MUTU 59
Nivokwanishika kupilila keno ayakine okutamanishani
Ŵanthu payakine angayambe kutitamanisha olo kutishusha na cholinga chakuti tileke kutumikila Yehova. Lomba kansi vamene ivi vufunika kutidabwisha?
1. Ndaŵa yanji tufunika kuyembekezela kuti ŵanthu angayambe kutitamanisha?
Baibolo yunena kuti “Onse ofuna kunkhala na moyo wolipeleka kwa Mulungu mwa Khilisitu Yesu, nawosoti azatamanishiwe.” (2 Timoteyo 3:12) Yesu etamanishiwa chifukwa enzelini mbali ya chalo cha Satana. Sewo nase tililini mbali ya ichi chalo cha Satana, tetyo tudabwalini maboma komasoti vipembezo va umu n’chalo vikotitamanisha.—Yohane 15:18, 19.
2. Ni chinji chingatiyavye kukonzekela chinzunzo?
Tufunika kuyamba lomba teti kudalila ngako Yehova. Nsiku iliyonse tikopatula nthawe yopemphela kuli yove komasoti kuŵelenga mawu ŵake. Tufunikilasoti kuchita nawo misonkhano ya mpingo nthawe zonse. Vinthu vamene ivi vingakuyavyeni kuti osati mufoke mukayamba kukumana na mayeselo olo ofumila kuli ŵanthu a m’banja mwanu. Ntumwi Paulo wamene nthawe zinyinji enzetamanishiwa elemba kuti: “Yehova niye nthandizi wangu. Nizayopelini.”—Aheberi 13:6.
Tingakonzekelesoti chinzunzo tikoyeja-yeja kulalikila nthawe zonse. Kulalikila kutiyavya kuti tikokhulupilila ngako Yehova komasoti kuti osati tikoyopa ŵanthu. (Miyambo 29:25) Mukolalikila motang’a ntima palipano, muzavutikelini kupitilija kulalikila boma ikezelesha ntchito yasu.—1 Atesalonika 2:2.
3. Kansi kupilila keno tutamanishiwa kuli na ubwino wotyani?
Ni chendi kuti tusangalalalini patutamanishiwa. Koma, keno tupilila patutamanishiwa chikhulupililo chasu chutang’a ngako. Tunkhala pa ushamwali wotang’a ngako na Yehova chifukwa pa nthawe yatuwona kuti tingakwanishelini kupilila, yove mpakutiyavya. (Ŵelengani Yakobo 1:2–4.) Yehova akawona kuti tunzunziwa vumuŵaŵangakosoti. Koma yove osangalala akawona kuti tuyeja-yeja kupilila. Baibolo yunena kuti: “Keno mupilila pamuvutika chifukwa chochita vinthu viweme, vamene ivi ni viweme kwa Mulungu.” (1 Petulo 2:20) Tikapitilija kunkhala okhulupilika ŵanthu ayakine akotitamanisha, Yehova azatidalise potipasa moyo wosasila mu chalo mwamene muzaŵevesoti ŵanthu otishusha.—Mateyu 24:13.
VATI TIPHUNZILE
Tiphunzile kuti ni vokwanishika kupilila keno ayakine otitamanisha komasoti tiwone mwati azatidalisile Yehova tikapitilija kunkhala okhulupilika.
4. Ni vokwanishika kupilila mukoshushiwa na ŵanthu a m’banja mwanu
Yesu enzeziŵa luweme kuti ŵanthu ayakine m’banja mwasu azakondwelelini na vosankha vasu vakuti tilambile Yehova. Ŵelengani Mateyu 10:34-36, ndipo pavuli pake mukambilane konsho iyi:
Mokatijana na lemba yamene iyi, kansi achibale ŵasu angachite tyani tikasankha kutumikila Yehova?
Kuti muwone chisanzo cha vamene ivi, lolelani VIDIYO, ndipo pavuli pake mukambilane konsho iyi.
Kansi mungachite tyani keno n’kwanu olo muyanu ofuna kuti muleke kutumikila Yehova?
