Kansi mungachite tyani kuti Mulungu akomvwishila mapemphelo ŵanu?
Yehova Mulungu ni “wakumvwa pemphelo.” (Salimo 65:2) Tingalaŵile naye kulikonse nthawe iliyonse, mokuwa, olo chamuntima. Yehova ofuna kuti tikomutomola kuti “Atata,” ndipo yove ni tata muweme ngako kupambana aliyense. (Mateyo 6:9) Pakuti Yehova ni tata wachikondi, yove otiphunzisa mwatingachitile kuti akomvwishila mapemphelo ŵasu.
TIKOPEMPHELA KWA YEHOVA MULUNGU KUPITILA MU ZINA YA YESU
“Keno musenga chilichonse kwa Atata mu zina yangu, azakupaseni.”—Yohani 16:23.
Mawu a Yesu amene aŵa owonesha kuti Yehova ofuna kuti sewo tikopemphela kuli yove kupitila mu zina ya Yesu Khilisitu, osati kupitila m’mafano, mwa ŵanthu atuŵa ntima, angelo olo kuli makolo ŵasu amene echifwa kale-kale. Tikopemphela kwa Mulungu kupitila mu zina ya Yesu tuwonesha kuti tuzindikila za udindo wofunika ngako walinawo Yesu. Yove enena kuti “Paliye wamene ofwika kwa Atata osapitila muli newo.”—Yohani 14:6.
MUKOLAŴILA KUFUMILA MUNTIMA
“Mukhutulileni vamuntima mwanu.”—Salimo 62:8.
Tikopemphela kwa Yehova tufunika kulaŵila monga kuti tulaŵila na Atata ŵasu achikondi. M’malo mochita kuŵelenga pemphelo yasu m’buku, olo kungolaŵila mawu ŵatadjaila kale tufunika kulaŵila naye mwaulemu komasoti kufumila muntima.
MUKOPEMPHELA MOKATIJANA NA VAKUFUNA MULUNGU
“Chilichonse chatingamusenge mokatijana na chifunilo chake otimvwisha.”—1 Yohani 5:14.
Yehova otiuja vati azatichitile komasoti vakufuna kuti tikomuchitila, kupitila m’Baibolo. Kuti mapemphelo ŵasu akonkhala ovomelejeka kwa Mulungu tufunika kusenga “mokatijana na chifunilo chake.” Kuti tikwanishe kuchita vamene ivi tufunika kuphunzila Baibolo na cholinga chakuti timuziŵe luweme. Tikachita vamene ivi mapemphelo ŵasu azamukondweshe.
KANSI TINGAPEMPHELELE VINTHU VOTYANI?
Tingasenge kuti atipase vatufunikila. Tingasenge Mulungu kuti akotiyavya kufwana vofunika pa moyo monga vakulya, vovwala, komasoti malo onkhala. Tingamusenge soti kuti atipase nzelu zosankha luweme vochita olo mphamvu zakuti tikwanishe kupilila mavuto. Tingamusenge soti kuti atiyavye kunkhala na chikhulupililo, atikhululukile olo kuti atiyavye pa mavuto ŵasu.—Luka 11:3, 4, 13; Yakobo 1:5, 17.
Tikopemphelela ŵanthu ayakine. Makolo achikondi osangalala keno ŵana ŵawo okondana. Naye soti Yehova ofuna kuti nawo ŵana ŵake pano pachalo akokondana. Tingachite luweme kupemphelela mwanalume olo mwanakazi wasu, ŵana ŵasu, achibale ŵasu olosoti azishamwali. Yakobo elemba kuti: “Mukopemphelelana.”—Yakobo 5:16.
Tikotembeja. Ponena za Nyamalenga wasu, Baibolo yunena kuti: “Echita viweme. Ekupasani mvula kufumila kululu na nyengo yamene voweja vanu vunkhala vinyinji. Ezuja mitima yanu na chakulya komasoti chisangalalo.” (Machitidwe 14:17) Tikoganizila vinthu vonse vawatichitila Mulungu tufunishisha kumutembeja kufumila mpemphelo. Tuwonesha soti kuti tutembeja vawatichitila Mulungu tikomvwila malamulo ŵake.—Akolose 3:15.
