NKHANI YOPHUNZILA N.° 49
Kansi Yehova angayankhe mapemphelo ŵanu?
“Muzaniite komasoti muzawele nopemphela kuli newo ndipo newo nizakumvwishileni.”—YER. 29:12.
NYIMBO N.° 41 Mulungu mvwani Pemphelo yangu
VATIKUTI TIPHUNZILEa
1-2. Ndaŵa yanji tingaganize kuti Yehova oyankhalini mapemphelo ŵasu?
“KOMASOTI kondwela mwa Yehova ndipo azakupase vokumbwa va ntima wako.” (Sal. 37:4) Yamene iyi nilonjezo iweme ngako! Koma kansi tufunikila kuyembekezela kuti Yehova azatipase chinthu chilichonse chatingamusenge panthawe yamene iyo? Ndaŵa yanji konsho yamene iyi niyofunika ngako? Ganizilani vochitika ivi vokonkhapo. Mulongo muyakine wamene ni mbeta opemphela kuti akaloŵe Sikulu ya Akhilisitu olalikila za Ufumu. Koma vyaka vinyinji vupita ndipo yove oitiwalini. M’bale wachilumbwana osenga Yehova kuti amuyavye pa vuto yali nayo yolwala-lwala kuti akokwanisha kuchita vinyinji mumpingo. Koma yove opolalini ku matenda ŵake. Makolo Achikhilisitu opemphela kuti mwana wawo apitilije kunkhala mu chonadi. Koma mwana wawo wamene uyo oganiza zoleka kutumikila Yehova.
2 Vingachitike kuti mwewo mwipemphelapo kale kwa Yehova kuti akuyavyeni pa chinthu chiyakine, koma yove aliye kuyavyeni. Chifukwa cha vamene ivi, mwewo payakine mungaganize kuti Yehova oyankha mapemphelo a ŵanthu ayakine koma osati ŵanu. Payakine mwewo mungayambe kuganiza kuti mwiphoniyesha chinthu chiyakine. Mulongo muyakine zina yake Janiceb enzeganiza mwanjila yamene iyi. Yove pamozi na mwanalume wake enzepemphela kwa Yehova chifukwa enzefunishisha kuyatumikila pa beteli. Yove enena kuti: “Newo nenzeganiza kuti achelwelini kutiita ku beteli.” Koma vyaka vinyinji vipita ove akaliye itiwa. Janice enena kuti: “Newo nikhumudwa ngako, ndipo nisokonezeka maganizo. Nenzedabwa kuti kansi n’chinji chenichita chamene Yehova aliyekondwele nacho. Newo nenzepemphela ngako kuti niitiwe ku beteli. Ndaŵa yanji Mulungu aliye yankhe mapemphelo ŵangu?”
3. Kansi tikambilane chinji mu nkhani ino?
3 Nthawe ziyakine tingokaikila keno Yehova omvwishila mapemphelo ŵasu. Olo analume okhulupilika am’masiku akuvuli enzekaikila kuti Mulungu omvwishila mapemphelo ŵawo. (Yobu 30:20; Sal. 22:2; Hab. 1:2) Kansi n’chinji chingakusimikijileni kuti Yehova azayankhe mapemphelo ŵanu? (Sal. 65:2) Kuti tiyankhe konsho yamene iyi, tiyeni tikambilane makonsho aŵa okonkhapo: (1) Kansi tingayembekezele chinji kufumila kwa Yehova? (2) Kansi Yehova oyembekezela chinji kuli sewo? (3) Ndaŵa yanji sewo tingafunikile kuchinja vinthu vatusenga m’mapemphelo ŵasu?
KANSI TINGAYEMBEKEZELE CHINJI KUFUMILA KWA YEHOVA?
4. Mokatijana na Yeremiya 29:12, kansi Yehova olonjeza kuchita chinji?
4 Yehova elonjeza kuti akoyankha mapemphelo ŵasu. (Ŵelengani Yeremiya 29:12.) Mulungu otikonda chifukwa chakuti tumutumikila mokhulupilika, tetyo nthawe zonse yove akonkhala tchelu na mapemphelo ŵasu. (Sal. 10:17; 37:28) Koma olo n’tetyo, vamene ivi vutanthauzalini kuti yove azatipase vonse vatumusenga. Nthawe ziyakine, sewo tingafunikile kuyembekezela mpaka m’chalo chanyowani kuti Mulungu akatipase viyakine mwa vinthu vatumusenga.
