Malifalensi a Utumiki komasoti Moyo wasu wachikhilisitu kabuku kamisonkhano
© 2023 Watch Tower Bible and Tract Society of Pennsylvania
DJANUWALE 1-7
CHUMA CHUPEZEKA M’MAWU A MULUNGU | YOBU 32-33
Mukolimbikisa ŵanthu amene avutika na nkhaŵa
Insight-1 pedji 710
Elihu
Elihu enze munthu aliye sankho, ndipo enzesankhalini aliyense popeleka ulemu. Yove enzeziŵa kuti molingana na Yobu epangiwa na lito komasoti kuti Wamphamvu yonse niye Nyamalenga wake. Elihu aliye ganizilepo zoyofya Yobu koma elaŵila naye monga shamwali wake ngaye-ngaye ndipo ewonesha nkhalidwe iweme mosiyana na Elifazi, Bilidadi na Zofari.—Yob 32:21, 22; 33:1, 6.
Nsanja ya Mulonda 15/06/2014 pedji 25 ndim. 8-10
Kansi muwona ŵanthu ofoka monga ni mwakuŵawonela Yehova?
8 Kukumbukila kuti abale na alongo ŵasu ofoka chifukwa cha mavuto, kuzatiyavye kunkhala achifundo ngako—ayakine mwa ove olwala, ayakine ali pa banja na munthu wosakhulupilila, ndipo ayakine ovutika na nkhaŵa. Sewo nase, tingazakumana na vinthu volingana na vamene ivi nsiku iyakine. Aisiraeli penze ku Iguputo enze osauka komasoti ofoka, chifukwa cha vamene ivi, akaliye loŵa mu chalo chanyowani ekumbushiwa kuti ofunikilalini “kuyumila ntima” abale ŵawo ovutika. Yehova enzefuna kuti ove osati akonyoza ŵanthu osauka, koma akoŵayavya.—De 15:7, 11; Le 25:35-38.
9 Mmalo mwa kuŵaweluza olo kuŵakaikila, ŵanthu amene okumana na mavuto tufunikila kuŵatonthoja mwauzimu. (Yob 33:6, 7; Mat. 7:1) Mwachisanzo, tiyelekezele kuti munthu muyakine wachita ngozi pansewu ndipo taluta naye kuchipatala, kansi madokota angayambe na kufufuza kuti aziŵe ngati wachitisha ngozi yamene iyo niyove? Yayi, koma angapeleke chithandizo cha mankhwala mokulumija. Ni chimozi-mozi na Nkhilisitu muyasu wamene wakumana na mavuto, chofunikila ngako ni kumuyavya mokulumija.—Ŵelengani 1 Atesalonika 5:14.
10 Keno tuganizila mwavilili vinthu pamoyo wa abale na alongo ŵasu, tingawone vofoka vawo munjila yoyenelela. Mwachisanzo, ganizilani za alongo amene ankhala oshushiwa na analume ŵawo kwa vyaka vinyinji. Ove angawoneke monga ni ofoka, koma olo ntetyo owonesha chikhulupililo chotang’a komasoti kupilila. Koma kansi mukumvwa tyani mukawona mulongo wamene olela yeka ŵana akuza kumisonkhano pamozi na ŵana ŵake? Kansi mutembeja chifukwa cha chikhulupililo chake komasoti khama yake? Lomba mukumvwa tyani mukawona achilumbwana amene niwokhulupilika olo kuti okumana na viyeso kusukulu? Kunkhala olichefya kungatiyavye kuziŵa kuti ŵanthu amene owoneka monga ni ofoka ni “olemela mu chikhulupililo” molingana na ŵanthu amene owoneka monga kuti vinthu vuŵayendela luweme.—Yak 2:5.
Nsanja ya Mulonda 03/2020 pedji 23 ndim. 17-18
Kansi muziŵa nthawe yoyenelela yamungafunikile kulaŵila?
17 Munthu muyakine wamene eluta kuyawona Yobu enze Elihu, wamene enze wachibale wa Abulahamu. Yove enzemvwishila pa nthawe yamene Yobu na analume ayakine atatu penzelaŵijana. Nvowonekelatu kuti yove enzetetekela luweme venzelaŵiliwa chifukwa chakuti epeleka malangizo mowama ntima amene eyavya Yobu kuti achinje maganizo ŵake ophoniyeka. (Yob 33:1, 6, 17) Chinthu chamene chenze chofunika ngako kuli Elihu, chenze kulemekeza Yehova osati kulitamandila yove yeka olo kutamanda ŵanthu ayakine. (Yob 32:21, 22; 37:23, 24) Chisanzo cha Elihu chutiphunzisa kuti pali nthawe yoyenelela yonkhala chelele nomvwishila. (Yak 1:19) Tuphunzilaposoti kuti patupeleka uphungu kuli munthu, cholinga chasu chikulu chikonkhala kulemekeza Yehova, osati kulilemekeza sewo seka.
18 Tingawoneshe kuti tutembeja mphaso ya kulaŵila mwa kukonkheja malangizo a m’Baibolo okhuza nthawe yolaŵila komasoti yonkhala chelele. Mfumu ya nzelu Solomo eujiliwa kulemba kuti: “Mawu olaŵiliwa pa nthawi yoyenelela ali monga vitwazi vama apozi agolide mmbale zasiliva.” (Miy 25:11) Keno tumvwishila mwatchelu vakulaŵila ayasu komasoti kuganizila tikaliye laŵila, mawu ŵasu angankhale monga nima apozi agolide mmbale zasiliva.—Mawu amene awo onkhala aweme komasoti oyavya ngako. Koma keno tingalaŵile mawu atontho kapena anyinji, volaŵila vasu vingatang’ishe ayakine ndipo Yehova azasangalale nase. (Miy 23:15; Aef 4:29) Keno tingachite tetyo, tizawoneshe kuti tutembeja ngako mphaso yechitipasa Mulungu!
