1. Kansi Yesu ni ŵani?

Yesu ni mngelo wamphamvu ndipo onkhala kululu. Yehova Mulungu elenga Yesu akaliye lenga chinthu chilichonse. Tetyo, yove oziŵika kuti “woyamba kuvyalika wa chilengedwe chonse.” (Akolose 1:15) Baibolo yunena kuti Yesu ni “Mwana . . . wovyalika yekha” wa Mulungu chifukwa ni yove yeka wechilenga Yehova mwachindunji. (Yohane 3:16) Yesu enzekata ntchito pamozi na Atata ŵake Yehova, enzeŵayavya kulenga vinthu viyakine vonse. (Ŵelengani Miyambo 8:30.) Yesu akalipitilija kukata ntchito pamozi na Atata ŵake Yehova mokondwela. Yove otumikila mokhulupilika monga womulaŵilila m’malo mwa Mulungu. Ndipo oitiwa kuti “Mawu,” kutanthauza kuti opeleka mauthenga na malangizo ofumila kwa Mulungu.—Yohane 1:14.

Tonse nise ochimwa, tuvutika, komasoti tumwalila chifukwa chakuti banja yoyambilila Adamu na Hava, aliyemvwile Mulungu.a Koma olo n’tetyo, sikuti vonse veluzika. Yehova ekonza njila yotipulumushila ku uchimo na imfwa. Yehova etumija Mwana wake Yesu Khilisitu kuzatipulumusha ku uchimo na imfwa. Baibolo yutiwonesha kuti imfwa ya Yesu yenze monga dipo yotiwombola. Dipo ni malipilo amene opelekewa kuti munthu amasuliwe. Tetyo, ntengo wechilipila Yesu wenze moyo wake wangwilo. (Ŵelengani Mateyu 20:28.) Yesu elipeleka nowela kuzankhala na moyo pano pachalo, mwa njila yamene iyi yove esegula njila kuti tikafwane vinthu vechiluza Adamu na Hava. Imfwa ya Yesu yutiwoneshasoti kuti yove pamozi na Yehova otikonda. Mutu wamene uyu ukuyavyeni kutembeja ngako dipo ya Yesu Khilisitu.

1. Kansi imfwa ya Yesu Khilisitu ingatiyavye tyani masiku ŵano?

Sewo nise ochimwa, n’chifukwa chake tuchita vinthu vinyinji vokhumudwisa Yehova. Koma chifukwa cha vechichita Yesu kuli sewo, n’vokwanishika kukhululukiliwa machimo ŵasu. Kuti vamene ivi vikwanishike tufunika kulapa kufumila pansi pa ntima nosenga kuti Yehova atikhululukile mu zina ya Yesu Khilisitu, nochita vonse vatingakwanishe kuti osati tiwelejesoti chimo imo na imo. Tikachita vamene ivi tinkhale pa ushamwali wotang’a na Yehova. (1 Yohane 2:1) Baibolo yunena kuti: “Khilisitu efwila machimo kamozi tyala. Munthu wolungama wamene uyo efwila ŵanthu osalungama, kuti akufwisheni kwa Mulungu.”​—1 Petulo 3:​18.

2. Kansi imfwa ya Yesu izatiyavye tyani kusogolo?

Yehova etumija Mwana wake Yesu kuzapeleka moyo wake wangwilo “kuti aliyense wokhulupilila [Yesu] osati awonongeke, koma ankhale na moyo wosasila.” (Yohane 3:​16) Chifukwa cha nsembe ya Yesu, Yehova azasilije vinthu vonse vuchitika chifukwa chakusamvwila kwa Adamu. Ivi vutanthauza kuti tikakhulupilila nsembe ya Yesu, tingezenkhala na mwayi wosangalala na moyo kosasila pano pachalo!​—Yesaya 65:21-​23.

VATI TIPHUNZILE

3. Nsembe ya Yesu yutipulumusha ku uchimo na imfwa

VIDIYO: Ndaŵa yanji Yesu echifwa?​—Mbali yoyamba (2:​01)

• Kansi Adamu etaya mwayi wotyani pechipandukila Mulungu?

Ŵelengani Aroma 5:​12, ndipo pavuli pake mukambilane konsho iyi:

• Kansi uchimo wa Adamu wekhuza tyani moyo wasu?

Ŵelengani Yohane 3:​16, ndipo pavuli pake mukambilane konsho iyi:

• Ndaŵa yanji Yehova etumija mwana wake pachalo?

