NKHANI YOPHUNZILA N.° 24
Mwewo mungakwanilishe volinga vanu vauzimu
“Osati tileke kuchita viweme, pakuti pa nthawe yake tizaweje tikaleka kuŵeŵa.”—AGA. 6:9.
NYIMBO N.° 84 Tulipeleka mwakhama
VATIKUTI TIPHUNZILEa
1. Kansi anyinji a sewo tukumana na vuto yotyani?
KANSI mweliikila kale cholinga chauzimu koma muvutika kuti muchikwanilishe?b Keno n’tetyo, ni mwewo mwekalini. Mwachisanzo, Philip enzefuna kukulisha minkhalidwe iweme komasoti kuti akopemphela kaŵili-kaŵili, koma enzevutika kufwana nthawe yopemphela. Erika enze na cholinga chakuti akofwika mokulumija pa misonkhano yokonzekela utumiki wakumunda; koma olo n’tetyo, yove enzefwika mochelwa pafupi-fupi nthawe zonse. Tomáš kwamaulwendo anyinji enzeyeja-yeja kuti aŵelenge Baibolo yonse. Yove enena kuti: “Koma chomvwisha chisoni n’chakuti nenzesangalalalini poŵelenga Baibolo. Niyeja-yeja kwa maulwendo atatu, koma nthawe zonse nenzengolekejela pa lemba ya Levitiko.”
2. Ndaŵa yanji mufunikalini kutaya ntima keno mwaliikila cholinga ndipo muvutika kuti muchikwanilishe?
2 Keno mwewo palipano muli na cholinga chamukaliye kwanilisha, pulizi osataya ntima. Olo kukwanilisha cholinga chosavuta kanyinji-kanyinji kufuna nthawe na khama. Kufunishisha kwanu kukwanilisha cholinga chamuli nacho kuwonesha kuti muwona kuti ushamwali wanu na Yehova ni wantengo wapatali ndipo mufuna kumupasa viweme. Yehova otembeja khama yanu. Kulaŵila chendi, yove oyembekezelalini vinyinji kuli mwewo kupambana vamungakwanishe kumupasa. (Sal. 103:14; Mik. 6:8) Tetyo cholinga chanu chufunika kukatijana na mwavilili vinthu pa moyo wanu. Pavuli pakuti mwasankha cholinga, kansi mungachite tyani kuti muchikwanilishe? Tiyeni tikambilane malangizo ayakine.
MUKONKHALA OFUNISHISHA NGAKO KUKWANILISHA CHOLINGA CHANU
Mukopemphela kuti yehova akuyavyeni kunkhala ofunishisha (Onani ndime 3-4.)
3. Ndaŵa yanji kunkhala wofunishisha n’kofunika?
3 N’chinthu chofunika ngako kunkhala ofunishisha kukwanilisha volinga vanu. Keno mwewo mufunishisha kukwanilisha cholinga chanu mukoyeja-yeja kuchikwanilisha. Kufunishisha kukwanilisha cholinga chasu kuli monga ni mphepo yamene yukhaŵija bote kuti ikafwike kwayukuya. Keno mphepo yupitilija kuunga n’vosakaikisha kuti woyendesha bote wamene uyo akafwike kwakuya. Ndipo na mphamvu ya mphepo, yove angafwike mokulumija kwakuya. Molingana na vamene ivi, keno tufunishisha ngako niyesoti patunkhala na mwayi ukulu wokwanilisha volinga vasu. M’bale muyakine waku El Salvador zina yake David enena kuti, “Keno wewo ufunishisha ngako niye pauchita khama ngako. Wewo uyeja-yeja mwa kusalola kuti chiyakine chikukangishe kukwanilisha cholinga chako.” Lomba mungachite tyani kuti munkhale ofunishisha ngako?