Kusakila-sakila Mfundo zingatiyavye
Nsanja ya Mulonda 01/2013 pedji 19 ndim. 10
Pitilijani kuvwendela kwa Yehova
10 Tingachite luweme kuganizila za kawonekedwe kasu. Koma vingankhale lini luweme kuganizila ngako vatingachite kuti tiziŵe vizindikilo vonse va ukalamba. Vizindikilo vamene ivo vingankhale kutang’a mwauzimu, ulemelelo komasoti kuwama kwa umunthu wasu wankati. Kumbukilani Baibolo yunena kuti: “Imvwi nichisoti chachifumu cha ulemelelo zikapezeka munjila yachilungamo.” (Miy 16:31) Umu niye mwakutiwonela Yehova, ndipo sewo nase tikoyeja-yeja kuliwona tetyo. (Ŵelengani 1 Petulo 3:3, 4.) Koma kansi nichinthu chanzelu kuchitiwa ma opaleshoni oyofya, olo kulondela chithandizo chamankhwala chosafunikila na cholinga chakuti tikowoneka luweme? “Chisangalalo chakupeleka Yehova” niye chuwamililisha munthu olo ni wokalamba kapena wolwala, ndaŵa yakuti chufumila mu ntima. (Ne 8:10) Ni mchalo chanyowani tyala mwati tizankhale athanzi komasoti owoneka luweme monga kamwana. (Yob 33:25; Yes 33:24) Poyembekezela nthawe yamene iyi, tiyeni tikochita vinthu mwanzelu komasoti kunkhala na chikhulupililo champhamvu. Kuchita vamene ivi kungatiyavye kunkhala mphela paushamwali wotang’a na Yehova komasoti kunkhala na moyo uweme olo palipano.—1Ti 4:8.
DJANUWALE 8-14
CHUMA CHUPEZEKA M’MAWU A MULUNGU | YOBU 34-35
Mungalimbikisiwe olo pamuwona kuti vinthu viliye chilungamo vuchitikila ŵanthu aweme
Nsanja ya Mulonda 01/2019 pedji 8 ndim. 2
Kansi Mulungu ali na minkhalidwe yotyani?
Nthawe zonse Yehova ochita vinthu viweme. “Mulungu wachendi angachitelini vinthu viipa na patontho kumo, ndipo wamphamvu zonse angachitelini vinthu viliye chilungamo!” (Yob 34:10) Nthawe zonse chigamulo chake chunkhala choyenelela, monga mwechinenela wamasalimo kuti: “Muzaweluze ŵanthu mwachilungamo.” (Sl 67:4) Pakuti “Yehova owona mwaulili ntima,” angasemphewelini na chinyengo. Yove oziŵa vachendi ndipo opeleka chigamulo choyenelela (1 Sam. 16:7) Komasoti Mulungu oziŵa chinthu chilichonse chiliye chilungamo komasoti chachinyengo chamene chuchitika pano pachalo, ndipo walonjeza kuti kwalombapano “aipa . . . azachose we pano pachalo.”—Miy 2:22.
Nsanja ya Mulonda 04/2017 pedji 10 ndim. 5
Kansi Ufumu wa Mulungu ukazawela uzachose vinthu votyani?
5 Kansi Yehova azachite chinji? Palipano, Yehova wapeleka mwayi kuli ŵanthu aminkhalidwe iipa kuti achinje. (Yes 55:7) Sikuti yove wapeleka kale chiweluzo chakuti munthu aliyense muipa azapaiwe. Chino chalo, niye chawaweluza kuti chizawonongewe. Koma kansi ŵanthu amene ofunalini kuchinja, vizaŵasilile tyani pa chisauso chikulu? Yehova walonjeza kuti azawononge chino chalo chiipa. (Ŵelengani Salimo 37:10.) Payakine ŵanthu ayakine aipa oganiza kuti ove azawonongewelini. Payakine onkhala na maganizo amene aŵa chifukwa chakuti ankhala ochita vinthu viipa koma olangiwalini chifukwa chakuti ofisama. Chifukwa chiyakine ni chakuti okumanalini na vokonkhapo va vochita vawo viipa. (Yob 21:7, 9) Koma kumbukilani Baibolo yunena kuti: “Menso ŵake ololeshesha njila za munthu, ndipo owona mayendedwe ŵake onse. Kuliye mfinzi ya zanimuwone yakuti ŵala ochitila ayawo viipa afisamemo.” (Yob 34:21, 22) Tetyo, paliye wamene akuti azafisame mpaka Yehova kukangiwa kumuwona. Komasoti pakuti menso ŵake owona paliponse; paliye chinthu changachite munthu pofuna kumusempha. Tetyo Aramagedo akazasila, tizaloleshe paliponse penze ŵanthu aipa koma azapezekepolinisoti. Chifukwa chakuti azankhale kuti—apaiwa!—Sl 37:12-15.
Nsanja ya Mulonda 05/2021 pedji 7 ndim. 19-20
Kansi mwewo mulole chilichonse kukukangishani kukonkheja Yesu?
19 Kansi masiku ŵano tukumana na vuto imo na imo? Eye. Ŵanthu anyinji masiku ŵano otizonda chifukwa chakuti tukana kutolamo mbali mu ndale. Ove oganiza kuti tufunikila kuvota pa visankho. Koma keno tingasankhe nsogoleli kuti atilamulile, tunkhala kuti tukana Yehova. (1 Sam. 8:4-7) Ŵanthu angoganizasoti kuti tufunikila kumanga masikulu na vipatala komasoti vinthu viyakine kuti viyavye ŵanthu mmunzi. Ove okana uthenga wasu chifukwa chakuti tuikila nzelu pa ntchito yolalikila mmalo moyeja kusilija mavuto ŵatukumana nawo pano pachalo.
20 Kansi ni chinji chingatiyavye kuti osati titaye chikhulupililo chasu? (Ŵelengani Mateyo 7:21-23.) Cholinga chasu chikulu chikonkhala kulipeleka pa ntchito yechitilamula Yesu. (Mat. 28:19, 20) Tufunikalini kutangwanika noyeja kusilija mavuto a ichi chalo. Sewo tuŵakonda ngako ŵanthu ndipo tuganizila za mavuto ŵawo, koma tuziŵa kuti njila iweme yoyavyilako ayasu ni kuŵaphunzisa vokhuza Ufumu wa Mulungu komasoti kuŵayavya kuti ankhale pa ushamwali na Yehova.
Kusakila-sakila Mfundo zingatiyavye
Nsanja ya Mulonda 04/2017 pedji 29 ndim. 3
Kulipeleka kwasu kuchitisha kuti Yehova atamandiwe!
