Uthenga Wabwino Wolembewa na Mateyo

5 Yesu peciona gulu ya ŵanthu, ekwela pa lupili. Pecinkhala pansi, ophunzila ŵake eluta kuli yove. 2 Ndipo eyamba kuphunzisa kuti:

3 “Osangalala ni ŵanthu amene ozindikila kuti ofunikila zinthu zauzimu cifukwa Ufumu wa kululu ni wao.

4 “Osangalala ni ŵanthu amene olila cifukwa akatonthozewe.

5 “Osangalala ni ŵanthu ofasa cifukwa akalandile calo.

6 “Osangalala ni ŵanthu amene akumvwa njala na njota ya cilungamo cifukwa akakute.

7 “Osangalala ni ŵanthu acifundo cifukwa akaoneshewe cifundo.

8 “Osangalala ni ŵanthu atuŵa mu mtima cifukwa akaone Mulungu.

9 “Osangalala ni ŵanthu amene olimbikisha mtendele cifukwa akaitiwe kuti ŵana a Mulungu.

10 “Osangalala ni ŵanthu amene onzunziwa cifukwa ca cilungamo, cifukwa Ufumu wa kululu ni wao.

11 “Nimwe osangalala ngati ŵanthu okunyozani, kukunzunzani nokunenelani vinthu viipa vawenye va mtundu ulionse cifukwa ca neo. 12 Kondwelani ndipo sangalalani ngako cifukwa mphoto yanu ni ikulu kululu ndipo umu niye mweenzonzunzila aneneli m’nthawi zakuvuli.

13 “Nimwe munyu wa calo. Koma kansi munyu ukasila mphamvu, ungaseŵenze soti? Unkhala uliye nchito. M’malo mwake, utaiwa tyala kunja ndipo ŵanthu oukandakanda.

14 “Nimwe kuwala kwa calo. Mzinda ungafisike lini ngati uli palulu pa lupili. 15 Ŵanthu akayasha lambi, oivwinikila lini na basiketi. Koma oiika pa kasitandi kuti isanikile ŵanthu onse m’ng’anda. 16 Molingana na izi, oneshani kuwala kwanu pamenso pa ŵanthu na colinga cakuti aone nchito zanu zabwino na kuti atwale ulemelelo kuli Ausuwanu a kululu.

17 “Musaganize kuti newela kuzoononga Cilamulo kapena Mau ya Aneneli. Niliyowele kuti niziononge koma kuti nizikwanilishe. 18 Kulaŵila cendi, nukuuzhyani kuti kululu na calo vingacoke mosavuta, kupambana kuti cilembo cimozi kapena kambali kake kacoke mu zolemba za m’Cilamulo vinthu vonse ivi vikaliyocitika. 19 Tetyo, aliyense wamene ophwanya imozi mwa malamulo atontho-atontho aya nophunzisa ayakine kucita cimozimozi, ni wosayenelela kuloŵa mu Ufumu wa kululu. Koma aliyense wamene okonkha malamulo aya nophunzisa ayakine kucita cimozimozi, ni woyenelela kuloŵa mu Ufumu wa kululu. 20 Cifukwa nukuuzhyani kuti ngati cilungamo canu cupambaniwa na ca alembi na Afarisi, mukaloŵe lini mu Ufumu wa kululu.

21 “Mwecimvwa kuti ŵanthu a m’nthawi zakuvuli euzhyiwa kuti: ‘Musapaye munthu cifukwa aliyense opaya munthu akapezeke na mlandu mu khoti ya cilungamo.’ 22 Tetyo, nukuuzhyani kuti aliyense wamene opitilizhya kunkhala na ukali cifukwa ca mkwake, akapezeke na mlandu mu khoti ya cilungamo. Ndipo aliyense wamene olaŵilila mkwake mau aipa akapezeke na mlandu mu khoti ikulu. Aliyense wamene onena muyake kuti, ‘Niwe cisilu!’ akaponyewe mu mulilo wa Gehena.*

23 “Tetyo, ngati watwala mphaso yako pa guwa yansembe ndipo uli pamene pala wakumbukila kuti mkwako ali nawe na cifukwa, 24 siya mphaso yako pasogolo pa guwa yansembe. Coyamba, nkhazikisha mtendele na mkwako ndipo pavuli pake welela nopeleka mphaso yako.

