Ndaŵa yanji tumanga Ng’anda za Ufumu, soti tuzimanga tyani?

Molingana na zina yakuti Ng’anda ya Ufumu, chiphunziso chikulu cha m’Baibolo chatuphunzila kwamene uko chulaŵila za Ufumu wa Mulungu, yamene yenze mfundo ikulu ya ulaliki wa Yesu.​—Luka 8:1.

Ni malo olambilila Mulungu. Ntchito yolalikila uthenga uweme wa Ufumu yuchitika kufumila ku malo amene aŵa. (Mateyu 24:14) Ng’anda za Ufumu zusiyana-siyana kukula kwake na kamangidwe kake, koma zunkhala lini zikulu olo ziweme mopitilila malile. Ng’anda za Ufumu zinyinji zukatishiliwa ntchito na mipingo yopitilila pa umozi. M’vyaka vitontho vapita, tamanga Ng’anda za Ufumu masauzande anyinji (pa avaledji Ng’anda za Ufumu 5 pa nsiku) kuti tikwanishe kusamalila mipingo yamene yuyangijilika. Kansi vamene ivi vukwanishika tyani?​—Mateyu 19:26.

Ndalama zomangila zufumila m’mipingo yosiyana-siyana. Vopeleka vamene ivi vutumijiwa ku ofesi ya nthambi kuti vikatishiliwe ntchito kumangila olo kukonza soti Ng’anda za Ufumu ku malo kwazufunikila.

Zumangiwa na antchito olipeleka amene olipiliwa lini komasoti a vinkhalidwe vosiyana-siyana. M’vyalo vinyinji, magulu omanga Ng’anda za Ufumu enkhazikishiwa. Atumiki antchito yomanga na antchito olipeleka oluta ku mipingo yosiyana-siyana olo kuti kumadela akutali m’chalo chawo, kuti akatangulile pa ntchito yomanga Ng’anda za Ufumu. M’vyalo viyakine, Mboni zoyenelela zesankhiwa kuti zikopanamila ntchito yomanga na kukonza Ng’anda za Ufumu m’vigawo vechipasiwa. Olo kuti abale na alongo amene ali na maluso osiyana-siyana ofumila mbali, abale na alongo a mumpingo mwamene umo olipeleka kuti ayavye pa ntchito yomanga Ng’anda ya Ufumu. Ntchito yamene iyi yukwanishika chifukwa cha mzimu wa Yehova na ŵanthu ŵake amene olipeleka na ntima wonse.​—Salimo 127:1; Akolose 3:23.

• Ndaŵa yanji malo ŵasu olambilila oitiwa kuti Ng’anda za Ufumu?

• Kansi tukwanisha tyani kumanga Ng’anda za Ufumu pachalo chonse?