Kansi buku ya Chivumbulutso yufotokoza chinji vokhuza sogolo yanu?

1. Kansi ni chosankha chofunika chotyani chakufunika kupanga ŵanthu onse?

ŴANTHU masiku ŵano ali na chosankha chofunika ngako chakufunika kupanga. Kansi ove asankhe kunkhala kumbali ya Yehova monga Wolamulila wa chalo chonse, olo asankhe kunkhala kumbali ya Satana Mdyelekezi, wamene ni mdani muipa wa Mulungu? Aliyense ofunika kusankha mbali imozi osati kungokhala teti aliye mbali. Vinthu vangasankhe aliyense niye vingasimikijile keno angazapulumuka olo yayi. (Mt. 25:31-33, 46) Nkati mwa “chisauso chikulu,” ove azadindiwe chidindo cha kupulumuka olo cha chiwonongeko.—Chiv. 7:14; 14:9-11; Eze. 9:4, 6.

2. (a) Kansi lemba ya Aheberi 10:35-39 yutilimbikisa kuchita chinji? (b) Kansi buku ya Chivumbulutso ingatiyavye tyani?

² Ŵelengani Aheberi 10:35-39. Keno mwewo mwisankha kunkhala kumbali ya ulamulilo wa Yehova, mwisankha mwanzelu. Lomba mwewo mufunika kuyavya ayakine kuti apange chosankha chiweme. Kuti vamene ivi vikwanishike, mufunika kukatishila ntchito mfundo za m’buku ya Chivumbulutso kuti muŵayavye. Buku yochitisha chidwi yamene iyi, yufotokoza vikuti vizachitikile ŵanthu amene oshushana na Yehova, koma yufotokozasoti vokhuza madaliso ŵakuti azalondele ŵala emene osankha kunkhala kumbali ya ulamulilo wake. Tingachite bwino ngako kuphunzila vinthu vamene ivi vofunika. Kuchita vamene ivi kutiyavye kuti tinkhale ofunishisha kupitilija kutumikila Yehova. Kuyangijila pamene apa, tingakatishile ntchito vinthu vatuphunzila kuti tiyavye ŵanthu ayakine kuti apange chosankha chiweme nochikwanilisha.

3. Kansi tikambilane chinji mu nkhani ino?

³ Mu nkhani ino, tikambilane makonsho akuti: Kansi n’chinji chikuti chizachitikile ŵala amene osankha kunkhala kumbali ya ulamulilo wa Mulungu? Lomba kansi n’chinji chikuti chizachitikile ŵala amene osankha kunkhala kumbali ya ulamulilo wa chinyama chisweta ngako, chufotokozewa m’buku ya Chivumbulutso?

KANSI N’CHINJI CHIKUTI CHIZACHITIKILE ŴANTHU AMENE NI OKHULUPILIKA KWA YEHOVA?

4. Kansi Yohane owona gulu yotyani yamene ilipaname pamozi na Yesu kululu?

⁴ Mmensomphenya, Yohane owona magulu aŵili, amene osankha kunkhala kumbali ya ulamulilo wa Yehova ndipo olondela madaliso a moyo wosasila. Gulu yoyamba ni ya a 144.000. (Chiv. 7:4) Ove otolewa kufumila pachalo na kuyapanga boma, kapena kuti Ufumu pamozi na Yesu kululu. Yove owona Yesu pamozi na a 144.000 olamulila pachalo. (Chiv. 5:9, 10; 14:3, 4) Mmensophenya amene awo, Yohane oŵawona alipaname pamozi na Yesu pa Lupili ya Ziyoni kululu.—Chiv. 14:1.

