Malifalensi a Utumiki komasoti Moyo wasu wachikhilisitu kabuku kamisonkhano
© 2023 Watch Tower Bible and Tract Society of Pennsylvania
MALICHI 4-10
CHUMA CHUPEZEKA M’MAWU A MULUNGU | MASALIMO 16-17
“Yehova niye munecho wa kuwama ntima”
Nsanja ya Mulonda 12/2018 pedji 26 ndim. 11
Achilumbwana, mungankhale na moyo wosangalala
FWANANI AYANU AWEME
11 Ŵelengani Salimo 16:3. Davide enzeziŵa vinthu vamene vingayavye munthu kufwana azishamwali aweme. Yove ‘enzesangalala ngako’ kunkhala pamozi na ŵanthu amene enzekonda Yehova. Yove enena kuti ayake amene awo enze “atuŵa,” kutanthauza kuti enze na minkhalidwe iweme. Munthu muyakinesoti wamene elemba Masalimo, enzesankha luweme ŵanthu otandala nawo. Yove elemba kuti: “Nine muyawo wa ŵanthu okuyopani komasoti wa ŵanthu osunga malamulo ŵanu.” (Sl 119:63) Nkhani iyakine iwonesha kuti m’gulu ya Yehova tingafwanemo ayasu aweme. Ayasu amene awo angankhale ŵanthu a misinkhu yosiyana-siyana.
Nsanja ya Mulonda 15/02/2014 pedji 29 ndim. 4
“Mukowona ubwino wa Yehova”
Davide enena kuti “Yehova niye gawo yangu, gawo yenipasiwa komasoti kapu yangu. Malo ŵanipimila naweme ngako.” (Sl 16:5, 6) Davide enzetembeja ngako “gawo” yake, kapena kuti mwayi wonkhala paushamwali na Yehova komasoti womutumikila. Molingana na Davide, sewo nase tukumana na mavuto anyinji koma tudalisiwa soti mu njila zinyinji! Tetyo, tiyeni tipitilije kusangalala potumikila Mulungu wachendi ndipo ‘tiloleshe motembeja’ kachisi wauzimu wa Yehova.
Nsanja ya Mulonda 15/02/2008 pedji 3 ndim. 2-3
Mukoika Yehova pasogolo nthawe zonse pamoyo wanu
2 Tonse tuphunzila vinyinji pa nkhani za ŵanthu oziŵika luweme a m’Baibolo monga—Abulahamu, Sara, Mose, Rute, Davide, Esitere, mtumwi Paulo, komasoti ayakine. Koma olo n’tetyo, tingapindulesoti na nkhani za ŵanthu amene ni osaziŵika ngako. Kuganizila nkhani za m’Baibolo, kungatiyavye kuchita vinthu vechichita wamasalimo. Yove enena kuti: “Nuika Yehova pasogolo pangu nthawe zonse. Chifukwa chakuti yove ali kukwanja yangu ngayo nizanyang’anyike lini.” (Sl 16:8) Kansi mawu amene aŵa otanthuza chinji?
3 Kale-kale nsodja enzekata chibemba na kwanja yake ngayo. Vamene ivi venzechitisha kuti mbali yake yaku kwanja ngayo kuŵeve chitetezo chifukwa chishango chenzenkhala kukwanja ya manjele. Koma olo ntetyo, yove enzenkhala wotetezeka keno nsodja muyake oniyata nkhondo pafupi na yove kukwanja yake ngayo. Sewo nase tikochita chifunilo cha Yehova nthawe zonse tizankhale otetezeka. Tetyo, tiyeni tiwone mwamene nkhani za m’Baibolo mwazingatang’ishile chikhulupililo chasu kuti ‘tikoika Yehova pasogolo [pasu] nthawe zonse.’—Byington.
Kusakila-sakila Mfundo zingatiyavye
Insight-2 pedji 714
Mwana wa linso
Mawu am’Chiheberi akuti ʼi·shohnʹ (De 32:10; Miy 7:2), amene ŵenzekatishila ntchito ponena za ʽaʹyin (linso), ngako-ngako otanthauza “linso ya mulumbwana ntontho”; n’chimozi mozisoti na bath (nsimbi tontho) molingana na mwayunenela lemba ya Maliro 2:18 kuti “linso yako”, mawu onse amene aŵa onena za mwana wa linso. N’chendi kuti mawu onse aŵili amene aŵa otanthauza chinthu chimozi monga mwayafotokozela lemba ya Salimo 17:8 (ʼi·shohnʹ bath-ʽaʹyin), koma ngako-ngako otanthauza “linso ya mulumbwana ntontho na nsimbi ntontho.” (“mwana wa linso yalaundi,” NW). Mawu amene aŵa owonesha kuti otanthauza za kamboni ka pakati pa linso.
Linso niyodekha komasoti yomvwila; chifukwa nsiye kapena mungu vikandalalila mmenso linso yuziŵa mokulumija. Mbali yowonekela ya (cornea) yamene ni chikope chuvwinikila linso tufunikila kuchiteteza komasoti kuchisamalila, chifukwa keno chingawonongeke, kapena kuyamba vizindikilo viyakine va matenda, linso ingaleke kulolesha luweme. Baibolo yukatishila ntchito mawu akuti “mwana wa linso yako” ponena za chinthu chamene chufunikila kutetezewa ngako. Monga mwatusamalilila mwana wa linso tufunikila soti kusunga luweme malamulo a Mulungu. (Miy 7:2) Pofotokoza mwechisamaliliwa Aisiraeli na Mulungu, Deuteronomo 32:10 yuwonesha kuti yove eteteza mtundu wamene uyo ‘monga mwana wa linso yake.’ Davide naye epemphela kwa Mulungu kuti amuteteze komasoti kumusamalila monga “mwana wa linso.” (Sl 17:8) Yove enzefuna kuti Yehova achitepo kanthu mokulumija adani ŵake pechimuukila. (Yelekezelani na Zekariya 2:8; pamene pali mawu Achiheberi akuti ba·vathʹ ʽaʹyin, “linso yalaundi,” amene ŵechikatishila ntchito.)—Onani mutu wakuti OLHO.
MALICHI 11-17
CHUMA CHUPEZEKA M’MAWU A MULUNGU | SALIMO 18
“Yehova niye . . . wopeleka chipulumuso kuli newo”
Nsanja ya Mulonda 1/05/2009 pedji 14 ndim. 4-5
Chisangalalo cha Yehova niye malo ŵasu achitetezo
Baibolo iyelekezela Yehova na vinthu vamene viliye moyo . Mwachisanzo, yunena kuti yove ni “mwala wa Isiraeli,” ‘mwala wotang’a,’ komasoti monga “malo achitetezo.” (2Sa 23:3; Sl 18:2; De 32:4) Kansi vinthu vamene ivi vulingana tyani na Yehova? Monga mwaulili mwala wotang’a komasoti usanyang’anyika, Yehova Mulungu niye chitetezo chasu chotang’a komasoti chosanyang’anyika.
