Kuwamyasoti ushamwali wanu na Yehova

CHAKA chilichonse, mbelele zinyinji zantengo wapatali zujoshelewa mumpingo. Ganizilani “chisangalalo chikulu” chamene chunkhala kululu munthu muyakine akajokela kwa Yehova! (Lk. 15:7, 10) Keno mwewo mwajoshelewa, osakaikila kuti Yesu, angelo komasoti Yehova osangalala ngako kukuwonani kuti mwayambasoti kunkhala ku mbali ya chonadi. Olo n’tetyo, pamuyeja-yeja kuwamyasoti ushamwali wanu na Yehova mungakumane na mavuto. Kansi ayakine mwa mwavuto amene awo ni otyani, lomba n’chinji chingakuyavyeni?

KANSI MAVUTO ŴAKE NI OTYANI?

Pavuli pojoshelewa mumpingo, anyinji olimbana mphela na maganizo ophoniyeka. Payakine mumvwisha mwenzemvwila Mfumu Davide. Olo pavuli pokhululukiliwa machimo ŵake yove enena kuti: “Vophoniya vangu vanikulila.” (Sal. 40:12; 65:3) Munthu akajokela kwa Yehova, payakine angapitilije kuliimba mulandu olo kuchita nsoni kwa vyaka vinyinji. Isabelle, enkhala wochosewa kwa vyaka 20.a Yove enena kuti, “Venzenivuta kuvomekeja kuti Yehova enikhululukila.” Keno munthu ali na maganizo ofokesha, n’vosavuta kuti ankhalesoti wofoka mwauzimu. (Miy. 24:10) Osalola kuti vamene ivi vikuchitikileni.

Ayakine odela nkhaŵa kuti akwanishelini kuchita vonse vakufunikila kuti ankhalesoti pa ushamwali uweme na Yehova. Pechijoshelewa, Antoine enena kuti, “Nenzewona kuti niluŵa vinthu vinyinji venenzechita penenze nikali wa Mboni.” Chifukwa cha vamene ivi, ayakine vingaŵavute kuti ayambesoti kuchita vonse vangakwanishe potumikila Yehova.

Mwachisanzo, munthu muyakine wamene ng’anda yake yawonongeka ngako na chimphepo champhamvu, angowona kuti pofunika nthawe komasoti mphamvu zinyinji kuti aimangesoti. Molingana na vamene ivi, keno ushamwali wanu na Yehova wawonongeka chifukwa chochita chimo ikulu, mungowona kuti pofunika kuchita khama ngako kuti muujoshele. Koma mwewo mungayavyiwe kuchita vamene ivi.

Yehova otiuja kuti: “Welani lomba mwewo mwaŵanthu. Tiyeni tikambilane ndipo newo nikuyavyeni kuti munkhalesoti pa ushamwali uweme na newo.” (Yes. 1:18) Mwewo mwachita kale vinyinji kuti “munkhalesoti pa ushamwali uweme” na Yehova. Yove okukondani mwewo chifukwa chakuti muyeja-yeja kuchita vamene ivi. Ganizilani, mwewo mwamupasa yankho yakuti akopeleka kwa Satana wamene omunyoza!—Miy. 27:11.

Kujokela kwa Yehova kwakuyavyani kuti mumuvwendelele, ndipo yove naye olonjeza kuti akuvwendeleleni. (Yak. 4:8) Olo n’tetyo, pofunika vinyinji kupambana kungoziŵika kuti mwajoshelewa mumpingo. Mufunika kukulisha chikondi chanu kwa Yehova, wamene ni Atata ŵanu komasoti Nshamwali wanu. Kansi mungachite tyani vamene ivi?

MUKOLIIKILA VOLINGA VAMENE MUNGAVIKWANILISHE

Mukoyeja-yeka kuliikila volinga vamene mungavikwanilishe. Vingachitike kuti mukumbukila mfundo zoyambilila—zemwiphunzila zokhuza Yehova—na malonjezo ŵake akusogolo. Komalomba mwewo mufunikasoti kuchita vinthu vokhuza kulambila nthawe zonse, mwachisanzo, kulalikila uthenga uweme monkhazikika, kuluta kumisonkhano komasoti kutola nthawe ikulu muli pamozi na abale na alongo ŵanu. Ganizilani volinga ivi vokonkhapo.

