Yehova otisimikijila kuti azachinje chino chalo kunkhala Paladaiso

1. Kansi ni uthenga wotyani wechipeleka mneneli Yesaya kuli Aisiraeli ayake?

MNENELI Yesaya efotokoza kuti Yehova ni “Mulungu wa chonadi.” Mawu akuti “chonadi” amene ŵechikatishila ntchito ngako-ngako otanthauza kuti “ame.” (Yes. 65:16) Mawu akuti “ame” otanthauza kuti “vinkhale tetyo”, kapena kuti “n’chendi.” Mawu akuti “ame” akakatishiliwa ntchito m’Baibolo ponena za Yehova kapena Yesu, owonesha kuti chinthu chiyakine n’chachendi. Tetyo, mfundo ya uthenga wa Yesaya kuli Aisiraeli ayake, yenze yakuti: Yehova akalaŵila chinthu, nthawe zonse chuchitika chendi. Kulaŵila chendi, Yehova nthawe zonse wankhala okwanilisha malonjezo ŵake.

2. Ndaŵa yanji tufunika kukhulupilila malonjezo a Yehova okhuza sogolo yasu, ndipo tikambilane makonsho otyani?

² Kansi sewo nase tingakhulupilile kuti malonjezo awalonjeza Yehova okhuza sogolo yasu azakwanilishiwe? Pafupi-fupi vyaka 800 kufumila m’nthawe ya Yesaya, Paulo efotokoza chifukwa chake malonjezo a Mulungu ni odalilika nthawe zonse. Paulo enena kuti: “N’vosakwanishika kuti Mulungu atale wenye.” (Ahe. 6:18) Molingana na chisime chamene chingakwanishelini kufumiya manzi osiyana, aweme komasoti amunyu, n’chimozi-mozi na Yehova wamene ni Chisime cha chonadi komasoti moyo, yove angakwanishelini kutala wenye. Tetyo, sewo tingankhale na chidalilo chonse kuti vonse vakunena Yehova, kupamikijapo malonjezo ŵake onse akusogolo azakwanilishiwe. Munkhani ino tikambilane makonsho aŵa: Kansi Yehova walonjeza kuti azatipase chinji kusogolo? Komasoti yakuti kansi Yehova otisimikijila motyani kuti lonjezo yake yamene iyo izakwanilishiwe?

KANSI YEHOVA WALONJEZA VINTHU VOTYANI?

3. (a) Kansi nilonjezo yotyani iweme kuli atumiki a Mulungu? (Chivumbulutso 21:3, 4) (b) N’chinji chakuchita ŵanthu ayakine tikaŵauja za lonjezo yamene iyi?

³ Lonjezo yatufuna kuti tikambilane, ni yantengo wapatali kuli aliyense wa sewo. (Ŵelengani Chivumbulutso 21:3, 4.) Yehova olonjeza za nthawe yamene “imfwa izaŵepolini soti, kuzaŵeve kulila, olo kumimila olosoti voŵaŵa.” Anyinji a sewo tukatishila ntchito lemba yotonthoja yamene iyi yamene yunena za moyo wa m’Paladaiso polalikila kuli ŵanthu. Kansi ŵanthu ayakine ochita tyani tikaŵauja za lonjezo yamene iyi? Ove payakine anganene kuti, “Lonjezo yamene iyi ni iweme ngako, koma newo nukaikila kuti vamene ivi vingachitike chendi.”

4. (a) Kansi Yehova enzeziŵa chinji chokhuza masiku osilijila pechilonjeza za Paladaiso? (b) Kuyangijila pa lonjezo yechipeleka, kansi Yehova echitasoti chinji?

⁴ N’vowonekela kuti penzeujila ntumwi Yohane kuti alembe za lonjezo yamene iyi yokhuza Paladaiso, Yehova enzeziŵa kuti sewo masiku ŵano tizaujeko ayakine za chiyembekezo chamene ichi polalikila za uthenga uweme wa Ufumu. Yehova enzeziŵa soti kuti ŵanthu anyinji azavutike kukhulupilila lonjezo ya “vinthu vanyowani” yamene iyi. (Yes. 42:9; 60:2; 2 Akor. 4:3, 4) Lomba kansi tingaŵayavye tyani ŵanthu kusimikijila kuti malonjezo ofotokozewa pa lemba ya Chivumbulutso 21:3, 4 azakwanilishiwe? Sikuti Yehova echingopeleka tyala lonjezo yotang’isha yamene iyi, koma yove etipasa soti vifukwa vomvwika luweme voikhulupilila. Kansi yove epeleka vifukwa votyani?

