Uthenga Wabwino Wolembewa na Luka
6 Siku iyakine pa Sabata, Yesu peenzopita m’minda ya witi, ophunzila ŵake enzothyola ngalangala za witi, kuzifikisa m’manja mwao na kulya. 2 Afarisi ayakine peciona izi eŵakonsha kuti: “Ndaŵa yanji mucita vinthu vamene ni vosaloleka pa Sabata?” 3 Yesu eŵayankha kuti: “Kansi muliyoŵelenge zecicita Davide, yove na masoja ŵake peecimvwa njala? 4 Yove eloŵa m’ng’anda ya Mulungu nolandila mabuledi yacioneselo ndipo ecilya nopasako analume ŵeenze nao, zamene paliye enzololewa kulya koma tyala ansembe. Kansi muliyoŵelenge izi?” 5 Pavuli pake eŵauzhya kuti: “Mwana wa munthu ni Ambuye a Sabata.”
6 Pa Sabata iyakine soti, yove eloŵa m’sunagoge noyamba kuphunzisa. Mwamene umo, mwenze munthu muyakine wolemala kwanja yamalendi. 7 Alembi na Afarisi enzomuloleshesha kuti aone ngati apoleshe munthu uyu pa siku ya Sabata na colinga cakuti amupeze na mlandu. 8 Koma yove eziŵa zeenzoganiza. Tetyo euzhya munthu wolemala kwanja kuti: “Nyamuka ndipo uwele pakati.” Munthu ula enyamuka noluta kuyopanama pakati. 9 Pavuli pake, Yesu eŵakonsha kuti: “Kansi malamulo olola kucita cinji pa Sabata, cabwino kapena ciipa, kupulumusa moyo kapena kupaya?” 10 Pavuli poŵalolesha onse, Yesu euzhya munthu wolemala kwanja kuti: “Tambulula kwanja yako.” Yove eitambulula ndipo yenkhala bwino. 11 Koma ove ekalipa ngako ndipo eyamba kukambilana zati amucite Yesu.
12 Siku iyakine m’masiku amene ao, Yesu eluta ku lupili kuti akapemphele ndipo ecezela usiku wonse kupemphela kwa Mulungu. 13 Pavuli pakuti kwaca, yove eita ophunzila ŵake nosankhapo ali 12 amene eŵapasa zina yakuti atumwi. 14 Yove esankha Simoni wamene emupasa soti zina yakuti Petulo, Andireya mkwake wa Simoni, Yakobo, Yohane, Filipo, Batolomeyo, 15 Mateyo, Thomasi, Yakobo mwana wa Alifeyo na Simoni wamene enzoitiwa kuti “wacangu.” 16 Esankha soti Yudasi mwana wa Yakobo na Yudasi Isikariyoti wamene pavuli pake emupeleka.
17 Pavuli pake, eseluka nao na kuyopanama pa malo afulati. Pamene apo, penze gulu ikulu ya ophunzila ŵake. Penze soti gulu ikulu ya ŵanthu ofumila ku Yudeya konse na ku Yerusalemu konse koma soti ku madela a m’mbali mwa nyanja a ku Turo na Sidoni. Onse aŵa ewela kuti azemumvwishile koma soti kuti aŵapoleshe ku matenda ŵao. 18 Olo ŵala amene enzovutishiwa na mizimu iipa, epoleshewa. 19 Gulu yonse ya ŵanthu aŵa yenzoyesayesa kuti imukateko cifukwa mphamvu yenzocoka muli yove noŵapolesha onse.
20 Pavuli pake, elolesha ophunzila ŵake ndipo eyamba kuŵauzhya kuti:
“Nimwe osangalala mweo ŵanthu osauka cifukwa Ufumu wa Mulungu ni wanu.
21 “Nimwe osangalala mweo ŵanthu amene mukumvwa njala pali lomba cifukwa mukakute.
“Nimwe osangalala mweo ŵanthu amene mulila cifukwa mukaseke.
22 “Nimwe osangalala ngati ŵanthu okuzondani, okuoneshani sankho, okunyozani koma soti kukuipishilani mbili cifukwa ca Mwana wa munthu. 23 Kondwelani pa siku yamene iyo ndipo lumphani mokondwela cifukwa mphoto yanu ni ikulu kululu cifukwa vinthu ivi niye soti vamene makolo ŵao akale enzocitila aneneli.
24 “Koma soka kuli mweo amene muli na cuma cifukwa mulandililatu vinthu vonse vamene vukusangalasani.
25 “Soka kuli mweo amene mukuta pali lomba cifukwa mukamvwe njala.
“Soka kuli mweo amene museka pali lomba cifukwa mukankhale na cisoni koma soti mukalile.
26 “Muli na soka ngati ŵanthu onse olaŵila vabwino vokhuza mweo cifukwa izi niye soti zamene makolo ŵao akale enzocitila aneneli awenye.