5 M’buku ya Masalimo muli ma fanizo anyinji amene ofotokoza za minkhalidwe yosiyana-siyana ya Yehova. Mwachisanzo, Salimo 84:11 yunena kuti Yehova ali monga “zuŵa na chishango” chifukwa chakuti yove otipasa zuŵa, moyo, mphamvu komasoti otiteteza. Komasoti Salimo 121:5 yunena kuti “Yehova ni chinfule chako kukwanja yako ngayo.” Monga ni mwakutetezelewa munthu na chinfule kuti osati apye na zuŵa, ŵanthu amene otumikila Mulungu, Yehova oŵateteza ku mavuto akulu ngako amene ali monga nikupya kwa zuŵa. Ochita vamene ivi poŵafisa muchinfule cha “kwanja” yake kapena “mapapilo” ŵake.—Yes 51:16; Masal 17:8; 36:7.
Insight-2 pedji 1161 ndim. 7
Mawu
Mulungu akumvwa mawu ŵa atumiki ŵake. Ŵanthu amene otumikila Mulungu mokhulupilika, angankhale na chidalilo chakuti Mulungu akumvwa mapemphelo ŵawo mosasamala kanthu za chilaŵilo chakulaŵila. Olo tingapeleke pemphelo chamuntima kapena kuti mosafumya mawu, Mulungu wasu wamene akumvwa mapemphelo komasoti wamene oziŵa luweme mitima yasu, “omvwishila” mapemphelo ŵasu ofumila pansi pa ntima. (Masal 66:19; 86:6; 116:1; 1Sa 1:13; Ne 2:4) Mulungu akumvwa atumiki ŵake akosenga thandizo kuli yove chifukwa cha mavuto ŵakukumana nawo ndipo akumvwa mawu ŵawo komasoti oziŵa luweme volinga va ŵanthu amene omushusha komasoti ozondana na atumiki ŵake.—Ge 21:17; Masal 55:18, 19; 69:33; 94:9-11; Yer 23:25.
Nsanja ya Mulonda 04/2022 pedji 3 ndim. 1
Kansi n’chinji chingakuyavyeni kupilila mukankhala na nkhaŵa?
2. Mukoganizila mwechikuyavyilani Yehova kuvuli. Kansi mukwanisha kukumbukila vinthu vovuta vemwikumana navo pa moyo wanu, vamene mwikwanisha kulimbana navo chifukwa cha thandizo ya Yehova tyala? Keno tuganizila mwamene Yehova mwechiyavyila atumiki ŵake kuvuli komasoti mwawatiyavyila sewo, tunkhala na ntendele ngawo-ngawo ndipo tuyamba kumudalila ngako. (Sl 18:17-19) Nkulu muyakine zina yake Joshua, enena kuti: “Newo nili na mndandanda wa mapemphelo onse awaniyankha Yehova. Vamene ivi, vuniyavya kukumbukila nthawe iyakine yenisenga Yehova chinthu chofunika ngako, ndipo yove enipasa chenenzefunikila.” N’chendi, keno tuganizila vinthu vawatichitila kale Yehova, niye patunkhala na mphamvu zolimbana na maganizo amene otichitisha kunkhala na nkhaŵa.
Kusakila-sakila Mfundo zingatiyavye
Insight-1 pedji 432 ndim. 2
Kerubi
Akerubi amene aŵa enzelini vimafano vantundu uyakine vamene enzevipanga na mapapilo vochita kuŵaza veyenzelambila mitundu iyakine ya ŵanthu, mokatijana na mwakunenela ŵanthu ayakine. Molingana na umboni wafwana ŵanthu ayakine ponena za mwambo wakale wa Ayuda (Baibolo yunenapo lini kalikonse pankhani yamene iyi), akerubi amene awo enzewoneka monga ni ŵanthu. Ove enze opangiwa mwaluso ngako, chifukwa enzepanamila volengewa vauzimu vamawonekedwe aulemelelo, ndipo enze opangiwa mokonkheja malangizo ŵechilondela Mose kufumila kwa Yehova, ndipo echita vinthu mokatijana ndendende na vechimuuja Mulungu. (Eks 25:9) Ponena za ove Paulo efotokoza kuti, penze akerubi aulemelelo amene vimvwili-mvwili vawo venzefwika pachovalila palikasa. (Ahe 9:5) Akerubi amene aŵa enkhazikishiwa na Yehova, ndipo yove enena kuti: “Newo nizawonekele kuli wewo pamene apo nolaŵila nawe kufumila palulu pa chovalila pakati pa akerubi aŵili amene ali pa likasa ya umboni.” (Eks 25:22; Nu 7:89) Tetyo, Yehova otomolewa kuti “onkhala palulu [olo kuti pakati] pa akerubi.” (1Sa 4:4; 2Sa 6:2; 2Mf 19:15; 1Mb 13:6; Masal 80:1; 99:1; Yes 37:16) Mophiphilisila akerubi enze “chifanizilo cha galeta” yenzekwelepo Yehova (1Mb 28:18), ndipo mapapilo ŵa akerubi enzeteteza komasoti kuyenda mokulumija ngako. Mu nyimbo yake ya ndakatulo, Davide efotokoza za luŵilo yechiutuka Yehova poyelekezela na luŵilo ya munthu kuti, “yove ekwela pakerubi ndipo efwika ondalala”, enenasoti kuti “pa mapapilo amngelo.”—2Sa 22:11; Sl 18:10.
MALICHI 18-24
CHUMA CHUPEZEKA M’MAWU A MULUNGU | MASALIMO 19-21
“Volengewa vakululu vulengeza ulemelelo wa Mulungu”
Nsanja ya Mulonda 1/01/2004 pedji 8 ndim. 1-2
Ŵanthu onse alengeze ulemelelo wa Yehova
DAVIDE mwana wa Jese, ekula monga nchiŵeta m’dela ya Betelehemu. Vuwoneka kuti nthawe zinyinji usiku enzeloleshesha kululu kozula na nyenyezi zinyinji kunja kuli zii kuliye chongo chilichonse uku ololela vifuwo va atata ŵake ku malo olyeshelako mbelele amene enzenkhala kutali ngako na minzi! Mosakaikila, yove ekumbukila vinthu vosaluŵika vamene ivi pamene mosogolelewa na mzimu utuŵa wa Mulungu evilemba noimba mawu ochitisha chidwi apa Salimo 19 amene onena kuti: “Vakululu vulengeza ulemelelo wa Mulungu. Ndipo mmululu mufotokoza ntchito ya manja ŵake. Ndipo uthenga wavine wamvwika mpaka kwachulekejela chalo kwamene kuli ŵanthu.”—Sl 19:1, 4.
