Uthenga Wabwino Wolembewa na Luka
12 Pa nthawi iyi, gulu ya ŵanthu masauzande anyinji yenze yesonkhana pamozi cakuti ŵanthu enzokandanakandana, ndipo Yesu eyamba kulaŵila na ophunzila ŵake coyamba kuti: “Samalani na cofufumisha ca Afarisi camene ni cinyengo. 2 Koma paliye cinthu ciliconse cosungiwa mwacisinsi cati cikaleke kuululika ndipo paliye cisinsi ciliconse cati cikaleke kuziŵika. 3 Tetyo, ciliconse camulaŵilila mu mfinzi cikamvwike patuŵa ndipo vamulaŵila coŵeleŵeshana kwamweka m’vipinda vanu, vikalalikiliwe pa mtenje wa ng’anda. 4 Kuyangizhyila apo, nuuzhya mweo ashamwali ŵangu kuti: “Osayopa ŵala amene okwanisha tyala kupaya muŵili, amene angakwanishe lini kucita zinyinji kupambana apa. 5 Koma nikuuzhyeni wamufunikila kuyopa. Mukoyopa wala wamene ocita kuti akapaya, onkhala soti na mphamvu zoponya munthu uyo mu Gehena. Eee, nukuuzhyani kuti mukoyopa wamene uyu. 6 Kansi tunthaki* 5 tugulisiwa lini na makoini aŵili aliye mphamvu?* Olo n’tetyo, paliye olo kanthaki kamozi mwa tunthaki utu kamene Mulungu okaluŵa.* 7 Olo sisi yanu yeneyene ya m’mutu, okwanisha kuiŵelenga. Osacita wowa, nimwe ofunika ngako kupambana tunthaki* tunyinji.
8 “Nukuuzhyani kuti aliyense wamene ovomelezhya kuti ni wokonkha wangu pamenso pa ŵanthu, naye Mwana wa munthu akamuvomelezhye pamenso pa angelo a Mulungu kuti ni wokonkha wake. 9 Koma aliyense wamene onikana pamenso pa ŵanthu, akakaniwe pamenso pa angelo a Mulungu. 10 Ndipo aliyense wamene onyoza Mwana wa munthu, akakhululukiwe. Koma aliyense wamene onyoza mzimu utuŵa, akakhululukiwe lini. 11 Akayokupelekani ku malo oimbila milandu, kuli akulu-akulu aboma koma soti olamulila, musakacite nkhawa kuti mukaziteteze tyani olo mukalaŵile cinji, 12 cifukwa mzimu utuŵa ukakuyavyeni kuziŵa zati mukalaŵile pa nthawi yamene iyo.”
13 Pavuli pake, munthu muyakine m’gulu iyi euzhya Yesu kuti: “Mphunzisi, muuzhyeni mkwangu kuti anigaŵileko coloŵa.” 14 Yesu emukonsha kuti: “Weo, ni ŵani enisankha kuti ninkhale woweluza wanu olo wogaŵa cuma canu?” 15 Pavuli pake, euzhya ŵanthu aŵa kuti: “Nkhalani menso ndipo cenjelani na dyela ya mtundu ulionse, cifukwa olo munthu angankhale na vinthu vinyinji tyani, moyo wake ufumila lini m’vinthu vamene ivo.” 16 Pavuli pa izi, eŵauzhya kuti: “Munda wa munthu muyakine wolemela wecita bwino. 17 Tetyo, eyamba kuzikonsha kuti: ‘Lomba nicitenji pakuti niliye mosungila vinthu vangu ivi?’ 18 Pavuli pake, elaŵila kuti, ‘Nicite izi: Nipasule vimphaka vangu nomanga vikulu-vikulu, ndipo witi wangu na vinthu vangu vonse niviike mwamene umo, 19 ndipo niziuzhye kuti: “Uli na vinthu vinyinji vabwino, vati visungike kwa vyaka vinyinji. Osacita nkhawa, ulye, umwe nosangalala.”’ 20 Koma Mulungu emuuzhya kuti, ‘Weo munthu uliye nzelu, usiku wamene uno moyo wako aufune. Lomba vinthu vawasunga vinkhale va ŵani?’ 21 Umu niye mwazunkhalila na munthu wamene waziunjikila cuma, koma ni wosalemela kwa Mulungu.”
