Uthenga Wabwino Wolembewa na Maliko
1 Ciyambi ca uthenga wabwino wonena za Yesu Khristu, Mwana wa Mulungu: 2 Kulingana na zecilemba mneneli Yesaya kuti: “(Ona! Nutumizhya mthenga wangu pasogolo pako,* kuti akakukonzele njila.) 3 Munthu muyakine okuwa m’cipululu kuti: ‘Konzani njila ya Yehova! Pangani njila zake kunkhala zasiteleti!’” 4 Yohane M’batizi enze m’cipululu ndipo enzolalikila za ubatizo monga cizindikilo ca kulapa kuti macimo akhululukiwe. 5 Ŵanthu onse a mu Yudeya na mu Yerusalemu enzoluta kuli Yohane ndipo enzoulula macimo ŵao pamenso pa ŵanthu. Yove enzoŵabatiza* mu M’mana wa Yorodano. 6 Yohane enzovwala vovwala va usako wa ngamila koma soti beoti ya cikumba muluunda mwake. Ndipo enzokulya mphanzi na uci. 7 Yove enzolalikila kuti: “Pavuli pangu pakuza muyakine wamphamvu ngako kupambana neo. Ndipo n’ne wosayenelela kuŵelama nomasula nthambo za masanda* ŵake. 8 Neo nekubatizani na manzi koma yove akakubatizeni na mzimu utuŵa.”
9 M’masiku amene ao, Yesu efuma ku Nazareti wa ku Galileya ndipo eluta ku M’mana wa Yorodano kwamene eciyobatiziwa na Yohane. 10 Pecivuuka tyala m’manzi, yove eona kuti kululu kwaseguka ndipo eona soti mzimu wooneka monga ni nkhunda ukuza pali yove. 11 Ndipo kwemvwika mau kufumila kululu akuti: “Niwe Mwana wangu wanukonda, nukondwela nawe.”
12 Nthawi yamene iyo, mzimu wemulimbikisha kuluta m’cipululu. 13 Tetyo epitilizhya kunkhala m’cipululu kwa masiku 40, ndipo Satana enzomuyesa. M’cipululu umu, enzonkhala na vinyama vamusanga, ndipo angelo enzomutumikila.
14 Pavuli pakuti Yohane wamangiwa, Yesu eluta ku Galileya kuyolalikila uthenga wabwino wa Mulungu. 15 Enzolaŵila kuti: “Nthawi yoikika yakwana ndipo Ufumu wa Mulungu uli pafupi. Lapani ndipo khulupililani uthenga wabwino!”
16 Yesu peenzoyenda m’mbali mwa Nyanja ya Galileya,* eona Simoni na Andireya amene enze pokwao apo n’kuti oponya maneti ŵao m’nyanja, cifukwa enze okasha nsomba. 17 Tetyo Yesu eŵauzhya kuti: “Nikonkheni, ndipo nikupangeni kuti munkhale okasha ŵanthu.” 18 Nthawi yamene iyo, esiya maneti ŵao nomukonkha. 19 Peciyendako patontho, eona Yakobo mwana wa Zebedayo na mkwake Yohane apo n’kuti ali m’boti yao ndipo enzosoka maneti ŵao. 20 Nthawi yamene iyo, eŵaita kuti ayambe kumukonkha. Ove esiya ausuwao a Zebedayo m’boti pamozi na anchito ndipo emukonkha. 21 Ove eluta ku Kaperenao.
