MUTU 17
Kansi Yesu ni munthu wotyani?
Tikophunzila vinthu vechilaŵila Yesu komasoti vechichita penze pano pachalo, tufwana minkhalidwe iweme ngako yamene yutichitisha kuti tikomukonda komasoti kuti tikokonda Atata ŵake, Yehova. Kansi ni minkhalidwe iyakine yotyani yali nayo Yesu? Ndipo tingamukonkheje tyani?
1. Kansi Yesu olingana na Atata ŵake mu njila zotyani?
Kwa vyaka mabiliyoni anyinji, Yesu enkhala kululu na Atata ŵake achikondi. Pa nthawe yonse yamene iyi, yove enzewona na kuphunzila kufumila pa vinthu venzechita Atata ŵake. (Ŵelengani Yohane 5:19.) Tetyo yove oganiza, kukhuzika na kuchita vinthu monga Atata ŵake. Ndipo tinganene kuti Yesu ali na minkhalidwe monga ni ya Atata ŵake, mpaka yove enena kuti: “Wala wawona newo wawonasoti Atata.” (Yohane 14:9) Mukophunzila minkhalidwe ya Yesu, mukwanishe kumuziŵa luweme Yehova. Mwachisanzo, chifundo chenzewonesha Yesu kuli ŵanthu chuwonesha umboni wakuti Yehova okudelani nkhaŵa mwewo.
2. Kansi Yesu ewonesha tyani kuti okonda Yehova?
Yesu enena kuti: “Kuti chalo chiziŵe kuti newo nukonda Atata, nuchita vamene ivi kukonkheja lamulo yechinipasa Atata amene awo.” (Yohane 14:31) Penze pano pa chalo, Yesu ewonesha kuti enzekonda Atata ŵake poŵamvwila olo kuti kuchita vamene ivo kwenze kovuta. Yesu enzekonda kulaŵila vokhuza Atata ŵake ndipo enzeyavya ŵanthu ayakine kuti nawo ayambe kukonda Mulungu.—Yohane 14:23.
3. Kansi Yesu owonesha tyani kuti okonda ŵanthu?
Baibolo yuwonesha kuti Yesu osangalala ngako na “ŵana a ŵanthu.” (Miyambo 8:31) Yove ewonesha kuti okonda ŵanthu poŵalimbikisa na kuŵathandiza osati mokakamijika. Vodabwisa venzechita venzewoneshalini tyala mphamvu zake koma venzewoneshasoti kuti ni wachifundo. (Maliko 1:40-42) Enzechita vinthu mowama ntima komasoti mosakondela. Vinthu venzelaŵila venzetonthoja nopeleka chiyembekezo kuli ŵanthu onse aweme ntima amene enzemumvwishila. Yesu enze wokonzeka kuvutika na kufwa chifukwa chokonda ŵanthu onse. Koma okonda ngako ŵala okonkheja viphunziso vake.—Ŵelengani Yohane 15:13, 14.
VATI TIPHUNZILE
Tiphunzile vinyinji vokhuza minkhalidwe ya Yesu. Ndipo tiwone vamungachite kuti mukomukonkheja pa nkhani yowonesha chikondi na kunkhala opasa.
4. Yesu enzekonda Atata ŵake
Vinthu venzechita Yesu vutiyavya kuziŵa vatingachite kuti tikokonda Mulungu. Ŵelengani Luka 6:12 na Yohane 15:10; 17:26. Ndipo pavuli pakuti mwaŵelenga lemba iliyonse, mukambilane konsho iyi:
Pokonkheja chisanzo cha Yesu, kansi tingawoneshe tyani kuti tukonda Yehova?
Yesu enzekonda Atata ŵake ŵakululu ndipo nthawe zinyinji enzelaŵila nawo m’pemphelo
5. Yesu omvwila chisoni ŵanthu osauka
Yesu enzeganizila vofuna va ayakine mmalo mwa vofuna vake. Olo kuti enzenkhala woŵeŵa, enzekatishila ntchito nthawe na mphamvu zake pofuna kuyavya ŵanthu. Ŵelengani Maliko 6:30-44, ndipo pavuli pake mukambilane makonsho aŵa:
Mu nkhani iyi, kansi ni vinthu votyani vuwonesha kuti Yesu enzedela nkhaŵa ayakine?—Onani mavesi 31, 34, 41, na 42.
Kansi ni nkhalidwe yotyani ichitisha Yesu kuti ayavye ŵanthu amene awo?—Onani vesi 34.
Pakuti Yesu okonkheja minkhalidwe ya Yehova, kansi vamene ivi vukuphunzisani chinji vokhuza Yehova?
Kansi ni vinthu votyani vatingachite pokonkheja chisanzo cha Yesu pa nkhani yoganizila ŵanthu ayakine?
6. Yesu ni wopasa
Olo kuti Yesu enzeve vinthu vinyinji, enzepasako ayakine vinthu venze navo. Yove naye ofuna kuti nase tikonkhala opasa. Ŵelengani Machitidwe 20:35, ndipo pavuli pake mukambilane konsho iyi:
Mokatijana na vechinena Yesu, kansi tingachite tyani kuti tikonkhala osangalala?
Lolelani VIDIYO, ndipo pavuli pake mukambilane konsho iyi.
Kansi tingawoneshe tyani kuti tili na ntima wopasa olo kuti tiliye vinthu vinyinji?
Kansi muziŵa?
Baibolo yutiphunzisa kuti tikopemphela kwa Yehova kupitila mu zina ya Yesu. (Ŵelengani Yohane 16:23, 24.) Tikopemphela mwa njila yamene iyi, tuwonesha kuti tutembeja vechitichitila Yesu potiyavya kuti tinkhale azishamwali a Yehova.
ŴANTHU AYAKINE ONENA KUTI: “Mulungu aliye nawo ntchito mavuto ŵasu.”
Pakuti Yesu ali na minkhalidwe yolingana naya Atata ŵake, kansi vochita vake viwonesha tyani kuti Yehova niyelini ochitisha mavuto ŵasu?
MFUNDO ZACHIDULE
Yesu okonda Yehova na ŵanthu. Pakuti Yesu etolela minkhalidwe ya Atata ŵake, kuziwa vinyinji vokhuza yove kungakuyavyeni kuti mumuziŵe luweme Yehova.
Makonsho oweleja
Kansi tingawoneshe tyani kuti tukonda Yehova monga mwakuchitila Yesu?
Kansi tingawoneshe tyani kuti tukonda ŵanthu monga mwechichitila Yesu?
Ni nkhalidwe yotyani ya Yesu yamene yukuchitishani chidwi ngako?
PHUNZILANI VINYINJI
Onani iyakine mwa minkhalidwe ya Yesu yatingakonkheje.
“Kuti mukwanishe kukonkheja Yesu mufunikila . . .” (Yesu—Ndi Njira, Choonadi ndi Moyo, pedji 317)
Onani chifukwa chatufunikila kuchita pemphelo kupitila mu zina ya Yesu.
“Ndaŵa yanji tufunikila kupemphela mu zina ya Yesu?” (Nsanja ya Olonda, 1 February, 2008)
Kansi Baibolo yunena chilichonse chokhuza mwenzewonekela Yesu?
Kansi tuphunzilapo chinji pa nkhani ya mwenzechitila vinthu Yesu na anakazi?
“Mulungu ofuna kuti anakazi akolemekezewa” (Nsanja ya Olonda, 1 September, 2012)