Kalata yamene ingatiyavye kupilila mokhulupilika mpaka pamapeto

1-2. (a) Kansi vinthu venze tyani pamoyo wa Ayuda ntumwi Paulo pechilemba kalata ya Ahebeli? (b) Kansi n’chinji chuwonesha kuti kalata yamene iyo yenze yapanthawe yake?

AKHILISITU Achihebeli amene enzenkhala ku Yudeya na ku Yerusalemu, ekumana na mavuto anyinji pavuli pa imfwa ya Yesu. Pakaliye pita nthawe kufumila pewinkhazikishiwa mpingo wa Chikhilisitu, enekwasu na akalongosi eyamba kunzunziwa ngako. (Mach. 8:1) Pavuli pavyaka pafupi-fupi 20, ove ekumana na vuto yanjala komasoti umphaŵi. (Mach. 11:27-30) Koma olo n’tetyo, cham’ma 61 C.E., Akhilisitu amene awo enze munthawe ya ntendele tikayelekezela na vinthu venzeyembekezela kuti akumane navo kusogolo. Panthawe yamene iyo, Yehova eujila ntumwi Paulo kuti aŵalembele kalata,—ndipo mukalata yamene iyo mwenze malangizo ngawo-ngawo ŵenzefunikila kuti akonzekele vinthu vakusogolo.

² Kalata ya Ahebeli, yenze yapanthawe yake chifukwa ntendele wenze nawo Akhilisitu panthawe yamene iyo wenze wosankhalisha. Malangizo ŵechipeleka Paulo panthawe yamene iyo, sembe eyavya Akhilisitu kuti akwanishe kupilila chisauso chamene chenze chesala patontho kuchitika. Mawu a Yesu onena za kuwonongewa kwa chalo cha Yuda, enze esala patontho kuti akwanilishiwe. (Luk. 21:20) Koma olo n’tetyo, Paulo na Akhilisitu aku Yuda enzeziŵalini nthawe ngayo-ngayo yakuwonongewa kwa Tauni yamene iyo. Koma Akhilisitu amene awo sembe ekatishila ntchito nthawe yenze nayo kuti akonzekele vinthu vakusogolo pokulisha minkhalidwe iweme, monga chikhulupililo komasoti kupilila.—Ahe. 10:25; 12:1, 2.

3. Ndaŵa yanji buku ya Ahebeli niyofunika ngako kuli Akhilisitu masiku ŵano?

³ Sewo nase tasala patontho kukumana na chisauso chikulu ngako kupambana chechikumana nacho Akhilisitu Achiheberi. (Mat. 24:21; Chiv. 16:14, 16) Tetyo, tiyeni tikambilane malangizo ŵechipeleka Yehova kuli Akhilisitu amene awo amene angatiyavye nase masiku ŵano.

TIYENI “TIYEJE-YEJE MWAKHAMA KUTI TINKHALE AKULU MWAUZIMU”

4. Kansi Akhilisitu Achiyuda ekumana na mavuto otyani? (Onanisoti chithunzi.)

⁴ Akhilisitu Achiyuda ekumana na vuto ikulu. Poyamba, Ayuda enze ŵanthu osankhiwa na Yehova. Kwa vyaka vinyinji, Yerusalemu enze malo opatulika ngako pachalo chonse. Mafumu amene enzelamulila ku Yerusalemu, enzepanamila Yehova. Ndipo ŵanthu akafuna kulambila Yehova, enzeluta kukachisi ku Yerusalemu. Ayuda onse okhulupilika enzekonkheja Chilamulo cha Mose chenzephunzisa asogoleli ŵawo achipembezo. Ove enzekonkheja mwambo wa Ayuda pankhani ya chakulya komasoti mwangachitile vinthu na ŵanthu amitundu iyakine. Koma pavuli pa imfwa ya Yesu, Yehova aliyepitilije kulondela nsembe zenzepelekewa pakachisi. Tetyo venzelini vipepu kuli Akhilisitu Achiyuda amene enze edjaila kukonkheja Chilamulo. (Ahe. 10:1, 4, 10) Olo Akhilisitu otang’a mwauzimu monga ntumwi Petulo, evutika kuti adjaile kuchinja kwamene uko. (Mach. 10:9-14; Agal. 2:11-14) Chifukwa chachikhulupililo chawo chanyowani chamene icho, Akhilisitu eyamba kutamanishiwa na asogoleli achipembezo chikulu cha Ayuda.