Mukolaŵila na Yehova pafupi-pafupi. Atata ŵanu oziŵa kuti keno mukungoliimba mulandu nthawe zonse, vingankhale vovuta kuti mukopemphela kuli yove. (Aro. 8:26) Olo n’tetyo, “limbikilani kupemphela” ndipo mukomuuja Yehova kuti mufunishisha kunkhalasoti naye pa ushamwali. (Aro. 12:12) Andrej, enena kuti: “Newo nenzeliimba mulandu ngako ndipo nenzechita nsoni. Koma nthawe iliyonse yanapemphela, nenzekumvwa luweme komasoti nenzefwana ntendele wamuntima.” Keno mwewo muziŵalini vamungatomole popemphela, mukoganizila mapemphelo a Mfumu Davide owonesha kulapa, amene opezeka mu Salimo 51 na 65.

Mukophunzila Baibolo nthawe zonse. Kuchita vamene ivi kungakuyavyeni kuti munkhale na chikhulupililo chotang’a komasoti kuti mukokonda ngako Yehova. (Sal. 19:7-11) Felipe, enena kuti: “Chichitisha kuti poyamba nifoke ni kukhumudwisa Yehova, na kusankhala na pulogilamu yoŵelenga nophunzila Baibolo paneka. Newo nenzefunalini kumukhumudwisasoti, tetyo niwoneshesha kuti nikophunzila Baibolo paneka nthawe zonse.” Mwewo namwe mungochitasoti chimozi-mozi. Keno mufuna kuziŵa mwamungasankhile nkhani zakuti mukophunzila pamweka, mungasenge muyanu wotang’a mwauzimu kuti akuyavyeni.

Mukoyeja-yeja kuti muyambesoti kukatijana na abale ŵanu komasoti alongo. Ŵanthu ayakine amene ajoshelewa odela nkhaŵa ngako kuti payakine abale na alongo alikalipe nawo. Larissa, enena kuti: “Newo nenzechita nsoni ngako. Nenzewona kuti nikhumudwisa abale ŵangu komasoti alongo. Nivutika na maganizo amene aŵa kwa nthawe itali.” Ziŵani kuti akulu pamozi na Akhilisitu ayakine otang’a ofunishisha kukuyavyani kuti muwamyesoti ushamwali wanu na Yehova. (Onani bokosi yakuti, “Kansi akulu angachite votyani?”) Ove osangalala kuti mwijokela mumpingo ndipo ofuna kuti vinthu vikokuyendelani luweme!—Miy. 17:17.

Kansi n’chinji chingakuyavyeni kuti muyambesoti kukatijana na Akhilisitu ayanu? Mukochitako vonse vakuchita abale ŵanu komasoti alongo —monga kupezeka pamisonkhano komasoti kulalikila nthawe zonse. Kansi vamene ivi vingakuyavyeni tyani? Felix, enena kuti: “Abale na alongo enzefunishisha kuti nijokele mumpingo, tetyo niwona kuti onikonda. Ove eniyavya kuti nikolimvwa kuti najokelasoti m’banja ya Yehova, kuti yove enikhululukila komasoti kuti ningapitilije kumutumikila.”—Onani bokosi yakuti, “Kansi mungachite votyani?”

OSAFOKA!

Satana apitilije kukutumijilani “mavuto” anyinji na cholinga chakuti akufokesheni pamuwamyasoti ushamwali wanu na Yehova. (Lk. 4:13) Tetyo, konzekelani palipano poyeja-yeja kutang’isha ushamwali wanu na Yehova.

Ponena za mbelele zake, Yehova olonjeza kuti: “Mbelele zotaika nizazisakile-sakile, zomwajika nizazijoshe. Yotyoka kwendo nizaimange kwendo yamene iyo yotyoka. Yulwala nizaitang’ishe.” (Eze. 34:16) Yehova wayavya ŵanthu anyinji kunkhalasoti naye pa ushamwali. Tetyo, osakaikila kuti yove ofunishisha kukuyavyani namwe kuti mupitilije kunkhala naye pa ushamwali wotang’a ngako.