Kansi mungachite tyani kuti banja yanu inkhale yosangalala?—Mbali yachiŵili

Ŵana ni mphaso zofumila kwa Mulungu ndipo Yehova ofuna kuti makolo akozisamalila luweme mphaso zamene izi. Yehova opeleka malangizo anzelu amene angathandize makolo kuti akwanishe kuchita vamene ivi. Malangizo ŵake oyavyasoti ŵana kuziŵa vangachite kuti banja ikonkhala yosangalala.

1. Kansi Yehova opeleka malangizo otyani kuli makolo?

Yehova ofuna kuti makolo akokonda ŵana ŵawo komasoti akoyeja-yeja kufwana nthawe yotandala nawo. Yove ofunasoti kuti makolo akoteteza ŵana ŵawo ku vinthu viipa komasoti akokatishila ntchito mfundo za m’Baibolo poŵaphunzisa. (Miyambo 1:8) Yove olangiza azitata kuti: “Muŵalele [ŵana ŵanu] na kuŵaphunzisa kaganizidwe kake [ka Yehova].” (Ŵelengani Aefeso 6:4.) Yehova osangalala makolo akokatishila ntchito malangizo ŵake polela ŵana ŵawo komasoti keno makolo opasalini ŵanthu ayakine udindo wamene uyu wolela ŵana ŵawo.

2. Kansi Yehova opeleka malangizo otyani kuli ŵana?

Yehova olangiza ŵana kuti: “Mukomvwila makolo ŵanu.” (Ŵelengani Akolose 3:20.) Ŵana akolemekeza komasoti kumvwila makolo ŵawo, okondwelesha Yehova komasoti makolo amene awo. (Miyambo 23:22-25) Yesu akalimwana, epeleka chisanzo chiweme ngako pa nkhani yamene iyi. Olo kuti enze wangwilo, yove enzemvwila makolo ŵake noŵalemekeza.—Luka 2:51, 52.

3. Kansi mungachite tyani kuti monse m’banja mwanu munkhale pa ushamwali uweme na Mulungu?

Keno nimwe kolo, ni vosakaikisha kuti mufuna kuti ŵana ŵanu akokonda Yehova monga ni mwamuchitila mwewo. Lomba kansi mungachite tyani kuti vamene ivi vikwanishike? Mukochita vayunena Baibolo. Pala yove yunena kuti: “Ukokhomelela [Mawu a Yehova] mwa ŵana ŵako. Ukolaŵila nawo za mawu amene awo ukankhala pansi mng’anda mwako na poyenda pa nsewu.” (Deuteronomo 6:7) Mawu akuti kukhomelela otanthauza kuphunzisa munthu mfundo iyakine moweleja-weleja. Payakine mukafuna kuyavya ŵana ŵanu kuti osati aluŵe mfundo iyakine, muŵauja mfundo yamene iyo moweleja-weleja. Tetyo mfundo yapa lemba yamene iyi niyakuti, nthawe zonse mufunikila kufwana m’pata wophunzisa ŵana ŵanu vokhuza Yehova. Mungachite luweme ngako kufwanako m’pata sondo iliyonse kuphunzila vokhuza Yehova monga banja. Keno muliye ŵana, kuphunzila mawu a Mulungu sondo iliyonse kungakuyavyeni kuti munkhale pa ushamwali uweme na Yehova.

VATI TIPHUNZILE

4. Mukophunzisa ŵana ŵanu mwachikondi

Kuphunzisa mwana ni ntchitolini ya maseŵela. Koma kansi Baibolo ingakuyavyeni tyani? Ŵelengani Yakobo 1:19, 20, ndipo pavuli pake mukambilane makonsho aŵa:

• Kansi makolo angawoneshe tyani chikondi pakulaŵila na ŵana ŵawo?

• Ndaŵa yanji makolo akakalipa ofunikalini kulangiza ŵana ŵawo pa nthawe yamene iyo?a

5. Mukoteteza ŵana ŵanu

Kuti muteteze ŵana ŵanu, mufunika kufotokozela mwana aliyense nkhani zokhuza kuyonana. Payakine mungachite nsoni kukambilana na ŵana ŵanu nkhani zamene izi. Lolelani VIDIYO, ndipo pavuli pake mukambilane makonsho aŵa.

VIDIYO: Mukoteteza ŵana ŵanu ku vinthu viipa (2:58)

• Ndaŵa yanji makolo ayakine ovutika kukambilana na ŵana ŵawo nkhani zokhuza kuyonana?

• Kansi makolo ayakine okatishila ntchito njila zotyani pofotokozela ŵana ŵawo nkhani zokhuza kuyonana?

Baibolo inenelatu kuti chalo ichi cha Satana chikoipilaipila. Ŵelengani 2 Timoteyo 3:1, 13, ndipo pavuli pake mukambilane konsho iyi:

• Ayakine mwa ŵanthu aipa amene atomolewa mu vesi 13 ochitila ŵana nkhanza zokhuza kuyonana. Lomba kansi ndaŵa yanji makolo ofunika kuphunzisa ŵana ŵawo nkhani zokhuza kuyonana komasoti mwangalitetezele kwa ŵanthu amene ochita nkhanza zamene izi?