5. Kansi Yehova oganizila chinji akomvwishila mapemphelo ŵasu? Fotokozani.
5 Yehova oganizila mwamene mapemphelo ŵasu mwakukhuzila cholinga chake. (Yes. 55:8, 9) Chimozi mwa vinthu vakufuna yove, n’chakuti chalo chonse chizule na ŵanthu amene omvwila Mulungu mosangalala monga Wolamulila wawo. Koma Satana onena kuti ŵanthu vinthu vingoŵayendela luweme ngako keno angolilamulila ŵeka. (Gen. 3:1-5) Pofuna kuwonesha kuti vechilaŵila Satana n’vawenye, Yehova walola kuti ŵanthu akolilamulila ŵeka. Tetyo, ulamulilo wa ŵanthu niye wayambisha mavuto anyinji amene ŵatukumana nawo ŵano masiku. (Mlal. 8:9) Sewo tuziŵa kuti Yehova angachoseletu lini mavuto onse amene aŵa palipano. Keno yove angachite tetyo, ŵanthu ayakine angaganize kuti ulamulilo wa ŵanthu ni uweme ndipo ungakwanishe kusilija mavuto a ŵanthu.
6. Ndaŵa yanji tufunikila kukhulupilila kuti Yehova nthawe zonse ochita vinthu mwachilungamo komasoti mwachikondi?
6 Yehova angakwanishe kuyankha mapemphelo olingana, koma mwanjila zosiyana. Mwachisanzo, Mfumu Hezekiya pechilwala ngako epapatila Yehova kuti amuyavye. Yehova eyankha pemphelo yake mwakumupojeka. (2 Maf. 20:1-6) Koma mosiyana na vamene ivi, ntumwi Paulo pechipapatila Yehova kuti amuchosele “munga m’muŵili,” wamene payakine enze matenda, Yehova aliye chose vuto yamene iyo. (2 Akor. 12:7-9) Ganizilani soti za nkhani ya Yakobo na Petulo. Mfumu Herode yenzefuna kupaya atumwi onse aŵili amene aŵa. Mpingo wenzemupemphelela Petulo ndipo n’voziŵikilatu kuti wenzechitasoti chimozi-mozi na Yakobo. Koma olo n’tetyo, Mulungu epulumusha Petulo modabwisa, koma Yakobo epaiwa. (Mac. 12:1-11) Payakine sewo tingalikonshe kuti, ‘Ndaŵa yanji Yehova epulumusha Petulo yeka Yakobo osamupulumusha?’ Baibolo yunenalini chifukwa chake.c Koma chatingaziŵe n’chakuti njila zonse za Yehova “ni zolungama.” (Deut. 32:4) Ndipo tuziŵa kuti Petulo na Yakobo onse enze pa ushamwali na Yehova. (Chiv. 21:14) Nthawe ziyakine tingakumane na vinthu vetenzeleka yembekezela. Koma chifukwa chakuti tukhulupilila kuti Yehova oyankha mapemphelo mwanjila yachikondi komasoti yachilungamo, sewo tudandaula lini na njila yangakatishile ntchito poyankha mapemphelo ŵasu.—Yobu 33:13.
7. Kansi sewo tuyeja-yeja kupewa chinji, ndipo ndaŵa yanji?
7 Sewo tuyeja kupewa kuyelekezela vinthu vatukumana navo pamoyo wasu na vakukumana navo ŵanthu ayakine. Mwachisanzo, sewo tingapemphele momvwika luweme kwa Yehova kuti atiyavye, koma vinthu vatusenga vuchitikalini. Lomba pavuli pake, sewo tuziŵa kuti munthu muyakine esenga vinthu volingana na vatusenga sewo, ndipo Yehova emuyankha. Vamene ivi niye vechitikila mulongo muyakine zina yake Anna. Yove enzepemphela kuti mwanalume wake Matthew, apole ku matenda ŵake a kansa. Panthawe imo na imo yamene iyo, alongo achikulile aŵili enzelwalasoti kansa. Anna enzepemphelela Matthew pamozi na alongo amene awo mofumila pansi pa ntima. Alongo amene awo epola, koma n’chachisoni kuti Matthew emwalila. Poyamba Anna enzelikonsha keno alongo amene awo epola chifukwa choyavyiwa na Yehova. Lomba keno Yehova niye eŵayavya, ndaŵa yanji yove aliye yankhe pemphelo yake kuti mwanalume wake ankhale bwino? Kulaŵila chendi, sewo tuziŵalini kuti alongo amene aŵa epola tyani. Koma chatuziŵa sewo n’chakuti Yehova azasilije mavuto onse, ndipo yove ni wofunishisha kuusha azishamwali ŵake amene emwalila.—Yobu 14:15.
