Uthenga Wabwino Wolembewa na Mateyo

24 Yesu peenzocoka m’kacisi, ophunzila ŵake eluta kuli yove kuti amuoneshe mang’anda ya pa kacisi. 2 Yove eŵauzhya kuti: “Kansi muviona lini vinthu vonse ivi? Kulaŵila cendi, nukuuzhyani kuti pano pakasale lini mwala ulionse palulu pa uyake wati ukalekoponeshewa.”

3 Peenze nkhale payeka pa Lupili ya Maolivi, ophunzila ŵake eluta kuli yove nomukonsha kuti: “Tiuzhyeni, kansi ni lini pati vikacitike vinthu ivi, ndipo cizindikilo ca kunkhalapo kwanu koma soti ca masilizhyilo a nthawi ino cikankhale cinji?”

4 Poŵayankha, Yesu eŵauzhya kuti: “Cenjelani kuti munthu aliyense asakusoŵesheni, 5 cifukwa anyinji akawele kuli mweo m’zina yangu nokamba kuti, ‘Khristu ula ni neo,’ ndipo akasoŵeshe ŵanthu anyinji. 6 Mukamvwe za nkhondo koma soti malipoti okhuza nkhondo. Koma musakalole kuti vinthu ivi vikakucitisheni wowa, cifukwa vufunika kucitika masilizhyilo akaliyofwika.

7 Mtundu ukaukilane na mtundu uyake koma soti ufumu ukaukilane na ufumu uyake. Ndipo kukankhale njala na vivomezi m’malo osiyanasiyana. 8 Vinthu vonse ivi ni ciyambi ca mavuto akulu.*

9 Ŵanthu akakupelekeni kuti mukanzunziwe ndipo akakupayeni. Mitundu ya ŵanthu ikakuzondeni cifukwa ca zina yangu. 10 Kuyangizhyila apo, anyinji akakhumudwe ndipo akapelekane m’manja mwa adani nozondana. 11 Kukankhale aneneli anyinji awenye ndipo akasoŵeshe ŵanthu anyinji. 12 Cifukwa ca kupaka kwa kusamvwila malamulo, cikondi ca ŵanthu anyinji cikacepe. 13 Koma wati akapilile* mpaka posilizhyila niye wati akapulumuke. 14 Ndipo uthenga wabwino uyu wa Ufumu ukalalikiliwe pa calo conse kwamene kuli ŵanthu, kuti unkhale umboni kuli ŵanthu a mitundu yonse. Pavuli pake, masilizhyilo akafwike.

15 “Tetyo, mukayoona cinthu conyansa coleta cionongeko cecilaŵila mneneli Danieli capanama m’malo atuŵa (woŵelenga akazindikile), 16 ali mu Yudeya akayambe kuthaŵila ku malupili. 17 Munthu ali pa mtenje wa ng’anda asakaseluke kuti akatole katundu m’ng’anda mwake. 18 Ndipo munthu ali ku munda asakawelele kuti akatole covwala cake cakunja. 19 Soka kuli anakazi ati akapezeke kuti ali na mavumo koma soti ati akonyonsha m’masiku amene ao. 20 Pitilizhyani kupemphela kuti musakathaŵe m’nthawi yozizila kapena pa siku ya Sabata. 21 Cifukwa pa nthawi yamene iyi, kukankhale cisauso cikulu camene cikaliyocitikapo kufumila pa ciyambi ca calo mpaka lelo, ndipo cikacitikepo lini soti. 22 Kulaŵila cendi, ngati masiku aŵa akafupikishiwe lini, paliye aliyense angayopulumuka. Koma cifukwa ca osankhiwa, masiku aŵa akafupikishiwe.

23 “Tetyo aliyense akayokuuzhyani kuti, ‘Onani! Khristu ula ali kuno,’ olo ‘Ali uko!’ musakakhulupilile. 24 Kukankhale ŵanthu ati akolaŵila kuti n’ne Khristu koma soti kukankhale aneneli awenye ndipo akacite vizindikilo vamphamvu na vodabwisa kuti asoŵeshe ŵanthu. Ngati n’zokwanishika, akasoŵeshe soti olo ŵala amene ni osankhiwa. 25 Onani! Nakucenjezelantoni. 26 Tetyo ŵanthu akayokamba kuti, ‘Onani! Ali m’cipululu,’ musakaluteko. Akayokamba kuti, ‘Onani! Ali m’vipinda va mkati,’ musakakhulupilile. 27 Cifukwa molingana na mwakocelukila kaleza kufumila ku m’mawa nowala mpaka kufwika ku m’cingulo, niye mwati zikankhalile na kunkhalapo kwa Mwana wa munthu. 28 Kulikonse kwamene kuli cinthu cakufwa, nkhwazi zuungana kwamene uko.