2 Vinthu vochitisha chidwi vakululu vechilenga Yehova vulengeza ulemelelo wa Yehova usiku na nzuŵa paliye kulaŵila, komasoti paliye kumvwika mawu. Chilengedwe, chulekejalini kulengeza ulemelelo wa Mulungu ndipo tikaganizila zaumboni uliye mawu wamene uyo upita “pa chalo chonse” kuti ŵanthu onse onkhalamo auwone, vutiyavya kuziŵa kuti tiliye mphamvu zinyinji, ndipo tingalingane naye lini. Koma lomba umboni uliye mawu wa m’chilengedwe niwosakwanila. Ŵanthu okhulupilika olimbikisiwa kulengeza umboni wamene uyu na mawu ŵawo. Wolemba masalimo muyakine wamene zina yake iliyetomolewe, euja atumiki okhulupilika kuti: “Mupaseni Yehova vinthu vakufunikila kulondela chifukwa cha ulemelelo na mphamvu zake. Mupaseni Yehova ulemelelo wayufunikila zina yake.” (Sl 96:7, 8) Ŵanthu amene ali paushamwali uweme na Yehova, osangalala kumvwila malangizo amene aŵa. Koma, kansi kumupasa ulemelelo Mulungu kutanthauza chinji?
Nsanja ya Mulonda 1/06/2004 pedji 11 ndim. 8-10
Chilengedwe chulengeza ulemelelo wa Mulungu!
8 Pavuli pake Davide efotokoza chinthu chiyakine chodabwisa cha m’chilengedwe cha Yehova. Yove enena kuti: “Mulungu wamanga chitenti cha zuŵa kululu [mlengalenga], zuŵa yamene iyo yuwoneka monga ni ndola yamene yufuma m’chipinda chake, ndipo yusangalala monga ni mwanalume wamphamvu wamene outuka pampikishano. Yove yufuma kumalekejelo ayakine akululu, nozenguluka mpaka kuyafwika kumalekejelo ayakinesoti. Paliye chinthu chilichonse chamene chisamvwa kupya kwake.”—Sl 19:4-6.
9 Zuŵa niitontho polinganija na nyenyezi ziyakine. Koma olo n’tetyo, yove ninyenyezi ikulu, mwakuti mapulaneti ayakine amene ozenguluka zuŵa owoneka atontho-atontho ngako. Buku iyakine yunena kuti zuŵa yulema matani “2 biliyoni biliyoni biliyoni”—yamene ni 99.9 pelesenti ya kulema kwa mapulaneti ŵasu ozenguluka zuŵa! Mphamvu ya zuŵa yuchitisha kuti chino chalo chikozenguluka zuŵa yamene iyo pa nsenga wa mamailosi 93 miliyoni [makilomita 150 miliyoni] paliye kufutukila kutali, kapena kuvwendela pafupi ngako. Nimphamvu itontho tyala ya zuŵa yamene yufwika pano pachalo, koma niyokwanila kuti vamoyo vipitilije kunkhalapo.
10 Wamasalimo ekatishila ntchito mawu osamvwishishika luweme pofotokoza za zuŵa pechinena kuti zuŵa ni “mwanalume wamphamvu” wamene outuka kufumila kumalekejelo ayakine kuyafwika kumalekejelo ayakine nzuŵa, ndipo usiku oyona mu “chitenti.” Nyenyezi ikulu yamene iyi ikoloŵa kunchingulo munthu akoiwona pano pa chalo, oiwona monga kuti yulowa mu “chitenti,” monga kuti ikuyapumula. Kummawa yuwoneka monga yuvuuka noŵala ngako “monga ni ndola yamene yufuma m’chipinda chake.” Pakuti Davide enze nchiŵeta, yove enzeziŵa kuti usiku kwenzezizila ngako. (Ge 31:40) Enzekumbukila kuti zuŵa yenzemuchitisha kumvwa kupya mokulumija komasoti kuti malo ŵenzenkhala akonkhala akupya. Nivowonekelatu kuti yenzeŵeŵalini pa “ulwendo” wake wofumila ku mmawa kuyafwika ku nchingulo, koma yenze monga ni “mwanalume wamphamvu,” wokonzeka luweme kujokelasoti ku ulwendo wake.
Ukani! 8/11/1995 pedji 7 ndim. 3
Waluso yopanga vinthu wamene oikiliwalini nzelu ngako masiku ŵano
Kuchita chidwi na vinthu vachilengedwe vamene vilitizenguluke kungatiyavye kumuziŵa luweme Nyamalenga wasu. Nthawe iyakine Yesu euja ophunzila ŵake kuti aloleshe bwino-bwino maluŵa akusanga amene enze omela mozenguluka Galileya. Yove enena kuti: “Phunzilani mwamene maluŵa akusanga mwakukulila. Okatalini ntchito komasoti oŵilishalini vovwala. Ndipo nukuujani kuti olo Solomo mu ulemelelo wake wonse aliye vwaleko vovwala viweme teti monga nimaluŵa amene aŵa.” (Mt 6:28, 29) Kuwama kwa maluŵa atontho-atontho akusanga kungatiyavye kuziŵa kuti Mulungu onyalanyazalini vosowa va ŵanthu.
Kusakila-sakila mfundo zingatiyavye
Insight-1 pedji 1073
Aheberi, 2
Komasoti pali mawu afupi (olo kuti mawu amphamvu) amene angakhale olingana na ali mumbali yachŵili koma tanthauzo yusiyana. Mmalomwake mbali yamene iyo ingoyangijila tyala lingalilo iyakine yalombapano. Onani chisanzo ichi chatufwana pa Salimo 19:7-9:
Chilamulo cha Yehova n’changwilo,
Chujoshela moyo.
Vikumbuso va Yehova nivodalilika,
Vupasa nzelu munthu asaziŵa vinthu.
Malamulo ofumila kwa Yehova ni olungama,
Okondwelesha ntima;
Chilamulo cha Yehova ni chituŵa,
Chusegula menso.
Kuyopa Yehova n’kutuŵa,
Ndipo kunzankhalepo kosasila.
Vigamulo va Yehova n’vachendi;
Ndipo pa mbali iliyonse n’volungama.