22 Pavuli pake, euzhya ophunzila ŵake kuti: “Niye cifukwa cake nukuuzhyani kuti lekani kucitila nkhawa moyo wanu kuti mulyenji kapena kucitila nkhawa miŵili yanu kuti muvwalenji. 23 Cifukwa moyo ni wofunika ngako kupambana cakulya ndipo muŵili ni wofunika ngako kupambana covwala. 24 Ganizilani za vikwalala. Vove vukomola lini mbeu kapena kuwezhya. Viliye ng’anda yosungilamo vinthu kapena cimphaka, koma Mulungu ovilyesha. Kansi nimwe lini ofunika kupambana tunyoni? 25 Kansi ni ŵani wa mweo wamene angatalimphisheko moyo wake olo patontho tyala cifukwa cocita nkhawa? 26 Tetyo, ngati mungakwanishe lini kucita zinthu izi zamene ni zitontho, ndaŵa yanji mucita nkhawa na zinthu ziyakine? 27 Ganizilani za mwayokulila maluŵa. Ove okata lini nchito olo kusoka vovwala. Koma nukuuzhyani kuti olo Solomo mu ulemelelo wake wonse aliyovwaleko vovwala vabwino monga ni maluŵa aŵa. 28 Lomba ngati Mulungu ovwalika teti vomela vakusanga vamene vunkhalapo tyala lelo mailo noponyewa pa mulilo, kansi angakangiwe kukuvwalikani kupambana apa mweo acikhulupililo citontho? 29 Tetyo, lekani kucita nkhawa kuti mulyenji kapena kuti mumwenji ndipo lekani kuvutika mu mtima. 30 Cifukwa ŵanthu a mitundu iyakine m’calo ici, osakilasakila vinthu vonse ivi. Koma Ausuwanu oziŵa kuti mufunikila vinthu vonse ivi. 31 M’malo mwake, pitilizhyani kuika Ufumu wa Mulungu pasogolo ndipo akuyangizhyileni vinthu viyakine vonse ivi.
32 “Osacita wowa, mweo kagulu katontho ka mbelele cifukwa Ausuwanu avomelezhya kukupasani Ufumu. 33 Gulisani vinthu vanu nopeleka mphaso zacifundo.* Pangani vyola va ndalama vameme vingasile lini, kutanthauza cuma cosasila kululu, kwamene akawalala angafwikeko lini koma soti ajeyeye angaononge lini. 34 Cifukwa kuli cuma canu, nayo mitima yanu niye kwayunkhala.
35 “Vwalani nonkhala okonzeka ndipo malambi yanu yankhale yoyaka. 36 Munkhale monga ni ŵanthu amene oyembekezela ambuye ŵao kuti awele kufumila ku ukwati, kuti akafwika nogogoda aŵasegulile kamangu. 37 Osangalala ni akopolo amene ambuye ŵao powela aŵapeze kuti ali menso. Kulaŵila cendi, nukuuzhyani kuti yove akavwale vovwala kuti ayambe kuŵatumikila ndipo akaŵauzhye kuti alye naye pa thebo noŵatumikila. 38 Ove akankhale osangalala ngati akaŵapeze oyembekezela olo ngati angafwike pa ulonda waciŵili* olo pa ulonda wacitatu.* 39 Koma ziŵani izi, ngati mwineco wa ng’anda angaziŵe nthawi yaangawelelemo kawalala, angalole lini kuti athyole noloŵa m’ng’anda mwake. 40 Namwe nkhalani wokonzeka, cifukwa Mwana wa munthu akawele pa awa yamene muiganizilako lini.”
