Uthenga Wabwino Wolembewa na Mateyo
11 Yesu pecisilizhya kupeleka malangizo kuli ophunzila ŵake 12, ecoka ku malo uku noluta kuyophunzisa nolalikila mu mizinda iyakine.
2 Koma Yohane peenze m’jele, ecimvwa nchito zeenzocita Khristu. Tetyo, etuma ophunzila ŵake 3 kuyomukonsha kuti: “Kansi Mesiya watuyembekezela ni mweo olo ni mweo lini?” 4 Yesu eŵayankha kuti: “Nkhoyani mukauzhye Yohane zamukumvwa na zamuona. 5 Ŵanthu amene enzololesha lini, ololesha lomba, amene enze olemala, oyenda, amene enze akhate, otuŵishiwa, amene enze agonthi, akumvwa, amene enze ecifwa, oukishiwa ndipo ŵanthu osauka ophunzisiwa uthenga wabwino. 6 Wosangalala ni munthu wamene opeza lini cokhumudwisha muli neo.”
7 Ophunzila a Yohane peenzowelela, Yesu eyamba kuuzhya gulu ya ŵanthu zokhuza Yohane kuti: “Kansi mwenze mweluta kuyoona cinji m’cipululu? Kansi mwenze mweciyoona tete yokankhiwa na mphepo? 8 Lomba kansi mwenze mweciyoona cinji? Kansi mwenze mweciyoona munthu wovwala vovwala vapalulu? Yai. Ŵanthu amene ovwala vovwala vapalulu opezeka m’mang’anda yacifumu. 9 Lomba ndaŵa yanji mwenze mweluta m’cipululu? Kansi mweciyoona mneneli? Eee, nukuuzhyani kuti Yohane opambana pa uneneli. 10 Ponena za yove, Malemba ekamba kuti: ‘Ona! Nukutumizhyila mthenga pasogolo pako,* kuti akakukonzele njila.’ 11 Kulaŵila cendi, nukuuzhyani kuti pa ŵanthu onse, paliye mkulu kupambana Yohane M’batizi. Koma mtontho mu Ufumu wa kululu ni mkulu pali yove. 12 Kufumila m’masiku a Yohane M’batizi mpaka lomba, ŵanthu ankhala oyesayesa kupeza mwai woloŵa mu Ufumu wa kululu ndipo ŵala amene oyesayesa mwakhama okwanisha kuupeza. 13 Cifukwa mau yonse ya aneneli na Cilamulo, zefotokozelatu zinthu zamene zenze kuzocitika mpaka kufwika m’nthawi ya Yohane. 14 Kaya mukhulupilila olo yai, Yohane niye Eliya wecilaŵila aneneli kuti akawele. 15 Ali na matu amvwe.
16 Kansi m’badwo uyu niulinganizhye na ŵani? Uli monga ni ŵana amene ankhala m’mamaketi ndipo okuwilila ayao 17 kuti: ‘Tekulizhyilani citolilo, koma muliyovine. Telila mokuwa, koma muliyoziniate pa nganga cifukwa ca cisoni.’ 18 Molingana na izi, Yohane ewela ndipo enzokulya lini olo kumwa, koma ŵanthu enzolaŵila kuti, ‘Ali na ciŵanda.’ 19 Mwana wa munthu ewela ndipo akulya na kumwa koma ŵanthu olaŵila kuti, ‘Onani! Munthu wokonda kulya na kumwa waini, shamwali wa osonkhesha misonkho na ŵanthu ocimwa.’ Mulimonse mwazilili, nzelu yusimikizhyilika kuti ni yolungama* cifukwa ca nchito zake.”*
20 Pavuli pake, eyamba kuzuzula mizinda mwamene yove ecita ngako nchito zake zamphamvu cifukwa iliyolape. Elaŵila kuti: 21 Soka kuli weo Korazini! Soka kuli weo Betisaida! Cifukwa nchito zamphamvu zamene zecitikila muli weo kuti zecitikila ku Turo na Sidoni, sembe ŵanthu a m’mizinda iyi elapa kale-kale mwa kuvwala masaka a kotoni nonkhala pa milota. 22 Koma nukuuzhyani kuti cilango canu cikankhale coŵaŵa ngako kupambana ca Turo na Sidoni pa Siku ya Ciweluzo. 23 Weo Kaperenao, kansi uganiza kuti ukakwele mpaka kululu? Yai, ukalute ku Manda.* Cifukwa nchito zamphamvu zecitikila muli weo kuti zecitikila ku Sodomu, sembe mzinda wa Sodomu ukalipo mpaka lelo. 24 Koma nukuuzhyani kuti cilango ca Kaperenao cikankhale coŵaŵa ngako kupambana ca Sodomu pa Siku ya Ciweluzo.”
25 Pa nthawi iyi, Yesu elaŵila kuti: “Nukutamandani pamenso pa ŵanthu mweo Atata, Ambuye a kululu na pa calo, cifukwa mwafisa vinthu ivi kuli ŵanthu anzelu na ozindikila ndipo mwaviulula kuli ŵana. 26 Eee Atata, cifukwa mwevomelezhya kuti vinthu ivi vicitike. 27 Atata apeleka vinthu vonse kuli neo ndipo paliye aliyense wamene omuziŵa bwino Mwana koma ni Atata tyala. Koma soti paliye aliyense wamene oŵaziŵa bwino Atata koma ni Mwana tyala na aliyense wamene Mwana wamene uyo wafuna kumuululila za Atata amene ao. 28 Welani kuli neo mweo monse amene mukata nchito yoŵeŵesha na olemewa ndipo nikusisimuleni. 29 Nyamulani joko yangu ndipo lolani kuti nikuphunziseni cifukwa n’ne wofasa koma soti wolicefya ndipo musisimuliwe. 30 Cifukwa joko yangu ni yosavuta kunyamula ndipo katundu wangu ni upepu.”