5. Kansi n’chinji chikuti chizachitikile osala a 144.000 kwalombapano?

⁵ Kufumila mu nthawe ya atumwi mpaka pano, ŵanthu masauzande anyinji ankhala osankhiwa kuti ankhale mu gulu ya a 144.000. (Lk. 12:32; Aro. 8:17) Olo n’tetyo, Yohane oujiwa kuti ŵanthu tyala atontho, kapena kuti ŵanthu oŵelengeka, azankhale na moyo pano pachalo mmasiku osilijila. “Osala” amene aŵa azalondele “chidindo” chawo chosilijila chakuti avomelejewa na Yehova, chisauso chikulu chikaliyeyamba. (Chiv. 7:2, 3; 12:17) Pavuli pake, nkati mwa chisauso chikulu, osala amene aŵa azatolewe noluta kululu kuti akankhale pamozi na a 144.000, amene emwalila kale ali okhulupilika. Ove akalamulile na Yesu mu Ufumu wa Mulungu.—Mt. 24:31; Chiv. 5:9, 10.

6–7. (a) Kansi Yohane echizawonasoti gulu yotyani, ndipo sewo tuphunzilapo chinji? (b) Ndaŵa yanji osala na a “gulu ikulu” ofunika kuchita chidwi na vinthu vufotokozewa m’buku ya Chivumbulutso chapitala 7?

⁶ Pavuli pakuti wawona gulu ya kululu mmensomphenya ŵake, Yohane owonasoti, “gulu ikulu.” Mosiyana na a 144.000, Baibolo yunenalini kuti ŵanthu ali mu gulu yamene iyi ni angani. (Chiv. 7:9, 10) Kansi tupunzilapo chinji vokhuza gulu yamene iyi? Yohane oujiwa kuti: “Amene aŵa niye afuma mu chisauso chikulu ndipo achapa mikanjo yawo mmilopa ya mwana wa Mbelele.” (Chiv. 7:14) Pavuli pakuti apulumuka pa chisauso chikulu, a “gulu ikulu” amene aŵa azankhale pano pachalo nosangalala na madaliso aweme.—Sal. 37:9-11, 27-29; Miy. 2:21, 22; Chiv. 7:16, 17.

⁷ Keno sewo tisankhiwa kuti tizalute kululu olo kuzankhala pano pachalo, kansi tukwanisha kuyelekezela kuti tilimo mu vinthu vufotokozewa mu chapitala 7 cha buku ya Chivumbulutso? Tufunika kuchita tetyo. Yamene iyi izankhale nthawe yokondwelesha ngako kuli magulu onse aŵili ŵa atumiki a Mulungu! Tizasangalale ngako kuwona kuti tisankha kunkhala kumbali ya ulamulilo wa Yehova. Kansi buku ya Chivumbulutso yutiujasoti vinthu votyani vokhuza chisauso chikulu?—Mt. 24:21.

KANSI N’CHINJI CHIKUTI CHIZACHITIKILE ŴANTHU AMENE OSHUSHANA NA MULUNGU?

8. Kansi chisauso chikulu chizayambe tyani, ndipo ŵanthu anyinji azakhuziwe tyani?

⁸ Mu nkhani yapita, tiphunzila kuti lombapano magulu andale a pachalo azaukile Babulo Nkulu, wamene ni ufumu ukulu wa pachalo chonse wa chipembezo chawenye. (Chiv. 17:16, 17) Vamene ivi vikezechitika, chizankhale chiyambi cha chisauso chikulu. Kansi vamene ivi vizachitishe kuti ŵanthu anyinji ayambe kulambila Yehova? Yayi. Mosiyana na vamene ivi, buku ya Chivumbulutso chapitala 6, yuwonesha kuti pa nthawe yovuta yamene iyo ŵanthu asatumikila Yehova, azasakile chitetezo kuli magulu andale na amalonda a chino chalo, amene olinganijiwa na malupili. Pakuti ŵanthu amene aŵa aliyenkhale kumbali ya Ufumu wa Mulungu, Yehova azaŵawone kuti ni ŵanthu oshusha.—Lk. 11:23; Chiv. 6:15-17.

9. Kansi ŵanthu a Yehova azankhale osiyana tyani na ŵanthu ayakine pa chisauso chikulu, ndipo vokonkhapo vake vizankhale votyani?