3 Elihu, enzemvwishila venzekambilana Yobu na ŵala analume atatu. Pavuli pake, yove ekonsha Yobu kuti: “Ngati nimwe chendi wosalakwa, kansi mumupasa chinji [Mulungu]; kansi olondela chinji chofumila mmanja mwanu?” (Yob 35:7) Kansi pamene apa Elihu enzetanthauza kuti vatuchita potumikila Mulungu viliye ntchito? Yayi. Tunena tetyo chifukwa chakuti Yehova aliye muzuzule monga mwechichitila na ŵala analume atatu. Elihu enzetanthauza kuti Yehova ali nachilichonse. Ndipo odalilalini vatuchita pomulambila. Sewo tingamuyavyelini kuti ankhale wolemela kapena wamphamvu kupambana mwalili. Yove niye otipasa luso, mphamvu komasoti vinthu viweme vatili navo, ndipo owona mwatuvikatishila ntchito.
DJANUWALE 15-21
CHUMA CHUPEZEKA M’MAWU A MULUNGU | YOBU 36-37
Chifukwa chake mwewo mungakwanishe kukhulupilila lonjezo ya Mulungu ya moyo wosasila
Nsanja ya Mulonda 1/10/2015 pedji 13 ndim. 1-2
Kansi Mulungu niwosamvwishishika?
MULUNGU ALIYE CHIYAMBI KOMASOTI MAPETO: Baibolo yunena kuti Mulungu wankhalapo “kufumila kale-kale, ndipo azankhalepo mpaka kale-kale.” (Sl 90:2) Ivi vutanthauza kuti Mulungu aliye poyambila komasoti mapeto. Sewo taŵanthu tingakwanishelini kumvwisha vamene ivi chifukwa “vyaka vake nvosaŵelengeka.”—Yob 36:26.
Kansi kuziŵa vamene ivi nikoyavya motyani? Mulungu otilonjeza kuti azatipase moyo wosasila keno tingamuziŵe nochita vinthu vakufuna. (Yoh 17:3) Kansi kuti Mulungu wamene uyu azankhalepo lini mpaka kale-kale, sembe vinkhala vomvwika kulonjeza ŵanthu moyo wosasila? Ni “Mfumu yosasila” yeka yamene ingalonjeze vamene ivi.—1 Tim. 1:17.
Nsanja ya Mulonda 05/2020 pedji 22 ndim. 6
Kansi tutembeja vinthu vechitipasa Mulungu?
6 Ichi chalo chinkhala patali na patali na zuŵa, mwakuti manzi akupyalini ngako, ponkhalalini chimfule kapena kuzizila ngako mpaka manzi kukatana. Koma kuti yenze yevwendelako patontho, manzi yonse sembe yepwila ndipo pano pachalo sembe nipakupya ngako komasoti sembe paliye vamoyo. Koma kuti yenze ivwendelako mmululu patontho manzi onse sembe ekatana, ndipo chino chalo sembe chenkhala aizi yeka-yeka. Tetyo, Yehova eika ichi chalo komasoti zuŵa pamalo aweme, vamene ivi vechitisha kuti pano pachalo pankhale manzi amene oyavya volengewa vamoyo. Zuŵa ikayaka manzi apano pachalo okwela mmululu monga chusi pavuli pake onkhala mikumbi. Chaka chilichonse manzi amene okwela mmululu angakwane madamu 500.000. Damu iliyonse kukula kwake kilomita imozi ntali-ntali mwake, kilomita imozi mfupi-mfupi mwake, kilomita imozi komasoti kunoka kwake. Manzi amene aŵa okhala mmalele kwa masiku pafupi-fupi 10 akaliye pona monga mvula kapena fulele. Pavuli pake, manzi amene aŵa ojokela kunyanja komasoti mmimana, vamene ivi vuchitika moweleja-weleja ndipo vuwonesha kuti Yehova ni Mulungu wanzelu komasoti wamphamvu.—Yob 36:27, 28; Mla 1:7.
Nsanja ya Mulonda 10/2022 pedji 28 ndim. 16
Mukosangalala na chiyembekezo
16 Chiyembekezo chasu cha moyo wosasila ni mphaso ya ntengo wapatali yofumila kwa Mulungu. Tuyembekezela vinthu viweme ngako kusogolo ndipo tukaikilalini kuti vizachitike. Chiyembekezo chili monga ni nangula wasu, ndipo chutiyavya kunkhala odekha kuti tikopilila mayeselo, kutamanishiwa komasoti tuyopalini imfwa. Chilisoti monga ni chisote ndipo chuteteza maganizo ŵasu kuti tikopewa kuchita viipa noyeja-yeja kuchita viweme. Chiyembekezo chasu cha m’Baibolo chutiyavya kunkhala pa ushamwali na Mulungu ndipo chuwonesha kuti yove otikonda ngako. Vinthu vutiyendela bwino ngako tikapitilija kunkhala na chiyembekezo chotang’a.
Kusakila-sakila Mfundo zingatiyavye
Insight-1 pedji 492
Kulaŵijana
Nthawe zakale za m’Baibolo, ŵanthu enzepeleka mauthenga komasoti malingalilo kufumila kuli munthu kuluta kuli munthu muyakine pokatishila ntchito njila zosiyana-siyana. Cholinga chikulu chenze chakuti, mauthenga amchalo chamene icho komasoti akunja akopelekewa menso na menso. (2Sa 3:17, 19; Yob 37:20) Oyenda maulwendo nthawe zinyinji, enzesimba nkhani zofumila kutali akapanama kuti apeze chakulya, manzi komasoti vinthu viyakine ntauni, komasoti njila zenzekatishiliwa ntchito kaŵili-kaŵili na ŵanthu apaulwendo. Ŵanthu apaulwendo enzeluta komasoti kufumila kumadela akutali, enzepita mvyalo vapadela monga Asia, Africa, komasoti Ulaya, na Palestine. Tetyo, ŵanthu enzenkhala mmadela amene aŵa, venze vosavuta kumvwa mauthenga komasoti vochitika vikulu-vikulu va mvyalo vakunja. Nkhani zakunja nthawe zinyinji, ŵanthu enzezimvwila pa maketi atauni yamene iyi.
DJANUWALE 22-28
CHUMA CHUPEZEKA M’MAWU A MULUNGU | YOBU 38-39
Kansi mufwana nthawe yololesha chilengedwe?
Nsanja ya Mulonda 08/2021 pedji 9 ndim. 7
Kansi mwewo muyembekezela Yehova moleza ntima?