Kansi muziŵa?

A Mboni za Yehova ofalisa mabuku na vinthu viyakine voyavya makolo kuti akophunzisa ŵana ŵawo nkhani zokhuza kuyonana komasoti kuti aŵateteze ku ŵanthu amene angafune kuŵachitila nkhanza. Mwachisanzo, onani:

• Tetezani ŵana ŵanu (vidiyo)

• Phunzirani kwa Mphunzitsi Waluso, mutu 10 na 32

• Kuphunzisa mwana wanu nkhani zokhuza kuyonana” (Galamukani! N.° 5 2016)

6. Mukolemekeza makolo ŵanu

VIDIYO: Kansi ningachite tyani kuti nikolaŵijana nawo luweme makolo ŵangu? (2:19)

• Ndaŵa yanji mwana komasoti wachilumbwana ofunika kulaŵila mwaulemu na makolo ŵake?

• Kansi wachilumbwana angawoneshe tyani kuti olemekeza makolo ŵake akolaŵila nawo?

Ŵelengani Miyambo 1:8, ndipo pavuli pake mukambilane konsho iyi:

• Kansi wachilumbwana ofunika kuchita chinji makolo ŵake akomulangiza?

7. Mukofwana nthawe yophunzila Baibolo monga banja

Mabanja a Mboni za Yehova oyeja-yeja kufwana nthawe sondo iliyonse kuti aphunzile pamozi Baibolo. Kansi nivinthu votyani vamungachite pa kulambila kwa pa banja? Lolelani VIDIYO, ndipo pavuli pake mukambilane makonsho aŵa.

VIDIYO: Kulambila kwa pa banja—Mavuto onkhalapo komasoti madaliso ŵake (8:04)

• Kansi banja ingachite tyani kuti ikochita kulambila kwa pa banja sondo iliyonse?

• Kansi kolo ingachite tyani kuti kulambila kwa pa banja kukonkhala kokondwelesha komasoti koyavya?—Onani chithunzi chamene chili kumayambililo kwa mutu uno.

• N’chinji chingachitishe kuti banja yanu ikokangiwa kuphunzila pamozi mawu a Mulungu?

Kale ku Isiraeli, Yehova enzeyembekezela kuti banja iliyonse ikofwana nthawe yokambilana malemba nthawe zonse. Ŵelengani Deuteronomo 6:6, 7, ndipo pavuli pake mukambilane konsho iyi:

• Kansi mungaikatishile tyani ntchito mfundo yamulemba yamene iyi?

Vamungachite pa kulambila kwa pa banja:

• Kukonzekela misonkhano ya mpingo.

• Kuŵelenga komasoti kukambilana nkhani ya m’Baibolo yamene ingakondweleshe banja yanu.

• Keno muli na ŵana atontho-atontho, selushani olo lembani vati achite pa jw.org.

• Keno ŵana ŵanu ni achilumbwana kambilanani nawo nkhani yokhuza achilumbwana yapa jw.org.

• Kuchita sewelo ya nkhani ya m’Baibolo pamozi na ŵana ŵanu.

• Kulolela nokambilana vidiyo yapa jw.org.

MFUNDO ZACHIDULE

Yehova ofuna kuti makolo akokonda ŵana ŵawo, kuŵaphunzisa, komasoti kuŵateteza. Yove ofuna kuti ŵana akolemekeza nomvwila makolo ŵawo komasoti banja yonse ikomulambila mokatijana.

Makonsho oweleja

• Kansi makolo angachite tyani kuti aphunzise komasoti kuteteza ŵana ŵawo?

• Kansi ŵana angawoneshe tyani kuti olemekeza makolo ŵawo?

• Kansi banja ingapindule tyani ikofwana nthawe yolambila pamozi sondo iliyonse?

PHUZILANI VINYINJI

Kansi ni minkhalidwe yotyani ingayavye mwana wanu kuti akule luweme?

“Minkhalidwe 6 yamufunikila kuphunzisa ŵana ŵanu” (Galamukani! N.° 2 2019)

Onani malangizo ŵayupeleka Baibolo kwa ŵanthu amene osamalila achikulile.

“Kansi Baibolo yunena votyani pa nkhani yosamalila makolo achikulile?” (Nkhani yapa webisaiti)

Onani chamene chiyavya tata wamene anzeziŵalini mwangalelele ŵana kuti ankhale tata muweme.

Yehova eniphunzisa kulela luweme ŵana (5:58)

Onani vingayavye makolo kuti akokatijana ngako na ŵana ŵawo analume.

“Kansi tata angachite tyani kuti akokatijana ngako na mwana wake mwanalume?” (Nsanja ya Olonda, 1 November, 2011)