1. Adamu enze munthu wangwilo koma chifukwa cha kupanduka kwake ŵanthu wonse ochimwa na kufwa

2. Yesu enze munthu wangwilo ndipo chifukwa cha kumvwila kwake ŵanthu wonse azankhale na moyo wangwilo komasoti azankhale mpaka kale-kale

4. Imfwa ya Yesu yuyavya ŵanthu wonse

VIDIYO: Ndaŵa yanji Yesu echifwa?​—Mbali yachiŵili (2:​00)

• Kansi imfwa ya munthu tyala mmozi ingayavye tyani ŵanthu wonse?

Ŵelengani 1 Timoteyo 2:​5, 6, ndipo pavuli pake mukambilane konsho iyi:

• Adamu enze munthu wangwilo koma chifukwa cha uchimo wake ŵanthu wonse ochimwa na kufwa. Yesu naye enze munthu wangwilo. Kansi yove enkhala tyani dipo yoyenelela ndendende “kuli sewo tonse”?

5. Dipo ni mphaso ya Yehova kuli sewo

Kuli azishamwali a Yehova dipo ni chinthu cha ntengo wapatali. Mwachisanzo, ŵelengani Agalatiya 2:​20, ndipo pavuli pake mukambilane konsho iyi:

• Kansi ntumwi Paulo ewonesha tyani kuti dipo yochokela kwa Mulungu ni mphaso ya ntengo wapatali kuli yove?

Adamu pechichimwa, yove komasoti ŵanthu wonse efumila kuli yove eyamba kufwa. Koma Yehova epeleka moyo wa Mwana wake kuti mwewo munkhale na mwayi wakuzakwanisha kunkhala na moyo mpaka kale-kale.

Ŵelengani Yohane 19:​1-7, 16-​18, ndipo mukayamba kuŵelenga mavesi amene aŵa, ganizilani mwechimvwila Yehova penzewona Mwana wake otamana, ndipo pavuli pake mukambilane konsho iyi:

• Kansi mwewo mukumvwa tyani pa vinthu vechikuchitilani Yehova komasoti Yesu?

MFUNDO ZACHIDULE

Chifukwa cha imfwa ya Yesu, Yehova angatikhululukile machimo ŵasu, ndipo imfwa ya Yesu yutipasasoti mwayi wonkhala na moyo mpaka kale-kale.

Makonsho oweleja

• Ndaŵa yanji Yesu enzefunika kufwa?

• Kansi vukwanishika tyani kuti moyo wa ngwilo wa Yesu unkhale dipo yoyenelela kuli ŵanthu wonse?

• Kansi imfwa ya Yesu ingakuyavyeni tyani mwewo?

PHUNZILANI VINYINJI

Phunzilani chifukwa chake moyo wa mgwilo wa Yesu, uitiwa kuti dipo.

“Kansi nsembe ya Yesu yukata tyani ntchito monga ‘dipo kuli ŵanthu anyinji’?” (Nkhani yapa webisaiti)

Ziŵani vatufunikila kuchita kuti tizapulumuke.

“Kansi Yesu opulumusha tyani?” (Nkhani yapa webisaiti)

Kansi Yehova okhululuka olo machimo akulu-akulu?

“Kuyankha makonsho a m’Baibolo” (Nsanja ya Olonda, 1 May, 2013)

Onani mwamene kuphunzila za nsembe ya Khilisitu mwikwiyavyila munthu muyakine kusintha umunthu wake.

Ninelini soti kapolo wa chiwawa” (Nkhani yapa webisaiti)

1. Kansi ni njila iyakine yotyani yatingawoneshele kutembeja Yehova na Yesu pa vechitichitila?

Baibolo yulonjeza kuti “amene angakhulupilile yove (Yesu)” ankhale na moyo kosasila. (Yohane 3:​16) Koma kansi kunkhala na chikhulupililo kutanthauza chinji? Kutanthauza vinyinji osati kungokhulupilila tyala Yesu. Tingawoneshesoti chikhulupililo pa vosankha vatili navo komasoti pa vinthu vatuchita. (Yakobo 2:​17) Keno tuwonesha m’mawu na m’mvochita vasu kuti tili na chikhulupililo tutang’isha ushamwali wasu na Yesu komasoti Atata ŵake wamene ni Yehova.​—Ŵelengani Yohane 14:21.