PHUNZILO 6

Kumvwikisha mfundo ili pa lemba

Yohane 10:33-36

MFUNDO IKULU: Osaŵelenga tyala lemba noluta pa mfundo iyakine. Mukowoneshesha kuti omvwishila awona kukatijana kwa lemba na mfundo yamulaŵila.

Fotokozani tyala mfundo yamufuna. Mukaŵelenga lemba, fotokozani tyala mfundo yamufunapo. Mungachite vamene ivi mwa kuwelejela mawu amene awo olo kukonsha konsho yamene ingayavye omvwishila kuziŵa mfundo ikulu.

Keno mwakatishila ntchito mawu ayakine kuti mumvwikishe mfundo ili pa lemba, simikijilani kuti omvwishila awona mwamene mawu ali m’Baibolo mwakukatijilana na mfundo ikulu.
Simikijilani mfundo ikulu. Mukaliye ŵelenga lemba, mufunika kulaŵila chifukwa chati muŵelengele lemba nofotokoza mwamene mfundo ikulu ya pa lemba mwayukatijilana na nkhani yanu.

Pamufotokoza lemba, Baibolo yanu yufunika kunkhala yosegula. Ivi vuyavya omvwishila kugwilizanisa vamulaŵila na vili pa lemba yamwaŵelenga.
Fotokozani mosavuta mwatinga katishile ntchito mfundo ili pa lemba. Osalaŵila vinthu vamene vukatijana lini ngako na mfundo ikulu. Kuganizila vinthu vakuziŵa kale omvwishila pa nkhani yamene iyo, vingayavye omvwishila kuimvwisha luweme mfundo.