YEHOVA OTISIMIKIJILA KUTI LONJEZO YAKE IZAKWANILISHIWE

5. Kansi ni mavesi otyani amene otipasa vifukwa vokhulupilila lonjezo ya Mulungu, ndipo onena kuti tyani?

⁵ Sewo tufwana vifukwa viweme vokhulupilila lonjezo ya Yehova ya Paladaiso m’mavesi aŵa okonkhapo. M’mavesi amene aŵa tuŵelenga kuti: “Wala alinkhezi pa mpando wachifumu enena kuti: ‘Loleshani! Vinthu vonse vanupanga ni vanyowani.’ Elaŵilasoti kuti: ‘Lemba, ndaŵa mawu amene aŵa ni odalilika komasoti ni achendi.’ Yove eniujasoti kuti: ‘Vakwanilishiwa! Newo nine Alefa na Omega, chiyambi na mapeto.’”—Chiv. 21:5, 6 a.

6. Ndaŵa yanji mawu opezeka pa Chivumbulutso 21:5, 6 otang’isha chiyembekezo chasu pa malonjezo a Mulungu?

⁶ Ndaŵa yanji lemba yamene iyi ni yotang’isha chikhulupililo ponena za malonjezo a Mulungu? M’mavesi amene aŵa, vakuchita Yehova tingavilinganije na kusaina chipepa chotisimikijila kuti yove azakwanilishe chendi lonjezo yake yamene iyi.b Lonjezo ya Mulungu ilembewa pa Chivumbulutso 21:3, 4. Koma pavuli pake, m’mavesi 5 na 6, tufwanamo siginecha ya Yehova yamene yuwonesha kuti vawalonjeza yove vizachitike chendi. Tiyeni tiwone vakulaŵila Yehova pofuna kutisimikijila kuti malonjezo ŵake azakwanilishiwe chendi.

7. Kansi mawu oyamba a muvesi 5 ni aŵani, ndipo ndaŵa yanji mawu amene aŵa ni apadela?

⁷ Vesi 5, yuyamba na mawu akuti: “Wala alinkhezi pa m’pando wachifumu enena kuti.” (Chiv. 21:5a) Mawu amene aŵa ni apadela chifukwa ali m’gulu ya maulwendo tyala atatu amene Yehova ŵechilaŵila m’mesomphenya a m’buku ya chivumbulutso. Tetyo, Mulungu aliyelaŵile mawu osimikijila amene aŵa kupitila muli mngelo wamphamvu, kapena muli Yesu, koma Yehova eŵalaŵila yeka kufumila kululu! Mfundo yamene iyi yuwonesha kuti sewo tufunika kukhulupilila mawu okonkhapo amene ŵakulaŵila yove pavuli pake. Ndaŵa yanji tunena tetyo? Chifukwa chakuti Yehova “otalalini wenye.” (Tit. 1:2) Tetyo, mawu ŵatuŵelenga pa Chivumbulutso 21:5, 6 azakwanilishiwe chendi.

“LOLESHANI! VINTHU VONSE VANUPANGA NI VANYOWANI”

8. Kansi Yehova otisimikijila tyani kuti lonjezo yake izakwanilishiwe? (Yesaya 46:10)

⁸ Tiyeni tikambilane mawu akuti “Loleshani!” (Chiv. 21:5) Mawu Achigiriki amene ŵechimasulila kuti “loleshani!” ekatishiliwa ntchito moweleja-weleja m’buku ya Chivumbulutso. Buku iyakine inena kuti mawu amene aŵa okatishiliwa ntchito monga njila “yokonzekelesha oŵelenga kuti amvwishile mwatchelu mawu okonkhapo amene ŵakufuna kunena.” Kansi n’chinji chakulaŵila Mulungu pavuli pake? Mulungu onena kuti: “Nupanga vinthu vonse kunkhala vanyowani.” Onani kuti Yehova enena kuti “Nupanga vinthu vonse kunkhala vanyowani,” yove aliyenene kuti “Nizapange vinthu vonse kunkhala vanyowani.” Yehova olaŵila za kuchinja kwa vinthu kusogolo, koma kuli yove lonjezo yamene iyi ni ngayo-ngayo, mwakuti oilaŵila monga kuti yakwanilishiwa kale.—Ŵelengani Yesaya 46:10.