8. (a) Mokatijana na Yesaya 43:2, kansi Yehova otiyavya tyani? (b) Kansi pemphelo yutiyavya tyani keno tukumana na mavuto akulu? (Lolelani vidiyo yakuti Mapemphelo otiyavya kuti tikolimbana na mavuto.)
8 Yehova akotiyavya nthawe zonse. Monga atata ŵasu achikondi, Yehova osangalala lini akatiwona tutamana. (Yes. 63:9) N’chendi kuti Mulungu otitetezalini kuti osati tikokumana na mavuto, amene tingaŵalinganije na mimana komasoti mulilo. (Ŵelengani Yesaya 43:2.) Koma olo n’tetyo, yove elonjeza kuti azatiyavye “kutendesha” m’mavuto amene awo. Ndipo viliye kanthu kuti tukumana na mavuto otyani palipano, yove azatiyavye kuti tipitilije kunkhala naye paushamwali wotang’a. Yehova otipasa soti mzimu wake utuŵa wamphamvu kuti utiyavye kupilila. (Lk. 11:13; Afil. 4:13) Chifukwa cha vamene ivi, sewo tingankhale na chidalilo kuti nthawe zonse tizankhale na vinthu ngavo-ngavo vatufunikila kuti tikwanishe kupilila mavuto ŵasu nonkhala mphela okhulupilika kuli yove.d
KANSI YEHOVA OYEMBEKEZELA CHINJI KULI SEWO?
9. Mokatijana na Yakobo 1:6, 7, ndaŵa yanji tufunikila kukhulupilila kuti Yehova azatiyavye?
9 Yehova ofuna kuti tikomudalila. (Ahe. 11:6) Nthawe ziyakine tingoganiza kuti mavuto ŵasu ni ovuta ngako ndipo tingakwanishelini kulimbana nawo. Mpaka nthawe ziyakine tingayambe kukaikila kuti Yehova angatiyavye. Koma Baibolo yutisimikijila kuti na mphamvu za Mulungu tingakwanishe “kukwela chipupa.” (Sal. 18:29) Tetyo, m’malo mokaikila tufunikila kupemphela mwachikhulupililo, poziŵa kuti Yehova azayankhe mapemphelo ŵasu.—Ŵelengani Yakobo 1:6, 7.
10. Pelekani chisanzo chuwonesha mwatingachitile vinthu mokatijana na mapemphelo ŵasu.
10 Yehova oyembekezela kuti tikochita vinthu mokatijana na mapemphelo ŵasu. Mwachisanzo, m’bale angasenge Yehova kuti amuyavye kuti abwana ŵake amulole kuti akapezeke pa nsonkhano wachigawo. Kansi Yehova angayankhe tyani pemphelo yantundu wamene uyu? Yove angayavye m’bale wamene uyo kuti ankhale wotang’a ntima kuti akwanishe kulaŵila na abwana ŵake. Koma m’bale wamene uyo azafunikile mphela kuchita vinthu mokatijana na vawasenga. Payakine yove angafunikile kusenga moweleja-weleja. Yove angafunikilesoti kukata ntchito yamene iyo m’masiku ayakine. Ndipo keno pangafunikile, yove angalipelekesoti kukata ntchito m’masiku opumula paliye kulipiliwa.
11. Ndaŵa yanji sewo tufunikila kupemphela moweleja-weleja vokhuza nkhaŵa zasu?
11 Yehova oyembekezela kuti tikomuuja moweleja-weleja nkhaŵa zasu. (1 Ates. 5:17) Mokatijana na mwatingawonele pa mawu a Yesu, mapemphelo ŵasu nthawe ziyakine angayankhiwelini mokulumija. (Lk. 11:9) Tetyo osataya ntima! Mukopemphela mofumila pansi pa ntima komasoti moweleja-weleja. (Lk. 18:1-7) Keno sewo tingapitilije kupemphelela chinthu chiyakine, tuwonesha kuti tili siliyasi pavatusenga kwa Mulungu. Tuwonesha soti kuti tili na chikhulupililo muli yove kuti angakwanishe kutiyavya.
NDAŴA YANJI SEWO TINGAFUNIKILE KUCHINJA VIYAKINE MWA VINTHU VATUSENGA M’MAPEMPHELO ŴASU?
