MUTU 22
Kansi mwewo mungalalikile tyani uthenga uweme kuli ŵanthu ayakine?
Pofwika pano mwewo mwaphunzila vinyinji vokhuza chendi cha m’Baibolo, payakine mwewo mungaganize kuti, ‘ŵanthu onse enzefunikila kuviziŵa vamene ivi!’ N’chendi kuti onse ofunikila kuziŵa vamene ivi! Olo n’tetyo, mwewo mungaŵe na nsoni kuti mukoujako ŵanthu ayakine vinthu vamuphunzila. M’mutu wamene uyu, tiwone mwamungasilijile wowa wamene uyu nonkhala na chisangalalo poujako ayanu za uthenga uweme.
1. Kansi mwewo mungakwanishe tyani kuujako ayanu vinthu vamuphunzila?
Ophunzila a Yesu enena kuti: “Sewo tingalekelini kulaŵila vinthu vetiwona na kumvwa.” (Machitidwe 4:20) Ove enzekonda ngako choonadi ndipo enzefuna kuujako ayawo mwangakwanishile. Kansi mwewo namwe mulimvwa teti? Keno n’tetyo, fwanani mpata uweme wolaŵilako na abanja ŵanu olo azishamwali ŵanu za vinthu vamuphunzila.—Ŵelengani Akolose 4:6.
Maganizo ayakine
Keno mulaŵila na wa m’banja mwanu, payakine mungayambe kukambilana mfundo za m’Baibolo na mawu akuti: “Newo naphunzilako chinthu chofunika ngako ino sondo.”
Muwonesheni lemba ya m’Baibolo yamene ingamutonthoje shamwali wanu olwala olo wamene ali na nkhaŵa ngako.
Ayanu akuntchito akakukonshani mwauyendela moyo wanu, mungaŵaujeko vamwaphunzila pa phunzilo yanu ya Baibolo olo pamisonkhano yampingo.
Mungaŵawoneshe webisaiti yasu ya jw.org azishamwali ŵanu.
Mungamutumijile linki kuti mukokonkhana naye pa phunzilo ya Baibolo, olo yayi mungamuwoneshe mwangasengele phunzilo ya Baibolo pa webisaiti yasu ya jw.org.
2. Ndaŵa yanji n’chinthu chofunika ngako kulalikila pamozi na mpingo?
Ophunzila a Yesu echita vinyinji polalikila uthenga uweme ku ŵanthu ŵenzeziŵa. Yesu “etumija ophunzila ŵake aŵili-aŵili kuti akalalikile m’tauni na mmalo aliwonse ŵati akafwikeko yove.” (Luka 10:1) Ivi vipasa mwayi ŵanthu anyinji kuti aziŵe uthenga uweme. Komasoti, kulalikila pamozi na ayawo kwenzeŵaletela chisangalalo. (Luka 10:17) Kansi namwe mungafune kuti mukolalikila pamozi na mpingo?
VATI TIPHUNZILE
Tiphunzile mwamungasilijile wowa polalikila nonkhala na chisangalalo pokata ntchito yamene iyi.
3. Yehova ankhale ku mbali yanu
Ayakine amene ofuna kulalikila, payakine angodela nkhaŵa vangaŵaganizile ayawo komasoti mwangalondelele uthenga wawo.
Kansi mwewo muchita wowa mukafuna kuujako ayanu za vinthu vamuphunzila? Ndaŵa yanji?
Lolelani VIDIYO, ndipo pavuli pake mukambilane konsho iyi.
Kansi alumbwana amene aŵa a Mboni za Yehova esilija tyani wowa wawo?
Ŵelengani Yesaya 41:10, ndipo pavuli pake mukambilane konsho iyi:
Kansi pemphelo ingakuyavyeni tyani keno mukumvwa wowa wolalikila?
Kansi mwewo muziŵa?
Anyinji amene ni a Mboni za Yehova masiku ŵano, enzeganiza kuti angakwanishelini kulalikila uthenga uweme. Tiyeni tiwone chisanzo cha m’bale muyakine oitiwa kuti Sergey, yove enzelimvwa kuti ni watyala-tyala ndipo kulaŵila na ŵanthu ayakine yenze vuto ikulu. Koma pavuli pake echizayamba kuphunzila Baibolo. Yove onena kuti: “Olo kuti nenze na wowa, niyamba kuujako ŵanthu vinthu venenzephunzila. Mosayembekezeleka, kulaŵila na ŵanthu vokhuza Baibolo kwikulisha chisangalalo changu. Komasoti kwitang’isha chiphunziso chamene ichi chanyowani muntima mwangu.”