9. (a) Kansi mawu akuti “nupanga vinthu vonse kunkhala vanyowani” otanthauza ntchito ziŵili zotyani za Yehova? (b) Kansi n’chinji chikuti chizachitikile “kululu” na “chalo” vamene vilipo?

⁹ Tiyeni tikambilane mawu okonkhapo ali pa Chivumbulutso 21:5 akuti: “Nupanga vinthu vonse kunkhala vanyowani.” M’chapitala chamene ichi Yehova onena za vinthu viŵili vamene vati azachite. Choyamba, Yehova azawononge chino chalo chiipa. Chachiŵili, yove azalete chalo chanyowani. Palemba ya Chivumbulutso 21:1, tuŵelenga kuti: “Pakuti kululu kwakale na chalo chakale venze vichosewa.” Mawu akuti “kululu kwakale” otanthauza maboma andale amene osogolelewa na Satana na viŵanda vake. (Mt. 4:8, 9; 1 Yoh. 5:19) M’Baibolo mawu akuti “chalo” angatanthauze ŵanthu amene onkhala pano pachalo. (Gen. 11:1; Sal. 96:1) Tetyo, “chalo chakale” chupanamila ŵanthu aipa. Sikuti Yehova azawamiye tyala kapena kukonzasoti “kululu” na “chalo” vamene vilipo, koma m’malo mwake azaviwonongeletu. Yove azachose kululu na chalo vamene vilipo palipano noika “chalo chanyowani na kululu kwanyowani”—vamene ni boma yanyowani na ŵanthu olungama.

10. Kansi n’chinji chanyowani chakuti azapange Yehova?

¹⁰ Pa Chivumbulutso 21:5, tuŵelengasoti mawu a Yehova ponena za vinthu vanyowani vati azapange. Lomba onani kuti Yehova aliyenene kuti: “Nupanga vonse kunkhala vinthu vanyowani.” M’malo mwake enena kuti: “Nupanga vinthu vonse kunkhala vanyowani.” Kansi Yehova azapange vinthu vonse kunkhala vanyowani mwanjila iyakine yotyani? (Chiv. 21:5) Yehova azawamiye chino chalo kunkhala chiweme komasoti azayavye ŵanthu kunkhala angwilo. Ndipo yove azatipange kunkhala anyowani mwakupojeka aliyense wa sewo mpaka kale-kale. Olemala, asawona, komasoti asamvwa azapojekewe, komasoti akufwa azankhalesoti na moyo.—Yes. 25:8; 35:1-7.

“MAWU AMENE AŴA NI ODALILIKA KOMASOTI NI ACHENDI. . . . VAKWANILISHIWA!”

11. Kansi Yehova elamula Yohane kuti achite chinji, ndipo ndaŵa yanji?

¹¹ Kansi n’chinji soti chiyakine chechilaŵila Mulungu chamene chingatiyavye kumukhulupilila? Yehova euja Yohane kuti: “Lemba, pakuti mawu amene aŵa ni odalilika komasoti ni achendi.” (Chiv. 21:5) Yehova aliye peleke tyala lamulo yakuti “lemba.” Yove epelekasoti chifukwa chomvwika chochitila vamene ivo. Yove enena kuti: “Ndaŵa mawu amene aŵa ni odalilika komasoti ni achendi”—kutanthauza kuti mawu ŵechilaŵila Mulungu azachitike ndipo ni odalilika. Sewo tutembeja kuti Yohane ekonkheja lamulo yakuti “lemba.” Monga vokonkhapo vake, tukwanisha kuŵelenga lonjezo ya Mulungu yokhuza Paladaiso, noganizila za madaliso osangalasa amene ŵatuyembekezela.

12. Ndaŵa yanji Yehova ali na ufulu wonena kuti: “Vakwanilishiwa!”

¹² Kansi n’chinji chechilaŵila Mulungu pavuli pake? Yove enena kuti “Vakwanilishiwa!” (Chiv. 21:6) Apa Yehova olaŵila monga kuti vinthu vonse vawatomola vokhuza Paladaiso vachitika kale. Mulungu ali na ufulu wolaŵila mwanjila yamene iyi, chifukwa paliye chilichonse chingamukangishe kukwanilisha cholinga chake. Pavuli pake, Yehova eleŵila chinthu chiyakine chamene chutisimikijila kuti lonjezo yake izakwanilishiwe chendi. Kansi yove enena kuti tyani?