Ŵelengani Salimo 27:10 na Maliko 10:29, 30. Ndipo pavuli poŵelenga lemba iliyonse, mukambilane konsho iyi:
Kansi lonjezo yamene iyi ingakuyavyeni tyani keno enekwanu olo ayanu okushushani?
5. Osaleka kutumikila Yehova keno mutamanishiwa
Tufunikila kutang’a ntima keno ŵanthu ayakine otitamanisha. Lolelani VIDIYO, ndipo pavuli pake mukambilane konsho iyi.
Kansi visanzo vamuvidiyo yamene iyi vakutang’ishani tyani?
Ŵelengani Machitidwe 5:27-29 na Aheberi 10:24, 25. Ndipo pavuli poŵelenga lemba iliyonse mukambilane konsho iyi:
Ndaŵa yanji tufunika kupitilija kulambila Yehova olo kuti boma itileshe kusonkhana olo kutilesha kukata ntchito yasu yolalikila?
6. Yehova azakuyavyeni kuti mukwanishe kupilila
A Mboni za Yehova amisinkhu yosiyana-siyana pa chalo chonse opitilija kutumikila Yehova mokhulupilika olo kuti otamanishiwa. Kuti muwone vuŵayavya kupilila, lolelani VIDIYO. Ndipo pavuli pake mukambilane konsho iyi:
Muvidiyo yamene iyi, ni chinji chiyavya abale na alongo amene aŵa kuti akwanishe kupilila?
Ŵelengani Aroma 8:35, 37-39 na Afilipi 4:13. Ndipo pavuli poŵelenga lemba iliyonse mukambilane konsho iyi:
Kansi lemba yamene iyi yuwonesha tyani kuti ni vokwanishika kupilila keno mukumana na mayeselo aliwonse?
Ŵelengani Mateyu 5:10-12, ndipo pavuli pake mukambilane konsho iyi:
Ndaŵa yanji mungapitilije mphela kunkhala okondwela panthawe yamutamanishiwa?
Mboni za Yehova mamiliyoni anyinji aliyeleke kutumikila Yehova olo pa nthawe yenzetamanishiwa. Mwewo namwe mungakwanishe!
ŴANTHU AYAKINE ONENA KUTI: “Ningakwanishelini kupilila ayakine akonitamanisha.”
Kansi ni malemba otyani angayavye munthu woteti kuti ankhale wotang’a ntima?
MFUNDO ZACHIDULE
Yehova otembeja khama yatuwonesha olo kuti ayakine otitamanisha. Yove angatipase mphanvu zingatiyavye kupilila.
Makonsho oweleja
Ndaŵa yanji Akhilisitu ofunika kuyembekezela kutamanishiwa?
Kansi mufunika kuchita chinji palipano pokonzekela chinzunzo?
N’chinji chingakuyavyeni kuti osati mwawokaikila kuti mungakwanishe kutumikila mphela Yehova mokhulupilika olo kuti mukumana na mayeselo?
PHUNZILANI VINYINJI
Onani mwamene Yehova mwechiyavyila m’bale muyakine pechikana kuloŵelela mu ndale.
Onani chiyavya ŵanthu a m’banja iyakine kuti akotumikila Yehova mokhulupilika kwa vyaka vinyinji olo kuti enzetamanishiwa.
Etumikila Yehova pa nthawe yamene vinthu venze vechinja (7:11)
Onani vingakuyavyeni kuti mukochita vinthu motang’a ntima mukotamanishiwa.
“Tikokonzekela kuti tizakwanishe kupilila tikezeyamba kutamanishiwa” (Nsanja ya Olonda, July 2019)
Kansi tikochita tyani ŵanthu a m’banja yasu akayamba kutishusha? Lomba tingachite tyani kuti tikochita mphela vinthu mwa ntendele komasoti kuti tipitilije kunkhala okhulupilika kwa Yehova?
“Choonadi ‘chuletalini ntendele koma chibemba’” (Nsanja ya Olonda, October 2017)