Monga ni mwatawonela, ziŵani kuti mumbali yachiŵili mawu aliwonse olo kuti ndime iliyonse yusila na lingalilo ya muvesi, tetyo tikapamikija mbali zonse ziŵili zamene izi zunkhala na malingalilo olingana amene ali na tanthauzo yosiyana. Mwachisanzo, monga mawu aŵa aŵili atawona kuvuli akuti “chujoshela moyo” na akuti “chupasa nzelu munthu asaziŵa vinthu” niye pangamvwishe oŵelenga kuti ‘chilamulo nichangwilo’ komasoti kuti “vikumbuso va Yehova nivodalilika.” Mwanjila yamene iyi kusiyana kwa mawu ali mumbali yoyamba na yachiŵili kwachitisha kuti tanthauzo yake inkhale yosiyana. Tetyo pangaŵe kulingana pa mawu a mmavesi ayakine. Pachifukwa chamene ichi oyitiwasoti kuti mawu lingana aweme olo amphamvu.
MALICHI 25-31
CHUMA CHUPEZEKA M’MAWU AMULUNGU | SALIMO 22
Baibolo yenze inenelatu momvwika luweme za imfwa ya Yesu
Nsanja ya Mulonda 15/08/2011 pedji 15 ndim. 16
Efwana Mesiya!
16 Mesiya azawoneke monga wasiyiwa na Mulungu. (Ŵelengani Salimo 22:1.) Maliko elemba kuti “[cha mma 3 koloko nzuŵa] Yesu eŵilikija mwamphamvu kuti: “E’li, E’li, laʼma sa·bach·thaʼni?” Mawu amene awa akaŵamasulila otanthawuza kuti: ‘Mulungu wangu, Mulungu wangu, mwanisiyilanji newo’?” (Mko 15:34) Polaŵila vamene ivi sikuti Yesu eleka kukhulupilila Atata ŵake akululu. Yove enzeziŵa kuti Mulungu azamutetezelini kuli adani ŵake panthawe ya imfwa yake. Wamene uyu wenze mwayi wakuti Yesu awoneshe kuti azankhale mphela wokhulupilika kwa Mulungu pakuyesewa kwake. Kuŵilikija kwa Yesu kwamwene uku kwekwanilisha ulosi wapa Salimo 22:1.
Nsanja ya Mulonda 15/08/2011 pedji 15 ndim. 13
Efwana Mesiya!
13 Davide elosela kuti Mesiya azanyozewe. (Ŵelengani Salimo 22:7, 8.) Yesu pechipachikiwa pa chimuti chotamanilapo enyozewa. Mateyu elemba kuti: “Tetyo ŵanthu opita mnjila eyamba kulaŵila mawu onyoza Yesu. Enzezunguja mitu yawo noyamba kulaŵila kuti: ‘Wewo wowisha kachisi noumanga m’masiku atatu lipulumushe! Keno niwe chendi mwana wa Mulungu seluka pa chimuti chotamanilapo!’” Nawosoti ansembe akulu-akulu, alembi komasoti akulu eyamba kumuchitila vachipongwe noyamba kunena kuti: “Ayakine ekwanisha kuŵapulumusha koma kuti alipulumushe yeka vumukanga! Wamene uyu ni Mfumu ya Isiraeli; aseluke pachimuti chotamanilapo kuti sewo timukhulupilile. Niwalalini okhulupilila Mulungu? Mulungu wamene uyo amupulumushe lomba keno omufuna chendi. Niwala enze laŵila kuti newo, ‘Nine mwana wa Mulungu.’” (Mt 27:39-43) Yesu epilila vonse vamene ivi paliye kuŵaŵiwa ntima olo kuwejela. Ndipo yove nichisanzo chiweme ngako kuli sewo!
Nsanja ya Mulonda 15/08/2011 pedji 15 ndim. 14
Efwana Mesiya!
14 Azachite madjiki pa vovwala va Mesiya. Wamasalimo elemba kuti: “Ove oyaŵana vovwala vangu pakati pawo, ndipo ochita madjiki pa vovwala vangu.” (Sl 22:18) Vamene ivi vichitika chendi. Baibolo yunena kuti masodja Achiroma “pechimuchika [Yesu] eyaŵana malaya ŵake akunja mwakuchita madjiki.”—Mt 27:35; Ŵelengani Yohani 19:23, 24.
Kusakila-sakila mfundo zingatiyavye
Nsanja ya Mulonda 1/11/2006 pedji 29 ndim. 7
Kulemekeza misonkhano yasu yopatulika
7 Tili na njila ziweme zatingalemekezele misonkhano yasu. Imozi mwanjila zamene izi ni kuimba nyimbo za Ufumu. Zinyinji mwa nyimbo zamene izi zelembewa monga mapemphelo, tetyo tufunikila kuziimba mwa ulemu. Pokata mawu a Yesu apa Salimo 22, ntumwi Paulo elemba kuti: “Nizalengeze zina yanu kwa abale ŵangu. Nizakutamandeni mwa kuimba nyimbo pakati pa mpingo.” (Ahe 2:12) Tetyo tikoyeja-yeja kufwana malo onkhala tcheyamani akaliye tomola nyimbo yatikuti tiimbe. Ndipo poimba tikoganizila ngako tanthauzo ya mawu anyimbo yamene iyo. Kuimba kwasu kukowonesha mwenzemvwila wamasalimo wamene elemba kuti: “Nizatembeje Yehova na ntima wonse pakati pa gulu yoyondoloka ntima, komasoti mumpingo.” (Sl 111:1) Kulaŵila chendi, kuimba nyimbo zotamanda Yehova n’chifukwa chimozi chiweme ngako chutichitisha kuti tikofwika mokulumija pamisonkhano yasu mpaka pamapeto.
Nsanja ya Mulonda 1/09/2003 pedji 20 ndim. 1
Tamandani Yehova “mumpingo”
Molinga na mwevenzele vinthu kale, ŵano masiku ŵanthu okhulupilila opasiwa mwayi wakuti akokwanisha kulaŵila za chikhulupilo chawo “mu mpingo.” Aliyense ali na mwayi woyankha makonsho amene okonshewa kwa omvwishila pamisonkhano ya mpingo. Mukowona kuti ndemanga zamene izi nizofunika ngako. Mwachisanzo, ndemanga zamene zuwonesha vatingachite kuti tilimbane na mavuto olo mwatingaŵapewele, zulimbikisa abale kuti apitilije mphela kukonkheja mfundo za m’Baibolo. Ndemanga zufotokoza malemba a m’Baibolo amene otomolewa koma aliye katiwe mawu pandime yamene iyo kapena zufotokoza mfundo zawafwana munthu pofufuza payeka, zingalimbikise ayakine kukulisha chiyoloŵezi chophunzila pa ŵeka.