4. Kansi tingapemphelele chinji? (Afilipi 2:13) (Onanisoti chithunzi.)
4 Mukopemphela kuti Yehova akuyavyeni kunkhala ofunishisha. Pokatishila ntchito mzimu wake utuŵa, Yehova angakuyavyeni kuti munkhale ofunishisha kukwanilisha cholinga chanu. (Ŵelengani Afilipi 2:13.) Nthawe ziyakine tuliikila cholinga chifukwa tuziŵa kuti niye vatufunikila kuchita ndipo chamene ichi n’chinthu chiweme. Koma nthawe ziyakine tingankhalelini ofunishisha kuti tichikwanilishe. Ivi niye vichitikila mulongo muyakine waku Uganda zina yake Norina. Yove enze na cholinga chochitisha phunzilo ya Baibolo koma enzefunishishalini ngako chifukwa enzeganiza kuti ni m’phunzisi lini muweme. Kansi n’chinji chimuyavya? Yove enena kuti: “Niyamba kusenga Yehova nthawe zonse kuti aniyavye kunkhala wofunishisha ngako kusogoja phunzilo ya Baibolo. Nichita vinthu mokatijana na mapemphelo ŵangu poyeja-yeja kukulisha luso yangu yophunzisa. Papita miyezi itontho, niwona kuti cholinga chofuna kuchitisha phunzilo ya Baibolo chikula ngako. Chaka chamene icho, niyamba kuchitisha maphunzilo a Baibolo aŵili.”
5. Kansi tingaganizile vokhuza chinji vamene vingayangijile ntima wofunishisha kukwanilisha cholinga chasu?
5 Mukoganizila vawakuchitilani kale Yehova. (Sal. 143:5) Ntumwi Paulo eganizila za kuwama ntima kukulu kwa Yehova ndipo vamene ivi vimuchitisha kukata ntchito mwakhama potumikila Yehova. (1 Akor. 15:9, 10; 1 Tim. 1:12-14) Molingana na vamene ivi, keno muganizila ngako vawakuchitilani Yehova, muzankhale wofunishisha ngako kukwanilisha cholinga chanu. (Sal. 116:12) Ganizilani viyavya mulongo muyakine waku Honduras kuti akwanilishe cholinga chake chonkhala mpainiya wonkhazikika. Yove enena kuti: “Niganizila ngako mwakunikondela Yehova. Yove enileta mu gulu ya ŵanthu ŵake. Onisamalila komasoti oniteteza. Peniganizila vamene ivi chikondi changu pa Yehova chikula ngako ndipo niganizila kuchita vonse vaningakwanishe kuti niyambe kuchita upainiya.”
6. Kansi n’chinji soti chingatiyavye kunkhala ofunishisha kukwanilisha cholinga chasu?
6 Mukoganizila madaliso amungafwane pokwanilisha cholinga chanu. Onani viyavya Erika, watatomola poyamba kuti akwanilishe cholinga chake chosunga nthawe. Yove enena kuti: “Niziŵa kuti nuluza vinyinji ngako chifukwa chochelwa kuluta mu utumiki. Koma nikafwika kamangu, nenzekwanisha kupeleka moni kuli abale na alongo komasoti kutandala nawo. Nenzekwanishasoti kumvwishila malangizo othandiza amene anganiyavye kusangalala komasoti kuyangijila luso yangu mu utumiki.” Erika eganizila ngako za ubwino wosunga nthawe ndipo ekwanilisha cholinga chake. Kansi ni madaliso otyani amungaganizile? Keno cholinga chanu ni kuŵelenga Baibolo olo kupemphela, ganizilani mwavingatang’ishile ushamwali wanu na Yehova. (Sal. 145:18, 19) Keno cholinga chanu ni kukulisha minkhalidwe ya Chikhilisitu, mukoganizila mwavingatang’ishile ushamwali wanu na wanthu ayakine. (Akol. 3:14) Tyani osalemba pa pepa vifukwa vamufuna kukwanilishila cholinga chanu? Mukoviwona pafupi-pafupi vamwalemba vamene ivo. Tomáš, watatomola kumayambililo enena kuti: “Nikankhala na vifukwa vinyinji vokwanilishila cholinga, niye panuyeja-yeja ngako kuti nichikwanilishe.”