“NEWO NINE ALEFA NA OMEGA”

13. Ndaŵa yanji Yehova enena kuti: “Newo nine Alefa na Omega”?

¹³ Monga ni mwatanenela kale poyamba, Yehova elaŵila kwa maulwendo atatu onse m’mensomphenya a Yohane. (Chiv. 1:8; 21:5, 6; 22:13) Pa maulwendo onse amene awo, Yehova ekatishila ntchito mawu olingana akuti: “Newo nine Alefa na Omega.” Zina yakuti alefa ni zina ya bi yoyamba mu afabeti ya Chigiriki, ndipo yakuti omega ni bi yosilijila. Mwakukatishila ntchito mawu akuti “Alefa na Omega,” Yehova otiyavya kumvwisha kuti yove akayamba kuchita chinthu chiyakine, niyekuti azachisilijishe bwino-bwino mpaka pamapeto.

14. (a) Pelekani chisanzo cha nthawe yamene Yehova yechinena kuti “Alefa” na yati azalaŵile kuti “Omega.” (b) Kansi mawu apa Genesis 2:1-3 otisimikijila chinji?

¹⁴ Pavuli pakuti Yehova walenga Adamu na Hava, efotokoza cholinga chake chokhuza ŵanthu komasoti chalo. Baibolo yunena kuti: “Muvyalane, mupake, muzuje chalo, soti muchilolele.” (Gen. 1:28) Pa nthawe yamene iyi, tinganene kuti mwanjila iyakine, Yehova enena kuti yove ni “Alefa.” Yove elaŵila momvwika luweme za cholinga chake: Nthawe yamene ŵana omvwila ŵa Adamu na Hava sembe ezuja chalo nochitisha kuti chinkhale paladaiso. Cholinga chake chamene ichi chikazakwanilishiwa Yehova azankhale monga wanena kuti yove ni “Omega.” Pa nthawe yechisilija kulenga “kululu na chalo komasoti vinthu vonse vili mwamene umo,” Yehova elaŵila mawu owonesha kuti cholinga chake chizakwanilishiwe. Mawu ŵake opezeka pa Genesis 2:1-3. (Ŵelengani.) Yehova esankha nsiku ya 7 kunkhala yapadela kuli yove. Kansi vamene ivi venzetanthauza chinji? Yehova, elonjeza kuti azakwanilishe chendi cholinga chake chokhuza ŵanthu komasoti chalo. Cholinga chake chamene ichi chizakwanilishiwe kumapeto kwa nsiku yamene iyi ya 7.

15. Ndaŵa yanji sembe viwoneka monga Satana wakwanisha kukangisha cholinga cha Yehova chokhuza ŵanthu?

¹⁵ Adamu na Hava pechipanduka enkhala ochimwa, ndipo epasila ŵana ŵawo uchimo na imfwa. (Aro. 5:12) Chifukwa cha vamene ivi, payakine sembe viwoneka monga kuti Satana wakangisha cholinga cha Mulungu chojuja chalo na ŵanthu angwilo komasoti omvwila. Kansi Satana sembe ekwanisha chendi kukangisha cholinga cha Yehova? Payakine yove Satana enzeganiza kuti cholinga cha Yehova chikange. Yove payakine enzeganiza kuti Mulungu apaye Adamu na Hava, ndipo alenge banja iyakine yangwilo kuti akwanilishe cholinga chenze nacho kuli ŵanthu. Koma kuti Mulungu enze echita chendi vamene ivo, Satana sembe enena kuti Mulungu ni wawenye. Ndaŵa yanji? Chifukwa chakuti pa Genesis 1:28, Yehova enze euja Adamu na Hava kuti ŵana ŵawo azazuje chalo.

16. Ndaŵa yanji Satana sembe eganiza kuti wakwanisha kumukangisha Yehova kukwanilisha cholinga chake?

¹⁶ Kansi payakine Satana enzeganiza kuti Mulungu angakatishile ntchito njila iyakine yotyani? Payakine Satana enzeganiza kuti Yehova azalole Adamu na Hava kuvyala ŵana amene angakwanishelini kunkhala angwilo. (Mlal. 7:20; Aro. 3:23) Kuti venze vinkhala yetyo, mosakaikila Mdyelekezi sembe eganiza kuti Yehova wakangiwa kukwanilisha mawu ŵake. Ndaŵa yanji? Chifukwa chakuti njila yamene iyi sembe iliyekwanilishe cholinga chenze nacho Mulungu, chamene ni kujuja chalo cha Paladaiso na ŵana angwilo komasoti omvwila ŵa Adamu na Hava.

