Uthenga Wabwino Wolembewa na Maliko
12 Pavuli pake, eyamba kulaŵila nao poseŵenzesha mafanizo kuti: “Munthu muyakine ekomola mpesa m’munda mwake noucingilila na mpanda. Ekumba soti cisengu copondelamo mphesa nomanga nsanja. Pavuli pake, esiya munda uyu m’manja mwa alimi noluta ku calo ciyakine. 2 Nthawi yowezhya peyekwana, yove etumizhya kapolo wake kuli alimi aŵa kuti akatoleko viyakine mwa vipaso va m’munda wa mpesa. 3 Koma ove emukata nomuniata ndipo emuzhyosha cimanjamanja. 4 Pavuli pake, yove etuma soti kapolo muyakine koma ove emutema m’mutu nomucita vinthu vacipongwe. 5 Etuma soti muyakine ndipo ove emupaya. Pavuli pa izi, etuma soti akapolo ayakine anyinji, koma ayakine eŵaniata ndipo ayakine eŵapaya. 6 Tetyo, esala na munthu m’mozi wakuti atume. Munthu uyu enze mwana wake wokondeka. Ndipo etuma mwana uyu nolaŵila kuti, ‘Mwana wangu akamulemekeze.’ 7 Koma alimi ŵala eyamba kuuzhyana kuti, ‘Uyu niye wati akalandile coloŵa. Welani, tiyeni timupaye kuti coloŵa cake cinkhale casu.’ 8 Tetyo, emukata nomupaya ndipo emuponya kunja kwa munda wa mpesa. 9 Kansi mwineco wa munda wa mpesa akacite cinji? Akawele nopaya alimi aŵa ndipo akapeleke munda uyu kuli alimi ayakine. 10 Kansi muliyoŵelenge lemba yukamba kuti: ‘Mwala wamene ŵanthu omanga ng’anda eukana, wankhala mwala wofunika ngako wapakona,* 11 na kuti mwala uyu wefumila kwa Yehova ndipo ni wocitisha cidwi m’menso mwasu’?”
12 Peecimvwa izi, enzofuna kumukata cifukwa enzoziŵa kuti yove enzolaŵila fanizo iyi ponena za ove. Koma cifukwa coyopa ŵanthu, emusiya noluta.
13 Pavuli pake, ove etuma Afarisi ayakine koma soti okonkha a Herode kuti alute kuli Yesu na colinga cakuti amupeze na mlandu kupitila m’zokamba zake. 14 Pecifwika kuli Yesu, ove ekamba kuti: “Mphunzisi, tuziŵa kuti mulaŵila cendi ndipo mucita lini vinthu, tyala kuti mukondweleshe ŵanthu cifukwa muona lini maonekedwe akunja a ŵanthu. Koma muphunzisa njila ya Mulungu m’cendi. Kansi n’zololeka kupeleka msonkho kwa Kaisara kapena yai?” 15 Yesu pecizindikila cinyengo cao, eŵauzhya kuti: “Ndaŵa yanji muniyesa? Letani kuno kakoini ka dinari kuti nikaone.” 16 Ove emutwalila kakoini kala ka dinari ndipo eŵakonsha kuti: “Kansi cithunzithunzi na mau ali pa kakoini aka ni va ŵani?” Ove emuyankha kuti: “Ni va Kaisara.” 17 Pavuli pake, Yesu eŵauzhya kuti: “Mukotwala vinthu va Kaisara kwa Kaisara, koma va Mulungu mukotwala kwa Mulungu.” Ndipo ove edabwa ngako.
18 Pavuli pake, Asaduki amene enzokhulupilila kuti kuliye ciukililo eluta kuli yove nomukonsha kuti: 19 “Mphunzisi, Mose elemba m’Cilamulo kuti, ngati munthu wamwalila ndipo wasiya mkazi wake akaliyovyalamo mwana, mkwake wa munthu wamene emwalila ofunika kulungula munakazi wawasiya kuti amuvyalile ŵana. 20 Lomba penze analume 7 amene enze pokwao. Woyamba, elungula koma emwalila akaliyonkhala na ŵana. 21 Waciŵili elungula soti munakazi uyu koma naye emwalila akaliyonkhala na ŵana. Ndipo izi niye zecitikila soti wacitatu. 22 Onse analume 7 emwalila akaliyonkhala na ŵana. Ndipo posilizhyila pake, naye munakazi emwalila. 23 Pofwana kuti analume onse 7 aŵa enze emulungulapo, kansi munakazi ula akankhale wa ŵani pavuli pakuti ŵanthu akufwa aukishiwa?” 24 Yesu eŵayankha kuti: “Pali mfundo iyakine yamusamvwisha pa nkhani iyi, cifukwa muziŵa lini Malemba olo mphamvu ya Mulungu. 25 Cifukwa akufwa akayoukishiwa, analume akalungule lini ndipo anakazi akalunguliwe lini, koma onse akankhale monga ni angelo a kululu. 26 Koma ponena za kuukishiwa kwa ŵanthu ecifwa, kansi muliyoŵelenge m’buku yecilemba Mose nkhani yokhuza zecitika pa kamuti ka minga, pamene Mulungu ekamba kuti: ‘Neo n’ne Mulungu wa Abulahamu, Mulungu wa Isaki na Mulungu wa Yakobo’? 27 Mulakwisa ngako. Yove ni Mulungu wa ŵanthu amoyo osati akufwa.”