⁹ Kulaŵila chendi, atumiki okhulupilika a Yehova azankhale osiyana ngako na ŵanthu amene aŵa pa nthawe yovuta ya chisauso chikulu. Ove azankhale gulu imozi ya ŵanthu amene akuti azatumikile Mulungu pachalo nokana kunkhala kumbali ya “chinyama.” (Chiv. 13:14-17) Chifukwa chakuti ove azankhale okhulupilika kwa Yehova, adani a Mulungu azakalipe ngako. Chifukwa cha vamene ivi, gulu ya amitundu izaukile ŵanthu a Mulungu pa chalo chonse. Kuchita vinthu mwaukali kwamene uku, Baibolo yufotokoza kuti ni kuukila kwa Gogi waku chalo cha Magogi.—Eze. 38:14-16.

10. Monga mwayufotokozela lemba ya Chivumbulutso 19:19-21, kansi Yehova azachite chinji na kuukiliwa kwa ŵanthu ŵake?

¹⁰ Kansi Yehova azachite chinji na kuukila koyofya kwamene uku? Yove otiuja kuti: “Ukali wangu uzafumile m’mphuno mwangu.” (Eze. 38:18, 21-23) Buku ya Chivumbulutso chapitala 19, yufotokoza vinthu vikuti vizachitike pavuli pake. Yehova otumija Mwana Wake kuti akateteze ŵanthu Ŵake nogonjesa adani ŵawo. Pa kuukila kwamene uku, Yesu azankhale na “magulu ankhondo a kululu”—amene ni angelo okhulupilika pamozi na a 144.000. (Chiv. 17:14; 19:11-15) Kansi vokonkhapo va nkhondo yamene iyi vizankhale votyani? Ŵanthu onse pamozi na magulu oshushana na Yehova azawonongewe mpaka kale-kale!—Ŵelengani Chivumbulutso 19:19-21.

UKWATI UKUTI UZACHITIKE PAVULI PA NKHONDO

11. Kansi ni chochitika chotyani chokondwelesha ngako chufotokozewa m’buku ya Chivumbulutso?

¹¹ Yejani kuganizila mwakuti azamvwile ŵanthu okhulupilika akazapulumuka pa chiwonongeko chosilijila cha adani a Mulungu! Ŵanthu onse pachalo azasangalale! Olo kuti kululu kuzankhale chisangalalo chikulu Babulo Nkulu akazawonongewa, palisoti chinthu chiyakine chikuti chizalete chisangalalo. (Chiv. 19:1–3) Chamene ichi ni chochitika chokondwelesha ngako—chamene ni “ukwati wa mwana wa Mbelele.”—Chiv. 19:6–9.

12. Mokatijana na lemba ya Chivumbulutso 21:1, 2, kansi ukwati wa mwana wa Mbelele uzachitike nthawe yanji?

¹² Kansi ukwati wamene uyu uzachitike nthawe yanji? Nkhondo ya Aramagedo ikazasala potontho kuti iyambe, ozozewa onse okwana 144.000 azankhale kululu. Olo n’tetyo, yamene iyo izankhalelini nthawe ya ukwati wa mwana wa Mbelele. (Ŵelengani Chivumbulutso 21:1, 2.) Ukwati wa mwana wa Mbelele, uzachitike pavuli pakuti nkhondo ya Aramagedo yachitika komasoti adani onse a Mulungu akazawonongewa.—Sal. 45:3, 4, 13-17.

13. Kansi ukwati wa mwana wa Mbelele utanthauza chinji kuli ŵala otolamo mbali?

¹³ Kansi ukwati wa mwana wa Mbelele utanthauza chinji kuli onse otolamo mbali? Ukwati uchitisha kuti mwanalume na mwanakazi ankhale ogwilizana. Molingana na vamene ivi, ukwati wophiphilisila wamene uyu wa mwana wa Mbelele uzachitishe kuti Mfumu, Yesu Khilisitu na “nkwatibwi” wake amene ni a 144.000, ankhale ogwilizana. Chochitika chamene ichi chamene ni chofunika ngako, chizankhazikishe boma yanyowani yamene ikuti izalamulile pa chalo chonse kwa vyaka 1.000.—Chiv. 20:6.