7 Pofotokoza mwechilengela chalo Yehova, Baibolo yunena kuti yove “eika mipimo yake,” ekumba “fandeshoni yake” komasoti eika “mwala wake wapakona.” (Yob 38:5, 6) Komasoti yove epatula nthawe kuti aganizile za ntchito yake. (Ge 1:10, 12) Ganizilani mwenzemvwila angelo akawona chinthu chilichonse chanyowani chawalenga Yehova. Ove enzekondwela ngakosoti! Chifukwa cha vamene ivo ove eyamba “kuŵilikija na chisangalalo.” (Yob 38:7) Kansi tuphunzilapo chinji? Petola vyaka masauzande anyinji kuti Yehova alenge chalo, nyenyezi komasoti volengewa vonse vamoyo, koma Yehova pechiloleshesha chinthu chilichonse chechilenga mosamala, yove enena kuti “venze viweme ngako.”—Ge 1:31.
Nsanja ya Mulonda 08/2020 pedji 14 ndim. 2
Kuukishiwa kwa akufwa kuwonesha kuti Yehova ni Mulungu wachikondi, wa nzelu, komasoti woleza ntima
2 Pachiyambi, Yehova elenga mwana wake Yesu. Pavulipake yove pamozi na mwana wake, elenga “vinthu vonse,” kupamikijapo Angelo. (Akl 1:16) Yesu enzesangalala kukata ntchito pamozi na Atata ŵake. (Miy 8:30) Angelo nawo esangalala. Ove enzeko, ndipo ewona panthawe yamene Yehova na mmisili wake Yesu, penzelenga kululu komasoti chalo. Kansi Angelo amene awo ewonesha tyani kuti esangalala? Ove “eyamba kuŵilikija mosangalala” chalo pechilengewa, ndipo nivosakaikisha kuti epitilja kusangalala na vinthu vonse vechilenga Yehova kupamikijapo ŵanthu. (Yob 38:7; Miy 8:31, mawu amnyansi.) Vinthu vechilenga Yehova vuwonesha kuti yove niwachikondi komasoti wa nzelu.— Sl 104:24; Aro 1:20.
Nsanja ya Mulonda 03/2023 pedji 17 ndim. 8
Phunzilani vinyinji vokhuza Yehova kufumila pa vinthu vechilenga
8 Yehova ni woyenelela kumukhulupilila. Yehova eyavya Yobu kuti akomudalila ngako. (Yob 32:2; 40:6-8) Penzekambilana na Yobu, Mulungu etomola mbali zinyinji za chilengedwe chake kupamikijapo nyenyezi, mikumbi, na tuleza. Yehova etomolasoti za vinyama, monga ng’ombe ya kusanga na hosi. (Yob 38:32-35; 39:9, 19, 20) Vinthu vonse vamene ivi vupeleka umboni osati tyala wa mphamvu zochitisha wowa za Mulungu zeka komasoti za chikondi chake na nzelu zake zikulu. Chifukwa cha makambilano amene aŵa, Yobu eyamba kumukhulupilila ngako Yehova kupambana kale yonse. (Yob 42:1-6) Molingana na vamene ivi, tikophunzila za chilengedwe, tukumbushiwa kuti Yehova ali na nzelu ziliye malile komasoti ali na mphamvu kupambana aliyense. Ndipo azasilije mavuto ŵasu onse. Mfundo yamene iyi ingatiyavye kuti tikomukhulupilila ngako.
Kusakila-sakila Mfundo zingatiyavye
Insight-2 pedji 222
Wopeleka malamulo
Yehova niwopeleka malamulo. Yehova niwopeleka malamulo ngaye-ngaye muchilengedwe chonse. Yove otipasa malamulo achilengedwe komasoti olamulila vinthu vechilenga va moyo komasoti vomela (Yob 38:4-38; Sl 104:5-19), kupamikijapo moyo wavinyama. (Yob 39:1-30) Ŵanthu nawo monga volengewa va Yehova, elengewa na minkhalidwe iweme monga, nzelu, kuganiza komasoti uzimu, tetyo ofunikila kugonjela malamulo a mankhalidwe aweme a Mulungu. (Aro 12:1; 1Ak 2:14-16) Komasoti chilamulo cha Yehova chulamulila volengewa vauzimu kupamikijapo Angelo.—Sl 103:20; 2Pe 2:4, 11.
Malamulo achilengedwe a Yehova osilalini. (Yer 33:20, 21) Muchilengedwe chake vinthu voziŵika luweme ni malamulo ŵake amene niwonkhazikika komasoti odalilika, ndipo malamulo ayakine ŵakuziwa asayansi oŵapangisha kuti, akoŵelenga kayendedwe ka mwezi, mapulaneti komasoti vinthu viyakine vakululu mosalekeja. Munthu wamene ochita vinthu vosemphana na malamulo, ofunikila kupasiwa chilango. Ni chimozi-mozi na malamulo a mankhalidwe aweme a Mulungu osinthalini, ndipo munthu angafwayelini malamulo ŵake osapasiwa chilango. Tufunikila kuŵakonkheja monga malamulo ŵake achilengedwe olo kuti onkhalila lini kupeleka chilango. “Mulungu opusishika lini. Chilichonse chawakomola munthu niye chati azaweje.”—Aga 6:7; 1Ti 5:24.
DJANUWALE 29–FEBULUWALE 4
CHUMA CHUPEZEKA M’MAWU A MULUNGU | YOBU 40-42
Vatuphunzila pa vinthu vechikumana navo Yobu
Nsanja ya Mulonda 15/10/2010 pedji 3-4 ndim. 4-6
“Niŵani oziŵa maganizo a Yehova?”
4 Patuganizila vochita va Yehova, tufunikila kupewa ntima woweluza Mulungu potolela mfundo zakuyendela ŵanthu. Chiyoloŵezi chamene ichi, chafotokozewa mmawu a Yehova olembewa pa Salimo 50:21 akuti: “Wenzeganiza kuti newo ningalingane nawe.” Ivi nivolingana na vechinena kaswili muyakine wa Baibolo vyaka 175 kuvuli. Yove enena kuti: “Ŵanthu okonda kuweluza Mulungu mokatijana na mwakuwonela vinthu, ndipo oganiza kuti yove olamuliliwa na malamulo amene ŵanthu oŵawona kuti niwoyenela kuŵakonkheja.”