12. (a) Kansi ni konsho imonzi yotyani yatufunikila kulikonsha ponena za vinthu vatusenga m’mapemphelo ŵasu, ndipo ndaŵa yanji? (b) Kansi tingachite tyani kuti mapemphelo ŵasu akowonesha kuti tulemekeza Yehova? (Onani bokosi yakuti “Kansi vinthu vanusenga vuwonesha kuti nulemekeza Yehova?”)
12 Keno tuyankhiwalini pa vinthu vatusenga m’mapemphelo ŵasu, tingachite luweme kulikonsha makonsho atatu aŵa. Yoyamba ni yakuti ‘Kansi nupemphelela vinthu voyenelela?’ Kanyinji-kanyinji, sewo tingoganiza kuti vinthu vatunena m’mapemphelo ŵasu niyevatufunikila chendi. Koma vingachitike kuti vinthu vatupemphelela vingatipindulile lini. Keno tankhala tusenga Mulungu kuti atiyavye pa vuto iyakine, payakine pangankhale njila iweme yoisilijila kupambana yatingoganizila sewo. Ndipo vinthu viyakine vatusenga vingankhale vosakatijana na chifunilo cha Mulungu. (1 Yoh. 5:14) Mwachisanzo, ganizilani chisanzo cha makolo ŵatatomola poyamba. Ove enzesenga Yehova kuti ayavye mwana wawo kuti osati azaleke choonadi. Kusenga vamene ivi n’kosayenelela. Kuyangijila pamene apo, Yehova okakamijalini aliyense wa sewo kuti akomutumikila. Yove ofuna kuti sewo tonse kupamikijapo ŵana ŵasu tikochita kusankha kumulambila. (Deut. 10:12, 13; 30:19, 20) Koma mmalo mwake, makolo angasenge Yehova kuti aŵayavye kuphunzisa luweme ŵana ŵawo kuti akokonda Yehova nonkhala naye pa ushamwali.—Miy. 22:6; Aef. 6:4.
13. Mokatijana na Aheberi 4:16, kansi Yehova angatiyavye pa nthawe yotyani? Fotokozani.
13 Konsho yachiŵili ingankhale yakuti, ‘Kansi ino ni nthawe iweme yakuti Yehova anipase vanusenga?’ Nthawe ziyakine tingowona kuti Mulungu ofunikila kutiyankha mokulumija mapemphelo ŵasu. Koma kulaŵila chendi, Yehova oziŵa nthawe iweme yangatiyavyile. (Ŵelengani Aheberi 4:16.) Tikaleka kuyankhiwa mokulumija pavatasenga kwa Mulungu, payakine tingaganize kuti yankho ya Yehova ni yakuti ‘Ng’ang’a.’ Koma n’voziŵikilatu kuti yankho ya Yehova ingankhale yakuti ‘Yembekezako patontho.’ Mwachisanzo, ganizilani za m’bale wachilumbwana wamene enzepemphela kuti apole matenda ŵake. Kuti Yehova enze emupojeka modabwisa, Satana sembe enena kuti m’bale wamene uyo epitilija kutumikila Yehova pachifukwa tyala chakuti Mulungu emupojeka ku matenda ŵake. (Yobu 1:9-11; 2:4) Kuyangijila soti pamene apo, Yehova enkhazikisha kale nthawe yakuti azasilije matenda onse. (Yes. 33:24; Chiv. 21:3, 4) Tetyo, nthawe yamene iyo ikaliyefwika sewo tingayembekezele lini kuti Mulungu akotipojeka modabwisa. Tetyo, m’bale wamene uyu enzefunikila kusenga Yehova kuti amupase tyala mphamvu na ntendele wamuntima, kuti akwanishe kupilila matenda ŵake amene awo nopitilija kutumikila Mulungu mokhulupilika.—Sal. 29:11.
14. Kansi muphunzilapo chinji pa vichitikila Janice?
14 Kumbukilani vamene vichitikila Janice, wamene enzepemphela kuti akatumikile pa beteli. Pavuli pa vyaka 5, yove eziŵa kuti Yehova eyankha mapemphelo ŵake koma mwanjila yosiyana na yenzeyembekezela yove. Yove enena kuti: “Yehova ekatishila ntchito nthawe yamene iyo poniphunzisa noniyavya kunkhala Nkhilisitu muweme. Newo nenzefunikila kukulisha chikhulupililo changu muli yove. Nenzefunikila kuziŵa mwaningophunzilila Baibolo mosamala ngako. Nenzefunika soti kufwana chisangalalo chamuntima chamene chudalilalini mwavilili vinthu pa moyo wangu.” Pavuli pake, Janice pamozi na mwanalume wake eitiwa kuti akatumikile monga opanamila dela. Pokumbukila vamene vichitika, Janice enena kuti: “Yehova eyankha mapemphelo ŵangu kupitila munjila yamene nenzeiyembekezela lini. Venitolela nthawe kuti nimvwishe kuti njila yechikatishila ntchito Yehova yenze mphaso yantengo wapatali. Koma palipano nine wokondwela ngako kuti nenze na mwayi wowona chikondi na kuwama ntima kwake.”
