Uthenga Wabwino Wolembewa na Luka
20 Siku iyakine peenzophunzisa ŵanthu m’kacisi nolengeza uthenga wabwino, ansembe akulu, alembi koma soti akulu eluta kuli yove. 2 Ndipo emukonsha kuti: “Tiuzhyeni, kansi mucita vinthu ivi na ulamulilo wa ŵani? Kapena kansi ni ŵani ekupasani ulamulilo wamene uyu?” 3 Yesu eŵayankha kuti: “Nane nikukonsheni konsho imozi ndipo muniyankhe: 4 Kansi ubatizo wa Yohane wecokela kululu kapena kuli ŵanthu?” 5 Tetyo, ove eyamba kukambilana kuti: “Tikakamba kuti, ‘Wecokela kululu,’ yove atikonshe kuti, ‘Lomba ndaŵa yanji muliyomukhulupilile?’ 6 Koma tikakamba kuti, ‘Wecokela kuli ŵanthu,’ ŵanthu onse aŵa atiteme miyala, cifukwa ove okhulupilila na mtima wonse kuti Yohane enze mneneli.” 7 Tetyo, eyankha kuti oziŵa lini kwewecokela. 8 Yesu eŵauzhya kuti: “Nane nikuuzhyeni lini enipasa ulamulilo wanucitila vinthu ivi.”
9 Pavuli pake, eyamba kuuzhya ŵanthu fanizo yakuti: “Munthu muyakine ekomola mpesa m’munda mwake ndipo eusiya m’manja mwa alimi noluta ku calo ciyakine kwamene enkhalako nthawi itali. 10 Koma nthawi yotwala vipaso peyefwika, yove etumizhya kapolo wake kuli alimi aŵa kuti akatoleko viyakine mwa vipaso va m’munda wa mpesa. Koma ove emuniata ndipo emuzhyosha cimanjamanja. 11 Koma yove etuma soti kapolo muyakine. Naye emuniata nomucita vinthu vacipongwe, ndipo emuzhyosha cimanjamanja. 12 Etuma soti kapolo wacitatu, koma naye emuniata mpaka kumucita vilonda nomutaila kunja. 13 Pavuli pa izi, mwineco wa munda wa mpesa elaŵila kuti, ‘Nicite cinji lomba? Nitumizhye mwana wangu wokondeka. Mosakaikila, mwana wangu yeka akamulemekeze.’ 14 Koma alimi ŵala pecimuona, eyamba kuuzhyana kuti, ‘Uyu niye wati akalandile coloŵa. Tiyeni timupaye kuti coloŵa cake cinkhale casu.’ 15 Tetyo, emutola kumucosa m’munda wa mpesa nomupaya. Lomba kansi mwineco wa munda wa mpesa azecite nao cinji alimi aŵa? 16 Yove akawele nopaya alimi aŵa ndipo akapeleke munda uyu kuli alimi ayakine.”
Peecimvwa izi, ove elaŵila kuti: “Izi zisacitike!” 17 Koma yove eŵaloleshesha nolaŵila kuti: “Malemba olaŵila kuti, ‘Mwala wamene ŵanthu omanga ng’anda eukana, wankhala mwala wofunika ngako wapakona.’* Lomba kansi mau aŵa otanthauzanji? 18 Aliyense wati akaponele pa mwala wamene uyo, akaphwanyike. Ndipo aliyense wati akaponelewe na mwala uyu, akasasanthike.”