5 Tufunikila kunkhala osamala ngako kuti osati tiyambe kuganizila kuti Yehova ofunikila kuchita vinthu mokatijana na mfundo komasoti vofuna vasu. Ndaŵa yanji vamene ivi nivofunika? Patuphunzila nkhani ziyakine za m’Baibolo, tingoganiza kuti Yehova ochitalini luweme pankhani yamene iyo. Tingankhale na maganizo amene aŵa, chifukwa chakuti tuziŵalini vinyinji ndipo tiliye ungwilo. Aisiraeli nawo enze na maganizo ophoniyeka ndipo enzewona kuti Yehova oŵasogalelalini luweme. Onani vechiŵauja Yehova: “Mwewo mwe ŵanthu muzanene kuti: ‘Njila za Yehova ziliye chilungamo.’ Mvwishilani mwewo amng’anda ya Aisiraeli. Kansi njila zangu niye ziliye chilungamo? Kansi ni njila lini zanu mwewo mweŵanthu ziliye chilungamo?”—Eze. 18:25.
6 Chinthu chofunika ngako chamene chingatiyavye kupewa maganizo oweluza Yehova mokatijana na mfundo zatuyendela, nikunkhala ozindikila kuti sewo tuziŵalini vinthu vinyinji ndipo nthawe ziyakine tunkhala na maganizo ophoniyeka ngako. Yobu enzefunikila kutolapo phunzilo pa vochitika vamene ivi. Ndipo niye venzefunikila kuziŵa Yobu. Panthawe yenzevutika Yobu esila nzelu ndipo eyamba kulikonda. Yove eleka kuwona vinthu vofunika ngako, koma Yehova emuyavya mwachikondi kuti akowona vinthu moyenelela. Yove emukonsha makonsho osiyana-siyana opitilila 70 ndipo Yobu aliyekwanishe kuŵayankha. Apa, Yehova eyavya Yobu kuzindikila kuti enzeziŵalini vinthu vinyinji. Tetyo, Yobu elichefya nochinja mwenzewonela vinthu.—Ŵelengani Yobu 42:1–6.
Nsanja ya Mulonda 06/2017 pedji 25 ndim. 12
Osati mukoluŵa nkhani yofunika ngako
12 Pakuti Yobu enze etamana ngako, kansi vinthu vechinena Yehova venze vankhanza komasoti viliye chifundo? Yayi, ndipo Yobu naye aliyeganize tetyo. Olo kuti enzekumana na mavuto, Yobu etembeja vechimuuja Yehova. Yove enena kuti: “Nilape mulito na mmulota.” Vamene ivi venzewonesha kuti malangizo otang’isha koma osapita mmbali a Mulungu emuyavya. (Yob 42:1-6) Yobu enze elondelakosoti malamgizo ofumila kwa Elihu wamene enze wachilumbwana ntontho polinganija na yove. (Yob 32:5-10) Yobu pechilondela malangizo a Mulungu nochinja maganizo ŵake, Mulungu elaŵila na ŵanthu mawu owonesha kuti osangalala naye Yobu chifukwa cha kukhulupilika kwake.—Yob 42:7, 8.
Nsanja ya Mulonda 06/2022 pedji 25 ndim. 17-18
“Yembekezela Yehova”
17 Yobu ni mmozi mwa atumiki a Yehova amene epitilija kunkhala otang’a ntima komasoti amphamvu penzelimbana na mayeselo akulu. Ndipo mtumwi Paulo mu kalata yake yoluta kuli Aheberi, efotokoza za ŵanthu ayakinesoti anyinji amene eŵatomola kuti “nkumbi ukulu wa Mboni.” (Ahe 12:1) Onse ekumana na mayeselo akulu-akulu; koma epitilija kunkhala okhulupilika kwa Yehova kwa moyo wawo wonse. (Ahe 11:36-40) Kansi kupilila kwawo na khama yawo vichingopita patyala? Yayi! Olo kuti mu nthawe yawo paliye ewonako kukwanilishiwa kwa malonjezo a Mulungu, ove epitilija kuyembekezela Yehova. Ndipo chifukwa chakuti enze osimikijila kuti enzekondewa na Yehova, enze na chidalilo chakuti azawone kukwanilishiwa kwa malonjezo amene awo. (Ahe 11:4, 5) Chisanzo chawo chingatitang’ishe kuti tipitilije kuyembekezela Yehova.
18 Masiku ŵano tunkhala mchalo chamene chupitilija kuipila-ipila. (2 Tim. 3:13) Satana akaliyesilija kuyesa ŵanthu a Mulungu. Viliye kanthu kuti tikumane na mavuto otyani kusogolo, tiyeni tinkhale osimikija ntima kupitilija kutumikila Yehova mwakhama nokhulupilila kuti “chiyembekezo chasu chili mwa Mulungu wa moyo.” (1 Tim. 4:10) Tikokumbukila kuti madaliso ŵechipasiwa Yobu na Mulungu owonesha “kuti Yehova ni wachikondi chikulu komasoti wachifundo.” (Yak 5:11) Ndipo nase tiyeni tipitilije kunkhala okhulupilika kwa Yehova ndipo osati tikokaikila kuti yove azadalise “ŵanthu omusakila-sakila na ntima wonse.”—Ŵelengani Aheberi 11:6.
Kusakila-sakila Mfundo zingatiyavye
Insight-2 pedji 808
Kunyozewa
Yobu enze munthu wolungama komasoti wokhulupilika olo kuti enzenyozewa. Koma yove eyamba kuwona vinthu mophoniyeka, ndipo ezuzuliwa. Ponena za Yobu Elihu enena kuti: “Kansi nimwanalume wotyani wamene ali monga ni Yobu akumwa manyozo monga ni manzi?” (Yob 34:7) Yobu eganizila ngako za kulilungamisha kwake mmalo moganizila chilungamo cha Mulungu ndipo enzekonda kulikuja mmalo moyamikila Mulungu. (Yob 35:2; 36:24) Penzenyozewa ngako Yobu na “azishamwali” ŵake atatu, enzewona kuti vamene ivi vumukhuzalini Mulungu. Kuganizila vamene ivi kwenze monga olipeleka yeka ku manyozo nokondwela nayo, noŵaloweshamo manyozo amene awo monga kuti akumwa manzi mokondwela. Pavuli pake, Mulungu efotokozela Yobu kuti (ŵanthu amene enzemunyoza) emufotokozela vawenye voshushana na Mulungu. (Yob 42:7) Molingana na vamene ivi, Yehova euja mneneli Samueli panthawe yamene Aisiraeli enzefuna mfumu, yove enena kuti: “Aliye kane wewo, koma akana newo kuti niŵe mfumu yawo.” (1Sa 8:7) Ndipo Yesu euja wophunzila ŵake kuti: “Ŵanthu amitundu yonse azazondane namwe [osati chifukwa cha mwewo mweka, koma] chifukwa cha zina yangu.” (Mat. 24:9) Kukumbukila vamene ivi kuzayavye Nkhilisitu aliyense kupilila kunyozewa komasoti kuwonesha mzimu uweme ndipo kuzamuyavye kunkhala woyenelela kulondela mphoto ya kupilila kwake.—Lu 6:22, 23.
