Pitilijani kutembeja dipo

1-2. Kansi dipo ni chinji, ndipo ndaŵa yanji tenzefunikila dipo?

MUNTHU woyambilila Adamu pechichimwa, yove eluza mwayi wa moyo wosasila osati tyala yove yeka koma na ŵana ŵake kumo amene echizavyalika pavuli pake. Penzevesoti kukhululuka pa vinthu vechichita Adamu. Chimo yake yenze yochitila lona. Lomba tyani ŵana ŵake? Ove enzeve mulandu uliwonse pa chimo yechichita Adamu. (Aro. 5:12, 14) Adamu enzefunikila kufwa chifukwa cha vinthu vechichita. Koma kansi Yehova sembe echita chinthu chilichonse kuti ŵana ŵa Adamu ankhale na moyo mpaka kale-kale? Eye! Pakaliyepita nthawe pavuli pakuti Adamu wachimwa, Yehova eulula patontho-patontho vinthu venzefuna kuti azachite kuti azapulumushe ŵana ŵa Adamu mamiliyoni ku tembelelo ya uchimo na imfwa. (Gen. 3:15) Pa nthawe yake yoyenelela, Yehova etumija Mwana wake kufuma kululu “kuzapeleka moyo wake dipo kuwombola ŵanthu anyinji.”​—Mk. 10:45; Yoh. 6:51.

² Kansi dipo ni chinji? M’Malemba Achigiliki Achikhilisitu, dipo ni malipilo ŵechipeleka Yesu kuti owombole vinthu vechitaya Adamu. (1 Akor. 15:22) Ndaŵa yanji tenzefunikila dipo? Chifukwa cha mfundo za chilungamo za Yehova, mu Chilamulo chechipasa Aisiraeli Yehova, chenzenena kuti akopeleka moyo kulipila moyo. (Eks. 21:23, 24) Adamu etaya moyo wake wangwilo. Lomba pofuna kukwanilisha mfundo za chilungamo za Mulungu, Yesu epeleka moyo wake wangwilo. (Aro. 5:17) Chifukwa cha vamene ivi yove enkhala “Atata Wosasila” kuli onse ŵala amene okhulupilila dipo.​—Yes. 9:6; Aro. 3:23, 24.

3. Mokatijana na lemba ya Yohane 14:31 komasoti 15:13, ndaŵa yanji Yesu enze wokonzeka kupeleka moyo wake wangwilo?

³ Yesu oŵakonda ngako Atata ŵake ŵakululu, komasoti otikonda ngako aliyense wa sewo, n’chifukwa chake yove enze wokonzeka kupeleka moyo wake wangwilo. (Ŵelengani Yohane 14:31; 15:13.) Chifukwa chakuti Yesu enzeŵakonda ngako Atata ŵake komasoti sewo taŵanthu, yove enze wosimikija kunkhala wokhulupilika kuli Atata ŵake mpaka pa mapeto a moyo wake. Chifukwa cha vamene ivi vechichita, cholinga choyambilila cha Yehova kuli ŵanthu komasoti kuli ichi chalo chizakwanilishiwe. Mu nkhani ino, tiwone chifukwa chake Mulungu elola kuti Yesu afwe imfwa iipa ngako. Tikambilanesoti mwachidule chisanzo cha wolemba Baibolo muyakine wamene enzelemekeza ngako dipo. Komasoti tiwone vatingachite sewo kuti tikowonesha kuti tutembeja dipo. Pamapeto pake, tiphunzile vatingachite kuti tiyangijile kutembeja kwasu chifukwa cha nsembe yechitipasa Yehova na Yesu.

NDAŴA YANJI YESU EFUNIKILA KUTAMANA?