7. Kansi n’chinji chiyavya Julio na nkazi wake kukwanilisha cholinga chawo?
7 Mukopatula nthawe yotandala na ŵanthu amene angakulimbikiseni kukwanilisha volinga vanu. (Miy. 13:20) Onani viyavya Julio na nkazi wake kuti akwanilishe cholinga choyangijila utumiki wawo. Yove enena kuti: “Tenzesankha azishamwali amene enzetilimbikisa kukwanilisha cholinga chasu, ndipo tenzekambilana nawo vokhuza cholinga chamene icho. Anyinji mwa ove enze ekwanilisha kale volinga vawo volingana na vasu, teyo ekwanisha kutipasa malangizo oyavya. Azishamwali ŵasu enzetikonshasoti mwenzeyendela mapulani ŵasu, ndipo enzetilimbikisa tikafunikila thandizo pa nkhani yamene iyi.”
KENO TUFUNISHISHALINI
Mukoyeja-yeja kukwanilisha cholinga chanu (Onani ndime 8.)
8. Kansi n’chinji chingachitike keno tuyeja-yeja kukwanilisha cholinga chasu peka-peka pa nthawe yatufunishisha? (Onanisoti chithunzi.)
8 Kulaŵila chendi, pakuŵa masiku ayakine amene tunkhalalini ofunishisha kukwanilisha chinthu chiyakine. Kansi ivi vutanthauza kuti tingakwanishelini kukwanilisha cholinga chasu? Yayi. Tiyelekezele teti: Mphepo ingankhale yamphamvu ngako mwakuti ingakhaŵije bote mpaka kuyafwika kwayukuya. Koma olo n’tetyo, mphepo yuchinja-chinja mwakuti masiku ayakine kungaŵeve mphepo. Kansi vamene ivi vuwonesha kuti woyendesha bote angapitilijelini kuyenda? Osati ngako-ngako. Mwachisanzo, bote ziyakine zunkhala na injini; pamene ziyakine zunkhala na vochapila kapena kuti (ng’ombo). Woyendesha bote angakatishile ntchito vinthu vamene ivi kuti apitilije kuyenda mpaka kuyafwika kwakuya. Kufunishisha kwasu kuli monga ni mphepo. Masiku ayakine tingofunishisha ngako kupambana masiku ayakine. Ndipo masiku ayakine tingawone kuti paliye chingatilimbikise kukwanilisha cholinga chasu chamene icho. Keno tuyeja-yeja kukwanilisha cholinga chasu peka-peka tikankhala ofunishisha, payakine tingachikwanilishelini. Koma molingana na woyendesha bote wamene oyeja-yeja kukatishila ntchito njila ziyakine kuti akafwike kwakuya, sewo nase tingayeje-yeje kukwanilisha cholinga chasu olo pa nthawe yatisafunishisha kuchita vamene ivo. Kulaŵila chendi, vamene ivi n’vipepulini. Koma mwewo muzankhale wosangalala keno muyeja-yeja kukwanilisha cholinga chanu. Koma tikaliye kambilana vatingachite tiyeni tikambilane konsho ingankhalepo.
9. Kansi tufunika kupitilija kuyeja-yeja kukwanilisha cholinga chasu olo pa nthawe yatisafunishisha kuchita vamene ivo? Fotokozani.
9 Yehova ofuna kuti tikomutumikila mosangalala komasoti mofunishisha. (Sal. 100:2; 2 Akor. 9:7) Lomba kansi tufunikila kupitilija mphela kuyeja-yeja kukwanilisha cholinga chauzimu olo kuti tufunalini? Ganizilani chisanzo cha ntumwi Paulo. Yove enena kuti: “Nuniyata muŵili wangu nousogolela monga kapolo.” (1 Akor. 9:25-27) Olo kuti nthawe ziyakine ntumwi Paulo enzenkhala lini na ntima wofunishisha kuchita venzefuna, enzelikakamija kuchita vamene ivo. Kansi Yehova enzesangalala na utumiki wa Paulo? Eye! Ndipo Yehova emudalisa chifukwa cha khama yake.—2 Tim. 4:7, 8.