Sabata peyeyamba tyala, yove eluta mu sunagoge noyamba kuphunzisa. 22 Ŵanthu edabwa ngako na kaphunzisidwe kake, cifukwa enzoŵaphunzisa monga munthu waulamulilo, osati monga alembi. 23 Pa nthawi yamene iyo, m’sunagoge mwao mwenze munthu muyakine wamene enze na mzimu uipa ndipo ekuwa kuti: 24 “Takulakwilani cinji mweo Yesu Mnazareti? Kansi mwawela kuzotiononga? Nukuziŵani bwino ngako, nimwe Mtuŵa wa Mulungu.” 25 Koma Yesu ezuzula mzimu uyu kuti: “Nkhala celele, coka muli munthu uyu!” 26 Tetyo, mzimu uipa uyu wecitisha munthu uyu kuti apalapate ndipo ekuwa ngako. Pavuli pake, wecoka. 27 Ŵanthu onse peciona izi, edabwa ngako ndipo eyamba kukambilana kuti: “Kansi n’cinji ici? N’ciphunziso cacilwendo! Olo mizimu iipa oilamula mwamphamvu ndipo yumumvwila.” 28 Tetyo, mbili yokhuza Yesu yewanda kamangu m’cigao conse ca Galileya.
29 Pavuli pa izi, ecoka m’sunagoge noluta ku ng’anda kwa Simoni na Andireya. Ndipo elutila pamozi na Yakobo na Yohane. 30 Koma apongozi a Simoni anakazi enzelale cifukwa enze elwala maleliya.* Tetyo kamangu-kamangu, ove euzhya Yesu zokhuza matenda ŵa apongozi a Simoni. 31 Yesu peciluta kuli ove, eŵakata kwanja noŵausha. Nthawi yamene iyo, maleliya yesila ndipo ove eyamba kukonzela Yesu na ophunzila ŵake cakulya.
32 M’cingulo zuŵa peyeloŵa, ŵanthu eyamba kumuletela ŵanthu onse amene enzolwala koma soti amene enze na viŵanda. 33 Ndipo ŵanthu onse a mu mzinda uyu, esonkhana pa luŵanza apa. 34 Yove epolesha ŵanthu anyinji amene enzolwala matenda osiyanasiyana koma soti ecosa viŵanda vinyinji. Koma aliyovilole kuti vilaŵile cifukwa venzoziŵa kuti yove ni Khristu.*
35 M’mamawa ngako kukali mfinzi, Yesu euka nocoka panja ndipo eluta ku malo kwayeka. Kwamene uko eyamba kupemphela. 36 Koma Simoni na ŵanthu ŵeenze nao eyamba kumusakila. 37 Pecimupeza, emuuzhya kuti: “Ŵanthu onse okusakilani.” 38 Koma yove eŵauzhya kuti: “Tiyeni tilute ku malo ayakine, m’matauni yapafupi kuti nikalalikile soti kwamene uku, cifukwa niye zenewelela.” 39 Yove eluta ndipo enzolalikila m’masunagoge ŵao, mu Galileya monse nocosa viŵanda.
40 Ali kwamene uku, kwewela soti munthu wakhate ndipo egwada noyamba kumusenga kuti: “Ngati mufuna, munganituŵishe.” 41 Peecimvwa izi, Yesu ecita cifundo ndipo etambulula kwanja yake nomukata ndipo emuuzhya kuti: “Nufuna. Nkhala mtuŵa.” 42 Nthawi yamene iyo, khate yesila ndipo enkhala mtuŵa. 43 Pavuli pake, emupasa malangizo amphamvu nomuuzhya kuti alute. 44 Emuuzhya kuti: “Samala kuti usauzhye aliyense za nkhani iyi. Koma nkhoya ukaonekele kuli wansembe ndipo cifukwa cakuti watuŵishiwa, ukapeleke vinthu vecilamula Mose kuti unkhale umboni kuli ove.” 45 Koma pavuli pakuti munthu uyu waluta, eyamba kulengeza kulikonse nouzhya ŵanthu a m’madela ayakine za nkhani iyi. Izi zecitisha kuti Yesu akopewa kuloŵa mu mzinda ulionse moonekela cakuti enzonkhala tyala kunja kuliye ŵanthu. Olo n’tetyo, ŵanthu epitilizhya mphela kuluta kuli yove kufumila ku mbali zonse.