TIKONKHALA OLEZA NTIMA NOPITILIJA KUPEMPHELA
Nthawe ziyakine tingakhumudwe chifukwa chakuti mapemphelo ŵasu amuntima aliye yankhiwe mokulumija. Vikankhala tetyo, kansi tingaganize kuti Mulungu aliye nase chidwi? Yayi. Ganizilani visanzo vokonkhapo vamene vuwonesha kuti tufunika kupitilija kupemphela.
Steve, watatomola mu nkhani yoyamba enena kuti: “Pemphelo niye yuniyavya kuti osati nikotaya ntima.” Kansi nchinji chemuyavya kuchinja? Yove eyamba kuphunzila Baibolo ndipo ezindikila kufunika kopemphela mosalekeja, ndipo echiti: “Nupemphela kwa Mulungu potembeja chifukwa cha vanichitila ayangu poniyavya mwachikondi. “Pali pano nine wosangalala ngako kupambana kale.”
Lomba tyani za Jenny, wamene enzeganiza kuti niwosayenelela kuti Mulungu akomumvwishila mapemphelo ŵake? Yove enena kuti: “Panthawe yenenzelimvwa kuti nine watyala-tyala nisenga Mulungu kuti aniyavye kuziŵa chifukwa chake nenzekumvwa tetyo.” Kansi vamene ivi vemuyavya tyani? Jenny enena kuti: “Kulaŵila na Mulungu kwaniyavya kuwona vinthu moyenelela nozindikila kuti olo ntima wangu unishusha, Mulungu ochita lini vamene ivo. Waniyavya soti kuti osati nitaye ntima koma kuti nipitilije kuchita vaningakwanishe.” Enena soti kuti “Pemphelo yaniyayva kuwona kuti Yehova ni Mulungu wachikondi, atata ŵangu komasoti muyangu ngaye-ngaye, ndipo nthawe zonse akoniyavya keno newo nuyeja-yeja kuchita vakufuna yove.”
“Isabel elaŵila kuti akawona mwana wake Gerard osangalala na moyo olo kuti ni wolemala ozindikila kuti Yehova eyankha mapemphelo ŵake kupitila muli yove
Chisanzo chiyakine ni cha Isabel. Penze woyembekezela madokota emuuja kuti mwana wake azavyalike ali wolemala. Yove ekhumudwa ngako. Ndipo ŵanthu ayakine emuuja kuti achose vumo yamene iyo. Yove enena kuti: “Nechimvwa monga kuti ninifwe ndaŵa yakumvwa kuŵaŵa muntima mwangu.” Lomba kansi echita tyani? Yove enena kuti: “Nenzengonkhalila kupemphela kwa Yehova kuti aniyavye.” Pepapita nthawe evyala mwana munalume zina yake Gerard, ndipo enze chendi wolemala. Kansi Isabel owona kuti Mulungu eyankha mapemphelo ŵake? Eye. Kansi ndaŵa yanji owona teti? Isabel enena kuti: “Nenzewona mwana wangu wamene pali pano ali na vyaka 14 ndipo osangalala na moyo olo kuti niwolemala, nezindikila kuti Yehova eyankha mapemphelo ŵangu kupitila muli yove. Nulaŵila tetyo chifukwa nuwona kuti mwana wamene uyo ni daliso ikulu ngako yechinipasa Yehova Mulungu.”
Mawu ofumila pansi pa ntima monga ni amene aŵa otikumbusha za wolemba masalimo muyakine yove enena kuti: “Muzamvwe kupapatila kwa ŵanthu ofasa mwewo Yehova. Muzakonzekeleshe mitima yawo, muzateye kwatu yanu.” (Salimo 10:17) Vamene ivi ni vifukwa vomvwika votichitisha kupemphela mosalekeja!
M’Baibolo muli mapemphelo anyinji a Yesu. Koma pemphelo iweme ngako ni yophunzisa ophunzila ŵake. Kansi tuphunzila chinji pa pemphelo yamene iyi?