FEBULUWALE 5-11
CHUMA CHUPEZEKA M’MAWU A MULUNGU | MSALIMO 1-4
Nkhalani kumbali ya ufumu wa Mulungu
Nsanja ya Mulonda 09/2021 pedji 15 ndim. 8
“Nizanyang’anyishe mitundu yonse ya ŵanthu”
8 Kansi ŵanthu ochita tyani akamvwa uthenga uweme wa Ufumu? Anyinji okana kumvwishila. (Ŵelengani Salimo 2:1-3.) Mitundu ya ŵanthu yukalipa ikamvwa uthenga wamene uyu. Ove okana wolamulila wawasankha Yehova. Ove owonalini uthenga uweme wa Ufumu wamene uyu watulalikila monga “uthenga uweme.” Ndipo maboma ayakine afwika polesha ntchito yasu yolalikila! Olo kuti anyinji mwa olamulila a chino chalo onena kuti otumikila Mulungu, ove ofunalini kusiya udindo wawo. Molingana na vechichita olamulila amu nthawe ya Yesu, olamulila amasiku ŵano nawo, oshusha Wozozewa wa Yehova polimbana na ophunzila ŵake okhulupilika.—Mac 4:25-28.
Nsanja ya Mulonda 04/2016 pedji 29 ndim. 11
Osati munkhale mbali ya chalo
11 Kukonda chuma. Keno tukonda ngako chuma tingagonje tikoyesewa pa nkhani za ndale. Mulongo muyakine wa ku Malawi zina yake Ruth, ewona abale na alongo ayakine amene egonja mu vyaka vam’ma 1970. Yove enena kuti: “Aŵa ŵanthu enzefunalini kusiya moyo uweme. Ayakine eluta nase kumisasa koma pavuli pake evomela kunkhala mamembala achipani ndipo ejokela kwawo, enzewona kuti angakwanishelini kunkhala moyo wotamana wakunsasa kwamene uko.” Koma atumiki a Mulungu anyinji ekhalamphela wokhulupilika, ndipo elolela kusiya vinthu vawo vonse nonkhala pa mavuto azachuma.—Ahe 10:34.
Kusakila-sakila Mfundo zingatiyavye
Insight-1 pedji 425
Mungu
Kale, enzetola nyula yopepuka kuvunikila pa mbewu monga balele na tiligu kuti osati kundalalile mungu. Koma olo kuti mawu a m’Baibolo onena za mungu niwophiphilisila, okatijana na venzechitika mmasiku akuvuli. Pavuli pofyokola mbewu zantengo wapatali, enzepepeta vimungu noviunjika ndipo pavuli pake enzevunikila mbewu kuti osati vindalalileko, chamene ichi chenzenkhala chizindikilo choyenelela cha mbewu zofunika komasoti chizindikilo cha vinthu vatyala-tyala na vosafunika vamene venzefunikila kutayiwa.
Choyamba enzefunikila kubula mbewu nopepeta vimungu, pavulipake notola mbewu ziweme noziika mchimphaka. (Onani JOEIRAR) Vamene ivi, vuwonesha luweme mwati azachitile Yehova na ŵanthu ampatuko amene ali pakati pa atumiki ŵake amene ochita minkhalidwe iipa komasoti amene oshusha mawu ŵake. (Yob 21:18; Sl 1:4; 35:5; Yes 17:13; 29:5; 41:15; Hos 13:3) Ufumu wa Mulungu uzafwaye adani ŵake, ndipo azankhale monga ni tumungu tutontho-tutontho twamene nitosavuta kundalala na mphepo.—Da 2:35.
Kanyinji-kanyinji, vimungu vamene viliye ntchito, venzeunjikiwa pamozi noshokewa kuti osati vindalalilesoti kuli tiligu. Molingana na vamene ivi, Yohane m’Batizi enenelatu za chiwonongeko chamene chikuza kuti chizawononge ŵanthu achipembezo chawenye amene ochita vinthu viipa molingana na vimungu vamene vufunikila kushokewa.—Yesu khilisitu azasonkhanishe tiligu, “koma vimungu azavishoke na mulilo usazimwika.”—Mat. 3:7-12; Lu 3:17; onani DEBULHA.
FEBUWALE 12-18
CHUMA CHUPEZEKA M’MAWU A MULUNGU | MASALIMO 5-7
Mukonkhala mphela okhulupilika olo kuti ŵanthu ayakine ochita vinthu viipa
Nsanja ya Mulonda 03/2021 pedji 15 ndim. 7-8
Malemba angatiyavye kuti tipilile
7 Kansi nshamwali wanu olo munthu wa m’banja mwanu ekukhumudwisamponi kale? Keno ntetyo, mwewo mungapindule mukaŵelenga nkhani ya Abisalomu, mwana wa Mfumu Davide, wamene epandukila atata ŵake ndipo eyeja-yeja kuti atole ufumu.—2 Sam. 15:5-14, 31; 18:6-14.
8 (1) Pemphelani. Muli na nkhani yamene iyi ya Davide mmaganizo mwanu, mufotokozeleni Yehova mwamumvwila chifukwa cha vinthu viipa vechikuchitilani. (Sl 6:6-9) Muujeni bwino-bwino Yehova mwamumvwila. Pavuli pake, musengeni kuti akuyavyeni kufwana mfundo zamene zingakuyavyeni pamuyeja-yeja kusilijana na vuto yamene iyo.