5. Kansi Akhilisitu ofunika kunkhala osamala na chinji?

⁵ Akhilisitu aku Yudeya enzeshushiwa na magulu aŵili a ŵanthu. Asogoleli achipembezo cha Ayuda enzeŵawona kuti ni ŵanthu ampatuko. Kuyangijila pamene apo, ŵanthu ayakine mumpingo enzenena kuti Akhilisitu ofunika kupitilija kukonkheja Chilamulo cha Mose. Payakine ove enzenena vamene ivi kuti osati akotamanishiwa. (Agal. 6:12) Kansi sembe n’chinji cheŵayavya Akhilisitu okhulupilika kuti akate mwamphamvu chonadi?

6. Kansi Paulo elimbikisa Akhilisitu ayake kuti achite chinji? (Ahebeli 5:14–6:1)

⁶ Mukalata yake yoluta kuli Ahebeli, Paulo elimbikisa Akhilisitu ayake kuti akophunzila Mawu a Mulungu mwakhama ngako. (Ŵelengani Ahebeli 5:14–6:1.) Pokatishila ntchito Malemba Achihebeli, Paulo eyavya enekwasu na akalongosi kuziŵa kuti njila yolambilila ya Chikhilisitu niyapalulu ngako kupambana njila yolambilila ya Ayuda.a Paulo elimbikisa Akhilisitu ayake kuti aŵaziŵe luweme Malemba kuti akokwanisha kuziŵa viphunziso vawenye novipewa.

7. Kansi ni mavuto otyani ŵatukumana nawo masiku ŵano?

⁷ Molingana na mwevenzele kuli Akhilisitu Achihebeli, nkhani komasoti minkhalidwe ya ŵanthu a ŵano masiku vukatijanalini na mfundo zolungama za Yehova. Kanyinji-kanyinji, ŵanthu oshusha otinyoza chifukwa cha mfundo za m’Baibolo zatukhulupilila pankhani ya minkhalidwe ndipo onena kuti nise ŵanthu osalila komasoti oyumisha vinthu. Vakuganiza ŵanthu vusiyana ngako na vakuganiza Yehova. (Miy. 17:15) Tetyo, tufunika kunkhala akulu mwauzimu kuti tikokwanisha kupewa maganizo aipa nopitilija kutumikila Yehova mokhulupilika.—Ahe. 13:9.

8. Kansi tingachite tyani kuti tipitilije kukula mwauzimu?

⁸ Tingachite luweme kukonkheja malangizo ŵechipeleka Paulo kuli Akhilisitu Achihebeli onena za kuyeja-yeja kuti tinkhale akulu mwauzimu. Vamene ivi vupamikijapo kuphunzila mfundo zikulu-zikulu za chonadi komasoti kuwona vinthu monga nimwakuviwonela Yehova. Tufunika kupitilija kuchita vamene ivi olo pavuli pakuti talipeleka kwa Mulungu nobatizika. Viliye kanthu kuti tankhala m’chonadi kwa nthawe ikulu tyani, tonse tufunika kuŵelenga komasoti kuphunzila chonadi nthawe zonse. (Sal. 1:2) Pulogilamu iweme yakuŵelenga Baibolo paseka, ingatiyavye kunkhala na chikhulupililo, yamene ninkhalidwe yechisimikijila ngako Paulo mukalata yake ya Ahebeli.—Ahe. 11:1, 6.