Keno muwona kuti Yehova okuyankhani lini pa vinthu vamumusenga, yejani kumusenga vinthu vosiyanako (Onani ndime 15.)f
15. Ndaŵa yanji nthawe ziyakine tufunikila kupewa kufotokoza mwasitiliti vinthu vatufuna m’mapemphelo ŵasu? (Onanisoti vithunzi.)
15 Konsho yachitatu ingankhale yakuti, ‘Kansi newo nankhala nupemphelelapo kale chinthu chiyakine?’ N’chinthu chiweme kufotokoza mosapita m’bali vinthu vatufuna m’mapemphelo ŵasu. Koma nthawe ziyakine, vingankhale luweme kupewa kufotoza mwasitiliti vinthu ngavo-ngavo vatufuna m’mapemphelo ŵasu na cholinga chakuti tiziŵe vakufuna Mulungu kuti tichite. Ganizilani chisanzo cha mulongo wosalunguliwa wamene enzepemphela kuti Mulungu amuyavye kuloŵa Sikulu ya Akhilisitu olalikila za Ufumu. Yove ofuna kuloŵa sikulu na cholinga chakuti pavuli pake akatumikile kufunika ofalisa anyinji. Tetyo, pa nthawe yakalipemphela kuti akaloŵe sikulu, yove angasengesoti Yehova kuti amuyavye kuziŵa njila ziyakine zangayangijile utumiki wake. (Mac. 16:9, 10) Pavuli pake, yove ofunikila kuchita vinthu mokatijana na mapemphelo ŵake mwa kukonsha wopanamila dela keno mpingo uyakine wapafupi ungafunikile apainiya anyinji. Olo angalembe fomu notumija ku ofesi ya nthambi kuti aziŵe kwamene kufunikila olalikila Ufumu anyinji.e
16. Kansi sewo tingankhale osimikijila za chinji?
16 Monga ni mwataphunzilila, sewo tingankhale na chidalilo chakuti Yehova azayankhe mapemphelo ŵasu mwachikondi komasoti mwachilungamo. (Sal. 4:3; Yes. 30:18) Nthawe ziyakine, Mulungu angatiyankhelini mwanjila yetenzeyembekezela. Koma Yehova azawaye-waye lini mapemphelo ŵasu. Yove otikonda ngako. Ndipo azatisiyelini. (Sal. 9:10) Tetyo, pitilijani ‘kumukhulupilila nthawe zonse’ komasoti kumuuja vamuntima mwanu m’pemphelo.—Sal. 62:8.
NYIMBO N.° 43 Pemphelo yotembeja Mulungu
a Nkhani ino, ifotokoze chifukwa chake tufunika kunkhala na chidalilo chakuti Yehova azayankhe mapemphelo ŵasu mwanjila ya chikondi komasoti yachilungamo.
b Mazina yakine achinjiwa.
c Onani nkhani yakuti “Kansi mwewo mukhulupilila kuti Yehova nthawe zonse ochita vinthu mwachilungamo?” mu Nsanja ya Mulonda ya Febuluwale 2022 ndim. 3-6.
d Kuti muziwe vinyinji vokhuza mwakutiyavyila Yehova kuti tipilile mayeselo, lolelani vidiyo pa jw.org yakuti Mapemphelo otiyavya kuti tikolimbana na mavuto.
e Kuti muziŵe vamungachite kuti mukatumikile mu gawo ya nthambi iyakine, onani buku ya Gulu Lochita Chifuniro cha Yehova mutu 10, ndim. 6-9.
f KUMVWIKISHA LUWEME: Alongo aŵili opemphela akaliye lemba fomu ya ofuna kuluta ku Sikulu ya Akhilisitu olalikila za Ufumu. Pavuli pake, m’mozi mwa ove oitiwa koma muyakine aliye itiwe. M’malo mokhumudwa, mulongo wamene uyo opemphela kwa Yehova kuti amuyavye kuziŵa njila ziyakine zangayangijile utumiki wake. Pavuli pake, yove olembela kalata ofesi ya nthambi ya olipeleka kuyatumikila kwamene kufunikila ofalisa anyinji.