19 Alembi na ansembe akulu pecizindikila kuti Yesu enzokamba za ove m’fanizo iyi, eyesa kupeza mpata wakuti amukate nthawi yamene iyi, koma enzoyopa ŵanthu. 20 Pavuli pooneshesha mweenzocitila vinthu, ove etuma ŵanthu amene enze eŵagula mwacisinsi kuti azioneshe monga ni olungama, na colinga cakuti amupeze na mlandu kupitila m’zokamba zake na kuti akamupeleke ku boma na kwa bwanamkubwa. 21 Tetyo, ŵanthu aŵa emukonsha kuti: “Mphunzisi, tuziŵa kuti mulaŵila nophunzisa cendi ndipo muliye sankho, koma muphunzisa njila ya Mulungu m’cendi: 22 Kansi n’zololeka* kuli seo kupeleka msonkho kwa Kaisara kapena yai?” 23 Koma Yesu ezindikila cinyengo cao ndipo eŵauzhya kuti: 24 “Nionesheni kakoini ka dinari. Kansi cithunzithunzi na mau ali pa kakoini aka ni va ŵani?” Ove emuyankha kuti: “Ni va Kaisara.” 25 Yove eŵauzhya kuti: “Tetyo, mukotwala vinthu va Kaisara kwa Kaisara, koma va Mulungu mukotwala kwa Mulungu.” 26 Ove ekangiwa kumupeza mlandu pa zecilaŵila pamenso pa ŵanthu, koma edabwa ngako na yankho yake cakuti enkhala tyala celele.
27 Koma Asaduki ayakine amene enzokhulupilila kuti kuliye ciukililo eluta kuli yove nomukonsha kuti: 28 “Mphunzisi, Mose elemba m’Cilamulo kuti ‘Ngati munthu wamwalila ndipo wasiya mkazi wake akaliyovyalamo mwana, mkwake wa munthu wamene emwalila ofunika kulungula munakazi wawasiya kuti amuvyalile ŵana.’ 29 Lomba penze analume 7 amene enze pokwao. Woyamba elungula koma emwalila akaliyonkhala na ŵana. 30 Naye waciŵili 31 koma soti wacitatu elungula munakazi uyu. Izi niye zecitikila analume onse 7. Onse emwalila ndipo aliyosiye ŵana. 32 Posilizhyila pake, naye munakazi emwalila. 33 Pofwana kuti analume onse 7 aŵa enze emulungulapo, kansi munakazi ula akankhale wa ŵani pavuli pakuti ŵanthu akufwa aukishiwa?”
34 Yesu eŵauzhya kuti: “Ŵana a nthawi ino olungula nolunguliwa, 35 koma ŵanthu amene aonewa kuti ni oyenelela kuyopeza moyo pa nthawi yamene iyo noukishiwa kwa akufwa, akalungule lini kapena kulunguliwa. 36 Ndipo akafwe lini soti cifukwa akankhale monga ni angelo. Ove akankhale soti ŵana a Mulungu cifukwa ni ŵana a kuuka kwa akufwa. 37 Koma pa nkhani yakuti akufwa akauke, olo Mose efotokoza m’nkhani ya kamuti ka minga, pecilaŵila kuti Yehova ‘ni Mulungu wa Abulahamu, Mulungu wa Isaki na Mulungu wa Yakobo.’ 38 Yove ni Mulungu wa ŵanthu amoyo osati akufwa, cifukwa kuli yove, onse ali moyo.” 39 Ayakine mwa alembi elaŵila kuti: “Mphunzisi, mwalaŵila bwino.” 40 Elaŵila izi cifukwa aliyokwanishe soti kutang’a mtima kuti amukonshe konsho iyakine olo imozi.
41 Pavuli pake, yove eŵakonsha kuti: “Ndaŵa yanji ŵanthu olaŵila kuti Khristu ni mwana wa Davide? 42 Cifukwa m’buku ya Masalimo, Davide elaŵila kuti, ‘Yehova euzhya Ambuye ŵangu kuti: “Nkhala ku kwanja yangu yamalendi 43 mpaka pati nikaike adani ŵako monga cokandapo mendo ŵako.”’ 44 Tetyo Davide emuita kuti Ambuye, lomba zukwanishika tyani kuti ankhale mwana wake?”
45 Pavuli pake, ŵanthu onse peenzomumvwishila, yove euzhya ophunzila ŵake kuti: 46 “Samalani na alembi amene okonda kuyendayenda apo n’kuti avwala mikhanjo ndipo ofuna kuti akoŵapasa moni m’mamaketi. Okonda kunkhala pa mipando ya kusogolo m’masunagoge koma soti okonda malo apalulu ngako pakulya cakulya ca m’cingulo. 47 Ove olonda anakazi amasiye katundu* ndipo opeleka mapemphelo atali-atali pofuna kuzioneshela. Ŵanthu aŵa akalandile ciweluzo coŵaŵa ngako.”