10. Kansi ni mapindu otyani ŵatufwana keno tuyeja-yeja kukwanilisha cholinga chasu olo pa nthawe yatisafunishisha kuchita vamene ivo?
10 Molingana na vamene ivi, Yehova osangalala akawona kuti tuyeja-yeja kukwanilisha cholinga chasu olo pa nthawe yatisafunishisha kuchita vamene ivo. Yove osangalala chifukwa olo kuti ni nthawe zonselini patingosangalala na utumiki wamene uyo, yove oziŵa kuti tuchita vamene ivi chifukwa tumukonda. Monga mwechichitila Yehova kudalisa Paulo, yove azatidalise nase chifukwa cha khama yasu. (Sal. 126:5) Ndipo patufwana madaliso a Yehova, tingayambesoti kunkhala ofunishisha. Mulongo muyakine waku Poland zina yake Lucyna enena kuti: “Nthawe ziyakine, nufunalini kuluta mu utumiki wakumunda makamaka keno nine woŵeŵa. Mosasamala kanthu za vamene ivi, chisangalalo chanunkhala nacho nikawelako ni mphaso yodabwisa.” Lomba tiyeni tiwone vatingachite keno tufunishishalini.
11. Kansi Yehova angatiyavye tyani kukulisha nkhalidwe yolilesha?
11 Mukopemphela kuti munkhale olilesha. Kulilesha ni luso yokwanisha kulamulila maganizo komasoti vochita va munthu. Mawu amene aŵa kanyinji-kanyinji otanthauza kuti osati tikochita vinthu viipa. Koma olo n’tetyo, tufunikasoti kulilesha kuti tikochita vinthu viweme, makamaka keno kuchita vamene ivo n’kovuta olo keno tufunishishalini kuchita vamene ivo. Kumbukilani kuti kulilesha ni mbali ya chitwazi cha mzimu utuŵa, tetyo mukomusenga Yehova kuti akupaseni mzimu utuŵa kuti ukokuyavyani kukulisha nkhalidwe yofunika ngako yamene iyi. (Lk. 11:13; Aga. 5:22, 23) David, watafotokoza kumayambililo efotokoza mweimuyavyila pemphelo. Yove enzefuna kuti akochita phunzilo yapayeka nthawe zonse. Yove enena kuti: “Nenzefunika kusenga Yehova kuti aniyavye kukulisha nkhalidwe yolilesha. Na thandizo yake nikwanisha kuyamba pulogilamu iweme yophunzila mosalekeja-lekeja.”
12. Kansi mfundo yapa Mlaliki 11:4 yutiyavya tyani kukwanilisha volinga vasu?
12 Osati mukoyembekezela vinthu viweme veka-veka. Muli chino chalo, vinthu vizankhalelini mwaungwilo. Keno tuganizila vamene ivi, tingachikwanilishelini cholinga chasu. (Ŵelengani Mlaliki 11:4.) M’bale muyakine zina yake Dayniel enena kuti: “Kuliye minkhalidwe yangwilo. Tetyo tufunikalini kuyembekezela minkhalidwe yamene iyi, koma sewo niye tufunika kuyamba kuchitapo kanthu kuti tinkhale nayo.” M’bale muyakine waku Uganda zina yake Paul efotokoza chifukwa chiyakine chatisafunika kunyalanyaza. Yove enena kuti: “Tikayamba ni sewo kuchitapo kanthu olo kuti vinthu ni vovuta pa moyo, Yehova angatiyavye.”—Mal. 3:10.