Nsanja ya Mulonda 07/2020 pedji 8-9 ndim. 3-4
Osati mukokaikila kuti vamukhulupilila nivachendi
3 Chikhulupililo chasu chufunikalini kudalila chikondi chatuwona pakati pa atumiki a Mulungu. Ndaŵa yanji tunena tetyo? Tiyelekezele kuti wokhulupilila muyanu—mkulu kapena mpainiya—wachita chimo ikulu. Olo payakine m’bale kapena mulongo muyakine wakukhumudwisani. Payakine wofalisa muyakine wayamba mpatuko ndipo onena kuti vatukhulupilila nivachendilini. Lomba keno vamene ivi vingachitike kansi mungakhumudwe nosiya kutumikila Yehova? Pamene apa mfundo niyakuti: keno mukhulupilila Yehova chifukwa cha vochita va ŵanthu ayakine osati chifukwa chakuti muli naye paushamwali wotang’a, chikhulupililo chanu chingankhalelini chotang’a. Nichendi kuti mwamuwonela Yehova komasoti ŵanthu ŵake vingakuyavyeni kuti chikhulupililo chanu chinkhale chotang’a. Koma chofunika ngako nikuphunzila mfundo za m’Baibolo mwakhama, kumvwisha vamuphunzila komasoti kufufuza mfundo ziyakine. Vamene ivi vingakuyavyeni kusimikijila kuti mfundo zamuphunzila zokhuza Yehova nizachendi—Aro 12:2.
4 Yesu enena kuti ŵanthu ayakine olondela chonadi “mosangalala,” koma akakumana na mavuto chikhulupililo chawo chufoka. (Ŵelengani Mateyo 13:3-6, 20, 21.) Payakine ŵanthu amene awo oziŵalini kuti ŵanthu amene okonkheja Yesu okumana na mavuto komasoti chikhulupililo chawo chufoka. (Mat. 16:24) Payakine oganiza kuti, chifukwa chakuti ni Akhilisitu— Mulungu akosilisha mavuto ŵakukumana nawo. Koma muli chino chalo chatilimo, nivosakwanishika kunkhala osakumana na mavuto chifukwa vinthu vingachinje pa moyo wasu notichitisha kuti osati tikosangalala.—Sl 6:6; Mla 9:11.
Kusakila-sakila Mfundo zingatiyavye
Insight-1 pedji 995
Manda
Pa Aroma 3:13 mtumwi Paulo ekatishila ntchito mawu apa Salimo 5:9, poyelekezela nkosi wa munthu muipa na chinyengo komasoti “manda oseguka.” Monga mwalili manda amene ofunikila kujujiwa na ŵanthu akufwa komasoti chivumba, pakamwa pawo poseguka kuti alaŵile mawu opaya komasoti aipa.—Yelekezelani na Mateyo 15:18-20.
FEBULUWALE 19-25
CHUMA CHUPEZEKA M’MAWU A MULUNGU | MASALIMO 8-10
“Nizakutamandeni mwewo Yehova”!
Nsanja ya Mulonda 08/2021 pedji 3 ndim. 6
Mukotembeja mwayi wonkhala m’Banja ya Yehova
6 Yehova etipasa malo aweme ngako akuti tikonkhalamo. Mvyaka voyamba akaliye lenga munthu woyambilila, yove enze elenga kale ichi chalo kuti ŵanthu okonkhalamo. (Yob 38:4-6; Yer 10:12) Pakuti yove nimuweme ntima komasoti wopasa, Yehova eikamo vinthu vinyinji viweme kuti ŵanthu azasangalale navo. (Sl 104:14, 15, 24) Nthawe ziyakine yove enzeganizila vinthu vechilenga, ndipo enzewona kuti “vililuweme ngako.” (Ge 1:10, 12, 31) Yehova ewonesha kuti owona ŵanthu kunkhala wofunika “poŵapasa mphamvu” yakuti alamulile vinthu vochitisha chidwi vechilenga pano pachalo. (Sl 8:6) Cholinga cha Mulungu nichakuti ŵanthu angwilo azasangalale nosamalila vinthu viweme vechilenga yove mpaka kale-kale. Kansi mutembeja Mulungu nthawe zonse chifukwa cha vinthu viweme vechilonjeza vamene ivi?
Nsanja ya Mulonda 05/2020 pedji 23 ndim. 10
Kansi mwewo mutembeja mphaso zofumila kwa Mulungu?
10 Kukambilana na ŵanthu amene odabwa kuti ndaŵa yanji tukhulupilila lini kuti vamoyo vechita chinja, ni njila imozi yatingawoneshele kuti tutembeja mphaso yolaŵila. (Sl 9:1; 1 Pet. 3:15) Ŵanthu amene aŵa onena kuti ichi chalo komasoti vamoyo vechingonkhalako veka. Koma keno tingakatishile ntchito mfundo za m’Baibilo zamene zufotokoza nkhani yamene iyi, tingakwanishe kuŵayavya kuziŵa Atata ŵasu akululu. Koma tingayavyesoti ŵanthu amaganizo aweme kuti aziŵe chifukwa chake tukhulupilila kuti Yehova niye elenga kululu komasoti chalo.—Sl 102:25; Yes 40:25, 26.
Nsanja ya Mulonda 04/2022 pedji 7 ndim. 13
Kansi nimwe “chisanzo chiweme . . . pa kalaŵilidwe”?
13 Mukoimba na ntima wonse. Tikoimba mu Ng’anda ya Ufumu, cholinga chasu chikulu chikonkhala kutamanda Yehova. Mulongo muyakine zina yake Sara oliwonalini kuti oziŵa ngako kuimba. Koma yove ofunishisha kutamanda Yehova poimba nyimbo. Ndipo chuyavya Sara kuti akokwanisha kuchita vamene ivi, ni kukonzekela nyimbo akali ku ng’anda monga mwakuchitila pokonzekela mbali ziyakine za misonkhano. Yove oyeselela kuimba nyimbo noyeja kuwona mwamene mawu a mu nyimbo zamene izo mwakukatanijilana na nkhani zikuti zikalaŵiliwe pamisonkhano. Yove enena kuti: “Vamene ivi, vuniyavya kuganizila ngako mawu a mu nyimbo mmalo moganizila ngako luso yangu yoimba.”