TINKHALE ‘ŴANTHU A CHIKHULUPILILO CHAMENE CHINGATIYAVYE KUZAFWANA MOYO’

9. Ndaŵa yanji Akhilisitu Achihebeli enzefunika kunkhala na chikhulupililo chotang’a?

⁹ Akhilisitu Achihebeli enzefunika kunkhala na chikhulupililo chotang’a kuti akwanishe kupulumuka pachisauso chamene chenze chesala patontho kuti chichitike ku Yudeya. (Ahe. 10:37-39) Yesu enze euja kale ophunzila ŵake kuti akezewona kuti Yerusalemu wazengulukiwa na masodja ankhondo, azathaŵile kumalupili. Malangizo ŵake amene aŵa enze ofunika ngako kuli Akhilisitu onse, viliye kanthu kuti enzenkhala nkati mwa tauni olo m’madela akuminzi. (Luk. 21:20-24) Munthawe ya Ayuda, ŵanthu akayofyewa na magulu ankhondo, enzethaŵila mumpanda wa tauni ya Yerusalemu kuti atetezeke. Kuthaŵila kumalupili kwenzewoneka monga nikusowa nzelu, ndipo Akhilisitu enzefunika kunkhala na chikhulupililo chotang’a kuti akwanishe kuchita vamene ivo.

10. Kansi chikhulupililo chotang’a sembe chiyavya Akhilisitu kuti akwanishe kuchita chinji? (Ahebeli 13:17)

¹⁰ Akhilisitu Achihebeli enzefunika kudalilasoti ŵanthu ŵenzekatishila ntchito Yesu posogolela mpingo. Enekwasu osogolela enzefunika kupeleka malangizo asiteleti okhuza nthawe yothaŵa komasoti mwangathaŵile. (Ŵelengani Ahebeli 13:17.) Mawu Achigiliki ŵechikatishila ntchito pa Ahebeli 13:17 akuti “mukomvwila”, otanthauza kuti munthu okwanisha kumvwila malangizo ofumila kuli muyake chifukwa chakuti omudalila. Kumvwila munthu muyakine kufuna vinyinji, osati tyala kuziŵa kuti munthu wamene uyo ali na udindo wopeleka malangizo. Tetyo, Akhilisitu Achihebeli enzefunika kuphunzila kudalila enekwasu osogolela chisauso chikaliyeyamba. Kuti Akhilisitu enzemvwila nokonkheja malangizo ofumila kuli enekwasu osogolela panthawe ya ntendele, sembe viliyeŵavute ngako kuchita chimozi-mozi panthawe yamavuto.

11. Ndaŵa yanji Akhilisitu ofunika kunkhala na chikhulupililo chotang’a masiku ŵano?

¹¹ Masiku ŵano, tufunika kunkhala na chikhulupililo cholingana na Akhilisitu Achihebeli amene elondela kalata yofumila kuli ntumwi Paulo. Masiku ŵano, ŵanthu anyinji okana kukhulupilila ndipo onyoza vayunena Baibolo kuti mapeto achino chalo chiipa avwendela. (2 Pet. 3:3, 4) Kuyangijila pamene apo, olo kuti Baibolo yunena vinthu viyakine vamene vikuti vizachitike pa chisauso chikulu, pali vinthu viyakine vatisaziŵa. Tufunika kukhulupilila ngako kuti mapeto achino chalo azafwike nthawe yake ikezekwana, ndipo Yehova azatisamalile.—Hab. 2:3.

12. Kansi n’chinji chingatiyavye kuti tizapulumuke pachisauso chikulu?

¹² Tufunikasoti kudalila njila yakukatishila ntchito Yehova potisogolela masiku ŵano pokatishila ntchito “kapolo wokhulupilika komasoti wanzelu.” (Mat. 24:45) Chisauso chikulu chekezeyamba, payakine tikalondele malangizo asiteleti okhuza vatingachite kuti tipulumuke monga nimwevenzele na Akhilisitu Achihebeli panthawe yechifwika Aroma. Ino niye nthawe iweme yotang’isha chikhulupililo chasu komasoti kukonkheja malangizo ŵatulondela kuli enekwasu osogolela m’gulu ya Yehova. Sewo tingayembekezelelini kuti tizakonkheje malangizo ofumila kuli enekwasu osogolela pachisauso chikulu keno vutivuta kukonkheja malangizo ŵawo na ntima wonse palipano.