29 “M’masiku amene ao cisauso cikulu cikayosila tyala, zuŵa ikacite mfinzi ndipo mwezi ukawale lini. Nyenyezi zikapone kufumila kululu ndipo mphamvu za kululu, zikanyang’anye. 30 Pavuli pake, cizindikilo ca Mwana wa munthu cikaonekele kululu. Ndipo mafuko onse a pa calo akaziniate cifukwa ca cisoni. Ove akaone Mwana wa munthu akuza m’mikumbi ya kululu apo n’kuti ali na mphamvu koma soti ulemelelo ukulu. 31 Yove akatume angelo ŵake na kulila kwa mphamvu kwa mtolilo, ndipo ove akasonkhanishe osankhiwa ŵake pamozi kufumila ku mphepo 4 koma soti kufumila kosilizhyila kwa mbali iyakine ya m’mululu mpaka kufwika kosilizhyila kwa mbali iyakine.

32 “Lomba phunzilani kufumila pa fanizo iyi ya cimuti ca mkuyu. Misambo yake itontho-itontho ikaphukila nocosa matepo, muziŵa kuti mainza ali pafupi. 33 Molingana na izi, namwe mukayoona vinthu vonse ivi, mukaziŵe kuti yove ali pafupi, pamlyango penepene. 34 Kulaŵila cendi, nukuuzhyani kuti m’badwo uyu ukasile lini wonse mpaka vinthu vonse ivi vikacitike. 35 Kululu na calo vikacoke, koma mau ŵangu ankhalepo mpaka kale-kale.

36 “Ponena za siku yamene iyi koma soti awa yake, paliye aliyense oziŵa, olo angelo a kululu kapena Mwana, koma ni Atata tyala. 37 Cifukwa molingana na mwezenzele m’masiku a Nowa, niye mwati zikankhalile na kunkhalapo kwa Mwana wa munthu. 38 M’masiku amene ao Cigumula cikaliyocitika, ŵanthu enzokulya na kumwa. Analume enzolungula ndipo anakazi enzolunguliwa mpaka pa siku yamene Nowa eloŵa m’cingalawa. 39 Ŵanthu enzonyalanyaza zenzocitika mpaka Cigumula cewela noŵapyelelatu onse. Umu niye mwati zikankhalile na kunkhalapo kwa Mwana wa munthu. 40 Pa nthawi iyi, analume aŵili akankhale m’munda, koma m’mozi akatolewe ndipo muyakine akasiiwe. 41 Anakazi aŵili akopela pa mphelo, koma m’mozi akatolewe ndipo muyakine akasiiwe. 42 Tetyo, pitilizhyani kunkhala menso cifukwa muziŵa lini siku yati akawele Ambuye ŵanu.

43 “Koma ziŵani izi: Ngati mwineco wa ng’anda angaziŵe nthawi yaangawelelemo kawalala, angankhale menso ndipo angalole lini kuti kawalala athyole noloŵa m’ng’anda mwake. 44 Cifukwa ca izi, namwe nkhalani okonzeka cifukwa Mwana wa munthu akawele pa awa yamene muiganizilako lini.

45 “Kansi ni ŵani makamaka wamene ni kapolo wokhulupilika na wanzelu wamene ambuye ŵake emuika kuti akoyanganila anchito a pa ng’anda noŵapasa cakulya cao pa nthawi yoyenela? 46 Kapolo uyu akankhale wosangalala, ngati ambuye ŵake pati akawele akamupeze kuti ocita zamene izo. 47 Kulaŵila cendi, nukuuzhyani kuti akamuike kunkhala woyanganila vinthu vake vonse.

48 “Koma ngati kapolo uyu angaoneshe kuti ni muipa nolaŵila mu mtima mwake kuti, ‘Ambuye ŵangu ocelwa,’ 49 noyamba kuniata akapolo ayake koma soti kulya na kumwa pamozi na acakolwa ngaongao, 50 ambuye ŵake akawele pa siku yamene oiyembekezela lini koma soti pa awa yasaziŵa. 51 Tetyo, akamupase cilango cikulu ndipo akamupeleke ku malo kuli ŵanthu acinyengo. Kwamene uko akalile nokukuta menu yake.