TAUNI YA ULEMELELO NA SOGOLO YANU

14–15. Kansi lemba ya Chivumbulutso chapitala 21 yulinganija a 144.000 na chinji? (Onani chithunzi chapachikuto.)

¹⁴ Pavuli pake, buku ya Chivumbulutso chapitala 21 yulinganija a 144.000 na tauni ikulu iweme yuitiwa kuti, “Yerusalemu Wanyowani.” (Chiv. 21:2, 9) Tauni yamene iyi, ili na miyala yomangila fandeshoni yokwana 12 yamene pelembewa “mazina 12 ŵa atumwi 12 a mwana wa Mbelele.” Ndaŵa yanji vamene ivi vimuchitisha chidwi Yohane? Ndaŵa yakuti ewona zina yake ililembewe pa umozi mwa miyala yamene iyo. Wamene uyu wenze mwayi ukulu ngako!—Chiv. 21:10-14; Aef. 2:20.

¹⁵ Tauni yophiphilisila yamene iyi, yuwonekalini monga ni matauni ayakine. Yove ili na nsewu ukulu wagolide woyenga bwino, viseko vapa milyango 12 va ngale, vipupa na fandeshoni vopangiwa na miyala ya ntengo wapatali—komasoti mipimo yolinganijiwa luweme. (Chiv. 21:15-21) Olo n’tetyo, Yohane ewona kuti chinthu chiyakine chenzeshota! Yohane enena kuti: “Niliyewone kachisi mu tauni yamene iyo, pakuti Yehova Mulungu Wamphamvu zonse niye enze kachisi wake, komasoti mwana wa Mbelele niye kachisi wake. Tauni yamene iyo ilyefunikilesoti kuŵala kwa zuŵa olo kwa mwezi, pakuti ulemelelo wa Mulungu weingweleŵelesha ndipo laiti yake yenze mwana wa Mbelele.” (Chiv. 21:22, 23) Ŵala opanga mbali ya Yerusalemu Wanyowani azankhale pafupi na Yehova. (Ahe. 7:27; Chiv. 22:3, 4) Tetyo, Yehova pamozi na Yesu niye kachisi mu tauni yamene iyo.

16. Kansi n’chinji chikuti chizachitikile ŵanthu nkati mwa Ulamulilo wa Ufumu wa Mulungu wa vyaka 1.000?

¹⁶ Ozozewa osangalala ngako akaganizila za tauni yamene iyi. Koma ŵala amene ali na chiyembekezo chakuzankhala pano pachalo, nawo ofunikasoti kusangalala na tauni yamene iyi. Nkati mwa Ulamulilo wa vyaka 1.000 wa Ufumu wa Mulungu, Yerusalemu Wanyowani azalete madaliso osaneneka pachalo. Mmensophenya ŵake, Yohane owona madaliso opopa monga ni “mmana wa manzi amoyo.” Ndipo mbali zonse za mmana muli “vimiti va moyo” vamene vutumbila matepo “ochijila mitundu ya ŵanthu.” (Chiv. 22:1, 2) Ŵanthu onse akuti azankhale na moyo pa nsiku yamene iyo, azankhale na mwayi wopindula na vinthu viweme vamene ivi. Patontho na patontho, ŵanthu onse omvwila Yehova azankhale angwilo. Pazaŵeve matenda, kuŵaŵiwa olo kuchosa misozi chifukwa cha chisoni.—Chiv. 21:3–5.