4. Fotokozani mwechifwila Yesu.

⁴ Ganizilani vichitika pa nsiku yosilijila ya moyo wa Yesu pano pa chalo. Yove sembe eita chigulu cha angelo kuti azamuteteze, koma yove eliyechite tetyo. Mmalomwake, yove elola kuti masodja Achiroma amumange nomuniyata. (Mt. 26:52-54; Yoh. 18:3; 19:1) Masodja ekatishila ntchito ntundu uyakine wa chikoti chemene chenzekwatula nyama kunsana kwa Yesu. Pavuli pake olo kuti Yesu enze na viŵanga vikulu-vikulu kunsana kwake, masodja emukakamija kuti atakule chimuti cholema ngako. Yesu eyamba kukwekwesha chimuti kuluta nacho pa malo ŵenzefuna kuti akamupaile. Koma pakaliyepita nthawe, masodja Achiroma elamula kuti munthu muyakine amutakulile chimuti chamene icho. (Mt. 27:32) Yesu pechifwika pa malo pechipailiwa, masodja emukhomelela manja na mendo ŵake pa chimuti. Kulema kwa muŵili wa Yesu kwenzechitisha kuti akokumvwasoti kuŵaŵa ngako mu vilonda va misomali yenze mukhomeleleko. Azishamwali ŵake enzedandaula ndipo amayi ŵake enzelila, koma Ayuda enzemunyoza. (Lk. 23:32-38; Yoh. 19:25) Yesu etamana ma awazi anyinji. Ntima na visape va Yesu viyamba kufoka, ndipo eyamba kuŵensa movutikila. Yesu eziŵa kuti wankhala wokhulupilika, ndipo wasala patontho kuti afwe, yove echita pemphelo yake yosilijila kwa Yehova. Pamapeto pake yove ejolisha mutu wake nopeleka moyo wake. (Mk. 15:37; Lk. 23:46; Yoh. 10:17, 18; 19:30) Kulaŵila chendi, Yesu echifwa patontho-patontho, echifwa imfwa yoŵaŵa, komasoti yochitisha nsoni!

5. Kwa Yesu, kansi ni chinji chimuŵaŵa ngako kupambana kufwa mochita khomelelewa pa chimuti?

⁵ Kwa Yesu, chinthu chimuŵaŵa ngako ni njilalini yechifwilamo yayi. Koma chinthu chikulu chimuipila ngako ni chifukwa chechimupaila cha wenye. Yove etalijiliwa wenye kuti ni wonyoza​—mutnhu aliye ulemu na Mulungu olo na zina yake. (Mt. 26:64-66) Chifukwa cha wenye wechimuyopejela ŵanthu wakuti olemekezalini Mulungu, vimuŵaŵa ngako Yesu ndipo yove enzeyembekezela kuti Atata ŵake alolelini kuti yove anyozewe mu njila yamene iyi. (Mt. 26:38, 39, 42) Ndaŵa yanji Yehova elola kuti Mwana wake wapantima atamane na kufwa? Tiyeni tikambilane vifukwa vitatu.

6. Ndaŵa yanji Yesu efunikila kupachikiwa pa chimuti chotamanilapo?

⁶ Choyamba, Yesu efunikila kufwa pa chimuti kuti amasule Ayuda ku tembelelo. (Aga. 3:10, 13) Ayuda enze na tembelelo yamene iyi chifukwa chakuti enze elonjeza kukwanilisha Chilamulo cha Mulungu koma aliyekwanilishe lonjezo yawo. Tetyo, ove enzefunikila kufwa ndaŵa yakuti enze ŵana ŵa Adamu, koma tembelelo yamene iyi yenzesoti pali ove. (Aro. 5:12) Chilamulo cha Mulungu kuli Aisiraeli chenzenena kuti, munthu wamene wachita chimo yofunikila kufwa enzefunikila kupaiwa. Pavuli pake, nthawe ziyakine, ntembo wake wenzefunikila kupachikiwa pa chimuti.b (Deut. 21:22, 23; 27:26) Chifukwa chakuti Yesu epachikiwa pa chimuti, Ayuda emasuliwa ku tembelelo yamene iyi ndipo nsembe yake iŵayavya olo kuti ove emukana.