EPULAYELO 1-7
CHUMA CHUPEZEKA M’MAWU A MULUNGU | MASALIMO 23-25
“Yehova niye nchiŵeta wangu”
Nsanja ya Mulonda 1/05/2011 pedji 31 ndim. 3
“Yehova niye nchiŵeta wangu”
Yehova osogolela mbelele zake. Mbelele zikankhala ziliye nchiŵeta zuluŵila. N’chimozi-mozi na sewo taŵanthu tufunikila otisogolela pa moyo wasu. (Yer 10:23) Davide efotokoza kuti Yehova osogolela ŵanthu ŵake “mmalo olyeshela viŵeto ansipu unyinji” na “mmalo opumulila amanzi anyinji.” Oŵasogolela soti “ntunjila twachilungamo.” (Vesi 2, 3) Vakuchita Yehova vulingana na vakuchita nchiŵeta posamalila mbelele zake ndipo vutisimikijila kuti tufunikila kumukhulupilila. Tikokonkheja malamulo a Mulungu opezeka m’Baibolo tingankhale na moyo wokhutilisha, wosangalala, komasoti tingankhale na sogolo iweme.
Nsanja ya Mulonda 1/05/2011 pedji 31 ndim. 4
“Yehova niye nchiŵeta wangu”
Yehova oteteza mbelele zake. Mbelele zikankhala ziliye nchiweta zunkhala na wowa, komasoti zusoŵa woziyavya. Yehova ouja ŵanthu ŵake kuti osati akochita wowa olo ‘poyenda mu chinshambo cha nfinzi ya zani muwone’—yamene iyi ingankhale nthawe yamene munthu owona kuti ali pa mavuto akulu. (Vesi 4) Pa nthawe yamene iyi, Yehova owona vuchitikila atumiki ŵake ndipo onkhala wokonzeka kuŵayavya. Yove opasa atumiki ŵake nzelu na mphamvu kuti akwanishe kupilila mayeselo ŵawo.—Afi 4:13; Yak 1:2-5.
Nsanja ya Mulonda 1/05/2011 pedji 31 ndim. 5
“Yehova niye nchiŵeta wangu”
Yehova olyesha mbelele zake. Mbelele zudalila nchiŵeta wawo kuti azifwanile chakulya. Sewo taŵanthu tili na vosoŵa vauzimu vamene ni Mulungu yeka wamene angatiyavye kuti tivifwane. (Mt 5:3) Tutembeja kuti Yehova niwopasa ndipo opeleka chakulya chinyinji kuli atumiki ŵake. (Vesi 5) Tikoŵelenga vofalisa monga Baibolo komasoti mabuku oyavya pophunzila Baibolo na Nsanja ya Mulonda tufwana chakulya chauzimu chamene chingatiyavye kuziŵa cholinga cha moyo, komasoti vakufuna Mulungu kuti tikochita.
Kusakila-sakila Mfundo zingatiyavye
Nsanja ya Mulonda 15/02/2011 pedji 24 ndim. 1-3
Mukokonda chilungamo na ntima wanu wonse
YEHOVA osogolela ŵanthu ŵake “mtunjila twachilungamo” kupitila m’Mawu ŵake komasoti mu mzimu wake utuŵa. (Sl 23:3) Koma olo n’tetyo, pakuti sewo taŵanthu tiliye ungwilo, nthawe ziyakine tufuma mu njila ya chilungamo. Vikankhala tetyo, pofunikila khama kuti tiyambesoti kuchita vinthu viweme. Kansi n’chinji chingatiyavye? Molingana na Yesu, tufunikila kukonda kuchita vinthu vachilungamo.—Ŵelengani Salimo 45:7.
2 Kansi pa lemba yamene iyi “tunjila twachilungamo” n’chinji? “Tunjila” twamene utu ni moyo wakunkhala nawo munthu chifukwa chokonkheja mfundo zolungama za Yehova. Mawu Achiheberi komasoti Achigiriki amene emasuliliwa kuti, “chilungamo” otanthauza “kuyondoloka,” pokonkheja minkhalidwe iweme. Pakuti Yehova ni “malo ŵachunkhalamo chilungamo,” ŵanthu amene omulambila omudalila yove kuti aŵauje njila za minkhalidwe iweme zakufunikila kukonkheja.—Yer 50:7.
3 Kuti tikomukondwelesha chendi Mulungu tufunikila kuyeja-yeja na ntima wonse kuchita vonse vakuwona yove kuti ni volungama. (De 32:4) Kuti vamene ivi vikwanishike, tufunika kuphunzila vinyinji vokhuza Yehova Mulungu kufumila m’Mawu ŵake Baibolo. Tikophunzila vinthu vinyinji vokhuza Mulungu komasoti kumuvwendelela nsiku iliyonse niye soti patukonda ngako chilungamo chake. (Yak 4:8) Komasoti tikosankha vinthu vofunika pa moyo wasu, tufunikila kulola kuti Mawu oujiliwa a Mulungu akotisogolela.
EPULAYELO 8-14
CHUMA CHUPEZEKA M’MAWU A MULUNGU | MASALIMO 26-28
Mwechitang’ishila chikhulupililo chake Davide
Nsanja ya Mulonda 1/12/2004 pedji 14 ndim. 8-9
Yendani mokhulupilika
8 Davide epemphela kuti: “Nifufuzeni mwewo Yehova na kuniyesa; tuŵishani mphewa zangu komasoti ntima wangu.” (Sl 26:2) Mphewa zili nkati mwa muŵili wasu. Mphewa zamene izo mophiphilisila zupanamila maganizo a munthu a nkati mwa ntima. Ndipo ntima wophiphilisila upanamila nkati mwa munthu—kapena kuti vamene vumulimbikisa kuchita vinthu viyakine monga mwakumvwila mu ntima mwake, komasoti nzelu zake. Posenga Yehova kuti amuyese, Davide ngako-ngako, enzesenga kuti Yehova afufuze noyesa maganizo ŵake a pansi pa ntima wake komasoti mwakumvwila muntima mwake.
9 Davide esenga Mulungu kuti atuŵishe mphewa na ntima wake. Kansi Yehova otituŵisha tyani nkati mwasu? Davide eyimba kuti: “Nizatamande Yehova wamene wanipasa malangizo. Olo usiku maganizo ankati mwantima wangu oniuja vanufunikila kuchita.” (Sl 16:7) Kansi vamene ivi vutanthauza chinji? Vamene ivi vutanthauza kuti malangizo a Mulungu emufwika pa ntima Davide nonkhazikika mu ntima mwake komasoti kukonza maganizo ankati mwa ntima wake. Vamene ivi vingatichitikilesoti nase keno tuganizila na ntima wonse komasoti kutembeja malangizo ŵatulondela kupitila m’Mawu a Mulungu, ŵanthu amene omupanamila, komasoti gulu yake nolola kuti malangizo amene awo ankhazikike mu ntima mwasu. Kupemphela kwa Yehova nthawe zonse kuti atituŵishe, kungatiyavye kuti tikoyenda mokhulupilika.
