Uthenga Wabwino Wolembewa na Mateyo
15 Pavuli pake, Afarisi na alembi a ku Yerusalemu eluta kuli Yesu nokamba kuti: 2 “Ndaŵa yanji ophunzila ŵanu okonkha lini miyambo ya makolo? Mwacisanzo, ove osamba lini m’manja* ngati ofuna kulya cakulya.”
3 Yove eŵayankha kuti: “Ndaŵa yanji muphwanya malamulo a Mulungu cifukwa ca miyambo yanu? 4 Mwacisanzo, Mulungu elaŵila kuti, ‘Mukolemekeza ausuwanu na amai ŵanu,’ koma soti kuti, ‘Aliyense wamene olaŵilila ausuwake na amai ŵake mau aipa ofunika kupaiwa.’ 5 Koma mweo mulaŵila kuti, ‘Aliyense ouzhya ausuwake olo amai ŵake kuti: “Vilivonse vanili navo vamene vingakupindulisheni ni mphaso zufunika kupelekewa kwa Mulungu,” 6 ofunika lini kulemekeza ausuwake olo patontho.’ Tetyo, mwacitisha kuti mau a Mulungu ankhale atyalatyala cifukwa ca miyambo yanu. 7 Mweo ŵanthu acinyengo, Yesaya elosela zacendi zokhuza mweo pecilaŵila kuti: 8 ‘Ŵanthu aŵa onilemekeza na milomo yao, koma mitima yao ili kutali na neo. 9 Ŵanthu aŵa onilambila patyala cifukwa ophunzisa malamulo a ŵanthu monga kuti ni malamulo a Mulungu.’” 10 Pavuli pokamba izi, eita gulu ya ŵanthu kuti ivwendele pafupi ndipo eiuzhya kuti: “Mvwani ndipo muzindikile tanthauzo yake. 11 Cinthu culoŵa m’kamwa mwa munthu, cuipisha lini munthu. Koma cufuma m’kamwa mwake niye cumuipisha.”
12 Pavuli pake, ophunzila ŵake ewela kuli yove nomukonsha kuti: “Kansi muziŵa kuti Afarisi akhumudwa na zamwakamba?” 13 Yove eŵayankha kuti: “Mbeu iliyonse yamene iliyokomolewe na Atata a kululu ikanyuliwe. 14 Ŵalekeni. Ove ni asogoleli aliye menso. Ngati mphofu yusogolela mphofu iyake, niye kuti onse aŵili aponele m’cisengu.” 15 Petulo euzhya Yesu kuti: “Timasulileni fanizo iyi.” 16 Yove eŵakonsha kuti: “Kansi namwe muliyomvwishe? 17 Kansi muziŵa lini kuti ciliconse caloŵa m’kamwa cupita m’mala ndipo pavuli pake cikuyotaiwa ku cimbuzi? 18 Koma zilizonse zucoka pa kamwa zucokela mu mtima ndipo zinthu izi niye zuipisha munthu. 19 Mwacisanzo, mu mtima mufuma maganizo aipa monga: opaya munthu, a cigololo, a ciwelewele, a ukawalala, ocitila umboni wawenye na onyoza Mulungu. 20 Vinthu ivi niye vuipisha munthu. Koma kulya cakulya cosasamba ku manja* kuipisha lini munthu.”
21 Pecicoka ku malo aŵa, Yesu eluta ku cigao ca Turo na Sidoni. 22 Nthawi yamene iyo, munakazi wa ku Foinike ewela kucokela ku cigao camene ici ndipo ekuwa kuti: “Nicitileni cifundo Ambuye, mwana wa Davide! Mwana wangu munakazi ali na ciŵanda camene cumunzunza ngako.” 23 Koma Yesu aliyomuyankhe ciliconse. Tetyo ophunzila ŵake eluta kuli yove nomuuzhya kuti: “Muuzhyeni munakazi uyu kuti alute cifukwa opitilizhya kukuwa pavuli pasu.” 24 Yove eŵayankha kuti: “Niliyotumiwe kuli aliyense kupatulapo tyala kuli mbelele zosoŵa za ng’anda ya Isiraeli.” 25 Koma munakazi uyu eluta kuli yove nomugwadila ndipo emuuzhya kuti: “Ambuye, niyavyeni!” 26 Yesu emuyankha kuti: “N’cosayenela kutola cakulya* ca ŵana noponyela tuimbwa.” 27 Munakazi uyu eyankha kuti: “Eee Ambuye, koma tuimbwa tukulya vinyenye vupona kufuma pa thebo ya aneco a tuimbwa.” 28 Pavuli pake, Yesu emuyankha kuti: “Weo munakazi uli na cikhulupililo cikulu. Zaufuna zicitike kuli weo.” Ndipo pa nthawi yamene iyo mwana wake epola.
29 Pecicoka ku malo aŵa, Yesu eluta pafupi na Nyanja ya Galileya ndipo ekwela mu lupili nonkhala pansi. 30 Pavuli pake, gulu ikulu ya ŵanthu yemukonkha ndipo yemuletela ŵanthu amene enze olemala, othyoka vizo, mphofu, asalaŵila na ayakine anyinji. Ŵanthu aŵa enzoŵaika pa mendo pa Yesu ndipo yove enzoŵapolesha. 31 Tetyo, gulu iyi ya ŵanthu yedabwa ngako peyeona kuti ŵanthu amene enzolaŵila lini, ayamba kulaŵila, amene enze othyoka vizo, ankhala bwino, amene enze olemala ayamba kuyenda na kuti amene enzololesha lini, ayamba kulolesha. Tetyo, yetamanda Mulungu wa Isiraeli.
32 Koma Yesu eita ophunzila ŵake noŵauzhya kuti: “Gulu iyi ya ŵanthu yunimvwisha cifundo cifukwa ankhala nane kwa masiku atatu ndipo aliye cakulya. Nufuna lini kuŵauzhya kuti alute na njala cifukwa angalenguke pa njila.” 33 Koma ophunzila ŵake emukonsha kuti: “Kansi tingatole kuni cakulya* cokwanila gulu yonse iyi ya ŵanthu ku malo kuno kusankhala ŵanthu?” 34 Yesu eŵakonsha kuti: “Kansi muli na mabuledi angani?” Ove eyankha kuti: “Tili na mabuledi 7 koma soti tunsomba tutontho.” 35 Tetyo pavuli pouzhya gulu ya ŵanthu kuti inkhale pansi, 36 etola mabuledi 7 na tunsomba noyamika. Esunasuna vakulya ivi noyamba kupasa ophunzila ŵake ndipo pavuli pake ove epasa gulu ya ŵanthu. 37 Onse ecilya mpaka kukuta ndipo vakulya vamene vesalako vezula mabasiketi akulu-akulu 7. 38 Onse amene ecilya enze analume okwanila 4,000, osaŵelengelako anakazi na ŵana. 39 Posilizhyila pake, pavuli pakuti wauzhya gulu ya ŵanthu kuti ilute kwao, yove ekwela boti ndipo eluta mu cigao ca Magadani.