7. Kansi chifukwa chachiŵili chamene chichitisha Mulungu kulola kuti Mwana wake atamane ni chotyani?

⁷ Tiyeni tiwone chifukwa chachiŵili chamene chichitisha Mulungu kulola kuti Mwana wake atamane. Yehova enzephunzisa Yesu za udindo wake wakusogolo monga Nkulu wa Ansembe. Yesu naye echimvwa kuti ni kovuta ngako kumvwila Mulungu pokumana na mayeselo akulu ngako. Yove echimvwa ululu mwakuti esenga thandizo ya Mulungu mpaka ‘kuchita ponesha misozi.’ Kulaŵila chendi, pechivutika ngako maganizo, Yesu yeka oziŵa vatufunikila ndipo “okwanisha kutiyavya” pa nthawe ‘yatuyesewa.’ Tumutembeja ngako Yehova chifukwa chotisankhila Nkulu wa Ansembe wamene ni wachifundo komasoti wamene ‘otimvwila chisoni pa vofoka vasu’!​—Ahe. 2:17, 18; 4:14-16; 5:7-10.

8. Kansi chifukwa chachitatu chamene chichitisha Mulungu kulola kuti Yesu ayesewe ngako ni chotyani?

⁸ Chachitatu, Yehova elola kuti Yesu akumane na chiyeso chovuta ngako kuti ayankhe konsho yakuti: Kansi ŵanthu angankhale mphela okhulupilika kwa Yehova olo kuti ali pa chiyeso chikulu ngako? Satana onena kuti yayi! Yove onena kuti ŵanthu akungotumikila tyala Mulungu chifukwa ofuna kupasiwa kanthu. Ndipo yove okhulupilila kuti​—molingana na atata ŵawo Adamu—​ove aliyelipeleke kwa Yehova. (Yobu 1:9-11; 2:4, 5) Chifukwa chakuti Yehova enze wosimikijila kuti Yesu apitilije mphela kunkhala wokhulupilika, yove elola kuti Mwana wake ayesewe ngako. Yesu enkhala mphela wokhulupilika ndipo ewonesha kuti Satana ni wawenye.

WOLEMBA BAIBOLO WAMENE ENZELEMEKEZA NGAKO DIPO

9. Kansi ntumwi Yohane etisiila chisanzo chotyani?

⁹ Akhilisitu anyinji enkhala na chikhulupililo chotang’a ngako chifukwa chophunzisiwa za dipo. Ove epitilija kulalikila olo kuti enzeshushiwa ndipo ove epilila mayeselo aliwonse kwa moyo wawo wonse. Ganizilani chisanzo cha ntumwi Yohane. Yove elalikila mokhulupilika vokhuza Khilisitu komasoti dipo, payakine kwa vyaka vopitilila 60. Yove penze na vyaka pafup-ifupi 100, Boma ya Roma yenzemuwona kuti ni munthu woyofwa ngako mpaka emangiwa nomutumija ku nsuwa ya Patimo. Kansi yove ephoniya chinji? “Chifukwa cholaŵila za Mulungu komasoti kuchitila umboni za Yesu.” (Chiv. 1:9) Yohane ewonesha chisanzo chiweme ngako cha chikhulupililo komasoti chopilila!

10. Kansi mabuku ŵechilemba Yohane owonesha tyani kuti yove enzelemekeza dipo?

¹⁰ M’mabuku a m’Baibolo ŵechilemba Yohane, yove elemba mwenzekondela Yesu komasoti mwenzetembejela dipo. Yove elaŵila maulwendo opitilila 100 vinthu vokhuza dipo olo vinthu viweme vayupeleka. Mwachisanzo, Yohane elemba kuti: “Muyakine akachita chimo, tili na mthandizi wolungama, Yesu Khilisitu, wamene ali na Atata.” (1 Yoh. 2:1, 2) Mabuku ŵechilemba Yohane ofotokozasoti za kufunika kwa “kuchitila umboni za Yesu.” (Chiv. 19:10) Kulaŵila chendi, Yohane enzeilemekeza ngako dipo. Kansi sewo nase tingawoneshe tyani kuti tuchita chimo-zimozi?