13. Ndaŵa yanji vingankhale luweme kuyamba na volinga vitontho-vitontho?
13 Mukoyamba na vinthu vitontho-vitontho. Payakine tingofunishishalini kukwanilisha cholinga chasu chifukwa chingowoneka monga ni chovuta ngako kuchikwanilisha. Keno vamene ivi vili chendi tetyo kuli mwewo, kansi mungagaŵe cholinga chanu chamene icho kunkhala vitontho-vitontho? Keno cholinga chanu ni kukulisa nkhalidwe iweme, tyani osayamba kuyeja-yeja kuiwonesha mu njila zitontho-zitontho? Keno cholinga chanu ni kuŵelenga Baibolo yonse, kansi mungafupikisheko nthawe yoŵelenga? Tomáš watatomola kumayambililo, evutika kuti akwanilishe cholinga chake chofuna kusilija kuŵelenga Baibolo yonse pachaka. Yove enena kuti: “Neziŵa kuti nenze nisankha kuŵelenga moutuka ngako. Tetyo nisankha kuti niyambesoti, koma ulwendo uno nikonzekela kuti nikoŵelengako machapitala atontho pa nsiku iliyonse noŵaganizila. Monga vokonkhapo vake niyamba kusangalala na kuwelenga.” Chifukwa chakuti Tomáš’ eyamba kusangalala poŵelenga Baibolo, yove esankha kuti akoiŵelenga kwa nthawe itali. Pavuli pake, yove ekwanisha kuŵelenga Baibolo yonse.c
OSATAYA NTIMA KENO MUVUTIKA KUKWANILISHA CHOLINGA CHANU CHIFUKWA CHA VINTHU VIYAKINE
14. Kansi n’chinji chingatikangishe kukwanilisha cholinga chasu?
14 Mosasamala kanthu kuti tufunishisha kukwanilisha cholinga chasu olo kupasiwa malangizo ŵatufunikila, tingakumane mphela na mavuto osayembekezeleka. Mwachisanzo, tingakumane na “vinthu vosayembekezeleka” vamene vingatitolele nthawe yatufunikila kuti tikwanilishe cholinga chasu. (Mlal. 9:11) Payakine tingakumane na vuto yamene ingatifokeshe komasoti kutichitisha kunkhala na mphamvu zitontho. (Miy. 24:10) Chifukwa chakuti tiliye ungwilo tingachite vinthu vamene vingatichitishe kuti vinkhale vovuta ngako kukwanilisha cholinga chasu. (Aro. 7:23) Olo payakine tingalimvwe kunkhala oŵeŵa. (Mt. 26:43) Kansi n’chinji chingatiyavye kulimbana na mavuto amene aŵa?
15. Ndaŵa yanji mufunikalini kufoka keno pachitika chinthu chiyakine chamene chakukangishani kukwanilisha cholinga chanu? (Salimo 145:14)
15 Mukokumbukila kuti keno pachitika chinthu chakukangishani kukwanilisha cholinga chanu, vutanthauzalini kuti nimwe ofoka. Baibolo yunena kuti tingakumane na mavuto moweleja-weleja. Koma olo n’tetyo, yufotokozasoti momvwika luweme kuti tingakwanishe soti kuyeja-yeja kukwanilisha cholinga chasu makamaka na thandizo ya Yehova. (Ŵelengani Salimo 145:14.) M’bale Philip watatomola kumayambililo, wamene owona kuti vinthu vumuyendela luweme enena kuti: “Nuganizilalini ngako za nthawe yaniliye kwanilishe cholinga changu. M’malo mwake nuganizila za nthawe yanayambasoti kukwanilisha cholinga chamene icho.” David watatomola poyamba enena kuti: “Nuyeja-yeja kuwona mavuto ŵangu osati monga chinthu chosokoneza koma monga mwayi wowonesha kuti numukonda ngako Yehova.” Mwa kupitilija kuyeja-yeja kukwanilisha cholinga chanu olo pa nthawe yamene kuchita vamene ivi ni kovuta, muwonesha kuti mufuna kukondwelesha Yehova. Yehova osangalala ngako akawona kuti muyeja-yeja kukwanilisha cholinga chanu!