17. Kansi Yehova eisilija tyani nkhani ya kupanduka kwa Satana komasoti ŵanthu oyambilila, ndipo vokonkhapo vake vizankhale votyani? (Onanisoti chithuzi.)

¹⁷ Satana enzeganizilako lini na patontho kumo venzefuna kuchita Yehova. Yehova enze na njila iweme ngako yokwanilishila cholinga chake olo kuti Satana komasoti Adamu na Hava epanduka. (Sal. 92:5) Yehova elola Adamu na Hava kuti avyale ŵana, ndipo mwanjila yamene iyi yove ekwanilisha mawu ŵake. Mulungu otala lini wenye. Komasoti Yehova ewonesha kuti keno yove walonjeza kuti azachite chinthu chiyakine, paliye chingamukangishe kukwanilisha. Yove echita vonse vangakwanishe pofuna kukwanilisha cholinga chake mwakupeleka “mbewu” yamene ikuti izapulumushe ŵana omvwila ŵa Adamu na Hava. (Gen. 3:15; 22:18) Vuwoneka kuti Satana edabwa ngako na makonzedwe a Yehova akuti apeleke dipo! Ndaŵa yanji? Chifukwa chakuti makonzedwe amene aŵa ni ozikiwa pa chikondi chiliye dyela cha Mulungu. (Mt. 20:28; Yoh. 3:16) Satana aliye nkhalidwe yamene iyi. Yove ni wadyela. Lomba kansi n’chinji chikuti chizachitike chifukwa cha makonzedwe a dipo? Pofwika kumapeto kwa vyaka 1.000 mbadwa za Adamu na Hava zangwilo komasoti zomvwila, zizankhale m’paladaiso pano pachalo—monga ni mwenzefunila Yehova poyamba. Panthawe yamene iyo Yehova azankhale monga ni “Omega.”

LONJEZO YA YEHOVA YOKHUZA PALADAISO YUTANG’ISHA CHIKHULUPILILO CHASU

18. Kansi ni mawu atatu otyani osimikijila ŵakutiuja Mulungu? (Onanisoti bokosi yakuti “Vifukwa vitatu votiyavya kukhulupilila lonjezo ya Yehova.”)

¹⁸ Molingana na vatakambilana, kansi tingaŵauje chinji ŵanthu amene okaikila kuti lonjezo ya Mulungu ya Paladaiso izakwanilishiwe? Choyamba, Yehova elonjeza yeka. Buku ya Chivumbulutso yunena kuti: “Wala alinkhezi pa mpando wachifumu enena kuti: ‘Loleshani! Nupanga vinthu vonse kunkhala vanyowani.’” Yehova ali na mphamvu, nzelu komasoti niwofunishisha kukwanilisha lonjezo yake. Chachiŵili, kukwanilishiwa kwa lonjezo yake n’kosimikijilika, chifukwa chakuti kuli yove lonjezo yamene iyi ili monga kuti yakwanilishiwa kale. N’chifukwa chake yove onena kuti: “Mawu aŵa ni odalilika komasoti ni achendi. . . . Vakwanilishiwa!” Chachitatu, paliye chingamukangishe Yehova kusilija ntchito yawayamba. N’chifukwa chake yove enena kuti: “Newo nine Alefa na Omega.” Yehova azawoneshe kuti Satana niwawenye ndipo angakwanishelini kukangisha Yehova kukwanilisha cholinga chake.

19. Keno ŵanthu okhulupilila lini lonjezo ya Mulungu yonena za Paladaiso, kansi mwewo mungachite tyani?

¹⁹ Mukokumbukila kuti nthawe iliyonse yamuuja ŵanthu ayakine muutumiki mawu a Yehova owonesha kuti malonjezo ŵake azakwanilishiwe chendi, mutang’isha chikhulupililo chanu chakuti malonjezo ŵake azakwanilishiwe. Tetyo, mukazaŵelenga lonjezo iweme yokhuza Paladaiso wamene akuza yapa Chivumbulutso 21:4, lomba munthu muyakine n’kunena kuti, “lonjezo yamene iyi ni iweme ngako, koma lomba ingakwanilishiwe lini,” kansi mwewo muzachite tyani? Mungaŵelenge nomufotokozela vesi 5 na 6. Pavuli pake nomuwonesha mwakusimikijila lonjezo yake Yehova mwakusaina na siginecha yake.—Yes. 65:16.