Nsanja ya Mulonda 1/12/2004 pedji 15 ndim. 12-13
Yendani mokhulupilika
12 Pofotokoza chinthu chiyakinesoti chamene chetang’isha chikhulupililo chake, Davide enena kuti: “Niliye tandale na ŵanthu aliye chilungamo. Ndipo nupewa ŵanthu ofisa umunthu wawo. Nuzondana na gulu ya ŵanthu ochita viipa, ndipo nukana kutandala na ŵanthu aipa.” (Sl 26:4, 5) Davide enzetandala lini na ŵanthu amene enzechita vinthu viipa olo patontho. Ndipo enzefunalini kukatijana nawo.
13 Lomba tyani sewo? Kansi tupewa kukatijana na ŵanthu aipa kupitila mu m’mapulogilamu apa TV, mavidiyo, makanema, pa intaneti kapena mu njila ziyakine? Kansi tupewa ŵanthu amene ofisa umunthu wawo? Ŵanhu ayakine kusikulu, kapena kuntchito kwasu angatisemphe kuti ni ayasu pamene ali na volinga viipa, kulaŵila chendi tufunalini kukatijana na ŵanthu amene oyendalini m’chonadi cha Mulungu. Olo kuti ampatuko onena kuti ni ŵanthu achilungamo, nawosoti angafise cholinga chawo chiipa pofuna kuti sewo tileke kutumikila Yehova. Kansi tingachite tyani keno mu mpingo wachikhilisitu muli ŵanthu ayakine amene ali na moyo wachinyengo? Nawosoti tinganene kuti ofisa umunthu wawo. Jayson wamene pali pano ni wopanamila dela, akali ntontho enze na ayake amene enze na moyo wachinyengo. Pofotokoza za ŵanthu amene aŵa yove enena kuti: “Nsiku iyakine mmozi mwa ayangu amene awo eniuja kuti: ‘Vatuchita pali pano viliye ntchito, chifukwa chakuti chalo cha nyowani kuti chizafwike, chizafwane kuti sewo tafwa kale. Tizakwanishelini kuziŵa kuti tuluza vinthu viakine.’ Mawu amene aŵa enidabwisha ngako. Newo nufunalini kuti chalo cha nyowani chizafwane kuti nafwa kale.” Jayson esankha vinthu mwanzelu posiya kukatijana na ŵanthu amene aŵa. Mtumwi Paulo echenjeja kuti: “Osaluŵilishiwa. Kukatijana na ŵanthu aipa kuwononga minkhalidwe iweme.” (1 Ak 15:33) Tetyo, tufunikila kupewa kukatijana na ŵanthu aipa!
Nsanja ya Mulonda 1/12/2004 pedji 16 ndim. 17-18
Yendani mokhulupilika
17 Chitenti pamozi na ntchito zake za nsembe chenze likulu yolambililapo Yehova ku Isiraeli. Pofotokoza mwenzesangalalila na malo amene awo, Davide epemphela kuti: “Yehova, newo nukonda ng’anda yamunkhalamo mwewo na malo amene kunkhala ulemelelo wanu.”—Sl 26:8.
18 Kansi tukonda kusonkhana pa malo ŵatuphunzililapo za Yehova? Chifukwa cha maphunzilo auzimu ŵatuphunzililamo, Ng’anda ya Ufumu iliyonse yunkhala likulu ya kulambila kwachendi m’dela yamene kuli ng’anda yamene iyo. Komasoti chaka na chaka tunkhala na misonkhano yachigawo, yadela tunkhalasoti na masiku ayakine amisonkhano yapadela. Pamisonkhano yamene iyi, pofotokozewa “umboni” kapena kuti vikumbuso va Yehova. Tikaphunzila ‘kukonda ngako’ vikumbuso vamene ivi, tunkhala ofunishisha kuluta kumisonkhano nomvwishila tikafwika pamisonkhano yamene iyo. (Sl 119:167) Vunkhala votang’isha ngako kunkhala pamozi na okhulupilila ayasu amene odela nkhaŵa za moyo wasu komasoti amene otiyavya kupitilija kuyenda mokhulupilika.—Ahe 10:24, 25.
Kusakila-sakila Mfundo zingatiyavye
Nsanja ya Mulonda 15/07/2006 pedji 28 ndim. 15
Yehova oyavya ŵanthu amene otamana
15 Wamasalimo Davide eimba kuti: “Olo atata na amayi ŵangu anisiye, Yehova azanitole.” (Sl 27:10) Nivotang’isha ngako kuziŵa kuti chikondi cha Yehova chupambana chikondi cha kolo iliyonse! N’chendi kuti kukaniwa olo kunzunziwa na makolo kungankhale koŵaŵa ngako, koma kungachitishelini kuti Yehova aleke kukusamalilani ngako. (Alo 8:38, 39) Kumbukilani kuti Yehova odonsa munthu wamene wawakonda. (Yoh 3:16; 6:44) Viliye kanthu kuti ŵanthu ankhala okuchitilani votyani, Atata ŵanu akululu okukondani!
EPULAYELO 15-21
CHUMA CHUPEZEKA M’MAWU AMULUNGU| MASALIMO 29-31
Chilango—Chuwonesha chikondi chali nacho Mulungu
Insight-1 pedji 802 ndim. 3
Chinso
‘Kufisa chinso’ kuli na matanthauzo osiyana-siyana molingana na mwavingankhalile vinthu. Kaŵili-kaŵili Yehova akofisa chinso chake owonesha kuti paliye ushamwali pakati pa munthu wamene uyo na yove ndipo angamuchilikizelini. Ichi chunkhala chifukwa cha kusamvwila kwa munthu kapena kusiyana na gulu ya Yehova monga mweuchitila ntundu wa Aisiraeli. (Yob 34:29; Sl 30:5-8; Yes 54:8; 59:2) Vamene ivi vutanthauza kuti Yehova azaulule machimo nochitapo kanthu ndipo munthu aliyense azayankhe yeka noyembekezela chiweluzo. (Sl 13:1-3) Davide pechipemphela kuti “fafanizani vophoniya vangu vonse” enzesenga Yehova kuti amukhululukile machimo ŵake.—Sl 51:9; yelekezelani na Salimo 10:11.