17. Monga mwayuwoneshela lemba ya Chivumbulutso 20:11-13, kansi ni ŵani akuti azapindule na Ulamulilo wa vyaka 1.000?

¹⁷ Kansi ni ŵani akuti azapindule na vinthu viweme vamene ivi? Choyamba, ni gulu ikulu yamene ikuti izapulumuke pa Aramagedo komasoti ŵana onse akuti azavyalike m’chalo chanyowani. Koma buku ya Chivumbulutso chapitala 20 yulonjezasoti kuti akufwa azaushiwe. (Ŵelengani Chivumbulutso 20:11-13.) Ŵanthu “olungama” amene echifwa kale-kale pamozi na “osalungama”—amene aliyenkhale na mwayi wokwanila wophunzila za Yehova—onse azankhalesoti na moyo pano pachalo. (Mac. 24:15; Yoh. 5:28, 29) Kansi vamene ivi vutanthauza kuti aliyense azaushiwe kuti ankhale na moyo pano pachalo mu Ulamulilo wa vyaka 1.000? Yayi. Ŵala enzechita viipa amene ekana mwayi wotumikila Yehova akaliyekufwa, azaushiwelini. Ove enze nawo mwayi wakuti aphunzile ndipo ewonesha kuti ni osayenelela kunkhala na moyo m’Paladaiso pano pachalo.—Mt. 25:46; 2 Ates. 1:9; Chiv. 17:8; 20:15.

CHIYESO CHOSILIJILA

18. Kansi vinthu vizankhale tyani pachalo kumapeto kwa vyaka 1.000?

¹⁸ Pofwika kumapeto kwa vyaka 1.000, ŵanthu akuti azankhale pano pachalo azankhale angwilo. Pa nthawe yamene iyo, paliye aliyense akuti azakhuziwe na uchimo wetitolela kwa Adamu kumayambililo. (Aro. 5:12) Tembelelo ya uchimo wetitolela kwa Adamu izachosewe mpaka kale-kale. Mwanjila yamene iyi, ŵala akuti azankhale pachalo “azankhale na moyo” monga ŵanthu angwilo kumapeto kwa vyaka 1.000.—Chiv. 20:5.

19. Ndaŵa yanji pazafunikile chiyeso chosilijila?

¹⁹ Tuziŵa kuti Yesu epitilija mphela kunkhala wokhulupilika kwa Mulungu olo pa nthawe yenzeyesewa na Satana. Koma kansi ŵanthu onse angwilo azapitilije kunkhala okhulupilika kwa Yehova Satana akazapasiwa mwayi kuti aŵayese? Aliyense azaliyankhile yeka konsho yamene iyi, Satana akazamasuliwa mu chisengu kumapeto kwa vyaka 1.000. (Chiv. 20:7) Ŵala akuti azankhale okhulupilika pa chiyeso chosilijila chamene ichi, azalondele moyo wosasila ndipo pamapeto pake azasangalale na ufulu ngawo-ngawo. (Aro. 8:21) Ŵala akuti azapanduke, azawonongewe mpaka kale-kale pamozi na Mdyelekezi komasoti viŵanda vake.—Chiv. 20:8-10.

20. Kansi mukumvwa tyani mukaganizila maulosi ochitisha chidwi opezeka m’buku ya Chivumbulutso?

²⁰ Kansi mwewo mukumvwa tyani pavuli pakuti takambilana mwachidule vinthu vupezeka m’buku ya Chivumbulutso? Kansi musangalalalini mukaliyelekezela kuti mulipo pa kukwanilishiwa kwa maulosi amene aŵa ochitisha chidwi? Kansi ivi vukuchitishanilini kuti mukoujako ŵanthu ayakine kuti nawo akatijane nase pa kulambila kutuŵa kwa Mulungu wasu? (Chiv. 22:17) Pavuli pakuti takambilana vinthu vamene ivi vikuti vizachitike kusogolo, nise osangalala ngako ndipo tufunishisha kulaŵila monga ni mwechilaŵilila ntumwi Yohane kuti: “Ame! Welani, Ambuya Yesu.”—Chiv. 22:20.