13. Ndaŵa yanji tinganene kuti malangizo ŵatuŵelenga pa Ahebeli 13:5 enze ofunika kuli Ayuda?

¹³ Panthawe yenzeyembekezela chizindikilo kuti athaŵe ku Yudeya, Akhilisitu Achihebeli enzefunikasoti kuphunzila moyo wosafuna vinthu vinyinji mwakupewa ntima ‘wokonda ndalama.’ (Ŵelengani Ahebeli 13:5.) Ayakine mwa ove enzetamana na njala komasoti umphaŵi. (Ahe. 10:32-34) Olo kuti poyamba enze okonzeka kupilila mavuto chifukwa cha uthenga uweme, ayakine eyamba kuwona kuti kunkhala olemela kungaŵateteze. Koma chuma sembe chiliyekwanishe kuŵapulumusha Aroma penzewononga Yerusalemu. (Yako. 5:3) Kuyangijila pamene apo, munthu aliyense wamene enzekonda ngako chuma chake, sembe vemuvuta kuthaŵa nosiya katundu wake.

14. Kansi kunkhala na chikhulupililo chotang’a kungakhuze tyani mwatuwonela vinthu pankhani yachuma?

¹⁴ Tingapewe ntima wokonda ngako chuma keno tukhulupilila kuti mapeto achino chalo chiipa avwendela. Panthawe yachisauso chikulu, ndalama izankhale iliye ntchito. Baibolo yunena kuti, “siliva wawo azamutaye m’misewu” chifukwa azaziŵe kuti “siliva olo golide wawo azakwanishelini kuŵapulumusha pansiku ya Yehova yakuti azawoneshe ukali wake ukulu.” (Eze. 7:19) M’malo mosakila chuma mwakhama, tikosankha vinthu vamene vingatiyavye kunkhala na moyo wosafuna vinthu vinyinji kuti tipitilije kutumikila Yehova. Vamene ivi vupamikijapo kupewa nkhongole zosafunikila olo vinthu vinyinji vakuthupi. Tufunika kunkhala osamala popewa ntima wokonda chuma komasoti katundu watili naye kale. (Mat. 6:19, 24) Chikhulupililo chasu chingayesewe kuti tiyambe kukonda chuma olo vinthu viyakine mapeto a chino chalo chiipa pakuvwendela.

‘TUFUNIKA KUNKHALA OPILILA’

15. Ndaŵa yanji Akhilisitu Achihebeli enzefunika kutang’isha ngako chikhulupililo chawo kuti akwanishe kupilila?

¹⁵ Akhilisitu Achihebeli enzefunika kupilila penzekumana na mayeselo oyesa chikhulupililo chawo panthawe yenzekumana na mavuto akulu moweleja-weleja ku Yudeya. (Ahe. 10:36) Olo kuti Akhilisitu Achihebeli enzetamanishiwa ngako, ŵanthu anyinji eloŵa mumpingo wa Chikhilisitu panthawe yenze akali pantendele. Tetyo, Paulo eŵakumbusha kuti akonzekele chinzunzo chikulu ngako nonkhala okhulupilika mpaka kufwa monga nimwechichitila Yesu. (Ahe. 12:4) Ayuda anyinji ekalipa ngako ndipo eyamba kuchita chiwawa, pechiwona kuti ŵanthu anyinji aloŵa mumpingo wa Chikhilisitu. Vyaka vinyinji kuvuli Paulo pechiwonekela ku Yerusalemu, Ayuda echita chipolowe. Ayuda opitilila 40 ‘elumbila molitembelela kuti alyelini olo kumwa kalikonse mpaka apaye Paulo.’ (Mach. 22:22; 23:12-14) Olo kuti adani ŵawo enzeŵazonda komasoti kuŵatamanisha, Akhilisitu enzefunika kupitilija kusonkhana pamozi kuti alambile Mulungu, kulalikila uthenga uweme, nopitilija kutang’isha chikhulupililo chawo.

16. Kansi buku ya Ahebeli ingatiyavye tyani kunkhala na maganizo aweme keno tutamanishiwa? (Ahebeli 12:7)

¹⁶ Kansi sembe n’chinji cheŵayavya Akhilisitu Achihebeli kuti akwanishe kupilila? Paulo eyavya Akhilisitu amene awo kuziŵa mapindu ŵangafwane chifukwa chopilila mavuto. Tetyo, yove enena kuti Mulungu angalole kuti Akhilisitu akumane na mayeselo oyesa chikhulupililo chawo pofuna kuŵakonzekelesha vinthu vakusogolo. (Ŵelengani Ahebeli 12:7.) Mavuto ŵechikumana nawo eŵayavya kuti akulishe minkhalidwe iweme ya Chikhilisitu. Mwakuganizila vokonkhapo viweme vamayeselo ŵenzekumana nawo, Akhilisitu Achihebeli sembe ekwanisha kupilila mavuto ŵawo mosavuta.—Ahe. 12:11.