4. Nkhalani aulemu
Mukayamba kulaŵila uthenga uweme kuli ayakine, mwaoganizila osati tyala pa vati mulaŵile koma mwaoganizilasoti mwamungavilaŵilile. Ŵelengani 2 Timoteyo 2:24 na 1 Petulo 3:15, ndipo pavuli pake mukambilane makonsho aŵa:
Kansi mungakatishile tyani ntchito mavesi amene aŵa mukayamba kulaŵila na ŵanthu ayakine za uthenga uweme?
Kansi mwewo mungachite tyani keno abanja ŵanu olo azishamwali ŵanu okatijanalini namwe? Ndipo mwewo mufunikalini kuchita chinji?
Kansi chingaŵe chiweme n’chinji, kulaŵila nawo mwaulemu kapena kuŵakakamija kuti akovomekejana na mwewo? Ndaŵa yanji?
5. Kulaŵila na ŵanthu ayakine za uthenga uweme kungatiletele chisangalalo
Yehova epasa Yesu ntchito yolalikila uthenga uweme. Kansi Yesu enzeiwona tyani ntchito yamene iyi? Ŵelengani Yohane 4:34, ndipo pavuli pake mukambilane makonsho aŵa:
Mmalo mwakuti tikonkhala tyala na moyo, kulya kutichitisha kunkhala osangalala. Ndaŵa yanji Yesu elinganija kuchita chifunilo cha Mulungu—monga kulalikila uthenga uweme—na chakulya?
Ndaŵa yanji mwewo muganiza kuti kulalikila uthenga uweme kuleta chisangalalo?
Vamungachite
Pamisonkhano ya nkati mwa sondo, mukankhale tchelu kuti mukaphunzile mwamungalalikilile uthenga uweme kuli ŵanthu ayakine.
Konzekelani luweme kuti mukakwanishe kupelekako ndemanga pamisonkhano ya nkati mwa sondo. Kulembeshako mu sikulu kungakuyavyeni mwewo kunkhala wotang’a ntima kulaŵilako na ayanu za vinthu vamuphunzila.
Katishilani ntchito mbali yakuti “Ŵanthu ayakine onena kuti” olo “Ŵanthu ayakine angakukonsheni kuti” kuti mukonzekele mwamungayankhile makonsho ayakine komasoti vamunganene keno munthu okatijanalini na vamwanena mwewo..
ŴANTHU AYAKINE ANGAKUKONSHENI KUTI: “Kansi vinthu vukuyendelani tyani ayasu?”
Kansi mungakatishile tyani ntchito mpata wamene uyu kuti muujeko muyanu za vinthu vamwaphunzila m’Baibolo?
MFUNDO ZACHIDULE
Kulaŵila za uthenga uweme na ŵanthu ayakine kuleta chisangalalo, ndipo n’kosavuta kusiyana na mwamuganizila mwewo.
Makonsho oweleja
Ndaŵa yanji tulaŵila uthenga uweme na ŵanthu ayakine?
Kansi mungakwanishe tyani kuchita vamene ivi mwaulemu?
Kansi mungasilije tyani wowa wolalikila uthenga uweme?
PHUNZILANI VINYINJI
Onani njila 4 zosavuta zolaŵilila uthenga uweme pokatishila ntchito kakhadi koziŵishila ŵanthu za jw.org.
Ziŵani minkhalidwe 4 yamene ingakuyavyeni kuti mukokwanisha kulalikila uthenga uweme.
“Kansi mwewo nimwe okonzeka kukata ntchito yokasha ŵanthu?” (Nsanja ya Olonda ya September 2020)
Onani mwamene chisanzo chamene ichi cha m’Baibolo mwachingatiyavyile kunkhala otang’a ntima polalikila uthenga uweme, olo nise achilumbwana.
Phunzilani mwamungalaŵilile nkhani za m’Baibolo na abanja ŵanu amene oziŵalini Yehova.
“Kansi tingaŵayavye tyani enekwasu amene ni Mbonilini?” (Nsanja ya Olonda ya 15 March, 2014)