Sondo, Novemba 2
Osapitilija kuyona monga ni mwakuchitila ayakine, koma tinkhale menso ndipo tinkhale oganiza luweme. —1 Ates. 5:6.
Chikondi ni chofunika kuti tikonkhala menso komasoti kuti tipitilije kunkhala oganiza luweme. (Mat. 22:37-39) Kukonda Mulungu kutiyavya kuti tikwanishe kupilila pokata ntchito yolalikila mosasamala kanthu za mavuto ŵatingakumane nawo. (2 Tim. 1:7, 8) Chifukwa chakuti tukonda ŵanthu amene otumikilalini Yehova, tupitilija kukata ntchito yolalikila nophunzisa ŵanthu a m’gawo yasu pokatishila ntchito ulaliki wapa foni olo m’makalata. Tujokelalini kuvuli chifukwa tili na chiyembekezo chakuti nsiku iyakine ŵanthu azachinje moyo wawo noyamba kuchita vinthu viweme. (Eze. 18:27, 28) Kukonda ayasu kupamikijaposoti kukonda Akhilisitu ayasu. Tuwonesha chikondi chamene ichi mwa “kutonthojana notang’ishana.” (1 Ates. 5:11) Molingana na masodja amene okatila ntchito pamozi kunkhondo sewo tutang’ishana muyake na muyake koma sewo tingachitelini akwasu na akalongosi ŵasu mwalona olo kuwejela kuchitiwa pa kuchitiwa. (1 Ates. 5:13, 15) Tuwoneshasoti chikondi polemekeza akwasu amene osogolela mpingo.—1 Ates. 5:12. Nsanja yophunzila 06.2023 pedji 10 ndim. 6; pedji 11 ndim. 10-11
Mande, Novemba 3
Kansi elaŵilapo kanthu [Yehova] koma osakwanilisha?—Num. 23:19.
Njila imozi yatingatang’ishile chikhulupililo chasu ni kuganizila vokhuza dipo. Dipo niye yutisimikijila kuti malonjezo a Mulungu azakwanilishiwe. Keno tuganizila ngako chifukwa cheipelekelewa dipo komasoti kufunika kwake, tutang’isha chikhulupililo chasu chakuti lonjezo ya Mulungu yunena za moyo wosasila m’chalo chiweme ngako izakwanilishiwe chendi. Ndaŵa yanji tinganene tetyo? Lomba kansi dipo yupamikijapo chinji? Yehova etumija Mwana wake wokondewa woyamba kuvyalika, shamwali wake wapantima, kufuma kululu kuti azavyalike monga munthu wangwilo. Yesu ali pano pachalo, epilila mavuto osiyana-siyana. Pavuli pake yove etamana komasoti kufwa imfwa yoŵaŵa ngako. Yehova elipila ntengo ukulu ngako! Mulungu wasu wachikondi sembe aliyelole kuti Mwana wake atamane na kufwa pofuna tyala kutipasa moyo uweme koma ufupi. (Yoh. 3:16; 1 Pet. 1:18, 19) Powona kuti Yehova elipila ntengo ukulu teti, yove azawonesheshe kuti moyo wosasila m’chalo chanyowani unkhale ngawo-ngawo. Nsanja yophunzila 04.2023 pedji 27 ndim. 8-9
Chiŵili, Novemba 4
Wewo imfwa wamene uleta ululu woyofya, kansi mphamvu yako ili kuni?—Hos. 13:14.
Kansi Yehova ofunishisha kuusha akufwa? Mosakaikila ofunishisha. Yove eujila olemba Baibolo ayakine kuti alembe lonjezo yake yunena za vikuti vizachitike kusogolo pa nkhani ya chiukililo. (Yes. 26:19; Chiv. 20:11-13) Ndipo Yehova akalonjeza, okwanilisha nthawe zonse. (Yos. 23:14) Yove, ni wokonzeka kuusha ŵanthu ŵala emwalila. Ganizilani mawu a munthu muyakine wakale zina yake Yobu. Yove enze wosimikija kuti olo afwe, Yehova azafunishishe kumuwona soti ali na moyo. (Yobu 14:14, 15) Vamene ivi niye vakufunishisha soti Yehova kuli atumiki ŵake onse amene emwalila. Yove ofunishisha kuŵausha ali na moyo wathanzi, komasoti wosangalala. Lomba tyani ponena za ŵanthu mabiliyoni amene enzeve mwayi wophunzila choonadi chunena za Yehova? Mulungu wasu wachikondi ofunasoti kuŵausha. (Mach. 24:15) Yove ofuna kuti ove ankhale na mwayi wonkhala azishamwali ŵake nonkhala na moyo wosasila pano pachalo.—Yoh. 3:16. Nsanja yophunzila 04.2023 pedji 9 ndim. 5-6