Nsanja ya Mulonda 1/03/2007 pedji 19 ndim. 1
Sangalalani pamuyembekezela Yehova
Mwachupindulishila chilango chofumila kwa Yehova tingachiyelekezele na mwavukosela vitwazi. Baibolo yunena mawu okonkhapo aŵa pankhani ya chilango cha Mulungu: “Kwa ŵanthu amene aphunzilapo kanthu pachilango chamene icho chutwala chitwazi cha ntendele, chamene ni chilungamo.” (Ahe 12:11) Vitwazi vutola nthawe kuti vipye, tetyo kuchinja maganizo ŵasu kuti akatijane na vakunena Mawu a Mulungu kutolasoti nthawe. Mwachisanzo, keno nkhalidwe yasu iyakine iipa yasokoneza maudindo ŵasu mumpingo, ntima woyembekezela Mulungu ungatiyavye kuti osati tifoke ngako mpaka kufwika potaya ntima. Nthawe yamene iyi mawu a Davide okonkhapo aŵa angatitang’ishe: “Chifukwa ukali wa Mulungu unkhalishalini pali munthu, koma munthu wakusangala naye omuwamila ntima pa nthawe yonse ya moyo wake. Munthu angalile usiku, koma mmawa oŵilikija mosangalala.” (Sl 30:5) Tikankhala na ntima woyembekezela nokonkheja malangizo a m’Mawu a Mulungu na gulu yake nthawe yasu ya ‘kuŵilikija mosangalala’ izafwike.
Nsanja ya Mulonda 10/2021 pedji 6 ndim. 18
Kansi kulapa ngako-ngako n’kuchita chinji?
18 Powonesha kuti walapa kufumila pansi pantima, munthu wamene wachosewa ofwika pamisonkhano monkhazikika ndipo okonkheja malangizo ŵakumupasa akulu akuti akopemphela nthawe zonse komasoti kuphunzila Baibolo. Yove oyeja-yeja kupewa vinthu vamene vemuchitisha kuti achite chimo. Keno angayeje-yeje kukonzasoti ushamwali wake na Yehova, yove angankhale na chikhulupililo kuti yove amukhululukile na ntima wonse, komasoti akulu angamuwejeleshesoti mumpingo. Koma olo n’tetyo, akulu akafuna kuziŵa keno munthu wamene uyo walapa chendi, oganizila nkhani iliyonse payeka ndipo ofufuza mosamala ngako kuti apewe kuweluza mosaganiza luweme.
Kusakila-sakila mfundo zingatiyavye
Nsanja ya Mulonda 15/05/2006 pedji 19 ndim. 13
Mfundo zikulu-zikulu za chigawo choyamba cha buku ya Masalimo
31:23—Kansi munthu wolikuja okumana na vinthu votyani? Mwachidule tinganene kuti azapasiwe chilango. Munthu wolungama opasiwa chilango chofumila kwa Yehova chifukwa cha vinthu vawaphoniyesha mwangozi. Pakuti munthu wolikuja osiyalini kuchita vinthu viipa, ojoshelewa vinthu vinyinji viipa na chilango champhamvu.—Miy 11:31; 1Pe 4:18.
EPULAYELO 22-28
CHUMA CHUPEZEKA M’MAWU AMULUNGU| MASALIMO 32-33
Ndaŵa yanji tufunika kuulula tikachita chimo ikulu?
Nsanja ya Mulonda 15/03/1993 pedji 9 ndim. 7
Chifundo cha Yehova chutiyavya tikataya ntima
7 Keno tachita chimo ikulu pofwaya malamulo a Mulungu, nthawe ziyakine kungankhale kovuta kuiulula chimo yamene iyo olo kwa Yehova. Kansi chingachitike n’chinji keno tingafise chimo yamene iyo? Mu Salimo 32 Davide evomekeja kuti: “Pa nthawe yeninkhala chelele osaulula machimo ŵangu, mabonzo ŵangu efoka chifukwa nenzevutika muntima mwangu nsiku yonse. Kwanja yanu yenzenilema usiku na nzuŵa. Mphamvu zangu zeyuma monga ni manzi munyengo yakupya yam’chisalo.” (Vesi 3, 4) Davide pechichita chimo nofisa, chikhumbuntima chake chemuvutisha. Mphamvu zake zesila chifukwa cha nkhaŵa yenze nayo, ndipo enze monga ni chimuti munthawe yachilala chamanzi. Kulaŵila chendi, yove sembe elwala matenda ammaganizo chifukwa chofisa chimo. Ndipo eluza chisangalalo chake. Keno aliyense munthu wachita chimo kansi ofunikila kuchita chinji?
Yandikirani pedji 262 ndim. 8
Mulungu “okhululuka”
8 Davide pechilapa enena mawu akuti: “Pamapeto pake neulula chimo yangu kuli mwewo, niliye fise chimo yangu. . . . Ndipo mwewo mwenikhululukila vophoniya vangu na machimo ŵangu.” (Sl 32:5) Mawu akuti “kukhululukila” efumila ku mawu Achiheberi amene ngako-ngako otanhauza “kunyamula” olo kuti “kutola.” Mawu ŵechikatishila ntchito palemba yamene iyi otanthauza kuchosa “chophoniya, chimo, olo chinthu chiipa.” Tetyo, tinganene kuti Yehova enyamula machimo a Davide noŵataya. Mosakaikila vamene ivi vichefya maganizo yenze nayo Davide oliwona kuti ni wophoniya. (Sl 32:3) Sewo tingankhale na chidalilo chonse mwa Mulungu wamene ochosa machimo a ŵanthu amene ofuna kukhululukiliwa chifukwa chakuti okhulupilila nsembe ya dipo ya Yesu.—Mt 20:28.
Nsanja ya Mulonda 1/06/2001 pedji 30 ndim. 1
Kulapa kwamene kuchija munthu
Davide pechivomekeja machimo ŵake, enzeliwonalini kuti ni watyala-tyala. Mmawu ŵake ŵechilemba mmasalimo onena za kuulula machimo, owonesha kuti yove enze na ntendele komasoti wosimikija kutumikila Mulungu mokhulupilika. Mwachisanzo, onani Salimo 32. Vesi 1, yunena kuti: “Wosangalala ni munthu wamene vophoniya vake vakhululukiliwa, wamene machimo ŵake akhululukiliwa.” Olo chimo ingankhale ikulu tyani, vokonkhapo vake vunkhala viweme keno munthu walapa kufumila pansi pantima. Njila imozi yatingawoneshele kuti talapa nantima wonse ni kuvomekeja vatachita monga nimwechichitila Davide. (2Sa 12:13) Yove aliyefwane vifukwa vopepushila chimo yake kwa Yehova olo kuimba mulandu ayakine. Vesi 5 yunena kuti: “Posilijila pake neulula chimo yangu kuli mwewo, niliyefise chophoniya changu. Newo ninena kuti: ‘Nizaulule machimo ŵangu kwa Yehova.’ Ndipo mwewo mwenikhululukila vophoniya vangu na machimo ŵangu.” Kuulula machimo mofumila pansi pantima kuchitisha munthu kunkhala aliye nkhaŵa, chifukwa cha vamene ivi munthu opitilijalini kuvutika na chikumbuntima chake chifukwa cha vinthu vechiphoniyesha kuvuli.
