 14 Chifukwa palipano tiliye tauni yonkhazikika, koma tufunishisha tauni yamene iyo ikuza. 15 Tiyeni tikotamanda Mulungu nthawe zonse kupitila mwa Yesu. Kuchita vamene ivi kuli monga ni nsembe yatupeleka kwa Mulungu ndipo tukatishila ntchito milomo yasu polengeza zina yake. 16 Komasoti osati muluŵe kuchita viweme nopasako ayakine vinthu vamuli navo, chifukwa Mulungu osangalala na nsembe zotetyo.
17 Mukomvwila amene okusogolelani ndipo mukoŵagonjela chifukwa ove ololela miyoyo yanu ndipo azayankhe mulandu. Mukochita vamene ivi kuti akokata ntchito yawo mosangalala osati modandaula, chifukwa akachita tetyo vinthu vingakuyendelenilini luweme.
18 Pitilijani kutipemphelela, chifukwa tukhulupilila kuti tili na chikumbuntima chituŵa* ndipo tufuna kuchita vinthu vonse mwachilungamo. 19 Koma maka-maka nukulimbikisani kunipemphelela, kuti nijokele kwamene uko mokulumija.
20 Lomba, Mulungu wantendele wamene eusha chiŵeta nkulu wa mbelele wamene ali na milopa ya pangano yosasila, Ambuye wasu Yesu, 21 akupaseni vinthu vonse vamufunikila kuti muchite vakufuna yove. Ndipo kupitila mwa Yesu Khilisitu, atiyavye kuchita vinthu vumukondwelesha. Mulungu alondele ulemelelo mpaka kale-kale. Ame.
22 Lomba akwasu, nukusengani kuti mumvwishile moleza ntima mawu olimbikisa amene aŵa chifukwa kalata yamene iyi yanakulembelani ni italilini. 23 Ziŵani kuti nkwasu Timoteyo wamasuliwa ndipo keno angawele kwalombapano, niwele naye pamozi pakuzakuwonani.
24 Munipelekele moni kuli ŵanthu onse amene okusogolelani komasoti kuli atuŵa ayakine onse. Akwasu akuno ku Italy okupasani moni.
25 Kuwama ntima kukulu kwa Mulungu kunkhale namwe monse.