27 “Koma mweo amene mumvwishila, nukuuzhyani kuti: Pitilizhyani kukonda adani ŵanu nocitila vinthu vabwino ŵanthu amene okuzondani. 28 Pitilizhyani kudalisa ŵanthu amene okutembelelani nopemphelela ŵala amene okunyozani. 29 Munthu akakuchayani mbama ku mbovu, mukomupasa soti mbali iyakine. Akakulondani covwala canu cakunja, osati mukomulesha kutola soti camkati. 30 Munthu akakusengani kanthu, mukomupasa ndipo aliyense wotola vinthu vanu osati mukomukakamizhya kuti awezhye.
31 “Kuyangizhyila apo, vinthu vonse vamufuna kuti ŵanthu akucitileni, namwe mukoŵacitila vamene ivo.
32 “Ngati mukonda tyala ŵanthu amene okukondani, kansi pali phindu yanji? Cifukwa olo ŵanthu ocimwa okonda tyala ŵala amene oŵakonda. 33 Ndipo ngati mucitila tyala zinthu zabwino ŵala amene okucitilani zinthu zabwino, kansi pali phindu yanji? Cifukwa olo ŵanthu ocimwa ocita zamene izo. 34 Kuyangizhyila apo, ngati mukongolesha* tyala ŵala amene muyembekezela kuti akuwezhyeleni, kansi mupindulapo cinji? Cifukwa olo ŵanthu ocimwa okongolesha ocimwa ayao na colinga cakuti akaŵawezhyele. 35 Mosiyana na izi, pitilizhyani kukonda adani ŵanu. Pitilizhyani kucita zabwino nokongolesha ayakine cosayembekezela kulandila kalikonse. Mukacita izi, mphoto yanu ikankhale ikulu. Ndipo mukankhale ŵana ŵa Wapalulu Ngako cifukwa yove ni muweme mtima kuli ŵanthu osayamikila koma soti aipa. 36 Pitilizhyani kunkhala acifundo molingana na Ausuwanu amene ni acifundo.
37 “Kuyangizhyila apo, lekani kuweluza ayakine kuti namwe musaweluziwe. Ndipo lekani kupasa milandu ŵanthu ayakine kuti namwe musapasiwe milandu. Pitilizhyani kukhululukila ŵanthu ayakine ndipo namwe akukhululukileni. 38 Mukopasa ayakine ndipo namwe akupaseni. Akukhutulileni m’mathumba ŵanu mpimo wabwino, wosindila, wozula bwino koma soti wombwezhya. Cifukwa mpimo wamupimilamo ayakine, namwe akakupimileni wamene uyo.”
39 Pavuli pake, eŵauzhya soti fanizo kuti: “Kansi mphofu ingasogolele mphofu iyake? Ngati ingacite izi, kansi onse angaponele lini m’cisengu? 40 Wophunzila opambana lini mphunzisi wake koma aliyense wamene waphunzisiwa bwino, alingane na mphunzisi wake. 41 Lomba ndaŵa yanji ulolesha ciswaswa cili mu linso ya mkwako nokangiwa kuona nsondo ya ng’anda ili mu linso yako? 42 Kansi ungauzhye tyani mkwako kuti, ‘Weo mkwangu, leka nikucose ciswaswa cili mu linso yako,’ pamene ukwanisha lini kuona nsondo ya ng’anda ili mu linso yako? Weo munthu wacinyengo, coyamba cosa nsondo ya ng’anda ili mu linso yako, kuti uone bwino mwaungacosele ciswaswa cili mu linso ya mkwako.
43 “Cimuti cabwino cingatwale lini vipaso viipa, ndipo cimuti ciipa cingatwale lini vipaso vabwino. 44 Cifukwa cimuti ciliconse cuziŵika na vipaso vake. Mwacisanzo, ŵanthu othyola lini nkhuyu mu cimuti ca minga kapena kutenda mphesa mu kamuti ka minga. 45 Munthu wabwino ofumya vinthu vabwino kufumila mu cuma cake cabwino ca mu mtima mwake, koma munthu muipa ofumya vinthu viipa kufumila mu cuma cake ciipa. Cifukwa pakamwa polaŵila zufwalukila mu mtima.
46 “Lomba ndaŵa yanji muniita kuti ‘Ambuye! Ambuye!’ koma mucita lini zanukamba? 47 Aliyense wamene akuza kuli neo nokumvwa mau ŵangu nocita zawamvwa, nikuuzhyeni wakulingana naye: 48 Olingana na munthu wamene pomanga ng’anda, ekumba ngako nomanga faundeshoni yake pa mwala. M’mana pewesefukila, manzi yechaya ng’anda iyi, koma yaliyokwanishe kuinyang’anyisha cifukwa cakuti eimanga bwino. 49 Ndipo munthu wamene akumvwa mau koma osacitapo kanthu, ali monga ni munthu wamene emanga ng’anda pa lito, paliye faundeshoni. M’mana pewesefukila, manzi yechaya ng’anda iyi ndipo nthawi yamene iyo, yepona. Ndipo kuonongeka kwake kwenze kukulu ngako.”