25 “Ngati munthu wokuimba mlandu okuya nawe ku khoti, mukosilizhya nkhani kamangu kuti asakupeleke m’manja mwa woweluza kuti woweluza asakupeleke m’manja mwa msoja na kuti akuike m’jele. 26 Kulaŵila cendi, nukuuzhyani kuti akakuloleni lini kuti mukacoke m’jele mpaka mukalipile kakoini kosilizhyila.*

27 “Mwecimvwa kuti elaŵila kuti: ‘Musacite cigololo.’ 28 Koma nukuuzhyani kuti aliyense wololeshesha munakazi nomukumbwila wacita naye kale cigololo mu mtima. 29 Tetyo, ngati linso yako ya kumalendi yukucimwisha, uikoloole noitaya. Cifukwa cili bwino kuti utaye cizo cimozi ca muŵili wako kupambana kuti muŵili wako wonse ukataiwe mu Gehena. 30 Kuyangizhyila apo, ngati kwanja yako yamalendi yukucimwisha, uitende noitaya cifukwa cili bwino kuti utaye cizo cimozi ca muŵili wako kupambana kuti muŵili wako wonse ukataiwe mu Gehena.

31 “Elaŵila soti kuti: ‘Aliyense wamene ofuna kusilizhya cikwati na mkazi wake, ofunika kumupasa cikalata cosilizhyila ukwati.’ 32 Koma nukuuzhyani kuti aliyense oleka mkazi wake osati pa cifukwa ca ciwelewele,* omuika pa ciyeso kuti acite cigololo ndipo aliyense olungula munakazi wamene uyo ocita naye cigololo.

33 Mwecimvwa soti kuti ŵanthu akale euzhyiwa kuti: ‘Mufunika lini kulumbila nokangiwa kukwanilisha zamwalumbila, m’malo mwake mufunika kukwanilisha zamwalonjeza Yehova.’ 34 Koma neo nukuuzhyani kuti mufunika lini kulumbila olo mwa kutomola kululu cifukwa niye kuli mpando wacifumu wa Mulungu, 35 olo mwa kutomola calo cifukwa ni cokandapo mendo ŵake olo kutomola Yerusalemu cifukwa ni mzinda wa Mfumu ikulu. 36 Osati mukolumbila potomola mutu wanu cifukwa mungakwanishe lini kucinja sisi imozi kuti inkhale ituŵa olo ifipa. 37 Simikizhyilani tyala kuti mukati ‘Eee’ akonkhala eee, mukati ‘Yai,’ akonkhala yai cifukwa mau alionse oyangizhyila apa ofumila kuli muipa.

38 “Mwecimvwa kuti elaŵila kuti: ‘Linso kulipila linso ndipo lino kulipila lino.’ 39 Koma nukuuzhyani kuti osati mukokangana na munthu muipa ndipo ngati munthu muyakine wakuchayani mbama ku mbovu ya kumalendi, mukomupasa soti kumbali iyakine. 40 Ngati munthu muyakine ofuna kukutwalani ku khoti kuti akulondeni covwala camkati, mukomupasa soti cakunja. 41 Ndipo ngati munthu waulamulilo wakulamulani kuti mumunyamulile katundu wake pa msenga wa kilomita imozi, mukomunyamulila pa msenga wa makilomita aŵili. 42 Ngati munthu muyakine wakusengani kanthu, mukomupasa. Ndipo ngati munthu muyakine ofuna kuti mumukongoleshe,* osati mukokana.

43 “Mwecimvwa kuti elaŵila kuti: ‘Ukokonda muyako nozonda mdani wako.’ 44 Koma nukuuzhyani kuti mukokonda adani ŵanu nopemphelela ŵala amene okunzunzani. 45 Mukacita izi, muoneshe kuti nimwe ŵana ŵa Ausuwanu a kululu amene oŵalisha zuŵa yao pa ŵanthu abwino na aipa koma soti amene olokwesha mvula pa ŵanthu olungama na osalungama. 46 Kansi pali pindu yanji ngati mukonda tyala ŵanthu amene okukondani? Kansi izi niye lini zakucita nao osonkhesha misonkho? 47 Ngati mupasa tyala moni akwanu, kansi ni cinthu cacilwendo cotyani camucita? Kansi nao ŵanthu a mitundu iyakine, niye lini zakucita? 48 Mufunika kunkhala angwilo* monga ni Ausuwanu a kululu amene ni angwilo.