Kusakila-sakila Mfundo zingatiyavye
Insight-1 pedji 832
Chikumo
Mophiphilisila, Mulungu onenewa kuti wokwanilisha ntchito na “vikumo” vake, monga kulemba malamulo 10 pamyala (Eks 31:18; De 9:10), kuchita vodabwisa (Eks 8:18, 19), komasoti kulenga kululu (Sl 8:3). Mfundo yakuti “vikumo” va Mulungu vekatishiliwa ntchito polenga vinthu, vutanthauza mzimu wake utuŵa kapena kuti mphamvu yukata ntchito yawoneshewa mulemba ya Geneses yamene yunena za chilengedwe na mphamvu yukata ntchito ya Mulungu (ruʹach, “mzimu”) yenzeyenda palulu pa manzi. (Ge 1:2) Koma olo ntetyo, mmalemba Achigiliki mupezeka mfundo yosimikijilika yamene iyi, mwa kukatishila ntchito mawu ophiphilisa amene aŵa. Lemba ya Mateyo yufotokoza kuti Yesu efumya viŵanda na mzimu utuŵa wa Mulungu, ndipo Luka otiuja kuti Yesu echita vamene ivi na “chikumo cha Mulungu.”—Mat. 12:28; Lu 11:20.
FEBULUWALE 26–MALICHI 3
CHUMA CHUPEZEKA M’MAWU A MULUNGU | MASALIMO 11-15
Yelekezelani kuti muli mchalo chanyowani mwamene muli ntendele wa Mulungu
Nsanja ya Mulonda 15/05/2006 pedji 18 ndim. 3
Mfundo zikulu-zikulu za chigawo choyamba cha Masalimo
11:3—Kansi nimaziko otyani amene opasuka? Amene aŵa nimaziko amene omangilila ŵanthu pamozi amene ni—malamulo, ntendele komasoti chilungamo. Mankhalidwe amene aŵa akasokonezeka ponkhala paliye nkatijano pakati pa wanthu ndipo ponkhala paliye chilungamo. Vikankhala tetyo, munthu aliyense “wolungama” ofunikila kudalila Mulungu na ntima wake wonse.—Sl 11:4-7.
Nsanja ya Mulonda 4/2016 pedji 11
Kansi vinthu vachiwawa vizasile pano pachalo?
Baibolo yulonjeza kuti Mulungu azasilishe vinthu vonse vachiwawa pano pachalo. Ndipo yutisimikijila kuti ŵanthu wonse okonda vinthu vachiwawa azapaiwe “pansiku ya chiweluzo na chiwonongeko cha ŵanthu asayopa Mulungu.” (2Pe 3:5-7) Panthawe yamene iyi pazankhalelini ŵanthu amene onzunza ayawo. Koma lomba kansi tingasimikijile tyani kuti Mulungu niwofunishisha kusilisha chiwawa?
Baibolo yunena kuti “Mulungu ozondana ngako na aliyense wokonda chiwawa.” (Sl 11:5) Nyamalenga wasu okonda ntendele komasoti chilungamo. (Sl 33:5; 37:28) Chifukwa chake azalolelini kuti ŵanthu okonda vinthu vachiwawa ankhalepo mpaka kale-kale.
Nsanja ya Mulonda 08/2017 pedji 6 ndim. 15
Kansi mungayembekezele moleza mtima?
15 Kansi ndaŵa yanji Davide eyembekezela moleza mtima? Yankho yakonsho yamene iyi tingaifwane mu vinthu vechinena yove mu Salimo yamene yala yechikonsha maulwendo 5 kuti: “Mpaka nthawe yanji?” Davide enenasoti kuti: “Koma newo, nakhulupilila kuwama ntima kwanu kosasila; ntima wangu ukondwela chifukwa chachipulumuso chanu. Nizaimbile Yehova chifukwa chakuti wanipasa vinthu viweme.” (Sl 13:5, 6) Davide enzekhulupilila kuti Yehova nimuweme ntima ngako. Tetyo, aliye khumudwe koma eyembekezela Yehova kuti amupulumuse, ndipo enzeganizila vinthu viweme vawamuchitila Yehova. Davide enzeziŵa vokonkhapo va kuyembekezela moleza ntima.
Ufumu wa Mulungu pedji 236 ndim. 16
Ufumu uzakwanilishe vakufuna Mulungu pano pachalo
16 Chitetezo. Pamapeto pake, mawu otang’isha amene ali pa Yesaya 11:6-9 azakwanilishiwe kosilijila. Analume, anakazi komasoti ŵana azankhale otetezeka kulikonse kwangalute pano pachalo. Kuzankhale kuliye chinthu chilichonse choyofya kaya chinyama kapena munthu. Ganizilani mwati muzasangalalile pa nthawe yamene iyo, ndipo ichi chalo chonse muzachiwone monga muli kwanu. Muzankhale na ufulu wonyaya mmimana, mnyanja komasoti kuyenda mmalupili paliye chilichonse chokuyofyani olo ni usiku. Pa nthawe yamene iyi, mawu apa Ezekieli 34:25 azakwanilishiwe, ndipo vizankhale vokwanishika kwa ŵanthu a Mulungu “kunkhala nchipululu paliye chilichonse choyofya, komasoti kuyona nsanga.”
Kusakila-sakila Mfundo zingatiyavye
Nsanja ya Mulonda 15/09/2013 pedji 19 ndim. 12
Kansi mwachinja?
12 Ŵanthu anyinji muli ichi chalo, ali na maganizo aipa. Ayakine mwa ove oganiza kuti ninkhalidwe yakale-kale kuuja ayakine mfundo zangayendele. Maticha komasoti makolo anyinji onkhala na maganizo akuti ŵana ofunikila kunkhala na ufulu wochita vinthu vakufuna. Ove owona kuti, paliye mfundo zofunikila zakuti ŵanthu wonse akozikatishila ntchito. Olo ŵanthu anyinji amene ali mu vipembezo owona kuti ali na ufulu wochita chilichonse chakuwona kuti ni chiweme mosaganizila vakufuna Mulungu. (Sl 14:1) Angasokoneze mwakuwonela vinthu Akhilisitu ayakine mu gulu ya Yehova. Mwachisanzo, payakine angafunelini kuyendela dongosolo ya mpingo ndipo angayambe kudandaula na chinthu chilichonse chamene osangalala lini nacho. Payakine angasangalale lini na malangizo ofumila m’Baibolo onena za vosangalasa, kukatishila ntchito intaneti kapena maphunzilo akuyunivesiti.