17. Kansi Paulo ephunzila chinji pankhani yopilila chinzunzo?

¹⁷ Paulo elimbikisa Akhilisitu Achihebeli kuti osati achite wowa olo kujokela vuli chifukwa cha mavuto ŵenzekumana nawo. Yove epeleka malangizo aweme onena vatingachite kuti tipilile chinzunzo. Chifukwa chakuti poyamba enzenzunza Akhilisitu, yove enzeziŵa luweme za mavuto ŵenzelimbana nawo Akhilisitu amene awo. Yove enzeziŵasoti vangachite Nkhilisitu kuti akwanishe kupilila chinzunzo. Ndipo kulaŵila chendi, Paulo pechinkhala Nkhilisitu ekumana na mavuto osiyana-siyana. (2 Ako. 11:23-25) Chifukwa cha vamene ivi, yove enzeziŵa vangachite munthu kuti akwanishe kupilila. Paulo ekumbusha Akhilisitu kuti ofunika kudalila Yehova kuti akoŵayavya akakumana na mavuto mmalo modalila nzelu zawo, ndipo eŵauja kuti ankhale otang’a ntima nonena kuti: “Yehova niye wamene oniyavya. Nizayopelini.”—Ahe. 13:6.

18. Kansi nivinthu votyani vakusogolo vatufunika kuziŵa kuti tikwanishe kupilila chinzunzo?

¹⁸ Patunena pano, enekwasu ayakine okumana na chinzunzo. Sewo tingaŵayavye poŵatomola m’mapemphelo ŵasu komasoti kuŵapasa vinthu vakufunikila nthawe ziyakine. (Ahe. 10:33) Koma olo n’tetyo, tikokumbukila vayunena Baibolo kuti, “onse amene ofuna kunkhala na moyo wolipeleka kwa Mulungu mokatijana na Khilisitu Yesu, nawosoti azatamanishiwe.” (2 Tim. 3:12) Chifukwa cha vamene ivi, tonse tufunika kukonzekela vinthu vakusogolo. Tiyeni tonse tipitilije kumudalila ngako Yehova, ndipo osati tikokaikila kuti azatiyavye kuti tikwanishe kupilila vuto iliyonse yatingakumane nayo. Nthawe yake ikezekwana, Mulungu azapulumushe atumiki ŵake onse okhulupilika.—2 Ates. 1:7, 8.

19. Kansi nivinthu votyani vatingachite pokonzekela chisauso chikulu? (Onanisoti chithunzi.)

¹⁹ N’vowonekelatu kuti kalata ya Ahebeli yechilemba Paulo, iyavya Akhilisitu oyambilila kuti akwanishe kukonzekela chisauso chamene enze esala patontho kuti akumane nacho. Paulo elimbikisa enekwasu na akalongosi amumpingo wamene uyo kuti akophunzila mfundo zikulu-zikulu za m’Malemba nozimvwisha luweme. Kuchita vamene ivi sembe kweŵayavya kuti akwanishe kupewa viphunziso vamene sembe vewononga chikhulupililo chawo. Yove elimbikisa Akhilisitu Achihebeli kuti akulishe chikhulupililo chawo, vamene sembe veŵayavya kuti akwanishe kumvwila malangizo a Yesu komasoti ofumila kuli enekwasu osogolela mumpingo. Paulo eyavyasoti Akhilisitu amene awo kuti akowona mavuto ŵawo mwanjila iweme monga njila yenzekatishila ntchito Atata ŵawo achikondi Yehova kuti aŵaphunzise kunkhala opilila. Nase tingachite luweme kukonkheja malangizo oujiliwa amene aŵa. Tikachita tetyo, tizakwanishe kupilila mokhulupilika mpaka pamapeto.—Ahe. 3:14.