28 M’mozi mwa alembi wamene enze ewela ku malo uku, enzomvwishila apo n’kuti okambilana. Yove peecimvwa kuti Yesu waŵafotokozela bwino Asaduki aŵa, emukonsha kuti: “Kansi lamulo yoyamba* pa malamulo yonse ni yotyani?” 29 Yesu eyankha kuti: “Yoyamba ni yakuti, ‘Mvwani mweo Aisiraeli, Yehova Mulungu wasu ni Yehova m’mozi. 30 Ndipo mukokonda Yehova Mulungu wanu na mtima wanu wonse, moyo wanu wonse, maganizo ŵanu onse na mphamvu zanu zonse.’ 31 Yaciŵili ni yakuti, ‘Ukokonda muyako monga ni mwauzikondela weka.’ Paliye lamulo iyakine ikulu kupambana malamulo aya.” 32 Mlembi ula euzhya Yesu kuti: “Mphunzisi, zamwalaŵila n’zacendi ngako, ‘Yove ni m’mozi ndipo paliye muyakine kupatulapo yove.’ 33 Ndipo kumukonda na mtima wasu wonse, maganizo ŵasu onse na mphamvu zasu zonse koma soti kukonda muyako monga ni mwauzikondela weka, niye vofunika ngako kupambana nsembe zoshoka zamphumbulu na nsembe ziyakine.” 34 Yesu peecimvwa kuti mlembi uyu wayankha mwanzelu, emuuzhya kuti: “Uli lini kutali na Ufumu wa Mulungu.” Kufumila pa siku iyi kuliye aliyense enzomukonsha makonsho.
35 Yesu pecipitilizhya kuphunzisa m’kacisi, eŵakonsha kuti: “Ndaŵa yanji alembi olaŵila kuti Khristu ni mwana wa Davide? 36 Kupitila mwa mzimu utuŵa, Davide elaŵila kuti, ‘Yehova euzhya Ambuye ŵangu kuti: “Nkhala ku kwanja yangu yamalendi mpaka pati nikaike adani ŵako pansi pa mendo yako.”’ 37 Lomba ngati Davide omuita kuti Ambuye, kansi zukwanishika tyani kuti ankhale mwana wake?”
Ndipo gulu ikulu ya ŵanthu yenzomumvwishila mosangalala. 38 Yesu peenzophunzisa, epitilizhya kulaŵila kuti: “Samalani na alembi amene okonda kuyendayenda apo n’kuti avwala mikhanjo ndipo ofuna kuti ŵanthu akoŵapasa moni m’mamaketi. 39 Okonda kunkhala pa mipando ya kusogolo m’masunagoge koma soti okonda malo apalulu ngako pakulya cakulya ca m’cingulo. 40 Ove olonda anakazi amasiye mang’anda ndipo opeleka mapemphelo atali-atali pofuna kuzioneshela. Ŵanthu aŵa akalandile ciweluzo coŵaŵa ngako.”
41 Pavuli pake, Yesu enkhala pa malo pamene enzokwanisha kuona kabokosi koponyamo zopeleka. Yove eyamba kuona mwamene gulu ya ŵanthu yenzoponyela ndalama mu kabokosi aka. Ndipo ŵanthu anyinji olemela enzoponyamo makoini anyinji. 42 Tetyo, kwewela munakazi wamasiye wamene enze wosauka ndipo eponyamo tumakoini tuŵili tuliye mphamvu. 43 Pavuli pake, Yesu eita ophunzila ŵake noŵauzhya kuti: “Kulaŵila cendi, nukuuzhyani kuti munakazi uyu wosauka, waponyamo ndalama zinyinji kupambana ŵanthu onse amene aponya ndalama mu kabokosi koponyamo zopeleka. 44 Zili teti cifukwa ndalama zaaponya ŵanthu onse aŵa, azicosa pa ndalama zinyinji zaali nazo. Koma munakazi uyu wosauka wapeleka zonse zaali nazo zamene sembe zamuyavya pa umoyo wake.”