16. Kansi mavuto angatiphunzise chinji?
16 Mukophunzilapo kanthu pa mavuto ŵanu. Mukoganizila vichitisha vuto yamene iyo ndipo mukolikonsha kuti, ‘Kansi ningachite tyani kuti vamene ivi osati vinichitikile soti?’ (Miy. 27:12) Koma nthawe ziyakine keno cholinga chanu chenze chovuta ngako kuti muchikwanilishe vingawoneshe kuti chenze chosakwanishika kuli mwewo. Keno muwona kuti niye mwavilili kumbali yanu, muganizilesoti za cholinga chanu kuti muwone keno chikali choyenelela kuli mwewo.d Yehova azawonenilini kuti nimwe ofoka chifukwa chakuti muliye kwanilishe cholinga chanu chamene chenze chosakwanishika.—2 Akor. 8:12.
17. Ndaŵa yanji tufunika kupitilija kukumbukila vinthu vetikwanilishapo kale?
17 Mukokumbukila vinthu vemwikwanilishapo kale. Baibolo yunena kuti “Sikuti Mulungu ni wosalungama kuti angaluŵe ntchito yanu.” (Ahe. 6:10) Tetyo mwewo namwe osaluŵa vinthu vemwikwanisha kale kuchita. Mukoganizila za volinga vemwikwanilishapo kale. Vingankhale luweme kuŵa paushamwali na Yehova, kuuja ayakine vokhuza yove, olo kubatizika. Monga mwemwipitila pasogolo nokwanilisha volinga vanu vauzimu m’masiku akuvuli, mungakwanishe soti kupitilija kukwanilisha cholinga chanu chalombapano.—Afil. 3:16.
Mukowona njila zakukuyavyilani yehova pamuyeja-yeja kukwanilisha cholinga chanu (Onani ndime 18.)
18. Kansi tufunikila kukumbukila chinji patuyeja-yeja kukwanilisha cholinga chasu? (Onanisoti chithunzi.)
18 Na thandizo ya Yehova, mungakwanilishe cholinga chanu molingana na woyendesha bote wamene osangalala akafwika kwakuya. Koma kumbukilani, kuti oyendesha bote anyinji osangalalasoti na ulwendo wawo. Molingana na vamene ivi, nthawe zonse mukoyeja kuwona mwakukuyavyilani Yehova ndipo vamene ivi vizakuyavyeni kunkhala osangalala pamuyeja-yeja kukwanilisha volinga vanu. (2 Akor. 4:7) Keno mwewo mungaleke kufoka, muzalondele madaliso anyinji.—Aga. 6:9.
NYIMBO N.° 126 Nkhalani menso, nkhalani otang’a nkhalani amphamvu
a Nthawe zonse tulimbikisiwa kuti tikonkhala na volinga vauzimu. Koma tyani keno teliikila kale cholinga ndipo tuvutika kuti tichikwanilishe? Nkhani ino ipeleke malangizo osiyana-siyana okhuza mwatingakwanilishile volinga vasu.
b KUMVWIKISHA LUWEME: Cholinga chauzimu chingapamikijepo chinthu chilichonse chatuyeja-yeja kuwamya olo kukwanilisha kuti titumikile Yehova mokwanila nomukondwelesha. Mwachisanzo, mwewo mungankhale na cholinga chokulisha minkhalidwe ya Chikhilisitu olo kuchinja mbali ziyakine zakulambila kwanu monga kuŵelenga Baibolo, phunzilo yapamweka, olo utumiki wakumunda.
c Onani Buku yakuti Pindulani ndi Sukulu ya Utumiki wa Mulungu, pedji 10-11, ndim. 4.
d Kuti muziŵe vinyinji onani nkhani yakuti, “Musadzipanikize, Ndipo Mudzakhala Achimwemwe” mu Nsanja ya Olonda ya 15 July, 2008.