41 Pavuli pake, Petulo ekonsha kuti: “Ambuye, kansi muuzhya seo tyala fanizo iyi kapena muuzhya aliyense?” 42 Ambuye elaŵila kuti: “Kansi ni ŵani makamaka wamene ni mtumiki woyanganila ng’anda wokhulupilika koma soti wanzelu, wamene ambuye ŵake akamuike kuti akoyanganila gulu ya anchito ŵake na kuti akoŵapasa cakulya cokwanila pa nthawi yoyenelela? 43 Kapolo uyu akankhale wosangalala ngati pati akawele ambuye ŵake akamupeze kuti ocita zamene izi. 44 Kulaŵila cendi, nukuuzhyani kuti akamuike kunkhala woyanganila vinthu vake vonse. 45 Koma ngati kapolo uyu angalaŵile mu mtima mwake kuti, ‘Ambuye ŵangu ocelwa kuwela’ noyamba kuniata anchito ayake analume na anakazi koma soti kulya, kumwa nokolwa, 46 ambuye ŵa kapolo uyu akawele pa siku yamene oiyembekezela lini koma soti pa awa yaasaziŵa. Ndipo akamupase cilango cikulu nomuika pamozi na ŵanthu osakhulupilika. 47 Tetyo, kapolo wamene uyo, wamene eziŵa veenzofuna ambuye ŵake koma aliyokonzekele kuwela kwao olo kucita vecimuuzhya, akakwapuliwe vikoti vinyinji. 48 Koma wamene aliyoziŵe ndipo ecita vinthu vamene vemucitisha kunkhala woyenelela kuti akwapuliwe, akakwapuliwe vikoti vitontho. Eee, aliyense wamene epasiwa vinyinji, vinyinji vikafuniwe kufumila kuli yove. Ndipo aliyense wamene eikiwa kuti akoyanganila vinthu vinyinji, ŵanthu akafune vinthu vinyinji kufumila kuli yove.
49 “Newela kuzoyasha mulilo pa calo. Lomba ngati mulilo uyu wayaka kale, ningafune soti cinji? 50 Kulaŵila cendi, pali ubatizo wanufunika kubatiziwa nao, ndipo nuvutika ngako mu mtima mpaka pati ukacitike. 51 Kansi muganiza kuti newela kuzoleta mtendele pa calo? Yai. Nukuuzhyani kuti newela kuzogaŵanisha ŵanthu. 52 Cifukwa kufumila lomba kuluta msogolo, m’ng’anda imozi mukankhale ŵanthu 5 osiyana maganizo. Atatu akosushana na aŵili ndipo aŵili akosushana na atatu. 53 Ove akagaŵikane, atata akokangana na mwana wao munalume ndipo mwana munalume akokangana na ausuwake. Amama akokangana na mwana wao munakazi ndipo mwana munakazi akokangana na amai ŵake. Apongozi anakazi akokangana na mpongozi wao munakazi ndipo munakazi wolunguliwa akokangana na apongozi ŵake anakazi.”
54 Pavuli pake, euzhya soti gulu ya ŵanthu kuti: “Mukaona mkumbi wanyamuka ca ku m’cingulo, nthawi yamene iyo mulaŵila kuti, ‘Kukuza cimvula,’ ndipo cuwela cendi. 55 Ndipo mukaona mphepo ya ku m’mwela yakuntha, mulaŵila kuti, ‘Lelo kupye ngako,’ ndipo zucitika cendi. 56 Mweo ŵanthu acinyengo! Muziŵa kuzindikila maonekedwe a calo na kululu. Nanga mukangiwa tyani kuzindikila tanthauzo ya zucitika pa nthawi ino? 57 Ndaŵa yanji pamweka mukwanisha lini soti kuzindikila vinthu vamene ni volungama? 58 Mwacisanzo, ngati ukuya kuli wolamulila na munthu wokuimba mlandu, pamuli m’njila, ukoyesayesa kucitapo kanthu kuti usilizhye mlandu uyo. Ukocita izi kuti asakupeleke kuli woweluza, na kuti woweluza asakupeleke m’manja mwa msoja wa pa khoti koma soti kuti msoja asakuike m’jele. 59 Kulaŵila cendi, nukuuzhya kuti akakulole lini kuti ucoke m’jele mpaka ukalipile kakoini kosilizhyila.”*