KANSI MWEWO MUNGAWONESHE TYANI KUTEMBEJA KWANU CHIFUKWA CHA DIPO?

11. Kansi ni chinji chingatiyavye kupilila mayeselo?

¹¹ Pililani pamuyesewa kuti muchite chimo. Keno sewo tutembeja chendi dipo, tingaganizilekolini olo patontho kuti: ‘Paliye chifukwa chaningafunikile kunkhalila wopilila ngako nikoyesewa. Newo ningapitilije kuchita chimo, ndipo pavuli pake nisenge kuti anikhululukile.’ Mmalomwake, tikayesewa kuti tichite chinthu chiipa, tufunika kunena kuti: ‘Yayi! Pavuli pa vinthu vonse vechinichitila Yehova na Yesu, newo ningachitelini chinthu choteti na patontho kumo.’ Pokonkheja nzelu yamene iyi, tingasenge Yehova kuti atipase mphamvu, mpaka kumupapatila kuti: ‘Osaniloŵesha m’mayeselo.’​—Mt. 6:13.

12. Kansi tingakonkheje tyani malangizo amene opezeka pa lemba ya 1 Yohane 3:16-18?

¹² Kondani abale na alongo ŵanu. Tikowonesha chikondi, tuwoneshasoti kuti tutembeja dipo. Ndaŵa yanji? Ndaŵa yakuti Yesu epeleka moyo wake osati chifukwa cha sewo seka, koma chifukwasoti cha abale ŵasu pamozi na alongo. Yesu enze wokonzeka kuŵafwila, niye chifukwa chake oŵakonda ngakosoti. (Ŵelengani 1 Yohane 3:16-18.) Keno tuchita nawo vinthu luweme abale ŵasu na alongo tuwonesha kuti tuŵakonda. (Aef. 4:29, 31–5:2) Mwachisanzo, tingaŵayavye akalwala olo akokumana na vinthu vovuta ngako, monga masoka achilengedwe. Koma kansi tingachite tyani keno m’bale walaŵila olo kuchita chinthu chamene chatikhumudwisa?

13. Ndaŵa yanji tufunika kukhululukila ayakine nthawe zonse?

¹³ Kansi mwewo muwona kuti kukhululukila n’kovuta keno m’bale muyakine wakuchitilani chinthu chiipa? (Lev. 19:18) Keno n’tetyo, konkhejani malangizo aŵa: “Pitilijani kulolelana muyake na muyake nokhululukilana na ntima wonse, olo kuti muyakine alinacho chifukwa chodandawulila za muyake. Monga nimwechichitila Yehova ekukhululukilani na ntima wonse, namwe mwawochita tetyo.” (Akol. 3:13) Pa nthawe iliyonse yatukhululukila m’bale wasu olo mulongo, tuwonesha Atata ŵasu ŵakululu kuti tutembeja chendi dipo. Kansi tingachite tyani kuti tipitilije kuyangijila kutembeja kwasu chifukwa cha mphaso ya Mulungu yamene iyi?

KANSI MUNGAYANGIJILE TYANI KUTEMBEJA KWANU CHIFUKWA CHA DIPO?

