Chitatu, Novemba 6
Mukotembeja pa chilichonse. —1 Ates. 5:18.
Tili na vifukwa vinyinji votembejela Yehova m’pemphelo. Tingamutembeje chifukwa cha vinthu vonse viweme vatili navo, chifukwa chakuti mphaso iliyonse iweme yufumila kuli yove. (Yako. 1:17) Mwachisanzo, payakine tingamutembeje chifukwa cha chalo chiweme komasoti vinthu vodabwisa vechilenga. Tingamutembeje soti chifukwa cha moyo wasu, banja yasu komasoti chiyembekezo chatili nacho. Ndipo tufunasoti kumutembeja Yehova chifukwa chotilola kuti tinkhale naye paushamwali uweme. Tingafunike kuyeja-yeja mwapadela kuganizila vifukwa vatili navo sewo paseka votembejela Yehova. Ŵanthu anyinji masiku ŵano ni osatembeja. Kanyinji-kanyinji ŵanthu ongoganizila tyala vangachite kuti afwane vinthu vakufuna m’malo moganizila vangachite kuti awoneshe kutembeja. Keno tingayambe kutolela maganizo amene aŵa, mapemphelo ŵasu angankhale tyala ndandanda ya vinthu vatufuna kusenga. Kuti vamene ivi osati vichitike, tufunika kupitilija kukulisha nowonesha kutembeja kwasu pa vonse vakutichitila Yehova.—Luk. 6:45. Nsanja yophunzila 05.2023 pedji 4 ndim. 8-9
Chisanu, Novemba 7
Koma akosenga na chikhulupililo, osakaikila na patontho kumo.—Yako. 1:6.
Monga atata ŵasu achikondi, Yehova osangalala lini akatiwona tutamana. (Yes. 63:9) N’chendi kuti Mulungu otitetezalini kuti osati tikokumana na mavuto, amene tingaŵalinganije na mimana komasoti mulilo. (Yes. 43:2) Koma olo n’tetyo, yove elonjeza kuti azatiyavye “kutendesha” m’mavuto amene awo. Ndipo viliye kanthu kuti tukumana na mavuto otyani palipano, yove azatiyavye kuti tipitilije kunkhala naye paushamwali wotang’a. Yehova otipasa soti mzimu wake utuŵa wamphamvu kuti utiyavye kupilila. (Luk. 11:13; Afil. 4:13) Chifukwa cha vamene ivi, sewo tingankhale na chidalilo kuti nthawe zonse tizankhale na vinthu ngavo-ngavo vatufunikila kuti tikwanishe kupilila mavuto ŵasu nonkhala mphela okhulupilika kuli yove.Yehova ofuna kuti tikomudalila. (Ahe. 11:6) Nthawe ziyakine tingoganiza kuti mavuto ŵasu ni ovuta ngako ndipo tingakwanishelini kulimbana nawo. Mpaka nthawe ziyakine tingayambe kukaikila kuti Yehova angatiyavye. Koma Baibolo yutisimikijila kuti na mphamvu za Mulungu tingakwanishe “kukwela chipupa.” (Sal. 18:29) Tetyo, m’malo mokaikila tufunikila kupemphela mwachikhulupililo, poziŵa kuti Yehova azayankhe mapemphelo ŵasu.—Yako. 1:6, 7. Nsanja yophunzila 11.2023 pedji 22 ndim. 8-9
Chiŵelu, Novemba 8
Kuyaka kwa [chikondi] kuli monga ni kuyaka kwa mulilo. Chikondi chamene icho ni mbaliŵali ya Yehova. Manzi anyinji angakwanishelini kuchizimya chikondi, ndipo tumimana tunyinji tungachikokolole lini.—Nym. 8:6, 7.
Mawu amene aŵa ochifotokoza luweme ngako chikondi ngacho-ngacho! Mawu amene aŵa ali na mfundo yachendi yolimbikisa kuli olungulana yakuti: Mungakwanishe kunkhala na chikondi ngacho-ngacho kuli muyake na muyake. Pofunikila khama kuti olungulana akokondana kwa moyo wawo wonse. Mwachisanzo, mulilo ungapitilije kuyaka keno munthu muyakine opitilija kuikapo nkhuni. Koma keno paliye oikapo nkhuni, mulilo wamene uyu ungazimwe. Molingana na vamene ivi, chikondi cha pakati pa mwanalume na mwanakazi, chingankhale chotang’a mpaka kale-kale—koma peka-peka keno otang’isha ushamwali wawo. Nthawe ziyakine, olungulana angowona kuti chikondi chawo chusila, makamaka keno okumana na mavuto azachuma, matenda olo kudela nkhaŵa mwangalelele ŵana ŵawo. Tetyo kuti “mbaliŵali ya Yehova” ipitilije kuyaka, mwanalume na mwanakazi wake ofunikila kuyeja-yeja kunkhala pa ushamwali wotang’a na Yehova. Nsanja yophunzila 05.2023 pedji 20-21 ndim. 1-3