Uthenga Wabwino Wolembewa na Maliko
11 Pecisala patontho kufwika ku Yerusalemu, efwika ku Betefage na ku Betaniya pa Lupili ya Maolivi. Ndipo Yesu etuma ophunzila ŵake aŵili. 2 Eŵauzhya kuti: “Nkhoyani m’munzi uyo uonekela pala. Mukayoloŵa tyala, mukapeze mwana munalume wa bulu womangilila, waakaliyokwelapo munthu aliyense. Mukamumasule nowela naye kuno. 3 Ngati aliyense angakukonsheni kuti, ‘Ndaŵa yanji mumasula bulu uyu?’ Mumuuzhye kuti, ‘Ambuye omufuna ndipo amuwezhye akangosilizhya tyala kumuseŵenzesha.’” 4 Tetyo, eluta ndipo epeza mwana munalume wa bulu wamene enze womangilila pa ciseko ca ng’anda yamene yenze m’mbali mwa mseu ndipo emumasula. 5 Koma ŵanthu ayakine peciona kuti ophunzila a Yesu omasula mwana munalume wa bulu, eŵakonsha kuti: “Ndaŵa yanji mumasula bulu uyu?” 6 Ove eŵauzhya zeenze eŵauzhya Yesu kuti alaŵile, ndipo ŵanthu aŵa eŵalola kuti alute.
7 Ove epeleka mwana ula wa bulu kuli Yesu. Pavuli pake, eyanzikapo vovwala vao vakunja ndipo Yesu ekwelapo. 8 Kuyangizhyila apo, ŵanthu anyinji enzoyanzika vovwala vao vakunja mu njila ndipo ayakine enzotenda vitepo m’minda. 9 Ŵanthu amene enze pasogolo pake koma soti ŵala amene enzokuza kuvuli kwake enzokuwa kuti: “Tusenga kuti m’pulumuseni! Wodalisiwa ni munthu wamene akuza m’zina ya Yehova. 10 Wodalisiwa ni Ufumu wamene ukuza wa Ausuwasu Davide. Tusenga kuli mweo amene munkhala kululu kuti, m’pulumuseni!” 11 Yove eloŵa mu Yerusalemu noluta m’kacisi. Pavuli pake, elolesha vinthu vonse koma pofwana kuti kwenze kweyamba kufipa, yove eluta ku Betaniya pamozi na ophunzila ŵake 12.
12 Siku yokonkhapo peenzofuma ku Betaniya, yove ecimvwa njala. 13 Capatali, eona cimuti ca mkuyu camene cenze na matepo. Pavuli pake, eluta ku cimuti ici kuti aone ngati muli nkhuyu. Koma pecifwika pafupi, epeza kuti mwenze tyala matepo cifukwa yenze lini nthawi ya nkhuyu. 14 Tetyo euzhya cimuti ca mkuyu kuti: “Kuyambila lelo, paliye munthu aliyense wati akalyeko nkhuyu kufumila muli weo.” Ndipo ophunzila ŵake enzokumvwa Yesu peenzolaŵila izi.
15 Pavuli pake, ove efwika ku Yerusalemu. Ali kwamene uku, Yesu eloŵa m’kacisi nopitikisha ŵanthu amene enzogulisa koma soti kugula vinthu m’kacisi. Egubuduza mathebo ya ŵanthu amene enzocinjanisha ndalama koma soti mabenchi ya ŵanthu amene enzogulisa nkhunda. 16 Ndipo enzolola lini aliyense kupitila pa kacisi ngati wanyamula katundu ulionse. 17 Yove enzophunzisa nouzhya ŵanthu kuti: “Kansi Malemba olaŵila lini kuti, ‘Ng’anda yangu ikoitiwa kuti ng’anda yopemphelelamo ŵanthu a mitundu yonse’? Koma mweo mwaicitisha kuti inkhale nkhwema ya akawalala.” 18 Ansembe akulu na alembi peecimvwa zinthu izi, eyamba kusakila njila yakuti amupailemo. Koma ove enzomuyopa cifukwa gulu yonse ya ŵanthu yenzodabwa na kaphunzisidwe kake.
19 Siku yamene iyi m’cingulo, Yesu na ophunzila ŵake ecoka mu mzinda uyu. 20 Koma m’mamawa peenzopita pa malo pamene penze cimuti ca mkuyu, ove eona kuti cimuti cala cafota. 21 Petulo ekumbukila cimuti cala ndipo elaŵila kuti: “Rabi, onani! Cimuti cala ca mkuyu cemwetembelela, cafota.” 22 Yesu eŵayankha kuti: “Mukokhulupilila Mulungu. 23 Kulaŵila cendi, nukuuzhyani kuti aliyense ouzhya lupili iyi kuti, ‘Coka pano ukaziponye mu nyanja,’ ndipo okaikila lini mu mtima mwake koma ali na cikhulupililo cakuti zawalaŵila zicitike, zicitike cendi. 24 Niye cifukwa cake nukuuzhyani kuti, vinthu vonse vamupemphelela nosenga, mukonkhala na cikhulupililo cikulu monga kuti mwavilandila kale ndipo muvilandile cendi. 25 Kuyangizhyila apo, ngati mufuna kupemphela, mukokhululukila aliyense pa ciliconse cawakulakwilani kuti namwe Ausuwanu akululu akukhululukileni macimo ŵanu.” 26 ——
27 Pavuli pake, efwika soti ku Yerusalemu. Ndipo peenzoyenda m’kacisi, ansembe akulu, alembi na akulu eluta kuli yove 28 nomukonsha kuti: “Kansi mucita vinthu ivi na ulamulilo wa ŵani? Kapena kansi ni ŵani ekupasani ulamulilo wocita vinthu ivi?” 29 Yesu eŵayankha kuti: “Nane nikukonsheni konsho imozi. Ngati muniyankhe nikuuzhyeni enipasa ulamulilo wanucitila vinthu ivi. 30 Kansi ubatizo wa Yohane wecokela kululu kapena kuli ŵanthu? Niyankheni.” 31 Tetyo, eyamba kukambilana kuti: “Tikakamba kuti, ‘Wecokela kululu,’ yove atikonshe kuti, ‘Lomba ndaŵa yanji muliyomukhulupilile?’ 32 Lomba kansi tikambe kuti, ‘Wecokela kuli ŵanthu’?” Ove enzoyopa gulu ya ŵanthu cifukwa ŵanthu onse enzokhulupilila kuti Yohane enze mneneli. 33 Tetyo eyankha Yesu kuti: “Tuziŵa lini.” Naye eŵauzhya kuti: “Nane nikuuzhyeni lini enipasa ulamulilo wanucitila vinthu ivi.”