Kusakila-sakila mfundo zingatiyavye
Nsanja ya Mulonda 15/05/2006 pedji 20 ndim. 1
Mfundo zikulu-zikulu za chigawo choyamba cha buku ya Masalimo
33:6; mawu amnyansi—Kansi “umphuye” wankamwa mwa Yehova n’chinji? Umphuye wamene uyu, nimphamvu zakukatishila ntchito Mulungu, olo kuti mzimu utuŵa wechikatishila ntchito polenga vinthu vonse vatuwona. (Ge 1:1, 2) Utomolewa kuti umphuye wankamwa mwake chifukwa chakuti molingana na kuŵensa kwa mphamvu mzimu wamene uyu ungatumijiwe kuyakata ntchito kutali ngako.
EPULAYELO 29–MEYI 5
CHUMA CHUPEZEKA M’MAWU AMULUNGU| MASALIMO 34-35
“Mukotamanda Yehova nthawe zonse”
Nsanja ya Mulonda 1/03/2007 pedji 22 ndim. 11
Tiyeni tonse tikuje zina ya Yehova
11 “Nizatamande Yehova nthawe zonse, nizalekelini kumutamanda na pakamwa pangu.” (Sl 34:1) Pakuti Davide enzenkhalila moyo wothaŵa-thaŵa, vuwoneka kuti enzedela nkhaŵa kuti akofwana tyani vosoŵa vapa moyo wake. Koma mawu amene aŵa owonesha kuti Davide epitilija mphela kunkhala na ntima wofuna kulemekeza Yehova olo kuti enze na nkhaŵa ngako. Yove ni chisanzo chendi chiweme kuli sewo tikakumana na mavuto! Kaya tili kusikulu, kapena kuntchito, na okhulupilila ayasu, olo tulalikila, cholinga chasu chikulu chikonkhala kulemekeza Yehova. Ganizilani vifukwa vinyinji vatili navo vochitila vamene ivi! Mwachisanzo, pali vinthu vinyinji vatingaphunzile nosangalala navo kufumila m’chilengedwe cha Yehova chochitisha chidwi chamene ichi. Lomba ganizilani vawachita Yehova pokatishila ntchito gulu yake yapachalo chonse! Yehova wakatishila ntchito ŵanthu okhulupilika kuchita vinthu vikulu-vikulu mugulu yake olo kuti aliye ungwilo. Kansi ntchito za Mulungu tingaziyelekezele na za ŵanthu amene chalo ichi chuŵalemekeza ngako? Kansi mukatijana lini na Davide, wamene elemba kuti: “Pakati pa milungu yonse paliye Mulungu aliyense amene angalingane na mwewo, ndipo paliye ntchito zilizonse zolingana na ntchito zanu”?—Sl 86:8.
Nsanja ya Mulonda 1/03/2007 pedji 22 ndim. 13
Tiyeni tonse tikuje zina ya Yehova
13 “Newo nizapeleke ulemu kwa Yehova momekela. Ofasa azamvwe ndipo azasangalale.” (Sl 34:2) Apa Davide enzelitamalini chifukwa cha vinthu venzechita luweme. Mwachisanzo, aliye litamandile pechitalija wenye Mfumu yaku Gati. Yove enzeziŵa kuti Yehova niye wamene emuteteza penze ku Gati, komasoti ekwanisha kuthaŵa chifukwa cha thandizo yake. (Miy 21:1) Tetyo, Davide aliyelitame koma etamanda Yehova. Vamene ivi vechitisha ŵanthu ofasa kuyamba kukonda Yehova. Yesu naye elemekeza zina ya Yehova ndipo vamene ivi vechitisha ŵanthu olichefya komasoti aminkhalidwe iweme kuyamba kukonda Yehova. Masiku ŵano, ŵanthu ofasa m’chalo chilichonse oloŵa mumpingo wapa chalo chonse wa Akhilisitu ozozewa amene Yesu niye mutu wawo. (Akl 1:18) Ŵanthu ofasa okhuziwa muntima akamvwa zina ya Mulungu yulemekezewa na atumiki ŵake olichefya, komasoti akamvwishila uthenga wa m’Baibolo moyavyiwa na mzimu utuŵa wa Mulungu.—Yoh 6:44; Mac 16:14.
Nsanja ya Mulonda 1/03/2007 pedji 23 ndim. 15
Tiyeni tonse tikuje zina ya Yehova
15 “Nepemphela kwa Yehova ndipo yove eniyankha. Enipulumusha ku vinthu vonse vamene venzenichitisha wowa.” (Sl 34:4) Vinthu monga nivamene ivi venze vofunika ngako kuli Davide. Tetyo, yove enena soti kuti: “Munthu wonyozeka wamene uyu eita ndipo Yehova eyankha. Emupulumusha ku mavuto ŵake onse.” (Sl 34:6) Tikankhala na okhulupilila ayasu tunkhala na nthawe iweme yofotokoza vinthu votang’isha vowonesha mwawatiyavyila Yehova kupilila mavuto. Vamene ivi vutang’isha chikhulupililo cha okhulupilila ayasu, monga mwechichitila Davide pofotokoza mawu otang’isha chikhulupilo cha ŵanthu amene enze kumbali yake. Ŵanthu amene enze na Davide “emukhulupilila [Yehova], ndipo vinso vawo viliye chite nsoni.” (Sl 34:5) Ove aliye chite nsoni olo kuti enzethaŵa Mfumu Sauli. Enze na chikhulupililo kuti Mulungu ali na Davide ndipo vinso vawo vesangalala. Molingana na vamene ivi, ŵanthu amene ayamba kuphunzila chonadi kwalomba pano, komasoti amene akhala Akhilisitu kwa nthawe itali, odalila Yehova kuti aŵayavye. Pakuti awona ŵeka na menso ŵawo Yehova oŵayavya, vinso vawo ni vosangalala ndipo vuwonesha kuti ni osimikija ntima kunkhala mphela okhulupilika.
Kusakila-sakila mfundo zingatiyavye
Nsanja ya Mulonda 15/05/2006 pedji 20 ndim. 2
Mfundo zikulu-zikulu za chigawo choyamba cha buku ya Masalimo
35:19—Kansi Davide enzetanthauza chinji pechisenga Mulungu kuti osati alole kuti adani ŵake amupailile linso? Kupailila linso, sembe kwiwonesha kuti adani a Davide osangalala chifukwa chakuyenda luweme kwa volinga vawo viipa vamene venzemuchitila. Davide epemphela kuti vamene ivi osati vichitike.