14. Kansi njila imozi yatingayangijilile kutembeja kwasu chifukwa cha dipo ni yotyani?

¹⁴ Tembejani Yehova chifukwa cha dipo. Mulongo muyakine wamene onkhala ku India, wa vyaka 83 zina yake Joana, enena kuti: “Newo nuwona kuti ni chinthu chofunika kutomola dipo nsiku zonse m’mapemphelo ŵangu komasoti kutembeja Yehova chifukwa cha dipo yamene iyo.” Nsiku iliyonse, mukopemphela pamweka, muujeni Yehova vinthu vamwaphoniyesha ndipo musengeni kuti akukhululukileni. Kulaŵila chendi, keno mwewo mwachita chimo ikulu, mufunikilasoti thandizo ya akulu. Ove akumvwishileni mwewo komasoti kukupasani malangizo achikondi ofumila m’Mawu a Mulungu. Ove apemphele namwe pamozi, nosenga Yehova kuti akukhululukileni kuti munkhalesoti pa ushamwali uweme na Yehova.​—Yak. 5:14-16.

15. Ndaŵa yanji tufunika kupatulako nthawe kuti tiŵelenge vokhuza dipo komasoti kuiganizila?

¹⁵ Ganizilani ngako za dipo. Mulongo muyakine wa vyaka 73 zina yake Rajamani, enena kuti: “Nthawe iliyonse yanuŵelenga za kutamana kwa Yesu, m’menso mwangu muzula misozi.” Mwewo namwe mungamvwe kuŵaŵiwa mukaganizila mwechitamanila Mwana wa Mulungu. Koma mwewo mukoganizila ngako za kulipeleka kwechichita Yesu, muyambe kumukonda ngako yove pamozi na Atata ŵake. Pofuna kukuyavyani kuganizila vokhuza dipo, kansi muwona tyani kuyangijilapo nkhani yamene iyi pa phunzilo yanu yapamweka?

16. Kansi kuphunzisa ayakine vokhuza dipo kungatiyavye tyani sewo? (Onani chithunzi chapachikuto.)

¹⁶ Phunzisani ayakine vokhuza dipo. Nthawe iliyonse yatuujako ayakine vokhuza dipo, kutembeja kwasu chifukwa cha dipo kuyangijilika. Sewo tili na vinthu viweme ngako vatukatishila ntchito pophunzisa vamene vutiyavya kuphunzisa ayakine za chifukwa chichitisha Yesu kutifwila. Mwachisanzo, tingakatishile ntchito mutu 4 wa kabulosha kakuti Uthenga uweme wofumila kuli Mulungu! Mutu wake ni wakuti, “Mwa Yesu Khilisitu niŵani?” Tingakatishilesoti ntchito mutu 5 wa buku yakuti Vayuphunzisa Baibolo! Mutu wake ni wakuti, “Dipo​—ni Mphaso yofumila kwa Mulungu.” Ndipo chaka chilichonse tuyangijila kutembeja kwasu chifukwa cha dipo popezeka pa Chikumbukilo cha imfwa ya Yesu komasoti pochita vonse vatingakwanishe kuti tiiteko ayakine kuti azankhale nase pa chochitika chapadela chamene ichi. Tutembeja ngako chifukwa cha mwayi wechitipasa Yehova wophunzisa ayakine vokhuza Mwana wake!

17. Ndaŵa yanji dipo ni mphaso ikulu ngako yofumila kwa Mulungu yechipasa ŵanthu?

¹⁷ Kulaŵila chendi, tili na vifukwa viweme votembejela komasoti voyangijilila kutembeja kwasu chifukwa cha dipo. Chifukwa cha dipo, tingankhale pa ushamwali uweme na Yehova olo kuti nise ochimwa. Chifukwa cha dipo, ntchito zonse za Satana zizawonongewe. (1 Yoh. 3:8) Chifukwa cha dipo, cholinga choyambilila cha Yehova chokhuza chalo chizakwanilishiwe. Chalo chonse chizankhale paladaiso. Ŵanthu onse ŵamukuti muzaziŵane nawo akokonda komasoti kutumikila Yehova. Niye chifukwa chake, nsiku iliyonse chitani vonse vamungakwanishe kuti muwoneshe kutembeja kwanu chifukwa cha mphaso ikulu ngako yofumila kwa Mulungu yechipasa ŵanthu​—dipo!